በጂንካ ከተማ የጎዳና ላይ ሩጫ ውድድር ተካሄደ

ኅዳር 28/2017 (ኤፍ ኤም ሲ) በአሪ ዞን ጂንካ ከተማ ታዋቂ አትሌቶች የተሳተፉበት የስምንት ኪሎ ሜትር የጎዳና ላይ ሩጫ ውድድር ተካሄደ።

ታህሳስ 1 ቀን 2017 ዓ.ም የሚከበረውን የአሪ ህዝብ የዘመን መለወጫ “የድሽታ ግና'' በዓልን እና የኢትዮጵያ ብሔሮች፣ ብሔረሰቦች እና ህዝቦች ቀንን ምክንያት በማድረግ በተካሄደው የስምንት ኪሎ ሜትር ሩጫ ውድድር ላይ በርካታ የከተማው ነዋሪዎች፣ ከተለያየ አካባቢ የመጡ እንግዶች እና አትሌቶች ተሳትፈዋል።

የአሪ ዞን አስተዳደር ከፋን ኢትዮጵያ ጋር በጋራ በመሆን ያዘጋጀው የሩጫ ውድድር "ታላቁ ሩጫ ለድሽታ ግና፤ ለሰላም እና አንድነት እሮጣለሁ!" በሚል መሪ ሀሳብ መካሄዱን ኢዜአ ዘግቧል።

በመርኃ ግብሩ ላይ አትሌት ፋንቱ ሚጌሶን ጨምሮ ሌሎች አትሌቶች እና የመንግስት የስራ ኃላፊዎች፣ ተፅእኖ ፈጣሪ ሰዎች እንዲሁም አርቲስቶች ታድመዋል።

የኦሮሚያ ክልል መንግስትና የኦሮሞ ነፃነት ሠራዊት ስምምነት ሁሉንም ተጠቃሚ የሚያደርግ ነው - የሰላም ሚኒስቴር

ኅዳር 22/2017 (አዲስ ዋልታ) በኦሮሚያ ክልል መንግስትና የኦሮሞ ነፃነት ሠራዊት መካከል የተካሄደው ስምምነት ሁሉንም ተጠቃሚ የሚያደርግ መንገድ መሆኑን የሰላም ሚኒስቴር አስታወቀ።

በኦሮሚያ ክልል መንግሥት እና የኦሮሞ ነፃነት ሠራዊት ከፍተኛ አመራር የሰላም ስምምነት መፈራረሙ ለሀገራችን ዘላቂና አዎንታዊ ሰላም መረጋገጥ ከፍተኛ ሚና እንደሚጫወት ሚኒስቴሩ ባወጣው መግለጫ አመልክቷል።

በኦሮሚያ ክልል ርዕሰ መስተዳድር ሽመልስ አብዲሳ እና የኦሮሞ ነፃነት ሠራዊት ከፍተኛ አመራር ጃል ሰኚ ነጋሳ መካከል የተካሄደው የሰላም ስምምነት እጅግ የሚደነቅ መሆኑንም ገልጿል።

ሂደቱ የሰላም መንገድ ሌላ አማራጭ የሌለው ሁሉንም ተጠቃሚ የሚያደርግ መንገድ መሆኑን የሚያመለክት ነው ሲልም ጠቁሟል።

የኦሮሞ ህዝብ በተደጋጋሚ ላደረገው የሰላም ጥሪ ተገቢ ምላሽ በመስጠትና በመቀበል የተደረገው የሰላም ስምምነት ለዘላቂና አዎንታዊ ሰላም መረጋገጥ አበርክቶ ያለው በመሆኑ ሚኒስቴሩ በአድናቆት የሚመለከተው መሆኑን አመልክቷል።

በተለያዩ የሀገሪቱ ክፍሎች ልዩነቶችን በዘመናዊ መንገድ በውይይትና በሰላም ለመፍታት የሚደረጉ መሰል ጥረቶች ሁሉ እንዲሳኩ የበኩሉን ሚና እንደሚጫወትም አረጋግጧል።

ቻይና አሜሪካ ለታይዋን የፈቀደችውን የጦር መሳሪያ ሽያጭ ተቃወመች
ኅዳር 22/2017 (አዲስ ዋልታ) ቻይና አሜሪካ ለታይዋን የፈቀደችውን የጦር መሳሪያ ሽያጭ የአንድ ቻይናን መርህን የሚጥስ ነው ስትል ድርጊቱን በጽኑ ተቃውማለች።

በትላንትናው ዕለት አሜሪካ ለታይዋን 385 ሚሊዮን ዶላር የሚገመት የጦር መሳሪያ ሽያጭ አጽድቃለች።

ይህን ተከትሎ የቻይና ውጭ ጉዳይ ሚኒስቴር ቃል አቀባይ "አሜሪካ የቻይና ግዛት ለሆነችው ታይዋን የምትሸጠው የጦር መሳሪያ የአንድ ቻይናን መርህ እና ሦስቱን የቻይና እና የአሜሪካ የጋራ መግለጫዎችን በተለይም የቻይናን ሉዓላዊነትና የጸጥታ ጥቅም የሚጎዳ ነው" ሲሉ ተናግረዋል።

የጦር መሳሪያ ሽያጩ ለታይዋን ነጻነት እንታገላለን ለሚሉ ኃይሎች "የተሳሳተ መልዕክት" የሚልክ እና የአሜሪካ-ቻይና ግንኙነትን የሚያዳክም ነው ሲሉም አክለዋል።

አሜሪካ ታይዋንን ማስታጠቁን በአስቸኳይ እንድታቆም አስጥንቅቀው ቻይና ሂደቱን በቅርብ እንደምትከታተል እና የቻይናን ሉዓላዊነትና የግዛት አንድነት ለመጠበቅ ቆራጥ እና ጠንካራ እርምጃዎችን እንደምትወስድ መናገራቸውን ዢንዋ ዘግቧል።

ቻይና አና ታይዋን ረጅም ጊዜ የቆየ የሉዓላዊነት ውዝግብ ያለባቸው ሲሆን ቻይና ታይዋንን ህጋዊ የግዛቷ አካል አድርጋ ትቆጥራለች።

በኦሮሚያ ክልል መንግስትና በኦሮሞ ነፃነት ሰራዊት መካከል የተፈረመው ስምምነት ሊበረታታ የሚገባው ነው - የብልፅግና ፓርቲ ምክትል ፕሬዝዳንት አደም ፋራህ
ኅዳር 22/2017 (አዲስ ዋልታ) በኦሮሚያ ክልል መንግስት እና በኦሮሞ ነፃነት ሰራዊት ክንፍ መካከል የተፈረመው የሰላም ስምምነት እጅግ ሊበረታታ የሚገባው ነው ሲሉ በምክትል ጠቅላይ ሚኒስትር ማዕረግ የዴሞክራሲ ስርዓት ግንባታ ማስተባበሪያ ማዕከል ኃላፊና የብልፅግና ፓርቲ ምክትል ፕሬዝዳንት አደም ፋራህ ገለጹ።

በኦሮሚያ ብሔራዊ ክልላዊ መንግስት እና በኦሮሞ ነፃነት ሰራዊት ክንፍ ከፍተኛ አመራር ጃል ሰኚ ነጋሳ መካከል በዛሬው ዕለት የሰላም ስምምነት ተፈርሟል።

የስምምነቱን መፈረም አስመልክቶ የብልፅግና ፓርቲ ምክትል ፕሬዝዳንት አደም ፋራህ በማህበራዊ ትስስር ባስተላለፉት መልዕክት ስምምነቱ እጅግ ሊበረታታ የሚገባውና እንደ ሀገር ዘላቂ ሰላም ለማረጋገጥ ለምናደርገው ጥረት ከፍተኛ አስተዋጽዖ የሚያበረክት ነው ብለዋል።

እንደ ብልፅግና ፓርቲ ሰላም ሁለንተናዊ ብልፅግናን ለማረጋገጥ ወሳኝ መሆኑን ተገንዝበን ራሳችንን ለንግግር፣ ለድርድር እና ለትብብር ክፍት አድርገናል ሲሉም ገልጸዋል።

ህብረተሰቡ በተደጋጋሚ የሚያቀርባቸው የህግ የበላይነት መከበር ጥያቄዎች በምሉዕነት እንዲመለሱ ለማድረግም የተጀመሩ ተስፋ ሰጪ ጥረቶችን ይበልጥ አጠናክሮ መሄድ እንደሚገባ የፓርቲው እምነት መሆኑን አመልክተዋል።
👇👇
https://web.facebook.com/wmccwaltamediaandcommunicationcorporate/posts/pfbid02H957kyMWQgKAszrxEFjo7CecnCfLizGLKTzDcRX9LFEhAPiYK93reMEpzb4TkmK6l

ማንችስተር ዩናይትድ በአዲሱ አሰልጣኝ ነጥብ ጣለ

ኅዳር 15/2017 (አዲስ ዋልታ) ሩበን አሞሬዬም በመጀመሪያ የማንችስተር ዩናይትድ አሰልጣኝነት ጨዋታው ነጥብ ጣለ።

ማንችስተር ምሽት 1 ከ30 ላይ ከኤፕስዊች ታውን ጋር ያደረገውን ጨዋታ 1 ለ 1 ተለያይቷል።

ውጤቱን ተከትሎ ቡድኑ በ16 ነጥቦች በሊጉ የደረጃ ሰንጠረዥ ላይ 12 ደረጃ ላይ ተቀምጧል።

ሌስተር ሲቲ አሰልጣኙን ስቲቭ ኩፐርን አሰናበተ

ኅዳር 15/2017 (አዲስ ዋልታ) ሌስተር ሲቲ እ.ኤ.አ ከሰኔ 2024 ጀምሮ በ3 ዓመት ኮንትራት ቀጥሯቸው የነበሩትን አሰልጣኝ ስቲቭ ኩፐርን ከኃላፊነት አሰናበተ።

የ44 ዓመቱ ስቲቭ ኩፐር ሌስተርን ለ5 ወራት በአሰልጣኝነት መርተው ቡድኑ በደረጃ ሰንጠረዥ በ10 ነጥቦች ከወራጅ ቀጣናው በሁለት ነጥቦች ብቻ ከፍ ብሎ በ16ኛ ደረጃ ላይ ይገኛል።

ትናንት ከቸልሲ ጋር የተጫወተው ቡድናቸው 2 ለ 1 በሆነ ውጤት የተሸነፈ ሲሆን አሰልጣኙ ቡድኑን በ15 ጨዋታዎች ብቻ ከመሩ በኋላ ከኃላፊነታቸው ተሰናብተዋል።

የአሰልጣኙ ስንብት በፕሪሚዬር ሊጉ ከቀድሞው የማንችስተር ዩናይትድ አሰልጣኝ ኤሪክ ቴን ሃግ ስንብት ቀጥሎ ሁለተኛው ነው።