ኢትዮጵያ የፓሪሱን የአየር ንብረት ለውጥ ስምምነት ለመተግበር ቁርጠኛ ናት - ፕሬዚዳንት ታየ አጽቀ ሥላሴ

ኢትዮጵያ የፓሪሱን የአየር ንብረት ለውጥ ስምምነት ለመተግበር እና የቅድመ ማስጠንቀቂያ ሥራዎችን ለመሥራት ቁርጠኛ መሆኗን ፕሬዚዳንት ታየ አጽቀ ሥላሴ ተናግረዋል፡፡

ፕሬዚዳንቱ ኢትዮጵያ እ.አ.አ በ2022 በተባበሩት መንግስታት ድርጅት የተጀመረውን የቅድመ ማስጠንቀቂያ እና የአደጋ መከላከል ሥራ ተግባራዊ እያደረገች መሆኗን አስታውቀዋል፡፡

ኢትዮጵያን ጨምሮ በበርካታ የዓለም ሀገራት ባልተለመደ ሁኔታ ጎርፍ እና የመሬት መንሸራተት አደጋዎች እየተከሰቱ መሆናቸውን ያነሱት ፕሬዚዳንቱ ፤ ዓለም ላይ ብርቱ የጥፋት በትሩን እያሳረፈ የሚገኘውን የዓየር ንብረት ለውጥ ለመከላከል የተቀናጀ ምላሽ እንደሚያስፈልግ አስገንዝበዋል፡፡

ሀገራት ለአደጋ መካላከል የቅድመ ማስጠንቀቂያ ሥራዎች ተገቢውን ትኩረት ሊሰጡ እንደሚገባም አሳስበዋል፡፡

ፕሬዚዳንት ታየ አጽቀ ሥላሴ በአዘርባጃን ባኩ እየተካሄደ በሚገኘው የዓለም የአየር ንብረት ለውጥ ጉባኤ ላይ እየተሳተፉ ይገኛሉ፡፡

ተመስገን ሽፈራው

"የግል ህልም የወል ህልምን ማጨናገፍ የለበትም" - ጠቅላይ ሚኒስትር ዐቢይ አሕመድ (ዶ/ር)

"በትናንት ውስጥ ወረት እና እዳ በዛሬ ውስጥ እድል እና ፈተና በነገ ውስጥ ተስፋ እና ስጋት ስላለ ኢትዮጵያዊያን የጋራ እጣ ፈንታችንን በጋራ መወሰን አለብን" ብለዋል ጠቅላይ ሚኒስትር ዐቢይ አሕመድ (ዶ/ር) ለከፍተኛ አመራር አካላት በሰጡት ሥልጠና፡፡

የሚጋሩት የጋራ ህልም ያላቸው ህዝቦች ነጋቸውን በማይናድ ጠንካራ መሰረት ላይ ያኖራሉ ያሉት ጠቅላይ ሚኒስትሩ፤ በአንድነት የሚያቆማቸው አካላዊ፣ ምናባዊ እና ሥርዓታዊ ውቅር አላቸው ብለዋል፡፡

ማንም ከመሬት ተነስቶ እንዳይዳፈረን ህልም ያነገብን፣ ህልምን የሰነቅን፣ ህልምን የምንናገር፣ የሚተገበር ተሻጋሪ ህልም ያለን ህዝቦች መሆን አለብን ሲሉም ገልጸዋል፡፡

የጋራ ህልም ጊዜን ተሻጋሪ ነው ያሉት ጠቅላይ ሚኒስትሩ፤ ህልም ልዕልና መር ሲሆን ጊዜን ተሻጋሪ ለትውልድ የሚተርፍ ይሆናል ብለዋል፡፡

መነሻው በቀል እና የበላይነትን ማረጋገጥ የሆነ ሀሳብ ቅዠት እንጂ ህልም አይሆንም ያሉት ጠቅላይ ሚኒስትር ዐቢይ አሕመድ (ዶ/ር)፤ እንደዚህ ዓይነቱ ስሁት ስሌት በጥላቻ ላይ ያተኮረ ባዶ ምኞት ስለሆነ መጨረሻው ጥፋት ነው ሲሉም አክለዋል፡፡

ህልም ግልጽና ቀጥተኛ፣ አሳታፊና አካታች፣ ቀጣይና አዳጊ እንዲሁም ተተግባሪ መሆን እንዳለትም ገልጸዋል፡፡
https://web.facebook.com/EBCzena/posts/pfbid02qFQytRd6USS73hDEC1CCgRUmghRBu7FB3PKB1boCj7VY6cRYDGFtohcmfgWFv5jel