ይህ ተስፋ በክብሩ እና በጸጋው ጉልበት በሚያስገርም ሁኔታ የዚህ አለም ነገሮች ከነ ከንቱ ምኞታቸው እንዲደበዝዙብን ያደርግና የጌታችንን ዳግም መመለስን ግን አጉልቶ በማሳየት ጌታችን እስኪመለስ ድረስ እርሱን ተስፋ ከሚያደርጉ ቅዱሳን ጋር እንድንተያይ፣ እንድንሰበሰብ፣ እንድንተናነጽ እና እንድንጽናና ያደርገናል (1ኛተሰ.5፤1-23)።

ከዘለአለም ሞት ያዳነን ጌታችን ኢየሱስ ክርስቶስ ተመልሶ ወደዚህ ምድር ሲመጣ በዓለሙ ላይ ከሚመጣ ቁጣ ደግሞ የሚያድነን እርሱ እንደሆነ በማወቅና በመረዳት በእግዚአብሔር ላይ ባለን እምነት ደግሞ እምነታችን በመልካሙ ስራ ሲገለጥ ለ እግዚአብሔር ባለን ፍቅር ላልዳኑ ሰዎች ምሳሌ በመሆንና የጌታችንን የአዳኛችንን ዳግመኛ መመለስ ተስፋ በማድረግ እሰከመጨረሻ በመፅናት የምንቆምበትን ጸጋና ሀይል እግዚአብሔር ያብዛልን ፡፡
አሜን!!!

Follow Us
◽️ YouTube
https://is.gd/FGBCHawassaYoutube
◽️Facebook
https://fb.me/FGBCHawassa
◽️Instagram
https://ig.me/FGBCHawassa
◽️Telegram
https://t.me/FGBCHawassa

የሀዋሳ ሙሉ ወንጌል አማኞች ቤተክርስቲያን ስነፅሁፍና ስነዳ አገልግሎት 
ጥር 4 /2017 ዓ.ም

የእውነተኛ አማኝነት መገለጫዎች
በወንድም ደረጀ ቡልቻ

በሀዋሳ ሙሉ ወንጌል አማኞች ቤተክርስቲያን ጥር 4/2017 ዓ.ም እሁድ ጥዋት በሁለት ፈረቃ የተካሄደው የጉባኤ አምልኮ ፕሮግራም

በዕለቱ በነበረው የቃል አገልግሎት ወንድም ደረጀ ቡልቻ 1ኛ ተሰሎንቄ 1:1-10 ላይ የሚገኘውን የእግዚአብሔር ቃል መሰረት በማድረግ "የእውነተኛ አማኝነት መገለጫዎች " በሚል ርዕስ ቀጥለው በቀረቡት ነጥቦች ላይ የእግዚአብሔርን ቃል አስተምረዋል።

በመጽሐፍ ቅዱሳችን በሐዋሪያው ጳውሎስ መልዕክት ውስጥ በ1ኛተሰሎንቄ 1፡1-10 በታዛዥነት እግዚአብሔርን በሚያስከብርና በሚያስደስት መንገድ እንመላለስ በሚል ሃሳብ በብዛት ተዘውትረው ቀርበዋል፤ ሆኖም በ 1ኛ ተሰሎንቄ መልዕክት ውስጥ ግን ጎልቶ እናገኘዋለን።

የመልዕክቱን ሀሳብ ስናይ እግዚአብሔር ለአማኞች የሚሰጠው ቅዱስ ደረጃ ከ ቅዱስ አኗኗር, ምልልስ እና ልምምድ ጋር መመሳሰል አለበት የሚል ሆኖ እናገኘዋለን።

ስለተሰሎንቄ ቤተክርስቲያን አጭር ታሪክ (ሐዋ.ስራ 17)
ጳውሎስ ወደተሰሎንቄ ከተማ የመጣው ከ ጢሞቲዎስና ከ ስልዋኖስ (ሲላስ) ጋር ሲሆን ፤ እንደልማዳቸውም በምኩራብ ገብተው የጌታችንን የኢየሱስ ክርሰቶስን ወንጌል ሐዋሪያው ጳውሎስ በግለጽ እያስረዳ እንደሰበካቸውና በተሰሎንቄ ከተማ ውሰጥ የነበረው ቆይታ በአንጻራዊነት ከሌሎች ጋር ሲነጻጸር በጣም አጭር ጊዜ ብቻ ነው፡፡ መጽሐፍቅዱስ ሐዋ 17÷2 ሦስት ሰንበት ብቻ እንዳስተማራቸው ይናገራል።

ሐዋሪያው ጳውሎስ ሁልጊዜ በወንጌል ስራ ውጤታማ እየሆነ ሲመጣ የወንጌል ተቃዋሚ የሆኑ ሰዎች አይሁዳዊያን ፣ ስራ ፈቶች እና ክፉ ሰዎች በማስተባበር በከተማው ላይ ሁካታን ሲያስነሱና የወንጌል ስራን ለማስተጓጎል ሲተጉ እናያለን።

በኋላም ጳውሎስ ወደ ቤርያ ሲሰደድ አሁንም ተቃዋሚዎቹ የጌታ ኢየሱስ ክርስቶስ ወንጌል በቤሪያም ተቀባይነት እንዳገኘ መረጃ ደርሷቸው ወደከተማ በመምጣት ሲገዳደሩ እናያለን ከዚያም ጳውሎስ ጢሞቲዎስን እና ሲላስን ቤርያ ላይ ትቷቸው እርሱ ወደ አቴና በመምጣት ፣ በአቴናም ወንጌል ሰብኮ በስተመጨረሻም ከ አቴና ወጥቶ ወደ ቆሮንቶስ እንደምጣም በሐዋሪያት ስራ መጽሀፍ ላይ በግልጽ እናነባለን።

እኛም ዛሬ የምንማረው ትምህርት በአጭር ጊዜ ውስጥ የጌታ ኢየሱስ ክርስቶስን ወንጌል በማመን ለሌሎች አቢያተ ክርስቲያናት አርአያ እንዲሆኑ ሐዋሪያው ጳውሎስ ከጢሞቲዎስ በሰማው ምስክርነት ላይ ተመስርቶ ከጻፈላቸው መልዕክት ከ1ኛ ተሰሎንቄ ምዕራፍ 1÷1-10 ይሆናል።

ጳውሎስ በቆሮንቶስ ሆኖ ጢሞቲዎስን እንደገና ወደተሰሎንቄ በመላክ የሰማው ጤናማና አስደሳች ምስክርነት ይህን መልዕክት እንዲጽፍ አነሳስቶታል። የፃፈበትም አላማ በዕምነታቸው እንዲጠነክሩና እንዲቀጥሉ ለማበረታታት ነው።

ጳውሎስ መለእክቱን ሲጀምር ስለእነርሱ አግዚአብሔርን እያመሰገነ ያለመቋረጥ በጸሎት የሚያስባቸው፣ አንድ ወር ባልሞላ ጊዜ ውስጥ የሰሙትን የኢየሱስ ክርስቶስን ወንጌል በማመን በእምነታቸው ምክንያት ደግሞ ለመጣባቸው መከራና ተግዳሮት በመጽናትና በመቀጠል በምልልሳቸውና በኑሮአቸው በተገለጠው ህይወት ምክንያት ነው።

እስቲ የህይወታቸውን ለውጥ እና የእድገታቸውን ማስረጃዎች እንዲሁም የዚያ ምንጭ ከየት እንደመጣ እንመልከት ፡-

1. "የእምነታችሁን ስራ" ቁ. 3
   በ አምላካችን እና በ አባታችን ፊት በእምነት የሠራችሁትን ስራችሁን ድካማችሁን እናስባለን፡፡ ከእምነታቸው ተነስተው የሰሩት ስራ ነው፡፡ (ያዕ.2፡14¸17¸20-22¸24¸26)

ይህ የዕድገታቸው እሴት ምክንያቱ ደግሞ ቁጥር 4 እና 5 እንደሚናገረው እምነታቸው የመጣው ጳውሎስ ከሰበከላቸው ወንጌል ሲሆን ይህም ወንጌል ስለ ኢየሱስ ክርሰቶስ ሲሆን ስብከቱ መሰረት ያደረገው ግን በቃል ብቻ ሳይሆን በመንፈስቅዱስ ኃይልና በብዙ መረዳትም ጭምር ስለሆነ ነው፡፡

ይህ ደግሞ በተሰሎንቄ አማኞች ልብ ውስጥ ስራ ፈት ሳይሆን በስራ የሚገለጥን ዕምነት ፈጥሯል። ሐዋ.17፡2-3 ላይ ጳውሎስ ከቅዱሳት መጽሐፍት ወንጌል ሲያስረዳና ሲያብራራ እንመለከታለን፡፡

እምነት የሚመጣው በአንድ መንገድ ብቻ ነው፤ እርሱም በወንጌል ቃል ነው፡፡ ወንጌልም ስለ ክርስቶስ የሚናገረው ቃል ነው። ይህ እምነት ምክንታዊ ነው። መሲሁ በሥጋ እንደተገለጠና መከራን እንደተቀበለ ደግሞም በመስቀል ላይ እንደሞተ በሦስተኛውም ቀን በኃይል እንደተነሳ ሲሆን መልእክቱ ደግሞ ወንጌል ይባላል፡፡

መንፈስቅዱስ ደግሞ ከዚህ ወንጌል ውጪ ስለሌላ ነገር በጥልቅ መረዳት እምነትን አይሰጥም። በወንጌል ማመን በኢየሱስ ክርሰቶስ ማመን ነው፤ ይህ ሥራ የሚያፈራ እምነትን የሚያፈራ ነው፡፡ ይህ እምነት የሚያፈራ ስራ ነው፤ እርሱም በኢየሱስ ክርስቶስ ማመን ነው(ዮሐ 6፡27-29)። መልካም ስራ ሁሉ የሚጀምረው በክርስቶስ በማመን ነው ፡፡

በተጨማሪ በወንጌል ማመን ሂደት ውስጥ በአማኞች ህይወት ውስጥ ኑዛዜያችንን ለማረጋገጥና እውን እንዲሆን ከቃል በላይ ስለተለወጠ ህይወታችን ማስረጃችን የመንፈስቅዱስ ሃይል ነው፡፡

2." የፍቅራችሁንም ድካም"ቁ.3

ይህ ሐረግ በዋናው ቋንቋ ትርጉሙ "በጎነት በፍቅር የሚቀሰቀስ የጉልበት ስራ ነው፡፡" ይህ ማለት "ለሌሎች መዳን በፈቃደኝነት ማሰብ ወይም መከራን መቋቋም ማለት ነው፡፡"
ይህ ፍቅር ክብደት ያለው፣ ለራስ የማይፈልግ ግን የሌሎችን ጥቅም የሚመለከት ፍቅር ነው። ይህ በተሰሎንቄ አማኞች ህይወት ቁጥር 6-8 እንመለከታለን፡፡
ያሉበት መከራ ሳይበገራቸው በእግዚአብሔር ቃል በመታዘዝ በብዙ ደስታ በመቄዶኒያና በ አካይያ ላሉ ምእመናን ሁሉ ምሳሌ ሆነዋል

በእግዚአብሔር ላይ ያላቸው ዕምነት ፣ ፍቅርን አስከትሎ የፍቅራቸው ድካም በህይወታቸው ተገልጦ መነጋገረያ ሆነዋል፡፡
ጣዖቶችን በማምለክ፣ በስካር ፣ በርኩሰት ፣ ሐቀኝነት በጎደለው ፣ በተከራካሪነት ወዘተ እግዚአብሔን በማያከብር ሕይወት ይመላለሱ የነበሩ እነዚህ የተሰሎንቄ ሰዎች ምን ሆነው ነው እየተባለ የተለወጠ ሕይወታቸውን ማለትም በ እግዚአብሔር ላይ ያላቸው ዕምነት ፍቅርን አስከትሎ በፍቅራቸው ድካም ደግሞ ለሌሎች የመዳን ምክንያት ሆነው ተገልጠዋል፡፡

ዛሬ ያለችው ቤተክርሰቲያን በምንድነው? ለምንድነው? እየደከመች ያለችው? ሌሎች ስለእኛ ምን እያወሩ ነው?

1. "በጌታችን በኢየሱስ ክርሰቶስ ያለውን የተስፋችሁን መጽናት" ቁ.3

ሌላኛው የወንጌል መልዕክት የተስፋ ይዘት በእምነትና በድረጊት የተመሰረተ ነው፡፡ እምነቱ የኢየሱስ ክርስቶስን ዳግመኛ መመለስ በመረዳትና በማመን የመልእክቱን ተስፋ መቀበል ሲሆን ድርጊቱ ደግሞ ከጣዖት የአምልኮ ልምምዶች በመራቅና በመተው እርምጃ መውሰድን ያካትታል፡፡ ቁ.9-10

በኢየሱስ ክርስቶስ ዳግመኛ መመለስ ተስፋ ማድረግ አስደሳችና የደህንነታችን እራሱ የመጨረሻ የመዳን ተስፋ ነው፡፡ ይህ ተስፋ በህይወታችን አስቸጋሪውን ጊዜ እንድንቋቋምና በፍቅራችን ድካም እንድንቀጥል ያስችለናል ፡፡

ክርስቶስ በማንኛውም ጊዜ ይመጣል ብለን ስንጠብቅ በኃጢያተኛ የአኗኗር ዘይቤ ላይ ሆነን መተኛታችንን ትተን ለእግዚአብሔር ክብር ለመኖርና እርሱን ነቅተን ለማገልገል እንሻለን፡፡