“Чудесный мир” өте жылы аяқталды. Жылынып қалдым. Рақмет! “Өмірге шексіз ғашықтың” айтарымен аяқталды. Әдемі.

Басында биліктің міндеті мәселені өзі шешіп үйренсін деп көмектеспегенім үшін, кейін көмектескім келгенде өзі ақ бәрі біркүндік жалақысын мәжбүрлі түрде тапсырып жатқан халықты көріп райымнан қайтқаным үшін өзімді кінәлі сезініп жүрмін. Билік қалай шыдайтынын білмеймін. Мен әрекетсіздігім үшін қатты ұялып, қиналып жүрмін.

Ұлдың муай-тайдан шыққанын күтіп отырмын. Кішілерден кейін ересек ұлдар келді. Жаттығулары басталып кетті. Жаттығу кезінде тренерлері мықты мотивациялық әңгімелер айтып жатыр. Анау ТӘРТІП, РУХ өте әдемі көрінеді. Қобыраған ой, әрекетіңнің бәрін бір жүйеге салып беретін тәртіп.. не деген керемет ең!

Ең тәтті, жылы сәттің бірі. Тұрмысқа шығып төркіндеп келдің бе, тіпті саналы түрде өзің тұрмыс құрмай ата-анаңмен бір үйде тұрып жатырсың ба, ажырасып үйге қайта келдің бе бәрібір. Есейіп кетсе де әлі ана мен баланың әлемі бар. Баланың қашанда оралып, емін еркін өмір сүре алатын сол бір туып өскен үйі бар.

Оралым. Әрқашан өзімен өзі. Артық көмек сұрамайды. Көмектесіп жатқандары көмектестік деп жар салмайды. Бөспейді, ашынып жыламайды, жағымпазданбайды да. Тұрсынбек айтқандай ешкімге жұғымы жоқ. Тәуір болған соң барып: “Тәуірміз ғой. Өздерің қалайсыңдар?” дейді.

Неге ерте тұрып алғансың? Аа, сен Күн шығатын жақтан келдің ғой))

Орынборды су басқан. Ресейден бізге келе жатыр деп алаңдаулы үйлегілер. Папамнан сол келе жатқан су көшіп келе жатқанда жартысы жерге сіңбей ме екен десем, жер суға тойып тұр дейді. Жердің суға тоятын кезі де болады екен.

Мемлекет басшысы Өзбекстанға барып келді. Екі ел туризмі жөнінде сұхбат беріңізші дейді. Бермеймін дедім. Топан су кезінде басқа елде не істеп жүр.

Деген соң досым (Пико емес) фонды көңілді түске ауыстырып қойды. Ура!
Соңғы кезде менімен шамалас, отыз бестен асқан келіншектерде рак екенін жиі естіп жүрмін. Естіген сайын әдемі, максимум өмір сүргім келеді. Біреуі бала деді, біреуі кәсіп деді. Әйтеуір өздері емес. Кәсіп те бала үшін шығар. Бірақ бала, бала дей беретін не бар. Олар да өз өмірлерін өздері әдемі жасасын. Жоғарғы оқу орнында оқу, пәтер алу секілді бір ғұмырына берілетін стандартты міндеттерді өзі орындай алмаса несі адам? Құдайдың жұмса жұдырығына ғана сыйып тұрған ғұмырым бар артық ешкімге, ешнәрсеге шашылғым келмейді.