шын бақытты болсаң, оны жалпақ жұртқа жар салып, жария еткің келмейді екен. тек дәмін татып рақаттанасың. тамсанасың. өз-өзіңнен қызғанасың.

«өмірдің сипаты көп…өз ырғағы бар. бір өмірдің тұзағына түскенде басыңдағы қасіреттің бәрі – қайғылы оқиғалар, сәтсіздіктер, үрей – осы өмірдегі сәтсіздіктерім деп ойларсыз. өмірдің өзі осындай сәттерден тұратынын білмейтін адам сол кездегі шешімін айыптайды, соның жемісін жедім деп ойлайды».

«түн ортасындағы кітапхана»

Ойлар кейде жылатады, кейде жұбатады. Қай әрекетке де бұйрықты беретін өзіміз. Бәрінен бұрын ойды басқару – қиын, сірә.

Жақын адамыңмен жүзбе-жүз кездескеннің әсері бөлек. Мессенджерлер арқылы тілдесу ол сезімді бере алмайды. Ондай кездесуде телефонды әрі қойып, эмоция, сезім алмасқан, ой-пікір бөліскен дұрыс. Энергияға, эйфорияға тойып қайтасың.

Кеше әрең дегенде «Моана 2»-нің қазақша дубляжына бардым. Бұған дейін уақыттары ыңғайсыз болып, бара алмай жүргем. Ең сүйікті мультфильмдерімнің бірі. Бір ата-ана төрт баласын әкеліп, әпке мен сіңлісінің арақатынасын «тура сендер сияқты екен» деп айтып отыр. Сүйсінерлік көрініс болды✨

Кез келген жақсы сезімнің басы сондай ерекше тәтті болады, иә? Әсіресе, махаббаттың. Өзіңіздің сүйіктіңізбен өткізген алғашқы сәттерді еске түсіріңізші. Бөлек сезім. Сол тәттілік өн бойында сақталсын. Жоғалмасын. Басы тәтті болған махаббат ақыр аяғына дейін тәтті болсын.?️

?«Дайағашшы»
? Ұларбек Нұрғалымұлы
? 253 бет

Парақтарынан қазақылықтың иісі аңқитын кітап. Маған қатты ұнады! Өзім топшылағандай кітап екен.

Автор кезіндегі көшпенді өмірдің қызығы мен қиындығын, ескідегі адамдардың есті сөздері мен есте қалар оқиғаларын жазып шыққан. Кітап «Кісі қадірі» және «Сөз қадірі» дейтін екі бөлімнен тұрады. Алғашқысында кей салт пен дәстүр, атбегілік, құсбегілік жайында әңгімелер сөз болса, екіншісінде «маймөңке», «қолқа», «боздақ» секілді көптеген сөз бен тіркестердің мағынасын ашады.

Автор қазақтың көзсіз, сөзсіз түсінікті болатын дара даналығын жеткізе білген. Кей тұсында қатты таң болдым. Әсіресе, сыңсудың мәні мен маңызын түсіндірген тұсы ерекше ұнады. Дала пәлсапасы тұнып тұр.

Шағын тақырыптарға бөлінгендіктен оқуға жеңіл келеді. Тіл байлығын көбейтемін деушілерге, атамның әңгімесін, ауылдың иісін сағындым деушілерге нағыз керек кітап.

#оқығаным

«Әңгіме ғана емес, көп тірлігіміз де сондай секілді. Тиянақ жоқ, байыз жоқ, не көзде, не көңілде тыныштық жоқ, бірдің басы, бірдің аяғы, жалтақ-жалтақ, алақ-жұлақ. Мұндай күйдегі адамға ғылым қона ма, білім жете ме, иман ұялай ма?..»

Ұларбек Нұрғалымұды «Дайағашшы».

Диссертацияма қатысты кітаптар оқымай жүргеніме өзімді кінәлі сезініп жүрмін. Айтпақшы, әлі прозалық шығармалардан қуыршақ образын іздеп жүрмін.