Yá lo diximos más veces y vais dexanos que nos repitamos: la igualdá de derechos nun tien que llevar detrás nengún axetivu. Nun hai oficialidaes amables nin oficialidaes gafes nin oficialidaes repunantes. Hai reconocimientu de derechos o nun lu hai. Nun queremos derechos de segunda. Queremos derechos, a cencielles.

Trenta y siete años..., pero siguimos. Falten munches persones que llucharon por ver feches realidá les nuestres reivindicaciones, pero xuntáronse otres más moces. Porque somos resistentes. El nuestru ye un movimientu de resistencia. Resistencia a desapaecer, resistencia a que nos roben el futuru. Queremos siguir usando estes palabres qu’aprendiemos en casa y que nos xunten cola memoria de los nuestros. Nun somos menos que naide nin lo nuestro ye menos que naide. Tenemos derechu y nun vamos arrenunciar nunca. Vamos siguir lluchando.

Nós vamos siguir, sí. Pero ¿qué va facer la nuesa clas política? ¿Qué van facer les nuestres representantes ehí, na Xunta Xeneral? ¿Qué va facer el PSOE? ¿Va dexar qu'Asturies siga careciendo un estatutu de segunda, del sieglu pasáu, y too por nun saber liderar la modernización que precisa? Esa modernización, ente otres coses, tien que poner fin a la discriminación del asturianu y del gallego-asturianu coles demás llingües del Estáu.

Lo que teníen que facer pa dar respuesta a esta demanda, pa satisfacer esta reivindicación histórica, nun nos cansa repetilo, ye impulsar un debate ehí, na Xunta Xeneral, pa que se pongan enriba la mesa los nuestros argumentos, pa obligar a los demás a posicionase, o al llau de la sociedá, de los sos derechos democráticos, de la xusticia... o al llau de la intolerancia y la reacción llingüicida. Sabemos que somos más y que tenemos razón de sobra. Y sabemos que vamos ganar esta llucha. Nun nos damos.

¡OFICIALIDÁ!

¡L’ASTURIANU, LLINGUA OFICIAL!

DISCURSU MANIFESTACIÓN LLETRES ASTURIANES 2024.

Llevamos trenta y siete años manifestándonos nestes feches de mayu. ¡Trenta y siete años! Un añu y otru, y otru, y otru... pa poner el ramu a la celebración de les Lletres Asturianes. Unes veces con más enfotu y otres con menos: viendo cómo s’abría una rendixa a la esperanza o asistiendo a un fracasu más de la nuestra clas política que nun ye capaz a ponese d’alcuerdu no que tenía que ser un consensu democráticu básicu.

Dende la Xunta pola Defensa de la Llingua Asturiana queremos davos les gracies a toos y a toes por volver participar nesta xornada reivindicativa, por ser parte d’esti ritu repetitivamente necesariu, nesti movimientu ciudadanu que, a pesar de los años, a pesar de les décades, demostró de sobra que ye neciu y que nun se da. Non, ¡nun nos damos y nun nos vamos dar!

Vamos cuntavos un secretu: tuviemos tentaos de garrar un discursu de la Xunta d’hai diez, venti, trenta años, y aprovechalu pa güei ensin dicivos nada. Quitándo-yos dalgún detalle concretu que dexe saber de qué contestu históricu ye, quiciás nun dibeis notar la diferencia porque les demandes siguen siendo asemeyaes; tamién los argumentos: reivindicar lo de casa, reivindicar la igualdá con otres comunidaes, refugar la esclusión, denunciar la intolerancia...

Nestes más de trés décades de reivindicación avancemos muncho en visibilidá social, sí, pero reculemos en vitalidá real, en númberu de falantes, porque la tresmisión xeneracional de les nuestres llingües, del asturianu y del gallego-asturianu, ta cuasi cortada. A eso xueguen, a allargar l’agonía. Y dícennos: “Esperái otro poco, a ver si nunos añinos... cuando la cosa tea pa la mano...”. Y pasen los años, pasen les décades, y siguen diciéndonos qu’agora nun toca, qu’agora nun se pue.

Venimos amás d’unos años intensos onde, vosotros y vosotres, fuistis quién a galvanizar a tola sociedá asturiana na busca de la respuesta definitiva a una aspiración de xusticia que vien dende la dictadura postrera. Estes cais d’Uviéu, como les de Xixón, tienen visto pasar nos últimos años dalgunes de les manifestaciones más grandes de la historia contemporánea d’Asturies.

El proyectu 2018 qu’entamó la Xunta pola Defensa de la Llingua Asturiana dio pie a un 21 d’abril na Plaza la Catedral y a un 6 d’abril nel Náutico que metieron nos corazones de la xente l’ardor y l’ánimu, la fuercia y l’enfotu. Y, otra vuelta n’Uviéu, un 16 d’ochobre lleguemos dende tolos llugares d’Asturies pa participar na que, si nun fuera pola mezquindá de parte de la nuestra clas política, pudo ser la última manifestación pidiendo la oficialidá.

Pero bien sabemos que tán fácil nun va ser. N’Asturies, cuando se trata de derechos, xusticia y llibertá, nada ye cenciello. Tenemos delantre’l mesmu conglomeráu ultra y mediáticu que lleva mediu sieglu tratando de facenos desapaecer del mapa. La movilización de la so maquinaria de basura y mentires foi escepcional. Son sabedores de que llograr derechos fundamentales llama depués a otres aspiraciones nueves, a otros horizontes nuevos.

La podrén de la intolerancia ta metío peles instituciones y pelos medios, y la pregunta ye: ¿qué van facer los que dicen defender la oficialidá?, ¿qué ye lo que van facer yá, agora mesmo? Nun val con dicir tar a favor y nun facer nada, nun val con ser mui favorable y abrazar les cadarmes ultres nos medios, na escuela y na sociedá. Nun val. Queremos firmeza, coherencia na política llingüística.

Derechos. Tamos falando d’eso: de dar derechos ciudadanos, d’enanchalos, non de recortalos. Agora tenémoslos recortaos, ruinos, probes... porque les persones falantes d’una llingua tiénenlo too a favor y les que falamos les otres, les que falamos asturianu o gallego-asturianu, tenémoslo too en contra. Nun ye abondo col usu ceremonial una o dos o trés veces al añu, nun ye abondo col requexu na programación, nun ye abondo con poner una traducción debaxo pa contentanos.

DE LES DECLARACIONES A LOS FECHOS

El 20 febreru pasáu presentóse la llamada Declaración de Bimenes aprovechando la reunión del Conseyu de la Rede de Normalización Llingüística y col apoyu de toles persones presentes, incluyíu'l presidente Barbón. Unos díes depués, la Xunta Xeneral aprobó una declaración col mesmu conteníu. Nengún pero se-y pue poner al testu en cuestión al tratar la convivencia natural ente les llingües d'Asturies, señalar la importancia d'acciones de normalización que garanticen oportunidaes y desenvolvimientu, concebir la diversidá como una oportunidá, llamar al diálogu y al consensu y afitar la necesidá de la declaración d'oficialidá.

La nuestra sorpresa vien polos actores del documentu mesmu: en Bimenes, alcaldes y presidente; y na Xunta Xeneral, diputaos y diputaes que, teniendo la responsabilidá d'aplicar y desenvolver tolos puntos de la declaración, nun tán faciendo la parte que-yos correspuende. Les polítiques de normalización nun esisten nos más de los conceyos firmantes y, non solo eso, sinón que nun cumplen la llegalidá n'aspectos como l'usu de la toponimia oficial o na atención a la ciudadanía; nin siquiera tienen les webs municipales n'asturianu o en gallego-asturianu, colo fácil que ye teneles disponiendo como disponen de servicios de normalización llingüística. De la mesma manera, na Xunta Xeneral vemos cómo s'aprueba un testu con unes disposiciones que nun se cumplen y solicítase la oficialidá n'abstracto cuando esa mesma representación de la ciudadanía tien les ferramientes necesaries pa impulsar una reforma estatutaria que lleve alantre la oficialidá.

Por eso, queremos facer un llamáu a la responsabilidá y la seriedá de la nuestra clas política. Yá pasó de sobra'l tiempu de les declaraciones. Ye la hora de pasar de les palabres a los fechos. Ye la hora d'impulsar el reconocimientu de los derechos y la igualdá xurídica que namás pue dar el marcu llegal de la oficialidá.

Contra les agresiones, La Xunta pola Defensa de la Llingua Asturiana, tamién col euskera.

Bonos díes, en nome de la Xunta pola Defensa de la Llingua Asturiana, lo primero quiero agradecer el convite del Euskalgintzaren Konseilua a esta manifestación en contra de les agresiones al euskera y pola defensa de los derechos llingüísticos de la comunidá euskaldun.

N'Asturies, y na nuesa organización, persabemos de derechos que nun se respeten, pero sobre tou sabemos d’agresiones. Tamos viendo cómo, a pesar de los avances na identidá de la comunidá de falantes, a pesar del aumentu del apoyu popular a la causa de la recuperación y la normalización de la llingua d’Asturies (o pue que por eso), la reacción de los llingüicides, de los amigos de la represión y la uniformización, ye cada vez más gafa: vuelven con argumentos que pensábemos esaniciaos: que l’asturianu nun ye una llingua (o que son milenta), que nun existe (o qu’esiste pero ye inventada, de llaboratoriu), que naide la fala (o que cada quién la fala d’una manera, y entós nun val pa entendese), que promovelu ye ruinoso, que ye antipatriótico, que ye una imposición, que naide lo quier, qu’hai coses más importantes…

La Xunta pola Defensa de la Llingua Asturiana vamos cumplir 40 años, casi tantos como l’estatutu d’autonomía que ye l’orixe y sofitu de toes estes agresiones (nun hai qu’escaecer que el nuesu estatutu, nin siquiera reconoz la oficialidá del asturianu), y llevamos, magar nacimos, reclamando normalización, dignidá, respetu y otru marcu llegal, denunciando y lluchando na cai, y aprovechando tolos medios qu’a vegaes nos dan voz.

Por eso, pa nós, pa la Xunta, ye natural solidarizanos güei cola causa del euskera.

Y porque pensamos que la llingua ye’l corazón d’un pueblu, y, porque falar asturianu ye la nuesa forma de tar nel mundu, traemos estos díes a Bilbo’l nuesu corazón multicolor, el qu’usamos pa reivindicar la oficialidá y que ye yá’l símbolu de la llucha pola dignidá de la llingua d’Asturies.

¡Hai llotería de la Xunta! ¡Nun quedes ensin ello!

Gárralo en:
·Avilés - El Cabanón.
·Uviéu - Espacio Nube y L'Esperteyu.
·Xixón - Sidrería Canteli.
·L'Infiestu - Cervecería La Traviesa.

RTPA SIGUE MARXINANDO L'ASTURIANU Y EL GALLEGO-ASTURIANU NES SOS CANALES DIXITALES

La XDLA reclama a los grupos parllamentarios qu'empiecen el procesu pa cambiar la dirección actual

RTPA cambió la so web y les sos redes sociales. Sicasí, esa renovación nun supón una visibilidá mayor de les llingües que por llei RTPA ta obligada a protexer. L'asturianu sigue arrequexáu a una sección de noticies, con testos traducíos al asturianu pero que conserva la llocución en castellanu, y a una estaya-contenedor con dalgunos de los pocos programes n'asturianu emitíos a lo llargo de cuasi 20 años d'emisión. Per otru llau, l'usu de la toponimia ye marxinal y el gallego-asturianu ye una llingua que nun existe.

La situación dexa a les clares la visión de la cultura y la llingua asturiana acomplexada que tienen dende RTPA y la necesidá d'un cambiu na dirección. Nestos momentos, nun hai programación infantil nel nuestru idioma, la toponimia oficial ta marxinada, namás s'emiten programes d'entretenimientu n'asturianu si paga la Conseyería de Cultura y esta llingua ta vetada nos programes deportivos y nos doblaxes de llargumetraxes y series, mentes qu'en RPA nun hai espacios dedicaos a la música nes nuestres llingües.

L'Estatutu y la mesma Llei d'Usu, amás de la llei de creación de RTPA dicen que los medios de comunicación públicos tienen que tener una presencia “amañosa” de les llingües propies y tienen que ser una ferramienta p'ayudar a normalizar l'asturianu y el gallego-asturianu. Por eso, la XDLA reclama a los partíos con representación parllamentariu qu'empiecen el procesu pa cambiar la dirección de RTPA, porque l'actual mostró n'ocasiones reiteraes la so posición contraria a la normalización llingüística y al cumplimientu de la llexislación vixente.

A pesar de les palabres bones del Gobiernu actual hacia'l nuestru patrimoniu llingüísticu l'asturianu y el gallego-asturianu siguen marxinaos na programación y na so presencia pública en RTPA. Pa iguar esta situación nun fai falta esperar a la oficialidá, namás fai falta voluntá política. Pel momentu, depués de dos llexislatures d'Adrián Barbón la voluntá amosada sigue siendo la mesma que na llexislatura de Javier Fernández: la marxinación del asturianu