نقضو عهد نص بيعتنه
او نار الحقد ما رحمتنه

كسر البتول. عكب الرسول

__________

او كار الغدر كصدو علية
  دفعو بابي وانه بلا حمية
  يدرون بعلي بيده القضية
ملزوم ابشرط ذيج الوصية
ظلم هجمو عالزهره الزجية
وابحالي جرت اعظم رزية 

ظمو  حقيقتها  الأسباب
أوجلمة وأن تشهد عالباب

الظالم يجول.عكب الرسول

__________

دار الرحمة مالاكه السلامه
منهد ماحيدر اتولى الامامه
  اصحاب الطمع جانو علامه
  ومنهم ماشفت غير الظلامه
   بشر تهدر دمه لتاج الزعامه
    ولاخافو عقاب الله وكلامه

والساومو عالحك اشرار
  بالمحشر اول تالي النار

غابت اصول. عكب الرسول
__________

اثار السطر مطبوعة بالعين
وبروحي الهضم ماكفه للبين
ياحزني الأبد مايخمد اسنين
واليجرح تبده اكبالي الحسين
وكت بيه تنكلب كل  الموزاين
باب المعرفة اتحركه الشياطين

زمرة نواصب كلها ارجاس
او هاي المصيبة الماتنقاس

شفت المهول. عكب الرسول
__________

طواغيث العصر ما تملك اسرار
عن حكمة وجودي او عن الابرار
العرش يندار من خطواتي تندار
هظيمة اشلون تلهب طارفي النار
دمع عالخد جره من العين مدرار
من العصرو على اضلوعي بسمار

ابيا لجمة ارويها احزاني
اوثكل الجذع هد اركاني

ما ظل قبول. عكب الرسول
__________

الم واهات عمري الراح جبته
و لا مرة الحزن فاركني شفته
من راح النبي أو صبري دفنته
او يسايرني الجرح لمن تركته
يا ملكه الحنان الروحي ردته
غصن ذابل صفيت ابلا نظرته

بالحسرة متروس احساسي
والموت  أخذ  مني  انفاسي

دهري الينول. عكب الرسول
__________

#الليالي_ الفاطمية

# ذكرى_ استشهاد_ الصديقة_ الطاهرة_ الكبرى_ فاطمة الزهراء صلوات الله عليها

# لعن الله _قاتلي _فاطمة الزهراء صلوات الله عليها

#اللهم_عجل_لوليك_الفرج

حمزة صباح الزيدي✍️

طفو اسنيني وعشرتج ميتة بين اعيوني
و دارنه الينبض محنه انهدم فوكـ امتوني

ضلعج بروحي انكسر
أو ما رحم بينه القدر
__

ياام حسن من كلبي ذبحتني المصيبة
اوليل هجرج اخذ كل عمري  اونصيبه
ذبلت ادموعي و صفت روحي  غريبة
أو بين حيطان الجذع حيدر    نحـيبه

مجروح و كلشي امتعبني بفراكج والله احتاريت
يالزهرة ومن دفعوا بابج موتي بهل الدنيا  اتلكيت
يانار الحسرة البضلوعي والتكتلني اشما    ضليت

من مشيتي وكلبي مالاكه السلام اخالافج
اشيبقى من عنده اليشاهد للمأسي   ابابج

صرتي بأحزاني  اثر
أو ما رحم بينه القدر
__

والله جرح الباب أخذ كلشي من ادية
اشلون اهيد أو محسن اكماطه المنية
الصدمة  بعيوني البقت والكسرة  الية
اكبالي شفته امن انعصر ضلع الزجية

مهدود الحيل أو كل دمعي متبدي ابين الحيطان
يجبل موتج ما حسبته وابقى على افراكج ذبلان
جانت روحي اكبالج تزهر هسه امشيبها الهجران

راحت أو من وسدوها ابكل كتر مصيوبة
اوفوك حمل الظيم جانت ناحلة ومتعوبة

الشيب لرومشي عبر
أو ما رحم بينه القدر
__

لا حزن يكفي أو دمع يشرحلي حالي
أو غربة بعيوني أصبحت ذيج الليالي
ما مصدك جرحي من روحي أو دلالي
وانطوت كل صفحتي ابروحة حلالي

متغير كلشي اعلى ارسومي ولو صد لداري اتعثر
أو ثكلت حتى النسمة ابريتي مو ذاك الشالع خيبر
اشما حاولت اخفيها ادموعي ظيم الباب يرد أكبر

كوه اجر انفاسي وانه النار حدر اضلوعي
اتطشرت كل امنياتي الذابت من اشموعي

ابلاية روح أو مستقر
أو ما رحم بينه القدر
__

من عبير احساسي فايض كل سباتي
ا فراك وجه الخل طوى سيرة حياتي
 ضاعت أحلامي ابجرح يشهد مماتي
اوجوه الاتراب ادفنت روحي وغلاتي

مكسور الخاطر واتعذب لو مر طيف الزهرة ابليل
والتهضمني حرورة جرحي كلما إميل وياي اتميل
لون الغربة التارس وجهي رافكني بدمعة أوياويل

التنذبح كل ذكرياته اشلون يجبر خاطره
والمفارك عينه تكضي الليل بس امناطره

امعلك ابروحي القهر
أو ما رحم بينه القدر
__

كوه شلت اجدامي من خذت الجنازة
أو ما شفت واحد فزع لمصابي عازة
واضحة اعلوم السلف ردلي اشمزازه
  اوكلبي بين الحقد واجروحي توازه

حاير والشمات اهواية واسهام ابروحي اللجمات
مجبور وهذا امري من الله اصبر عالصاير والفات
وحده اليدري اشصاير بية وبثاري اتموت النظرات

بذاك الموادع واشوفن ناس تلجم روحي
من الهضم اتلوه كدما زاد همي أو نوحي

والعدو ابظهري غدر
أو ما رحم بينه القدر

اللهم عجل لوليك المنتقم الفرج

حمزة صباح الزيدي

راحت فاطمة يدموعي سيلي
ثجيل افراكها أو يذبح دليلي

من طاحت وره الباب
جفني اتهدل أو شاب

::::::::::::::::::::::::::::::::::::::::::::::::::::::::::::::::::::::::::::::

شسولف وانتي جرحج تارس الديرة
علي من رحتي ضاع اعلينه تفسيره
قره ابروحه الوداع اوفاضت الغيره
على الملكه أصبحت سودة تصاويره

بعد عينج يغطي اتراب عيني
علطيوفج اجي ابلهفة حنيني

من شاهدت أبو تراب
جفني اتهدل أو شاب
::::::::::::::::::::::::::::::::::::::::::::::::::::::::::::::::::::::::::::::

ابتده وياج الحزن يالزهرة من صغرج
أو كل الليلة التمر تخلص بجي بدمعج
يباب الله اشحصل هل الناس وادفعج
وعجيبة اجفوف اديهم كسرت ضلعج

غريبة اتصير كل هاي المدينة
واعيش الموت بعدج يالحزينة

ابشوغة ذاك المصاب
جفني اتهدل أو شاب
::::::::::::::::::::::::::::::::::::::::::::::::::::::::::::::::::::::::::::::

شفت يم داري كلها اتحزمت الوادم
وانه كلبي أرتجف من شاهدت فاطم
ثار أو جمر غيض على الجذع صارم
أو عليها ابكل كتر صارت تره اتهاجم

ذرة امن الخجل ما لكت بيهم
الحقد تارس ملامحهم واديهم

بقت مجهولة الأسباب
جفني اتهدل أو شاب
::::::::::::::::::::::::::::::::::::::::::::::::::::::::::::::::::::::::::::::

النار ابروحي تلهب من وره العصره
أو شفت كل اخوتي خنكتهم العبره
انادي ابجرحي ماتت فاطمة الزهره
ويظيم الباب ما مش عثرته أو مره

نشف ريجي ابكثر نوحي عليها
وصبر ما ظل وصبر روحي بيها

كلبي اعلحصل ذاب
جفني اتهدل أو شاب
::::::::::::::::::::::::::::::::::::::::::::::::::::::::::::::::::::::::::::::

اللهم عجل لوليك المنتقم الفرج

حمزة صباح الزيدي

والله ياوسفة يرد ودموعه سابكته

حيدرة بفيض جرح يدفنها فاطمته

كلبه نار وتارس اعيونه الظلام

ودعاها وليله جارح كل السهام

__

جرحه يكبر يمشي يعثر والهوه خلافج ابد ما شمه حيدر

ناره تسعر طوله يكصر والحزن يا ام الحسن بعيونه خضر

ابليله غربة وكف كلبه ويأكل ابروحه الهجر ودموعه تكثر

والله صعبة كلف دربه وهو من شال النعش بجروحه كبر

وبملامح وجه مرسوم العتاب.

ويوكع شما ينظر بعينه علباب

بهمه وبجرحه الكلف عينه تنام

ودعاها وليله جارح كل السهام

__
َ
ابليل هجره يموت حسره والوضع يصعب وماضل عنده رأي

محني ظهره وضاع عمره وشارب اهواي الحزن بدموعه ماي

كلشي سكته موش وكته يومي الييخلي العطش ملكه بسماي

يضيع بخته أو حتى دكته تنبض بكلبه الخجل والحـيرة جاي

الشايل بروحه امنايتج والحنان.

بريته ما يشتم هوه يشتم دخان

الفاكد الزهره وعطرها والغرام

ودعاها وليله جارح كل السهام

__

ابروحه لجمة اليقره همه عرف معنى أجروحه ماطابت وراج

او شاب غمه اونزف دمه مستحى افراك الطفت عينه ابضماج

دمعه طايح وصوته رايح او كطعة أنفاسه بدت من شح هواج

ليله جارح او كلشي ذابح ابصحرة همومه وعطش كلبه اعتناج

منجز أحزانه الكبل سارح وراه.

كطرة يم كسر الضلع صاير مداه

ابشوغة المذبوح نحره بلاكلام

ودعاها وليله جارح كل السهام

__

صعب يلتم جرحه سلهم وي نياشينه اطبعت كسرة الضلوع

الشاهد الدم لو تقدم خطوة من يمشي الجدم يدمي اويلوع

ابكل حياته او امنياته جان صوته بكل دعاء ابوكت الشروع

وي صلاته عد مماته عمره يخلص يم حسن واطفي الشموع

وي كل ذكرى انكتب معنى الوداع.

راحت الزهره ومست داره بضياع

صار كلشي من الهجر يمه حطام

ودعاها وليله جارح كل السهـام

#ساعد الله قلبك مولاي يا أمير المؤمنين بفقدك الزهراء عليها السلام

#لاتنسوا_صاحب_الزمان_من_دعائكم

حمزة صباح الزيدي✍️

يالتسالني عالزهره ووضعها
                              انهشم بالباب واتكسر ضلعها
الباب امنالجذوع ..............ما تحمل وزنها
__

كصدوا لديوان حيدر ....لجن مو خير بطلابه
رادوا ايطبون داره.......وابتدوا صنع الربابه
والمخرب روحه راد...ايعم على الوادم خرابه

الباب عالزهره دفع ....ومنالعصر محسن وكع
لحدما بالدم نكع ....حيدر امنالزهره بابه

والله لو ما سبحت الزهره ودعاها
                                   جا طبك بيده الارض ربنه ومحاها
تبجي الزهره وتلوع................ماتحمل وزنها
__

بعد ما دفعوا الباب..........واذوا الزهره بضلعها
الصخر من ونها يتفطر......يكسر الخاطر دمعها
اثمنطعش عام وشباب.......وطفت الوادم شمعها

تندل دروب السمه .....بت محمد فاطمه
ينكسر حامي الحمه...من يجي يشاهد وضعها

الارض من العرك حيدر شلعها
                                  لون نادبته وصدك حيدر سمعها
ابد ماتكضي الدموع....ما تحمل وزنها
__

ما خلص من بعد ابوها........ومانكص ساعه حزنها
وزاد اضعاف وتكاثر.......من وكع محسن ابنها
اتخيل ام وطفل راح.........اتمنت اتشوفه بحضنها

استشهد بهاذ العمر.......عظم الله الاجر
الام اذا تذكر تدر.......عالولد ملحة لبنها

شما يجي بالبال طفل الجان غالي
                                       تركض لمهده وترد تلكاه خالي
حزن مايكضي باسبوع........ما تحمل وزنها
____

استشهدت ام النوايب.....واتركت دار ويتم
مكبره صبح البيت...وبيت ضل بس بالاسم
وروح من حيدر تخلت....من بعدها ضل جسم

عمر خلص وي عمرها.....ميت ويمشي لكبرها
يمشي كل خطوه يعثرها....شلون وحده ضل يهم

من مشت للمكبره وراحت زهرته
                                    حيدر امنالدنيه طفاها شمعته

بعد ما تضوي الشموع.........ما تحمل وزنها
__

ابد ما بالدنيه واحد ......عاش كل هاي المصايب
دار حيدر جان اسمها.....وهسه بس دار النوايب
هاي دنيه وعكس دارت.......سوت بحيدر عجايب

راد يقظي اعلى الظلم........والمصايب والهظم
تالي تظرب عالعظم....وعكس حيدر تحارب

ابد لا تامن بالهدنيه منونك
                                الخانت بحيدر غدا حتما تخونك
حيل رجيجه الضلوع ......ما تحمل وزنها
__
#اللهم عجل لوليك الفرج

الخادم
حمزة صباح الزيدي

فاجعة الزهراء ........اول عاشوراء
من باب الله كرامة بابي....وتعدا عليها الارهابي
فاجعة الزهراء...فاجعة الزهراء
__

ابو الكلمه الماله كلمه الكال للزهراء وان
دفع باب الله عليها وطاح من عدها ابن
الجبان الختم معنى الظالم وحد الجُبن
صار من انطاف عده ومن نسل جدا اسن

اسس ارهابين ....للزهره ولحسين
العفه انطلقت من احجابي....وتعدا عليها الارهابي
فاجعة الزهراء.....فاجعة الزهراء
__

يا مكص كطعت بيدك نور حبل الله المتين
وانطلاقاً من فعلتك اسست قتل الحُسين
تدعي الدين واصوله وانته اصلك ماله دين
من نسل خنزير اشكن صرت ابن واحد هجين

ارجع للانساب......زهرة داحي الباب
الله مكرمهم انسابي...وتعدا عليها الارهابي
فاجعة الزهراء....فاجعة الزهراء
__

النسله طاهر وابن طاهر  ما يسوي هالفعل
وانته اثبت ابن باغي ومو ابن طاهر نسل
جهل خلوك الخليفه يا خليفه اعلى الجهل
باجر المهدي يصلبك على الباب وعالطفل

غايبنه يطلبك......عالنخلله ايصلبك
ريشة جبريل بمحرابي.....وتعدا عليها الارهابي
فاجعة الزهراء.....فاجعة الزهراء
__

ان جان فعلك للخلافه انته ابد ما تستحق
الخلافه اتريد اهلها وانته تصلح للنعق
انته والخنزير واحد ابد ما بيكم فرق
عالخمر جانت قبلتك والحكم خط الافق

باجر بالمحشر...اضرب لو تكدر
ماتكدر توصل لثيابي....وتعدا عليها الارهابي
فاجعة الزهراء......فاجعة الزهراء
__

النار بالباب اضرمتها باجر اتعيشك جحيم
اعوذ بالله من فعلتك جنت شياطناً رجيم
بالسليم اشلون ينحط الانسان المو سليم
باب من اجذوع حقدك عالسراط المسقيم

آيات الرحمن....يسطرها الشيطان
مو من شيمة اي اعرابي.....وتعدا عليها الارهابي
فاجعة الزهراء......فاجعة الزهراء
__

حته عالما عده غيره ما يصح هذا الفعل
والجهل منك تعلم معنى وعلوم الجهل
شوف ياهو اليعلى شانه وياهو ينصه ويالزبل
شلون قران الله بيدك يستباح وينكتل

شنكلك حيره...ماعدك غيره
حسين ابخيمتهم رابي.....وتعدا عليها الارهابي
فاجعة الزهراء .....فاجعة الزهراء
__

اللهم عجل لوليك المنتقم الفرج

حمزة صباح الزيدي

شكرا لله يا عنواني ......شكرا لله خادم اني
عنواني احسين حسين ثق لو عيشن مرتين
شكرا لله ........ شكرا لله
.....................................................................

انه ربتني المجالس چي مدارس للآنين
انه صح ازغير لكن بيه ساكن ياحسين

خطوه بخطوه بدربك حلوه
لوما انته لا ما اسوه

انه بالحب صرت عاقل گلي قابل أن اكون
انه واحد كلشي گله بيك عقله طك جنون

علتني هواي كلمة خادم........تعني المذلول بس مانادم
للموت وياك وياك أنساني وما أنساك
شكرا لله ......... شكرا لله .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مره للمجلس عيوبي بكد ذنوبي من اجيت
بس رجعت ابليه ذنبي مصفي گلبي إتأدبيت

ابچي وانحب گلبي امعذب
لهنانه احضر حته اتادب

انه ابچي دمعي جاري تطفي ناري لو بچيت
فكري سارح بيك انته الضيم شفته اتعذبيت

ماريد هواي حبك نعمه........ تسوه العينين عدي الخدمه
خادم من دون الناس لكن مرفوع الراس
شكرا لله ........ شكرا لله .
.....................................................................

علمتني شلون اوافي وابقه صافي بالوفاء
من كسر ضهرك الكافل ابو فاضل كربلاء

جنت اشكبرك بس انعذرك
سهم الكافل كاسر ضهرك

طاح عالشاطئ كفيلك راح حيلك يالحنين
عالنهر چن طاح عمرك كسر ضهرك يالحسين

ملچوم هواي الله يساعد......... محروك بنار گلب الفاگد
منالخيمه لحد عباس اسود بس شاب الراس
شكرا لله ............. شكرا لله .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لو بده الرادود ينعه تطيع دمعه وانهضم
ابدي اتذكر واخاطر الكه حافر باللطم

اه يا باچر يكسر خاطر
حته المجرم صوت الحافر

صوره اتخيل تجيني تشوف عيني بس نحر
هذا معقوله ابو اليمه اشلون المه بس وذر

يصرخ يا ماي كلمن شافه..... متروسه سهام حته اشفافه
احمر جرحك ما طاب يتجدد كل امصاب
شكرا لله ....... شكرا لله .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
تبدي تتكلم اهم شي يبدي كلشي بالسكوت
احنه هم كل عاشر انضل شكو مقتل بي نموت

تسجله الزهره العنك يقره
الحاضر مجلس گبره تحضره

مو جنون ابيوم عاشر من نباشر نتعض
درس شوك امنتحفه بينه لهفه ويالركض

لا ما ننساك نقسم والله ........ نقسم للموت بامنه الزهراه
ثابت لا ماينشال حبك وسط الدلال
شكرا لله ........ شكرا لله .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اكتمل عقلي ابجنونك ساعه دونك ما اريد
هاذه مو دم بيه يسري حسين يجري بالوريد

اعرف وارضه كلمن حضه
اول خادم انته ابنبضه

عدي سر خليني اخبرك شنهو سرك مو بعيد
انه يوميه احبك وابدي نبضك من جديد

شكراً مولاي هيه الخدمه........ سوتني وياك افضل زلمه
ناصي وبيك اتعليت خادم عد اهل البيت
شكرا لله . ....... شكرا لله .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
#لاتنسوا_صاحب_الزمان_من_دعائكم

#سيدي ابا عبدالله الحسين أنت أكرم من أن تضيع من ربيته

#قصيدة استقبال محرم الحرام 1444هجرية

الخادم
حمزة صباح الزيدي

لابن الزجيه خدام والمهدي خيمه اعلينه
____

هوه اليمشي المجالس بيده
واليريد حسين هوه يريده
اشما يصفي النيه خدمه يزيده
باج للخدمه يعَلك ابجيده

نتواضع لعين حسين للمجلس يودينه
___

شايل ابكلبي حبيب وعابس
اسود اعلى حسين بالطف لابس
عن بصيره الطم ابد مو واهس
ابساعة المجلس اصيرن فارس

سيفي اللطم والرادود عالطايح ايبجينه

____

اله بكل مجلس تطوف عمامه
انروح فدوه لتربته وجدامه
المهدي يفخر من تجي خدامه
تخدم حسين وتعلي الهامه

اشما ننصه لاجلك يحسين بالاخره ايعلينه

__

بروحه عاشور وحركته وظيمه
تسعر ابكلبه لهسه الهيمه
الله يحميه ويسلمه يديمه
فوك كل خادم امان وخيمه

ضاع العمر بس وياك يالمنتظر لاكينه

___

اليقره ويعزي ابحركته وصوته
حسين يالوادم يحظره ابموته
ساعة التشييع كلها ابيوته
المهدي وياهم يزت تابوته

نكضي العمر ويه حسين بالمحشر اينجينه
____

كلشي بالخدمه يخضر باجر
شجرة الدين انروت بالعاشر
صار دم حسين اكبر ثائر
عاشت وعاشت كتبها الشاعر

ما نسكت ودم حسين عالعاشر ايحجينه
_

#لاتنسو_صاحب_الزمان_من_دعائكم

#قصيدة استقبال محرم الحرام1444هجرية

الخادم
حمزة صباح الزيدي

يالجرحك امبجي السمه
و نشرت قميصك فاطمه

اتنادي ابكلبها الدامي. ذبحو اوليدي الضامي

او من كل كتر ينزف دمه

__________

فاطمة ابهاي المصيبة التعبت وجه الارض
تحني الضلوع الكسيرة الماهدت من الركض
الما سلم خنصر عليها اوكف يم حدها النبض
المانشف ساعة ابجرحها وخيلها اعالدم ترض

منجوي الخاطر والنفس
زينب وحيدة ابلا حرس

من ديرة تمشي الديرة. ومامش اخو ولا غيره

والطف جثث الها انترس

__________

الرابي بحضاني ودلالي اطشر ابكيف السحك
رمح صاير بين نحره او رمح نص كلبي يدك
الجان بلسم كل حياتي من الطعن ما ينشبك
كلها فزعت على حسين وبالخيم شب الحرك

اشكد منسلب منه الحيل
من فرهدت جسمه الخيل

طايح او ماكو اسم الله. اوحافر ابصدره اشثكله

او عالرملة متبدي الهيل

__________

ابهل الرزية عليك يبني الفطرت حتى الحجر
ما توانت لحظة وحدة اوكطعت اعداك النحر
ايجلجل الليل أو يصبح وانت منك ماكو أثر
جثة فووك الكاع ثاري او مامش الشالك عبر

حرمومك حتى من الهوه
او طيحوا من جفك لوه

ما ظل عزيز على حسين. مو دمع دم تجري العين

او مذبوح يا وجه الضوه

__________

يا حزن يشرح عبرتي او يا جرح يرهم الي
غصب ماخذوة الحراير وانه طحت ابمحملي
القتل عادة علينه لا جن موش حرمة التنولي
من المصايب كلب زينب طايح أو ظل ينجلي

ما صح مثل ظيمي صبر
شيطفى ناري ابهل اليسر

كلبي على ذيج اضعوني. اشما طاحو يلجموني

او لا خيمة ضلت لا عذر 

__________

حمزة صباح الزيدي

يانور للعتره
مظلوم ك الزهره
يا فظلك اشكبره
صادق زمانك...صادق زمانك
__
اسمه علينه يمر
تعلمنه منه الصبر
ما يسوه شي بالعمر
لو ما حدث تنتظر

المن تعيش افتهم
والمن تريد العلم
بين الاهم والمهم
يحتاجك لكل عزم

يا راي بي حكمه
يا جوهر ابعلمه
معروف من اسمه
صادق زمانك ...صادق زمانك
_
جعفر الصادق اله
بكلب العلم منزله
وخدوده امبلله
لمن تمر كربله

زينب ذكرها وحزن
هم ما صفاه الزمن
مرت عليه المحن
زادن ابد ما كضن

صامد بقه ايكابر
يبجي على العاشر
ملجوم عالحافر
صادق زمانك ......صادق زمانك
_

بوكتك جنت مدرسه
اكبرهم امدرسه
ذكر الزمن لو نسه
ما فاركاك الاسه

وعيونك الدامعه
بوكتك جنت جامعه
كل للزمن سَمِعَه
وهاذ الحجي يطَبعَه

سَموك وافضالك
ماتنعد ابجالك
والدين حامالك
صادق زمانك ...صادق زمانك
_

مثل الحسن موتتك
ظلت تون شيعتك
كل الفتن اذتك
كاسرهم ابطيحتك

بكلب اليحبك عشت
يا جعغر وما متت
بالينبظ اتربعت
وبدمنه صادق صرت

ياموت ما عافك
مسموم واشفافك
حزنان واوصافك
صادق زمانك ...صادق زمانك
__
متروسه روحك حزن
عالزهره تبجي وتون
تخنك يكلمة وان
عاقبته صارت فان

الضدكم ذكر مال اله
لا نسله ولا هله
ما ينعرف اوله
كلمه ابشرف ماتله

يا سور بعلومك
معروف من يومك
والدين مرسومك
صادق زمانك...صادق زمانك
__

#لاتنسوا_صاحب_الزمان_من_دعائكم

#السلام على صادق ال بيت محمد(ص)

الخادم
حمزة صباح الزيدي