ЯҲУДИЙ ИСЛОМГА КИРДИ

Бир яҳудий Али (розияллоҳу анҳу) билан низолашиб қози Шурайҳнинг олдига келди. Яҳудий Али (розияллоҳу анҳу)дан олган совутни ўзимники деб даъво қилар, аммо ўзини ўзи алдаётганини ҳам билар эди. Ҳукм чиқариш мажлисида қози Али (розияллоҳу анҳу) билан яҳудийни бир хил мақомда жойлаштирди. Шунингдек, Али (розияллоҳу анҳу)нинг ўғли Ҳасан (розияллоҳу анҳу)нинг гувоҳлигига қулоқ солмади. Бу одилона муносабатдан яҳудий англадики, қози ҳазрат Алига мўминлар амири бўлса ҳам, тарафкашлик қилмас экан.
Дарҳақиқат, яҳудийнинг қасамини инобатга олиб, совутни унинг фойдасига ҳал қилди. Бундай исломий адолатдан таажжубланиб кетган яҳудий ўзини тута олмай ҳаяжонланиб кетди. Шу вақтнинг ўзида мусулмонларга адовати сўниб, мусулмон бўлганини эълон қилди. Совутни эгасига – Али (розияллоҳу анҳу)га қайтариб берди.

“Расулуллоҳ соллаллоҳу алайҳи ва саллам ҳаётидан лавҳалар” китобидан.

Дунёни қутқармоқчимисиз?
Қизга тарбия беринг!

Дунёни гўзал қилмоқчимисиз?
Қизга тарбия беринг!

Жаннатга кирмоқчимисиз?
Қизга тарбия беринг!

Ким Аллоҳдан дунёлик истаса, у хисоб-китоб куни Аллоҳнинг ҳузурида кўпроқ туришни хоҳлайди, деганидир (яъни, бойлигини керакли жойга ишлатмаса, узундан-узоқ ҳисоб беришга мажбур бўлади).
Бишр Хофий.

Сукут сақлашнинг етти фойдаси

1. Сукут — ҳеч қандай ҳаракатсиз ибодат.
2. Сукут — тақинчоқсиз зийнат.
3. Сукут — салтанатсиз ҳайбат.
4. Сукут — деворсиз қўрғон.
5. Сукут — бирор кимсадан узр сўрашга беҳожатлилик.
6. Сукут — икки елкадаги фаришталарга истироҳат.
7. Сукут — жоҳилларнинг айбини яширадиган тўсиқ.

Бу ҳаёт кучлиларники. Билаги эмас иродаси кучлиларники. Ҳаётга енгилмасдан куч билан барча синовлар олдида туриш керак. Битта синов келса бир бурчакда бўшашиииб ўтирсанг — ўтираверасан.

Шунинг учун ўзингга кел, кўзингни оч, мақсадингни эсла, қаттиқ ёпишиб ол мақсадинг томон кетган йўлга. Йўлингдан ёнғин чиқадими, тиканми, барчасига тайёр бўл. Кўп-кўп дуо қил!
Кучли бўл!
Йиқилма!
Йиқилсанг — тур!
Югур, югуролмасанг — юр, юролмасанг — эмакла.
Нима қилиб бўлса ҳам бор мақсадинг томон!
Инсонлардан ёрдам, дастак кутма!
Фақат ва фақат Ўзидан ёрдам сўра!

Аллоҳ муваффақ қилсин!

Кимнинг умри узун бўлса, яхши кўрганларини йўқотади.

Изоҳ. Ҳамманинг умри бир хил – узун бўлиши имконсиз. Шунинг учун узоқ яшаган инсонни турли ёшдаги яқинлари, суйганлари бир-бир тарк этади ва у тенгқур замондошларидан, ҳатто ўзидан кичикрок ёшдаги яқинларидан ҳам ажраб, ёлғизланиб қолади. Халқимизда ҳикматли бир гап бор: «Ёлғизлик Худога ярашади». Атрофингда сени тушунадиган, англайдиган кишиларнинг қолмаслиги оғир ғам, бу даҳшатли ёлгизлик! Лекин шундай бўлса-да, инсон фитратидаги узоқроқ умр кўришга бўлган майл ҳеч қачон сўнмайди.

Анас ибн Молик розияллоҳу анҳу Пайғамбаримиз Муҳаммад алайҳиссаломдан ривоят қилади: «Одам фарзанди соч-соқоли оқариб қарийди, аммо икки хислат унда ёшариб боради: дунёни исташ ва орзу-ҳавас».

Яна бир ривоятда: «Икки хислат яшариб боради: мол-дунёга ва узун умрга бўлган ҳирс» (Имом Муслим ривояти).

Демак, узунроқ умрни орзу қилмайдиган инсон йўқ экан, энди бу ёғида яхши кўрганларингизни йўқотишга сабр қилиш ва даҳшатли ёлғизликка кўникишга тайёр туринг. Яна бир синовга ҳозирлик кўринг, сиз эмасми душманингизнинг эгилиб, мағлуб бўлишини, арзимас ёрдамга муҳтож бўлиб қолишини, хорланишини хоҳлаган, шундай экан, умрингиз узун бўлишини орзу қилинг, барчасини ўзингизда топасиз..!

Шеър:
Умри узун бўлишин орзу этса ким
Ясасин ўзига сабрдан қалкон.
Суйганларин йўқотишга сабр этсин,
Аламдан ўртанишга топсин имкон.
Ким узоқ яшаса, ўзида топур,
Душманлари учун соғинганини
Кўзлардан нур кетур, оёқдан мадор
Кўрур қуриб-қақшаб қолган танини.

“Унвонул баён”дан.