ليلة العاشر..

حرگو اخيامك ..
خويه گـوم انظر عليهم حرگو اخيامك
داسـو ايتـامك ..
بخيلهم ياخويه اجونه  وداسو ايتامك

وانـه محـتاره شسوي  وي الزلم هايه
خويه ماضلـتلي خيمه  ولا ستـر رايه

……………………………
حسين بس گطعو وريدك خويه اجونه
ومـن جـهـات اربــع زلمـهـم حــاوطونه
بـخـيلـهـم  وبـنــــار  تـلـهـب  روعـونـه
وانـي بـيـن الزلــم اصرخ ويــن اخـونه

صعبه يبن امي ..
بهل عمر اركض واطيحن صعبه يبن امي
محـترگ هدمي ..
بالخـيم اطـفي يخـويه ومحـترگ هـدمي

وشت يخويه عقلي مني  ونفگد رايه
خويه ماضلـتلي خيمه  ولا ستـر رايه

……………………………
گـمت ويـه الـنـار اتـغـالب يلـحسين
هي تركض واني اركض عالصواوين
ولحـكـتـهن گــوه طلـعـت النساويـن
لچـن عـنـدي بالحــرگ ايتـام ميتين

النـــار غـلبـتـني
وخذت منـي چـم يـتـيمه  النـار غلبـتني
سياط  البـمـتني
اركض وتمنـعـني گـوه  سـياط البـمـتني

السوط من ايطگني اطيح  ومالي تچايه
خـويه مـاضلـتلي خـيـمه  ولا ستـر رايه

……………………………

ظـهر عاشورك ذبحني خـويه ضيمه
من الخيم تجمعنه ماضل لينه خيمه
واني والنسـوان نركـض وسط هيمه
والـيتـيـمه التركـض مچـلـبه بـيـتيمه

ركـضن وطـاحــن
خـوف البنـيات بالطــف  ركـضن وطـاحـن
من الهضم صاحن
عمه وين حسين ابونه  من الهضم صاحن

وعنك سكينه ورقـيه  يسألـن هوايه
خويه ماضلتلي خيمه  ولا ستـر رايه

……………………………

عـمـه گـتـلـهـن ابـوچـن على الـغـبره
موسـد  ومنـگـطع منـه حسين نحره
عمه ذيچ الخيل  داست فوك بصدره
وصارت اضلوعـه يويـلي جـوه ظهره

منـتـثر جسمه
حسين مايگدر يجيچن  منـتـثر جسمه
منطحن عظمه
بالحوافر عمـه ابوچـن  منطـحن عظمه

وراح ياعمه من ادينه، صعبه الحچايه
خويه ماضلـتلي خيمه   ولا ستـر رايه

……………………………
خويه چـا ويـن الگـمـر كـافـل ضعـنه
وينه وعده كـافلي الـدگ صدره الـنه
خـل يجـيـنيه يـردنـه عباس الوطـنه
شلون ضيعه ويالغرب ياخويه ضعنه

وين ابو فاضل
يلحـگ الزيـنـب سبـوها  ويـن ابـو فاضل
مايجي الكافل
يشوف حال اخته الغريبه  مايجي الكافل

خـل يـرد ماردنـه گـله  من النـهر مايه
خويه ماضلـتلي خيمه  ولا ستـر رايه

……………………………

حسين اذا ماتـفـزعلـنـه  ياهـو لينه
بـداعـت العباس الحـگـنـه انسبـينه
خويـه نظـرات الشماته  تصد علينه
وياوكـت يبـن امــي نـتـستر بدينه

بالهـظم صحـنه
بـلا أهـل ضلـينه تالـي  بالهـظم صحـنه
وللـيـسـر رحــنه
جسومكم عفناها صرعه  ولليسر رحـنه

لليسر راح امشي خويه الروس ويايه
خويه ماضلـتلي خيمه  ولا ستـر رايه

الشاعر عقيل الحسناوي..

يآ كَربلا ماذا جَرىٰ
ضَيفٌ بكِ لَم يُنصرا
ما هٰكذا الظَنُ بكِ
هذا حُسينٌ بالعَرىٰ

اشگال گلبج كربلا
خليتي ابو اليمة بفلا...... ودايرته الخيول
يا كربلا شنهو العذر
رد للخيم خالي المهر ...... گلب اخته شيكول

فوك الصحاري.. ضل جسمه عاري
اشلون المصيبه تهون
الهضمة الجبيره.... تلمة الحصيره
هذا ابن سيد الكون
...................................................................
لمَ الفراتُ جآرِيا
وَذا حُسيناً ضّاميا
مآ حَنَ قَلبٌ عِندكِ
كَيفَ الحُسينُ عاريا

يا كربلا شعندج گلب...... خليتي ابو اليمه بغرب
ما مش غطه اعلي
بعد الذبح ضيم اليجي.... يسحك على صدره اعوجي
ومحد يباري

ع الغبره جسمة... محد يلمة
وازها زينب ليل
صابتها خوفه... تلمة تعوفه
خافن تهد الخيل
.....................................................................
وصُبْحُكِ كَم جآرحُ
فَكَيفَ حُزني يَبرحُ
يآ كَربلا أعييّتني
مآ ذَنبُ طفلٍ يُذبحُ

اهتز كلبه جن هزة سعف... لمن حليب امة نشف
وفرفح على الماي
ما صايره بواحد قبل....... ست أشهر يذبحه النبل
ما تنعقل هاي

شيفك حزنها.... الميت ابنها
صعبه بعد ترتاح
ضل مهده خالي.... بس لا تبالي
تلوليه فوك رماح
........................................................
فِي بَحرُ فِكري غارقُ
كَيفَ الخِيامُ تُحرَقُ
أينَ تلوذُ زَينبا
وأيُ بابٍ تَطرِقُ

الما طالعه بغير الكفل...... اهنا بده بيها الخجل
من شبت النار
تضل بالخيم كلش صعب..... وبس تطلع تلاكي الغرب
للحيره اثار

ليل وضلامة... وكَثره الليتامة
زينب بعد شتصير
يهود حزنها.... لا ما اضنها
جا حكها من تحير
................................................................
ذاكَ العجابُ الاَعجَبُ
فَوقَ التِلالُ زينبُ
مَنْ ذا يُراعي قَلبُها
وأهلُها قَدْ خُضِبُ

يا كربلا هنا بت علي...... لحكوا تنادي ياهلي
وما تلكة عوان
والخيل غارت ع الخيم....... وما هو شيال العلم
والحومة دخان

ليل ومصيبه... وزينب غريبه
خوف وبواجي ايتام
ما عدها خيمة..... والدنيا هيمة
ومدري الزمان شضام
................................................................
مرتضى عامر الشمري

بسم الله الرحمن الرحيم

بمناسبه ذكرى شهاده مولانا الامام موسى ابن جعفر ع تم نشر اكثر من 400 من القصايد الخاصه بهذه الذكرى على الرابط التالي

https://t.me/+-3msO083Nvg1MTMx

خويه حُسين . خويه حُسين . خويه حُسين

جابتني الخوه واجيتك
ملهوفه من اعتنيتك
بكل عثره يتخشن الجف
متعبتهه الچويات اخيتك

زينب يا چبيرة شان . مختنگه بهوى الدخان .
الخيم محترگه ماكو امچان . اليطفيهه ويطفيني

لاگاني التعب مبحوح . منك مايريد يروح
طَلعت انه وي طَلعت روح . اخيي وروحي وحسيني

معاتب الخوه يريد حيل
خويه خويه خويه
شحچيلك وملگاك خيل
خويه خويه خويه

…………………………………….
تعبانه وليهسه اكابر
خويه اختك بين الحوافر
تعبتك كد ماصحتلك
وخليتك هم بيه حاير

ما اندلك ارفع ايد . الباتر خنصرك شيريد
لا تهتم يخوي الحيد . غصن من تنكص تخضر

متوزع وذر ع الكاع . يم الخيمه شفت اذراع
حسين بكبره راح ابساع . حوبت ساده وتشور

فر الرحه من حسين مات
خويه خويه خويه
كبالك سمعنه الخارجيات
خويه خويه خويه

…………………………………….
معاتب خلص بالبواچي
وراحن فرهود التراچي
مشرومه اذن الرقيه
ترضوها يهل الخواچي

نسوانك خذتهه اصياح . الواكف بالخيم ذباح
يشوفك ميت ومرتاح . ويصيح اسبوها عايلته

حتاريت بچوي النيران . لولم جسمك الذبلان
زينب رادتك عوان . حملي الوحدي شايلته

مت عيني يلكاسر كفاي
خويه خويه خويه
ودعتك الله بلايه ماي
خويه خويه خويه

…………………………………….
ياديره المامنهه ديره
چلمتهم كلش چبيره
من گالو هاي الغريبه
بلا والي وبلا عشيره

صدك مسبيه مو احلام . گالو خل تطب للشام
خويه حسين هاي ازلام . تضربنه وتسب بينه

شفت شكد اليموتون . الناس الهم عزه يقيمون
بس انه بهاي يسّبون . نعمالله الراس حامينه

وهم سوو الماصايرات
خويه خويه خويه
نسوان بالهيمه تباّاات
خويه خويه خويه

…………………………………….
عباس القلعاوي

عباتج والخيم وثنينهن سترج
محتركات وانتي ايتامج بكترج
ــــــــــــــــــــــــــــــــــــــ
عباتج والخيم يابت علي الكرار
سترج هالثنين ودوت بيهن نار
شلون بهل فله وعدج ايتام زغار
اعتبي اعلى اخوتج يازينب نعذرج
ــــــــــــــــــــــــــــــــــــــ
نار البالخيام ونار تاكل بيج
وتجيبين هاي الخيل تسحك ذيج
يازينب يخويه عمت عيني عليج
محد من اخوتج عدل ويحضرج
ــــــــــــــــــــــــــــــــــــــ
نوبه اعلى النهر نوبه اعلى جسم حسين
من الخوف شفتج هايمه تركضين
اسمعـــج وين اخوي الجابني تصيحين
مابين الزلم والصوط اكل ظهرج
ــــــــــــــــــــــــــــــــــــــ
من طحتي اعلى وجهج صحت اخ وصاح
وياي الحسين وكام مثلي وطاح
شلون نكوم ليج وروسنه اعله رماح
وراحت فدوه يختي اعمارنه لعمرج
ــــــــــــــــــــــــــــــــــــــ
احشمنه واشوفه مكسرة ضلوعة
ويحشمني ويشوف جفوفي مكطوعه
عليج تسيل دم دموعي وادموعه
من فوك الرماح ورسونه تنظرج
ــــــــــــــــــــــــــــــــــــــ
بين الخيل اشوفج مدري شتدورين
مدري على الخنصر لو على الجفين
روحج رايحة وكل ساع تنهطرين
متدوهنه وتاه منالوجل فكرج
ــــــــــــــــــــــــــــــــــــــ
يزينب وحدج والخيل حاطت بيج
شافت طاح اخوج وكلها ركظت ليج
تنطكين وانه تشوغ روحي عليج
وهيسه بظهري كل سوط اليجي لظهرج
ــــــــــــــــــــــــــــــــــــــ
هد حيلي النذل من طكج اعلى العين
وانه اعللنهر والحيــل اجيبه منين
عميه عيــوني ساكت وانتي تنطكين
وجدامي الشمر يتعمد يصطرج
ــــــــــــــــــــــــــــــــــــــ
يربات الحيود الماتعرف الخوف
طكاج الشمر وعيون اخوج تشوف
يخويه اتعذرج مـا بالزنود جفوف
ولا بالروح رده وترد وتنصرج
ــــــــــــــــــــــــــــــــــــــ
شلون الكومه للمجتوف بسهامه
وبعد لاعين لاجفين لاهامه
مو عباس اخته تلوج جدامه
وبالمقطوعه اديه يازينب شبصرج
ــــــــــــــــــــــــــــــــــــــ
يبت المانقاسو بالوغه برجال
الدنيا افترت ومن حال صرتي بحال
وسفه اعليج شدو معصمج بحبال
وصرتي بايد وادم ضيعت كدرج

رائد الناشي

#اللهم_عجل_لوليك_الفرج

#رئيسية_قميص_حسين

الزهره الليله متعوبه
نشرت بالسمه ثوبه
اما من ناعي وياهه

تنادي بلونه المدمه
يمه حسين يا يمه
يالخادم تلگاهه

جابت ثوبه الليله الزهره .....بي اثار الخيل العشره .....وبي من زينب دمع العين
مدمعها اعله الثوب تسيله...... شبقى بگلب الساده الليله.....ام حسين وتنعى حسين

القميص النشرته ام حسين اكو بردنه اثر خيال
گوه رفعته الزهراء مثل حسين ما ينشال
نعتله بصوتها المبحوح نواعي تمرد الدلال

گالتله يبعد امك
حار وما برد دمك
وجاها مختنگ طٰه

گالتله يبو الامه
حسين شضال بجسمه
يالخادم تلگاهه
.
.
.
.
تشتم بي وتزيد اللوعه.....وكل ما شافت دم اضلوعه ....تشهگ شهگه ترجف المات
ام ضلع الما ملتم لسه ....شافت بجزائه شكم رفسه.....وفوگاهن شافت طعنات

يم خاصرته بي فتحه چنها فتحت اردانه
فرس محنوس سواها حين الهوى بميدانه
من نِظررتها صاحت صوت هز العرش وأركانه

صاحت صوت واتألم
ضلعها اللسه ما ملتم
وضل جبريل ينعاهه

عالمذبوح عالمذبوح
ماخذهه التعب والنوح
يالخادم تلگاهه
.
.
.
.
هاي الزهره ياهل الوادم..... تستأنت لو شافت خادم...يبچي اعله حسين المنهوب
الطم واسمع هاي التهظم ...بصدر حسين الحافر يلطم ....اسلب حيلك للمسلوب

خيل ثگيله اجت لحسين منها الگاع تتفطر
صد الها ويريد يگوم لچن يا ناس ما يگدر
بعد ما سحگته وعبرت الزلم ضلت عليه تفتر

واحد يجر بثيابه
واحد بالحجر صابه
وبصوابه الردي اتباهه

واحد يجر بالخنصر
وامه بالدمع تنظر
يالخادم تلگاهه
.
.
.
.
شوف بگلبك هاي الحيره ....شاغت روحه شوغه جبيره .....من صابوه بمثلث حار
حيره بروحي يا هل السامع ...شلون انشال الثوب الطابع ...من جسم حسين المحتار

القماش اعله الجرح يطبع وما ينشال الا بماي
شلون انشال ذاك الثوب واجروح الحسين هواي
جزء من عنده اظن ضل بي حين انرفع من مولاي

الستر ضل عاري عالتربان
يضيع بكربله العطشان
وجروحه الرمل جواهه

عجاج الخيل سد عينه
حضرت فاطمه تعينه
يالخادم تلگاهه
.
.
.
.
حين الصاحت زينب عالتل ....وهوه من السيافه امعلعل ....گام وطاح اتلث مرات
كل ما گام الها يرمونه ...الحاجب هادل فوگ عيونه ....مات حسين من الحسرات

سمعت صوت من عنده ردي بداعت الزهره
احفظي اعيالي من عدهم سياط اهواي متحضره
فجأه ولن شمر قادم طبر نحره اثنعش طبره

وزينب ردت من التل
الخيمها والعدو حول
وعلت نيرانه بسماها

الجيش اتوجه اعليها
اجت ام الحسن ليها
يالخادم تلگاهه

الشاعر عبدالله الشويلي

الله يعينك مالك معين
وگومك على الغبره مطاعين
☆☆☆☆
اهلك عالوطيه وكل الأصحاب
چن اورود طاحو فوگ التراب
يسمعونك يخويه ومات الاجواب
إلا من ناصرٍ چا وين الاطياب
شدة چبيره ٠٠ ياخو الأميره ٠٠ مابقه ناصر الك
وكل النواظر ٠٠ چانت تناظر ٠٠ يالمحمد  قبّلك
وينه الي كاتب ٠٠  وين الي جاوب ٠٠ وينه ذاك الراسلك
انت الفديت الروح للدين
وگومك على الغبره مطاعين
☆☆☆☆☆
نايم عالرمل وادري الرمل حار
ماتنهض يوالي وتنظر شصار
حاطتنه الزلم من كل الاكتار
وبخيامي يخويه شبت النار
وظليت انادي .. آيافؤادي .. يااخي ان كنت حيّ
ادرك عيالك .. شنهو شجرالك .. يالرحت من بين اديّ
وعيوني غارت ..كالجمره صارت..ما شفتلك ياخويه فيّ
وين الهواشم تحظر الحين
وگومك على الغبره مطاعين
☆☆☆
عمت عيني بقيت تلوج يا حيف
من كثر الرماح وضربة السيف
تمنيت الأشوفه موصدگ طيف
برد جسمك يخويه وحنه بالصيف
متعوب اشوفك ٠٠ صعبه ظروفك ٠٠بكل كتر انظر جرح
يالگاضي حيلك ٠٠ نام بدليلك ٠٠چم سهم وشچم رمح
بروحك تكابر٠٠ وجرح الحوافر٠٠ مثله ياشده تصح
عشرتنه خلصت وسفه يحسين
وگومك على الغبره مطاعين
☆☆☆☆☆
يبعد اختك علامك تضرب الگاع
اظن كثرت يخويه اعليك الاوجاع
گرب حدها المنيه والأمل ضاع
صرت بعيونك انظر حان الاوداع
وانـظر تعنه ٠٠ ويمك تدنه ٠٠ وسيـفه بيمينه الشمر
نيته يذبحك ٠٠ وانت الّي جرحك ٠٠ ينزف أوما مستقر
لحظه واشاهد ٠٠ يبن الاماجد ٠٠ راسك انگص بالسمر
من بعد عينك تعمه هل عين
وگومك على الغبره مطاعين
☆☆☆☆
يخويه وداعت الله وحان الفراگ
دمع عيني بغيابك صار حراگ
ليليه يغالي الوجهك اشتاگ
أنفطر گلبي برحيلك والصدر ضاگ
وامشي سبيه ٠٠ وتنشد اديه ٠٠ ويجرح چفوفي الحبل
وآنه الاميره ٠٠ اصبح اسيره ٠٠ وتالي اصعد عالهزل
والماهو منه۰۰ يحدي بضعنه ٠٠ ودمعي مابطل يهل
يبن امي راح ادخل دواوين
وگومك على الغبره مطاعين
☆☆☆☆☆
حيدر بشار الدراجي

#فتحت_عزاء_اوشور_كعده_ليلة_الحادي_عشر

تعبت هواي هاليوم واجيتك امشي كوه
عطشت عليك يحسين وجابتني الاخوه

جيتك اتعثر خويا مچويه واني علويه واختك يحسين
احترگت اخيامك وانطفت بيه صاحو عليه عباسج وين
تطلب اميه وامك الزهره شكبر هالعبره يا ماي العين

جيتك بحرگ عباتي
عالرمل عفت خواتي
طشرهتن امنياتي
غارات الخيل

ليش اطشرت ليش ما ضلت امروه
عطشت عليك يحسين وجابتني الاخوه

.
.
.
.
شباقي من عندك فدوه حاجيني لا تبچيني تعبني اجفاك
سلبو اهدومك وانسلب گلبي احجي يا تعبي شنهو الاذاك
اصبع منَ ايدك منگطع توه والله حلوه امشي بلياك

رحلت السبي طويله
آنه ما بديه حيله
الهزيله تعرج الهزيله
ومو مالت سوگ

السوگ يريد رجال وإني وياي نسوه
عطشت عليك يحسين وجابتني الاخوه

.
.
.
.
تعثرت ببني وطحت موجوعه جفوف مگطوعه شفت اعله الكاع
كَبراني التل صعدته تكتل النفس ما ينزل للريه بساع
ردت احب صدرك وشفته ماهوه هايه مو خوه مابيها اوداع

مفرفحه يخويا أجيتك
بيضه عالرمح لحيتك
انه اخيتك أنه اخيتك
والخوه تريد

أنه هد حيلي عباس وألطف يريد قوه
عطشت عليك يحسين وجابتني الاخوه

.
.
.
.
تعبو راسك وتعبو گلبي محد بگربي كلكم ميتين
كلها متعوبه وحيلي مو كافي الشمر متعافي شايل سوطين
صحت يا يمه وامي اجت ليه تمشي محنيه تصيّح يحسين

بحسره اسمك انه اندبه
جابت امي ماي إشربه
لا تردها صعبه صعبه

مثل ما طحت عالكاع فوگك امي تهوه
عطشت عليك يحسين وجابتني الاخوه

الشاعر عبدالله الشويلي

چم اخ الصحت يحسين
بس الخيل ماتسمع
شمأذيك من عدهن
الحافر لو حرم تطلع
اخ وأخ حد الموت
بس الاخ ماتنفع
… ..
چم اخ الصحت والموت
غطه الدنيا والبيها
اختك عالتراب اتنام
هيچ الوكت تاليها
لاانته ولاعباس
چاياهو اليحاميها
…… .
يحسين الشمر بالسوط
من بعدك تولاني
اگابل راسك المگطوع
يمه ونكت احزاني
هم شفت الزمان شلون
عگبك وين وداني
… .
وحدي بلاخيم يحسين
لاخوان تحميني
اصيح ولاوصل فزاع
بيده ايشد صواويني
حسبالي من اجيت وياك
من ارجع توديني
…
يحسين الليالي هواي
بعدك حيل بچني
اجيت وصار بيه الصار
وليالي الظيم ظكني
اجيت وياك يبن امي
وبس نسوان زتني
……
الماعدها ولي بالناس
تمشي بحسره مخنوگه
وانه بكل نفس ويلاه
راحت بالي مبيوگه
محروگ الگلب يحسين
وعباتي بنار محروگه
……
علي الحاج الصبييحاوي