لەوە زیاتر دڵم لات بێ، سەرمات بێ هەستی پێ ئەکەم
تۆ گەرووت پڕ بێ لە گریان، من لێرە دەستی پێ ئەکەم!
لەوە زیاتر خۆشم بوێیت، گەر نەشبیت بە خۆشەویستم
لە هەر شوێنێکی دونیا بیت ترپەی دڵیشت ئەبیستم

•ڕەنج سەنگاوی•

ئەو
بەرماڵێک،
توورەکەیەک باروود،
پشتێنێکی خۆکوژی!
من
قاپێک جاجیک،
کاهوویەک،
پێکێک عەرەقی مەستەکی!
ئەو
تا کوشتنی دوا پەپوولەی ئۆقرەیی،
تا لە خوێن گەوزینی دوا ئاوازی کەمانچە،
وێرانی.
من
تا ئەستێرەکان دەچنە ژووری نووستنەوە،
تا مانگ بەردەبێتە دەریاوە،
گۆرانی...

•قوباد جەلیزادە•

دڵ ئەگەرچی تەنگە، جێگاتە! وەرە :)

•هونەر•

وتی لە شەقامێکی هەولێر پیاسەم ئەکرد، کوڕێ پێی وتم: بەو هەموو جوانییەوە، کوو درت دێ بە پێیان دەڕۆی؟

خراپ ژیام
هاتووم
بەڵکوو لە پاڵ تۆدا خراپ نەمرم.

•شێخە ڕەسووڵ•

وتم: خۆشە بە ئوممێدی وەفا جەور و جەفا، دەیوت:
بە سەر چوو عومرم و نەمدی وەفایەک لەو جەفاکارە!

•مەحوی•

ئەسیری زولفی خاوی تۆم، شەهیدی ڕەمزی چاوی تۆم
ئەمن گیراوی داوی تۆم، لە سەد جێ دڵ بریندارت

•وەفایی•

هیچ پێوەندییەکی خۆشەویستی لە نێوانمانا نییە
بەڵام حەزم لە گفتوگۆیە لەگەڵی
و گرنگیی پێ ئەدەم
و هیوام بینینیەتی
و غیرەی لێ ئەکەم
بەڵام من خۆشەویستم ناوێت
چونکە خۆشەویستەکان هەمیشە جێت ئەهێڵن...

•نزار قەبانی•

ماچت دەکەم ئەی گیانی خۆم!
ماچت دەکەم
قۆرتی چەناگەت ماچ دەکەم
نەرمانی گوێت،
گۆی مەمکەکانت ماچ دەکەم
زۆر تینووم
لەگەڵ ئەوەی چاک دەزانم
مەمکەکانت وەک تۆپه خوێ،
تا ماچیان کەم
نەمامی زەردی تینوێتی
له ئێسکمدا پتر دەڕوێ...

•پەشێو•