اربعين مولاتي العقيله زينب صلوات الله عليها
---------------------------------------------------------------
تسـعه وتـلاثين يـوم
گلـبي تانـاكـم تـجون
خلصت عـمـري اتـاني
بموتي هم تتعطلون

زيـنـب يا اهـل زيـنـب تـتـانـيكـم
تشعلون الـبـخور بكل صوانـيـكـم
اتـهـمـس مـشي رجلـين اليـمرون
اشگد مرن علي بس ماهي رجليكم

اجو شماتي يـهلي ومـا اجيتو
علي هل السنه هم تعطليتو
دريتو بموت زينب مو دريتو

==================================
تسـعـه وتـلاثيـن شـمـعه
خـلـصـن وي الـدمــوع
الاربعـيـن الـليـله مالي
يخلصن الليله الشموع

شني ذنبي واضلن يهلي مهضومه
غير المات لازم راحته بنومه
لـيش انـه اضل منتضره واحد جاي
واموت بحسرتي من اهلي محرومه

اليعيش ابـغربته بالموت يـرجـع
لهله ومن حنين اخوانه يشبع
بس اني غربتي تشيب اليرضع

====================================
رغم كلشي المر عليه
لماضي اهلي لسه احن
اشگـد حچي يوجع دليلي
ولله ما گلته من اون

الما يحچي يخوتي تموته الحسره
الما مات وي اهله عيشته مره
شنفع النفس لو مات الاعز منه
وزينب ماتت وللخوه منتضره

يشيوخ الغري وهيبة السادة
جاري يطالب بطگت اجداده
نمتو وطلعت عيون التماده

====================================
تـعـبر اعلـيـه الشـمـاته
وبالـغـريـبه يسـمـعوني
وانهظم هظمت خيامي
ودم يگـطر من عيوني

يالحتضرون وادم حضرو اختكم
بحليب الزهره يا هاشم نختكم
تحضرون لگبرهه وليهه تقرون
غربه الناس يمهه استاحشتكم

واضل اتخيل اخواني اجوني
انسبيت ومتت وأهلي ما لفوني
انه اول حرمة اخوتي الضيعوني
====================================
خادم مولاتي الزهراء ص
✍ ابو فضه الحميداوي

لسان حال مولاتنا العقيلة زينب (صلوات الله عليها)
##################

تعبانه واريد اليوم اشكي لهلي عن تعبي
مو انتم هلي يحسين شو عنكم بعد دربي
اليموت بموتته يرتاح بس وياي ما صارت
مدفونه بغرب والشام بعده يحرگ بگلبي

فارغ ضريحي من اليزورون
ولد السبوني بصحني يمشون
لاكو لاطم لادمع العيون
هاي السنه مهضومه يم عون

تزمط بيا ناس المدفونه بغرب تزمط بيا ناس
وعدواني حراس من تالي الوكت عدواني حراس

#####

هلي من الهظم مليت من الغربه خلصوني
تحملت الجرن كلهن بس بهاي اسمعوني
اليسبونه بحياته تهون بس صعبه سبي الميتين
ما رحموني اهل الشام حتى بگبري بچوني

كون اليموت يموت گلبه
ولا ينهظم من حچي الغربه
مو ضال بين الغرب صعبه
وعن اخوته مبعدين دربه

الماله خوان يضل ماخوذ حگه الماله خوان
ويريد عوان اليبچي بكل صباح يريد عوان

#####

كل يوم اليمر كل يوم يسبيني ضلام الليل
لهسه الشام احس يگول من عدنه نريد تشيل
بت الزهره اخوي حسين ولا زاير صفه لگبري
متت من عندي شيردون وليش الشام بيه يعيل

ما يخلص من الغربه اليموت
وماكو بضريحي ولا صفه صوت
الهاظمني ماكو زاير يفوت
مگطوع گلبي موش البتوت

ولازاير الفات لزينب يا هلي ولا زاير الفات
ما يخلص المات ما دامه بغرب ما يخلص المات

####

احشم بالبقى من اهلي واعرفه يفزع لعمته
صدگ تبچي علي خدام وكل واحد علت ونته
بس دمع الغرب يبقى مو دمع اليطيب اجروح
افزع عمتك تعبت وغيرك ما بشر صحته

صحت عله اليطيب الخواطر
يالمهدي عمتكم تناطر
اضلم ضريحي اليوم صاير
بس خافيه يهدمونه باچر

ما بين الأجانب لسه وبعد ما بين الأجناب
لا هاد لا طاب جرح السبي لاهاد لاطاب

######
✍️ابو فضة الحميداوي

‏مقطع صوتي من ابو فضة الحميداوي

لمولاتي ام البنين صلوات الله عليها

##########

يقارورة وفه وقطب المحبين
مسلم گلبي بيدچ يم البنين
يا اول خادمه وتخلف العباس
يبنت احزام صرتي احزام لحسين

مرجله وحنيه
خلفت البدويه
عالمه بحسينهه
ليهه اشيل ايديه

ام القمر
يم جدمهه المراجل تطخ الهامه
ماكو ام لا للحسين صفت خدامه
يل توزعين وفه وحب عله گلب حسين
وزعي بيدچ وفه وحب عله اللطامه

ام القمر ام البنين
####

يمعراج الرجوله بعتبتچ تنشد
اذ الحب يعمه بجدامچ تره ينحد
عند العرب فشله بحرمة زلمه يلوذ
واحنه ألوذ بيچ اشما زمن يشتد

بيچ لاذ الزلمه
انتي باب الخدمه
الوفه لغز ومحد
غيرچ اليفتهمه

ام القمر
انتي اية وبالطفوف گمر رتلهه
من وحي الحب عله ماي جثه ونزلهه
يا مليكة گلب زينب انتي دخيلچ
والتخلف گمر حيد بعد شنگلهه

ام القمر
ام البنين
######
اگول البيه الچ واللام خله يلوم
انتي الخادمه النحسبهه چن معصوم
قول الهادي گال اليعتصم بيهم
اعتصم بالله يعني وهل الأمر محزوم

اشما نگول بحقچ
لا أبد من نوصفچ
يا شريكت حيدر
ودرب حيدر دربچ

ام القمر
يا كفو لحيدر وماكو مثلچ واحد
يا بلغيه بمعانيچ ينجم الصاعد
وياچ رابين فرد بيت عباده الأفضل
يعني أسرار تعرفين تحير العابد

ام القمر ام البنين
####
الما قر بمقامچ هذا ناقص راي
يعطاشنه وتخلف ماي ذل الماي
حبنه وي الحسين مشامر العميان
بس حبچ دخيلچ فيت كلش جاي

بيچ تحيه ادموعنه
اليوم الچ موضوعنه
يا ستر حد شيبنه
غَطْه وسد ماعونه

ام القمر
الله منطيچ كرامات تحير العالم
الفاتحه ليچ تفك باب فرج للوادم
يا سماوت تسد بواب بوجه بي اسمچ
وانتي خلفتي مولاي قمر بني هاشم

ام القمر ام البنين

#####

حال مولاتنا زينب العقيله عليها السلام
بعد رحيل مولاتنا الزهراء عليها السلام

======================

حزن تارس زوايه البيت
وچانت زينب العباس عمرها چان خمس أعوام
گوا نامت من الضيم
رادت راحه تلفيهه مثل الناس عود تنام

نامت وما چنهه نامت
بالحلم چم ضيم شافت
شافت العاشر يصيح = الماي

الگاع والخيل وزلمهه
كلهه تسبيهه بحلمهه
وزينب تصيح عله امهه =اهواي

يايمه الحگي لزينب
الحلم خوفني واريد احضانچ اليوم
يايمه وراي العاشر
بمشاعل يركض بعد ما ريدن النوم

======
فزت تبچي الطفله
ومبچاها خفي الصوت حلم خلاها مذعوره
فزت فزت المحروگ
رادت تشبگ الزهره وردت تبچي مكسوره

رادت تسولف حلمهه
لمهه والموقف لچمهه
بس تذكرت امهه مات = بليل

تگلهه رادت عن مصايب
الهزايل والخرايب
وفوگ اخوها حسين شافت =خيل

يايمه تنادي وينچ
الحلم خوفني == اريد احچيلچ الصار
يايمه يراحت زينب
اذا مو لمي ==اسولف المن احتار
==========
راحت دخلت الغرفه
وتشتم گامت بسكته بفراش امها مهضومه
عن لا يسمع الونات
حسين وينكسر گلبه حنينه وتبچي محرومه

لاكو ام تسمع وجعها
ولا اكو اخت تمسح دمعها
شافت الهم من زغرها =ضيم

تشتم بهدم الزچيه
وتحچي والچلمه سبيه
يمه بعدچ ياهو اليه = ضيم

محتاره =صفت محتاره
تگول لياهو ويداوي بيهه الاوجاع
يايمه الهظم كاتلني
مشيتي وعفتي زينب تشبع اوداع
====
مكسوره صفت زينب
لا ام لا اكو راحت بال وسابيهه ضلام البيت
تبچي وتحچي مهضومه
اليفگد امه واشلون ام لو ابچي عمر يايمه ماوفيت

تنادي ها يا روحي هيدي
ماتت امي فوگ ايدي
اشلون انه البس جديدي = اشلون

امي هايه الماكو منهه
بدنيا ما ابدل حضنهه
اشلون اكف بچيي وحزننه = اشلون

ما انزع = سوادي واضحك
واموت بحزني ريت العمر لا طال
يايمه عليچ اعيوني
نذر تبچيلچ وحالي عليچ ياحال

=====================
✍️ابو فضه الحميداوي

حين ما يكون الجرح جرح علي والكلام كلام علي (صلوات الله عليه) ...

#####

الما تحني راسه سيوف
ولامره ضاگ الخوف
بنص بيته غربه يشوف
وطب چم زنيم الدار

يصب دم صفه الدلال
حال الوصي مو حال
الما يخطر عله البال
تطب على بيتي النار

اصعب أمر عالزلمه ..
حرمته تنضرب يمه ..
ويضل بغمده السيف

وغربه اطب على بيتي
علي يا وسفه تاليتي
يطب بيتي النذل حيف

يطب لبيتي وعينه بعيني شنهو اكثر يأذيهه الروح
يدفع بابي ويعصر فاطم وفاطم خلف الباب اتنوح
حيدر انه ابيتي اچتف وارفض هذا ما مسموح

###
اليهظم علي مـوضـوع
بنص بيته كسر اضلوع
وللزهره حس مسموع
هاي التهد الحيل

الحامي البشر والكون
ما يحمي بيته اشلون !!!
وبالزهره ما ضل لون
تبچي وتون كل ليل

تـنـاجـي العلي وتدعيله
وچف واحد من اتشيله
تالي القنوت صير

وردة عـلـي وعصروها
بنص بيته بـس اذوها
جرح الأمير چبير

ما ترفعهن اثنين ايديه بس وحده مرفوعه اشلون
وخدها تضمه من ادنها وعني التحچي بس العيون
رغم البيهه وتضحك النه تضحك للرادو يبچون

###

جرح الشهامه امصاب
يبقى ندي وما طاب
شخله بعلي هل الباب
وينطر صفه الدفان

تموت الرجل بسكوت
وعنده اهون من الموت
(لداره) غصب وتفوت
ويمه تطگ نسوان

وحيدر يشوف بعينه
بحبله صفه مقيدنه
والزهره خلف الباب

فوگ الترب مرميه
وشماتي التلثيمه
وگدام ابن خطاب

الأنه احميهه تصبح تالي ادافع عن حيدر چا ليش
تحمل كسر ضلوع وترحل خاطر حيدر هوا يعيش
الجرح الأكبر جرح الغيرا هذا الجرح اليهدم جيش

##

ما تشفي گلبي ادموم
وحرمة عليه النوم
ما يهده كل مهظوم
اله بدموم انذال

الكسرت دليلي وطاح
وخلتني اكض اصفاح
بطوله مشه الذباح
گدامي وما شال

گدامي يمشي بحيله
ومـــرتـاح نايـم ليله
واني الدمع بالعين

شـيـجـبـر كسرتي بهايه
بذنـي اسمعت الحچايه
يريد الزچيه حسين

صوت حسين يبچي اخوانه ويبچي حيطان الدار
لونادها بس حاچيني انه حسين وينحب صار
وزينب تكسر گلب الزهره وما كسرت گلب البسمار

###
✍️ابوفضة الحميداوي

**حال مولاتنا فاطمة صلوات الله عليها

#######################

ست اشهور احسبله احساب
وضيع تعبي ذاك الباب
ابني ومنتضرته يصير
وتالي ايموت بچف سلاب

ليش اوليدي ما مرتاح
شفته بعيني المحسن طاح
ردته شويه بحضني ينام
وجاله البسمار الذبااح

الطفل لو طاح غير يصيح يمه
المحسن ما حچه المسكته دمه
تطشر انتظاري بدفعة الباب
وردت بس مره وحده كون اشمه

رايح حناني .. يمه يمه
الخاين زماني .. يمه يمه
بس مره گلي .. يمه يمه
ليش ابقى اعاني .. يمه يمه

###

اغفه براحه أوليدي ونام
بلكي وتطلع هاي احلام
شده وتخلص يمه انگول
حضني لطولك ضل محتام

اگـعـد بـعـد أمــــك والروح
ما اريدك من حضني تروح
ماني مصدگه أوليدي تموت
بلـكــي وتـطــلع ما مذبوح

ردت بس مره كون تصيح بسمي
ما ميـت واگـعـدك بـيـدي يـبني
من النسمه اخاف اعليك تدريني
چا تاليها اشــوف تـمـوت يمي

راح انتظاري .. يمه يمه
يبسو خظاري .. يمه يمه
تعبتني روحي .. يمه يمه
وباگو نهاري .. يمه يمه

##

فدوه اتنفس ليش اتموت
اشويه اضحكلي لو بسكوت
التاكل بيه يـبـني اهـواي
ما يـرهـمـلك اي تابـــوت

رحت من ايدي يمه ابساع
المثلي تربي وتاخذ گاع
ما همني ضلعي المكسور
الهمني اوليدي مني ضاع

صـعــبـه الـيـتـعب يضيعونه تعبه
اريده بحضني مـو بالگـاع يـربه
أعطشت مثل الحسين وانه احسك
وجبتلك ماي گلت اوليدي اشربه

الماي اشطلبنه .. يمه يمه
اهوايه تعبنه ... يمه يمه
شعده وي بزري .. يمه يمه
ما چنه حبنه ... يمه يمه

###

چنت امحضرتلك كاروك
وجاني الموت بگلبي يروك
ياعطر امك واحله اوليد
ليش الوادم ما شموك

يالما مشتم حتى انفاس
تهضمني وتجرحلي احساس
ما گالو بأبني أعله الخير
الله يعوضه تگول الناس

اشم بريـحـتك وأدمـوعي تجري
يشمامـة الزهره وتـعـب عـمـري
اريد اسأل الفگدن عن الأولاد
خاطر لو رضن اقـبـل بكسري

گلبي كسرته .. يمه يمه
بيوم الهجرته .. يمه يمه
ليهسه اصيحن .. يمه يمه
وابني خسرته .. يمه يمه

####

✍️ابو فضه الحميداوي**

#محرم_الحرام_1446هـ_
الليله العاشرة

(جرح المقتل)

#####

آخـر حچي وي الــحــرم
حاچاهــن وگلـبـه انلـچـم
ومن البچي حسين انهضم - وتخنگه يالريح

وصـه العقيله بالـصـبـر
ويدري صعب هذا الأمر
شوفت خدرها والقصر - ويا محمل يطيح

يوصي وبچه حگه تره ذاك الدرب كله جرح
كلما وصل يم السبي يغص بچلمته وينذبح
ما يگدر يقنع الگلب بسبي الحرم وي الصبح

گلبه عله ضعنه ضل محتار
اشجاب الفواطم وي النار
هاي التأذي الغيره اهواي
يصيـر بخواته اللي ما صار

####

التمن عليه يشبگن
وحده تشمه والبقن
يحلفنه ابقى ياوطن ... من دونك اشلون

وجتله العقيله وشبگته
اتذكرت وصيه وباسته
بميمونه اجته وحاچـته ... ومغورگه عيون

لا ما شفت مثلي اخت تقدم لخوها امنيـتـه
ولا اقسى من گلبي گلب لخيل الأعادي ودته
وماكو بجلادت خافقي گالت لخوها وبچـتـه

وجتله رقيه تركض شوگ
بركضتها جته چن محروگ
وگالته بـويـه لا لــــتــروح
تدري برحيلك ندخل سوگ

####

ادنتله زينب والــهـوى
بالحسره ياناس انچوى
هذا الجرح بچه الدوى ... واحزانها تشيع

عشرة عمر ماهي سفر
وگلب الحجر ليها انكسر
خمسين عام بلا سهر ... ومن تالي تضيع

ويا حيرة حسين الصفت مهموم يمشي لو يضل
كلشي انتهه وضلت حرم بالغربه ضل ماله اهل
يصعد المهره بدمعته وما يرضه گلـبـه ورد نزل

ويرجع يشم ب اخته حسين
وتعبته چلمة رايـــح ويـــن
وچف الزغار يـچـلـب بــيـه
ونضرة سكينه تبچي العين

###

راح الحسين ومنكسر
وگوا صعد ويلي المهر
الراح لمنيته بلا صبر - وما شارب الماي

عالموته هم اهون تره
العايف وراه امخدره
حرمة لچن مو اي مره - ام الخدر هاي

هد عالزلم بس منهظم هدت الطير عله الدخن
صح يذبح بروس العده بس گلبه موجوع ويون
يحن عله ابنه المنذبح ولغيرت الــكـافـل يـحـن

ويگلي خويه انه وحـيـد
لاصحبه ضلو لاكو أوليد
لحضات اليه وجوا الخيل
والغربه كلها مـنـي تـريـد

####

هده التعب ويلي اوگع
چم سيف طگه ورد طلع
وبدمه يا هضمه نگع - ضل ينزف اهواي

التمو عليه من كل جـهـه
واعله المهر وسفه انتچه
الما طگه هم علي حـچـه - ومحتار مولاي

فوگ الثره ويلي هوا والتمت عـلـيــه الــرجــس
وبعده عدل داسه المهر وگوا يـجـر گام النـفـس
يدير بعيونه عله الخيم وضل يهمس لزينب همس

طلعي البنات مـــن الخيمات
ولحگي عليلي بــس لا مــات
النار واجتكم شبيدي بـهـاااي
وذباحي اجاني بدون اصوات

####

✍️ ابو فضه الحميداوي