ငါလည်း မင်းလိုနှလုံးသားနဲ့ချစ်ကြည့်ချင်တယ်
ပြောစရာစကားမရှိတဲ့ တိတ်ဆိတ်မှုမျိုးနဲ့ ချစ်ကြည့်ချင်တယ်
မျက်စိတမှိတ်အတွင်း ဖောက်ပြန်တတ်တဲ့ စောက်ကျင့်မျိုးနဲ့ ချစ်ကြည့်ချင်တယ်
မသိကျိုးနွံဆိုသလို ပစ်ထားတတ်တဲ့အတိုင်း ချစ်ကြည့်ချင်တယ်
ဘယ်တော့မှ မဆက်သွယ်ကြသည့်အတိုင်း ပြတ်သားမှုမျိုးနဲ့ချစ်ကြည့်ချင်တယ်
ငါလည်း မင်းလိုနှလုံးသားနဲ့ချစ်ကြည့်ချင်တယ်
မင်း ငါ့ကိုချစ်ခဲ့သလို ပုံစံမျိုးနဲ့ချစ်ကြည့်ချင်တယ်။

-ဘယ်လာခင်

-ခင်ခင်ပျိုရေစောင့်ခဲ့တယ်
------------------------------------------
၁။ ခင်ခင်ပျိုရေ

ဝိသေသနပုဒ်က ဒီအတိုင်း
စာသားက ဒီအတိုင်း
တရားက တရားအတိုင်း
အမှားက အမှားအတိုင်း ။
ခင်ခင်ပျိုရေ
ငါ စောင့်ခဲ့တယ် ။

မိုးတစ်ပေါက်တင်ပြီး
စိန်လိုလက်နေတဲ့ ဇီဇဝါပန်းများ မွှေးခဲ့လို့
ငါ့စိတ် ထိန်းနိုင်ခဲ့
မိုးတဖြောက်ဖြောက် နေ့တွေ ကုန်လွန်နိုင်ခဲ့ ။
ခင်ခင်ပျိုရေ
ငါ စောင့်ခဲ့တယ် ။

မဖြောင့်ဖြူးခြင်း အချစ်စစ်ကို
အနှစ်တစ်ရာ သစ္စာဖွဲ့
ငါ စောင့်ခဲ့တယ် ။
ခင်ခင်ပျိုရေ ၊ စောင့်ခဲ့တယ် ။       ။
.
အောင်ချိမ့်

ချစ်ခြင်းမေတ္တာအပေါ်မှာလည်း
ကိုယ်ချင်းစာစိတ်ထားလိုက်ပါ သူငယ်ချင်းရာ
ငါတို့ချစ်တဲ့လူတွေကလဲ
သူတို့ချစ်တဲ့လူနဲ့ နေချင်ကြမှာပဲလေ ။

-ဖားစည်ရည်ကျော်

အန္တရာယ် ကင်းစေချင်တယ်
ဆံပင်တွေ လှစေချင်တယ်

မမရေ
ရပ်ကွက်လူမိုက်တွေ ချစ်တတ်လာတဲ့အခါ
၂၄ပစ္စည်း စကျက်ပါတယ်
ကျစ်စမြီးကျစ်နည်း စသင်ပါတယ်။

-သူရဇ္ဇနီ

ကျွန်တော့်ရဲ့ချစ်ရသူ...။
_×_×_×

ရယ်မယ်ဆိုလည်း ရယ်စရာတွေမဆံ့မပြဲရှိပါတယ်၊
ငိုချင်ပါတယ်ဆိုလည်း ထပ်တူပဲပေါ့။
သေသွားခဲ့ရင်ဘယ်ဘဝရောက်မှာလဲ
ဒီဘဝတော့ မင်းကိုအသက်လောက်ချစ်ခဲ့ပါတယ်။

လူတွေကရယ်ရတာလား
ကျွန်တော်ကပဲရယ်စရာလားတော့မသိပါဘူး၊
လူအားလုံးချစ်တက်ဖို့ကြိုးစားနေချိန်မှာ
ကျွန်တော်ဟာအရာရာကို
စွန့်လွှတ်နိုင်ဖို့ကြိုးစားနေသူ။
သူမကလွဲ ဘယ်အရာကိုမျှ အကောင်းမမြင်တက်သူ။
သူမကလွဲရင် အရာအားလုံးကိုမေ့နိုင်သူ။
သူမရဲ့ဥပေက္ခာအပြုခံရသူ။

ဒီဘဝမှာရေစက်မပါရင်
နောင်ဘဝတွေအထိစောင့်မည်သူနှင့်၊
စကြာဝဠာရဲ့ဘယ်ထောင့်ချိုးမှာမဆို အမျိုးမျိုးအကြောင်းပြ၍ငြင်းမည့်သူ။
ကျွန်တော်သိပ်ချစ်ရတဲ့ကျွန်တော့်ချစ်သူ။
-ဝဏ္ဏ

သမိုင်းသင်တာ မ အ အောင်လို့တဲ့
ကျွန်တော်တော့ သမိုင်းသင်ရင် ရယ်ပဲရယ်နေတော့တယ်
ဒီသမိုင်းကို လူလည်ကြီးတွေက ရေးကြတာလေ။

-ဘယ်လာခင်

အချိန်အခါမဟုတ်
မိုးတွေရွာတော့
အတိတ် မေ့သူများ
ပြန်သတိရ ။

-ဂန္ဓမာ

ခြောက်ရင်‌ကြောက်တတ်လို့ နောက်ခဲ့မိတာပါမမ...။
ခုတော့ ကိုယ့်မှာ အတိတ်ကိုတမ်းတလိုက်
အနာဂတ်ကိုမှန်းဆလိုက်နဲ့
တော်တော်လေးလည်း ၀ဋ်လည်ပါတယ်။
ဒီတစ်ခါလည်တဲ့၀ဋ်က မမလောက်နီးနီးပဲဗျာ..။

-သူဇာ

ကမ္ဘာပေါ်မှာ
ဒေါင်လိုက်ကျလာတဲ့အရာတွေကို
တောင်လို့ခေါ်ပြီး
လဲကျသွားတဲ့အရာကိုတော့
မြစ်လို့ခေါ်တယ်  ။

အချစ်ရယ် လွယ်လွယ်မကြွေပါနဲ့  ။ ။

-ဝင်းမြင့်
သစ်ရွက်လှေ

လုံလောက်ပြီဆိုရင်တောင်
ပိုပြီးထပ်ပေးချင်နေတာ ချစ်ခြင်းမေတ္တာလို့ထင်တယ်။
ကျွန်တော့်အနေအထားနဲ့
မလုပ်နိုင်တာတွေလုပ်ပေးချင်တယ်၊
မမရဲ့လိုနေတဲ့ကွက်လပ်တွေဖြည့်ပေးချင်တယ်၊
ပြည့်နေတဲ့အိုးမကလို့
လျှံကျနေရင်တောင် ထပ်ဖြည့်ပေးမိဦးမယ် မမရယ်။
ဒါကကျွန်တော့်ရဲ့ချစ်ပုံချစ်နည်းပဲမမ
မှားနေရင်တောင်
ကျွန်တော့်အနား မမ ရှိသ၍ တရားနေမှာပါ။
-ဝဏ္ဏ