မမရေ...
မောင်အခု လက်ထဲကဆေးလိပ်ကိုဖြတ်
ဒေါသကိုသတ်ပြီး မမဆီပြေးလာနေပါပြီ။

ကမ္ဘာကြီးမနက်ဖြန် ပျက်သွားမယ်ဆိုရင်တောင်
ဒီနေ့ မမလက်လေးကို မလွှတ်တမ်းကိုင်ထားမယ်။
ဒါမောင့်ရဲ့ သွေးနဲ့ရေးတဲ့ ကတိစာချုပ်ပဲ။

ရေကိုဆန်တက်လာတဲ့
ဆယ်လမွန်ငါးလေး
တကယ်ကို ပင်ပန်းနေပါပြီ မမ။

-သူဇာ
-ခွန်းစာမပြန်တာသုံးရက်မြောက်တဲ့နေ့(၄)

မောင့်ကိုကျွန်မချစ်ပါသည်။
ချစ်လွန်းလို့ပဲ စွန့်လွှတ်ခဲ့ပါသည်။
စွန့်လွှတ်ခဲ့ပါပြီ။

ပုဂံမြို့ဟောင်းကိုရောက်တဲ့အခါ
ကြယ်ပန်းလေးတွေ ဖူးပွင့်လာတဲ့အခါ
ကဗျာလေးတွေ ဖတ်ဖြစ်တဲ့အခါ
ကျွန်မသေချာပေါက် မောင့်ကိုလွမ်းမိပါလိမ့်မယ်။

ဒဏ်ရာဆိုတာ သေရာပါနိုင်ကြောင်း
မောင်မတိုက်တော့တဲ့ ဆန်ပြုတ်လေးသောက်ရင်း
ကျွန်မတွေးမိပါသေးတယ်။

"ဆန်ပြုတ်ဆိုတာ လူမမာစာပဲမမ"ဆိုတဲ့စကား
ကျွန်မ လက်ခံနိုင်လာပါတယ်။

-ခွန်း
-မောင့်ကိုစာမပြန်တာသုံးရက်မြောက်တဲ့နေ့

နွေတို့ မိုးတို့ ဆောင်းတို့တောင်
သုံးခုပေါင်းပြီးမှ တစ်နှစ်ပြည့်ရဲတာ
ငါ့မှာတော့ မင်းတစ်ယောက်တည်း
တစ်နှစ်ပြီးတစ်နှစ် ။

_ အောင်ခိုင်မြတ်

မခင်ချောမေ
ခင်ဗျား ကျွန်‌တော့်ကိုမေတ္တာ မထားနိုင်သည့်ကိစ္စအား
ကျွန်‌တော်သဘောတူပါပြီ။

-အီလစ်

ပြည်တွင်းစစ်ကြီးကြောင့်
လူ့အခွင့်အရေး ဆုံးရှုံးမခံနိုင်ပါဘူးလေ
ချစ်စရာရှိတာ ချစ်မှ
လူဖြစ်ကျိုးနပ်မှာ...။

-ဘယ်လာခင်

ချစ်တာကို ချစ်တယ်လို့ ပြောခဲ့ပါတယ်
ဘာကိုမှမတွေး
သိက္ခာတရားတွေလည်း မတွေး
အခြားသော တိုင်းတာချက်များလည်း မတွေးပါ။

- မြကျေး

နာကျင်တယ်ဆိုတာ စောက်ရှက်ကွဲတာပဲ။

ခင်ဗျားကျောကို သပ်နေတဲ့
လက်တွေရဲ့နောက်ဘက်ခြမ်းမှာ ဟာသတွေရှိတယ်။
လူတွေက ရေချိုးခန်းလောက်တောင်
ငိုဖို့ စိတ်မချရတော့ဘူး။

ကိုယ်ထမ်းတဲ့ဝန်ဟာ အလေးဆုံးပဲဆိုရင်တောင်
ကိုယ်မထမ်းနိုင်တော့ပါဘူး။
ကျွန်တော် နုတ်ထွက်ပါတယ်။

•ဘုန်းပြည့်စုံမင်း

အမေရယ်...တခြားသူတွေအတွက်တော့
အရာရာဟာ လက်တစ်ပစ်စာရယ်ပါ
သားမှာတော့ ယူဇနာသန်းပေါင်းများစွာဝေးကွာလို့…။

•မောင်ချောနွယ်
ကြယ်ပြာလေးနဲ့ထမင်းစားပြီးနောက်

ငါဟာ မင်းမသိသလိုလိုနဲ့ ခေါက်ချိုးထားခဲ့တဲ့
ခေါက်ရိုးလေးပါပေါ့။
အဆင်မပြေတော့လည်း
ငိုပြရလောက်တဲ့ထိ
ငါဟာ ကျရှုံးနေပြီဆိုတာ
မခံချင်ရုံ။
ဒီထပ်မက နာကျဉ်မှုတွေနဲ့ အစားထိုးခံရခြင်းတွေကြား
ဓားသွားဟာ ဘယ်လောက်ထက်ထက် ငါမကြောက်တတ်တော့ဘူး။
မျက်ရည်ဟာ လမ်းမပေါ် ပြန့်ကျဲလို့
လူတွေ ကျော်ခွသွားကြတဲ့
ငါ့မျက်ဝန်းတွေ၌
လက်နှစ်ဖက်ဟာ အချင်းချင်း ထက်လို့
ယှဉ်တွဲလို့ ရပ်။
သူတို့ဟာ နှစ်
ငါက တစ်
ဘယ်တော့မှ မညီမျှတဲ့
အရာတွေထဲ
အချစ်ဆိုတာ ထိပ်ဆုံးက။
တကယ်တော့ ဒဏ္ဍာရီတွေဟာ
အလကားပါကွာ။

-နော်ယာ

ဆိုးချင်တိုင်းဆိုးလို့ရတဲ့ ရင်ခွင်တစ်စုံကို
ပြန်လိုချင်တိုင်း
မနက်ဖြန်ကစ လိမ်မာတော့မယ်လို့
ကျွန်တော်ဆုံးဖြတ်တတ်ပါတယ်။

-ဘယ်လာခင်