فيه ناس الليلة هتجيب آخرها في معصية ربنا؛ لأنها ليلة الكريسماس، وناس هتجيب آخرها في طاعة الله؛ لأنها أول ليلة في رجب.

فيه ناس الليلة مهددة بسخط الله، وناس هتنال رضا الله والفردوس الأعلى بسبب طاعة ربنا في طلعة رجب.

د/ حازم شومان

كثرة سماع القرآن يرمم النفس البالية، ويجمع القلب المشتت، ويملأ الجوف الفارغ، سبحان الله، وكأن القرآن يسري بداخلنا ليبني ما هدمه الشيطان، وما حطمه الناس.

د/ أحمد العربي

كنا قاعدين، فلقيت يوسف أخويا الصغير (في تانية إعدادي) بيقولي ازيك يا شيخة إسراء، هو دايمًا بيقولي كده عادي وبيهزر ?

وراح باصص كده لبابا وقاله اللي عنده ابن صالح بيبقى فرحان به، ما بالك أنت ولادك كلهم صالحين ماشاء الله!

وحقيقي يعني رغم إن الجملة دي اتقالت بشكل عفوي منه بس أنا مبسوطة بها أوي. ?

ربنا يقربنا منه دايمًا ويصلح حالنا جميعًا ويرزقنا الجنة. ?

#Esraa_Shehta ✍️

شغالين بفضل الله في شركة Your Dream على مشروع وصفات أكلات ومشروبات بنستهدف فيه الجمهور الأمريكي ✔️

كنت بكتب وصفات لمشروبات سخنة يقدروا يشربوها في الشتاء، فالأجانب بيشربوا حاجات غريبة كده زي: الحليب بالكركم، الينسون بالعسل، الشاي بالزبدة، والتفاح بالقرفة (نفسي أعرف مشروب تفاح سخن ازاي!)

وقتها جه في بالي الحلبة بالسمنة اللي كنت بشربها زمان وبيقنعوني إن دي هتحسن صوتي لما أكون تعبانة وصوتي رايح، اللي هو مالها الحلبة بالسمنة يا إسراء! ما هي أرحم من الشاي بالزبدة والتفاح السخن بالقرفة يعني! ?

#Esraa_Shehta ✍️
#Your_Dream

إتقان ذكر الله يدخلك جنة الدنيا قبل الآخرة.

د/ أحمد العربي

كنت قاعدة في مكان ما فبنت جاية تقولي هاتي حاجة لله، يارب تتجوزي اللي بتحبيه ?

فضحكت وقُلتلها والله ما بحب حد، اللي هو أنا بريئة. ?

ماشية في الشارع لقيت واحدة بتقولي يا دكتورة أنتِ يا عسل، يارب أشوفك دكتورة، راضيني بحاجة (كان نفسي أقولها أنا اتخرجت خلاص).

وحقيقي يعني رغم إني لسة منزلة بوست من يومين عن موضوع الاستعطاف ده، بس طريقتهم بتخليني أبتسم وأقول مش خسارة فيكوا على الابتسامة دي.

احنا غلابة أوي وبيتضحك علينا بجد. ?

#Esraa_Shehta ✍️

وعن عمره فيما أفناه؟

ربنا هيحاسبك على وقتك اللي بتضيعه ده ومش بتستغله في حاجة مفيدة. ?

طب أعمل ايه؟ أنا فاشل، أنا مش نافع في حاجة، أنا مهما حاولت مش بوصل لنتيجة، هو ممكن ربنا يبقى مش راضي عني؟ ممكن يكون عدم التوفيق ده بسبب حاجة عملتها وربنا زعلان مني؟ ?

بص يا عم، في كلمة سر هي اللي بتفرق بين الشخص الناجح والفاشل، الكلمة دي بتحدد هل أنت شخص ناجح ولا فاشل فعلًا زي ما أنت فاكر؟

كلمة السر هي الاجتهاد ?

الاجتهاد هو الفرق بين الشخص الناجح والفاشل.

حاولت؟ اجتهدت؟ سعيت؟ يبقى أنت كده تستحق لقب ناجح وبجدارة، محاولتك في حد ذاتها إنجاز. ✔️

متشغلش بالك بقى بالنتيجة، طالما عملت اللي عليك وسعيت يبقى ربنا هيجازيك ويكرمك، ومتشغلش بالك بالناس وكلامهم، القصة كلها أنت ايه في عيون نفسك وشايف نفسك ازاي؟ ده اللي هيخليك تقدر تكمل.

كمل محاولة وسعي وخليك عارف إن مفيش حاجة بتيجي بالساهل، الأشخاص الناجحة اللي أنت شايفها هناك دي موصلوش بسهولة كده زي ما أنت فاكر، لو سألت كل واحد فيهم هيحكيلك قصة طويلة عريضة وقد ايه هو تعب وطلع عينه عشان يوصل للي هو فيه ده. ?

ربنا بيجازي على السعي وأنت بتسعى وبتحاول صح؟ يبقى تكمل في طريقك بقى وتخلي في بالك دايمًا إنك مطالب بالسعي مش بالنتيجة.

أنت بتحاول، إذًا أنت بطل. ??

#Esraa_Shehta ✍️

القرآن يهذب خبائث الخواطر

د/ فريد الأنصاري

النهاردة بالصدفة ظهر قدامي فيديو لواحد كان بيقرأ الآية دي: "قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ ۖ بِيَدِكَ الْخَيْرُ ۖ إِنَّكَ عَلَىٰ كُلِّ شَيْءٍ قَدِيرٌ" ?

كان بيقرأها بانكسار مشوفتش زيه قبل كده لدرجة إني بكيت! يمكن أنا قرأت الآية دي كتير قبل كده، وسمعتها من شيوخ، وكمان قرأت تفسيرها، ويمكن أكون تدبرتها! بس الإحساس اللي وصل ليا من الفيديو ده محستش زيه قبل كده!

أنا بحب عبادة الصدقة جدًا، وبعتبرها من أكتر العبادات المقربة لقلبي، وبحسها بتقربني من ربنا أكتر. ?

دايمًا بقعد أفكر هو ليه مش كل حد معاه فلوس يحاول يساعد اللي مش معاه حتى لو بحاجة بسيطة! بالمداومة أكيد الحاجة البسيطة دي هتفرق.

يمكن وقتها منلاقيش الانكسار اللي بنشوفه في عيون الناس ده، ويبقى الكل حاسس إنه قادر يساعد غيره حتى لو بحاجة بسيطة، ودي في حد ذاتها نعمة. ?

ايه رأيك تبتدي من النهاردة وتعمل صدقة ولو بحاجة بسيطة؟ ممكن تعمل الآتي:

✳️ تفتح الفون بتاعك وتبعت لأي مؤسسة خيرية وتتصدق حتى ولو بعشرة جنيه.

✳️ تنزل الشارع وتشوف الناس اللي بيكونوا على الأرصفة والكباري وشكلهم محتاج وتديهم اللي فيه النصيب.

✳️ تشوف البائعين اللي موجودين في السوق ولو حد منهم باين عليه الحاجة فعلًا ساعده باللي تقدر عليه.

✳️ تشتري أكل لحد محتاج.

✳️ تفتح الدولاب بتاعك وتشوف ملابس عندك شكلها حلو ونضيفة بس مبقتش تلبسها وتشوف أي حد محتاج وتهاديه بها.

✳️ لو حد بيبني مستشفى أو مدرسة، ممكن تشارك ولو بمبلغ صغير حسب مقدرتك.

✳️ لو فيه عروسة بتتجهز، ممكن تساهم في جهازها.

✳️ ناس كتير بيكون عليها دين ومش بيبقوا عارفين يتصرفوا ازاي ممكن تساعدهم.

✳️ فيه قرى كتير بتبقى فقيرة ومش عندها مياه، تقدر تساهم في عمل وصلة مياه لهم.

كل دي مجرد أفكار وفيه غيرهم كتير، تقدر تعمل أي حاجة فيهم حسب مقدرتك، وبجد الخير مبيقلش، وربنا بيبارك في كل حاجة بتطلع منك بنية صافية. ?

#Esraa_Shehta ✍️