وكف كدامهم ولسيف ما منجر
ودم وجوهم الاحمر غده اصفر
داس اعله لشوارب غيرة العباس
مثل فرة المحبس فوكهم يفتر

هد الما برد حيله وحط بكلوبهم خوفه
شهم والكاع خلاها تميل بطكت جفوفه
العساكر داسها برجليه وضيك بيهم الكوفه

ما شاء الله ..
ساك بيهم سيفه
الموت صار بكيفه
ربات حمزه وحيدر
ينحجب توصيفه

^^^^^^^^^^^^^^^^^

هذا الحجي كله وسيفه بكرابه
جن حيدر بزدوه ولفة نكابه
كدما شردت الخياله بلميدان
ما ينشاف الصبع من الترابه

تعبهم ربات حسين خلاهم بلا ناصر
والكابله مو راسه جلده بلسمه طاير
مو بس الزلم من صاح حافر يردم بحافر

ما شاء الله ..
حار دمه وهيبه
الطار بيده يجيبه
الكابله يطر ضلعه
موش بس يعيبه
‏
^^^^^^^^^^^^^^^^^

تجدم ولهوه ما وصل لريه
وركاب الزلم خلاها ملويه
جدحت غيرته المابرد دمه بيوم
شمر روسهم شمرت الخاجيه

رباهم شبل حيدر ويتوسلون بيمينه
هاي وباله يم حسين وجدحت غيرته بعينه
جا شيسوي لو باله ما مشغول بحسينه

ما شاء الله ..
دخن وطباها
بس اثر خلاها
صدورهم بلحومه
وي الترب ساواها

^^^^^^^^^^^^^^^^^
طكت سنونهم يسمعها ذاك الصوب
من الروح اغله هناك صار الثوب
ختلو وره البوب الزلم جن نسوان
هد وضهورهم كسرهه وي البوب

ابو طاهر وطك صبره وهد ابساعته ويومه
واعله ضهورهم هوس واتسيد على الحومه
زلمه المو شرد المنه الزلمه الباقي بهدومه

ما شاء الله ..
دخيل سطرة ايده
ما تهمه بعيده
يلوحها بخزراته
ما يتاني الصيده

^^^^^^^^^^^^^^^^^

اللهم عجل لوليك الفرج
مصطفى سلمان

كأني في ولادة سيد الشهداء ع حدثت ضجة في أزقة المدينة والناس تتسارع الى رسول الله ص لكي تُهنية بهذا المولود المُبارك حيث كان هُنالكَ طفل واقفً، مُندهشاً لهول المنظر فذهب مُتسألً لأمهِ
لكي يعلم ما الذي حدث فقال لها :
شصار يمه
صار فد موضوع ماعرفه جديد ؟
يمه ما كِلتيلي صوم
ليش احس اليوم عيد
حاره اجواء المدينه وكمت اشوف الناس مطرت
ليش كل الناس فِرحت
ليش شياب المدينه لبيت أهل البيت ركضت
الا أعّرف يمه هسه
احساس بس الطفل يكدر
يفرزن ادراگه ويحسه
وقبل لدكليلي يمه ليش ما فصلتي مَلبس
حالي حال الناس البسه
الا أعرف يمه هسه
الناس ما تلحَك عليمن
ياهو اسئله يگلي ما أكدر أفهمك
روح عمي واسئل أمك
روح گلها خل تحضر الواهلية
ما عرفت شصار يمه وكمت اشوف الفرحه بيه
وهاي اول مره اشوف الناس فرحتها سويه
شفت كلبي بكلبي يسرح
والاناء بروحه ينضح
يمه حتى الينطي جزية شفته ويه الناس يفرح
شصار يمه؟؟؟؟
فقالت لهُ :
يمه افرح
ما كِلتلك صوم يبني الفرحه بعيونك تفيض
لان لا رمضان عدنه ولانه بأيام بيض
وراح اجاوب عن سؤالك
'' نعم يمه اليوم عيد "
صدك كلبك جان يحجي
النيه ابيض يمه من لون النوارس
الفرحه ما شالت اجدامي
اعذرني ما لحَكت يبني حتى افصّلك ملابس
شلون بيه ومن علي مستحيه روحي
صدك فرحانه واحس بعيوني دمعه
ماكو شي بالبيت اوزعه
روح اركض يم ابو الحسنين شوفه
وبوسه من عينه وجفنها
تسلم امي اعليك كله
وهاك ابني اخذه قربان الفرحتك
وهوه يدري شلون اذا أُم تنطي ابنها
شلون اوصف فرحة الله
لان لو رايده احجيلك ما يضل بامك حجي
ولا تلوم دموع عيني
لان بالفرحة جبيره لازم اخر شي بجي
وآنه مو كل الحجي لازم اكلك
لان مرات الحجي تلكاه بعين
يمه آنه شعرفاني حتى اعرفك بالحُسين
انت يوليدي زغير
ومو مثل زغرك حبيبي
حسين من الله جبير
تحضر الكلشي تشوفه
الكمر لو بالصبح صار ، اليل لو شفته نهار
ولو لكيت الساعه وكفت
ولو مشت عكس المدار
يمه شحجيلك شكلَك
( احلى شي بالدنيا صار )
يمه فدوه بداعة امك
بعد لا تسألني شنهي اليوم صار
الفرحى اقرب حتى من حبل الوريد
" نعم يمه اليوم عيد "

علي الحسن
اللهم عجل لوليك الفرج

يابويه من تحن الجروح
اذكر شبكتك وين ما اروح
ورجف اضل جن طير مذبوح .. بـدمـعـتي

___

الضوه مات بعيني بويه سكته سكته
الماي من كدما عطشتك ما عطشته
بالي ما ضل يمي بالي وياك أخذته
جان آخر شيء اذكره حضنك انته

من كثر ما هد دليلي سهم الوداع
جفي ما يحمل دمعتي تطيح بلكاع
هيج عشرتنه الطويله تخلص بساع

ضليت اسد وافتح الباب
بلكي انته مو دكة هوه الهاب
تطلع وترجع ضلت الروح
ورجف اضل جن طير مذبوح .. بـدمـعـتي
__

جنت ما اقبل حلم يبعدني عنك
‏ بجسمي يمشي موش دمي بويه دمك
‏شكثر صعبه عليه بس من فاض حزنك
‏فاض بيه وكتلك امشي ولا يهمك

صدك عشت الغربه لمن شفت دمعك
جيتك اركض مو اروح وياك اودعك
هاي اخر شبكه ضلعي وي ضلعك

يموداعك ما ينسى بعام
شما اريد اعبره الكاه كدام
بعيوني ضل فركاك مفضوح
ورجف اضل جن طير مذبوح .. بـدمـعـتي
__

حلم واقع لوحت جفي لعذابك
حلت الفركه عليه وحل مصابك
صورتين بعيني عاشلي بغيابك
صوره سالم صوره متسلبه ثيابك

ثنيهن نفس العذاب ونفس الفراك
الجنت سألم موش سالم كلبي مشتاك
تعبت كلبي المدينه بوحشتي انعاك

انعاك حد ما يخلص الحيل
واتلوه من الصبح لليل
ضل جرحي مثل الباب مفتوح
ورجف اضل جن طير مذبوح .. بـدمـعـتي
___

طلعت من البيت بيه فرحة سنين
ورجعت للبيت جن كل هلي ميتين
الحدر الضلوع انكسم يابويه نصين
نص يون ونص مشه وياك يحسين

البيت يخنكني وانطرك خارج البيت
‏واختنك ورجع اطب للبيت ضليت
‏وي الهوه شوك ومحنه شكثر وديت
‏
يا روحتك ثلمه بدليلي
ولفاتحه قريت اعله حيلي
والبيت ضل بوحشته يفوح
ورجف اضل جن طير مذبوح .. بـدمـعـتي

___

مو كتابه روحي كلها بهل الضرف
اخ فكدك ما يوصفه شجم حرف
بحزني غركانه وعشت بأصعب ضرف
لاني ميته ولاني ماخذني الجرف

روحي توها تريد تطلع بس ترد
بصورتك ذيج القبل هذا البعد
من جنت بويه اعله خوفك انحسد

سويت كلشي اعليه مگدور
ما فاد كلشي وجنحي مكسور
ضل حملي فوك الكاع مطروح
ورجف اضل جن طير مذبوح .. بـدمـعـتي

ـــــــــــــــــــــــــــــــــــــ

اللهم عجل لوليك الفرج
مصطفى سلمان

https://youtu.be/xAMIWQxI3RE?feature=shared

تدريني احبك ياجرح ?
الرادود : سيد عمار العرداوي
الشاعر : مصطفى سلمان

تدريني احبك يا جرح
چيف انته واهس حزني
رهملي بجفوفك حضن
فدوه الفشل تعبني
كافي أرسم لراسك رمح
وانت بغزل ترسمني
بضحكاتي تلچم غيبتك
يلمهدي تسمع وني
:
.
يمته اشبكك يا عشك
يل بيك كلشي مختنك
حتى الدمع ينزف جرح
ولجرح بي ريحه حرك

_ ____*

واهسني يمسامر عشك
ميل الله يفتر بيه
ضماني چذبي وچن زلف
لمن يضم ترجيه
حاجيني صدرك مختنك
من رفعو الخاچيه
لو عل خيم لو عل السحك
لو عثرت العلويه
:
.
يمغوش عيونك دمع
باقي تدك اعله الضلع
من البواجي ولطم
حيلك كضه كضية شمع .. !!

_ ____*

عاگبني وكتي عله الهجر
وستاحشيت شلونك
يااانسمة من كثر القهر
مخنوگ. كلش لونك
وضحت تچاعيد العشك
من بجت دم عيونك
سامحني يل مالك عرف
من يمي هدله متونك
:
.
يوميه ذابحلك حلم
من قلبي قلبك ملچم
مدري الله اليعينك علي
مدري يعينك علخيم

_ ____*

يا چفك العاشر لطم
ماعرف شنهي الشبكه
الشاف وچه الله بطشت
تنشز بوجهه الضحگه
ياا هوه مثلك بلـ حزن
ولسوط تارس خلگه
راسم عله جفونك ضعن
ومتون كلش زرگه
:
.
مرسوم بجروحك سبي
تتراكض دموعك عبي
تصفك العشره من الوجع
بايك أحلامك اجنبي

_ ____*

بـخلافك آتـناوش هوه
وآعثر بچلمة وينك
يلمهدي غثاني الذنب
من لجم نحر حسينك
انت ضوه الله الما طفه
چاليش ضلمه سنينك .. !
اغفه عله ذنوبي لچن
تندسني دمعت عينك
:
.
لعيونك عيوني تحن
اتحسر وابقه اون
شوفتك اجمل ما احب
فركتك عندي اكبر سجن

_ ____*

#اللهم عجل لوليك الفرج
_مصطفى سلمان

يجاهي وخدري
اديه ابضهري
وادورك وين مطروح

وغلات عيونك
اليعيش بدونك
تشيع كلبه الجروح

ويلاه . . بيا زمان
اخوي ابلا غطه جسمه اعله التراب
الروحن فدوه انه الاسمه اعله التراب
غريب وطشرو رسمه اعله التراب

**
بقلبك عشت كل العمر
وبقلبي خويه انته عشت
ما اخاف من كلشي لجن
من فركتك كلش خفت
وياي من تكطع درب
تكضي الدرب بس تلتفت
لمن شفتني بنص غرب
وانته اعله رمحك دنكت

صرت يلضامي
بدون خيامي
وغريبه والحمل مال

تبدل حالي
انفجع دلالي
دمعتي تهد الجبال

ويلاه . . كربله
خذت من ايدي خواني بلنهار
احترك يافشله صيواني بلنهار
حسافه الكون شافاني بلنهار

**
ما يبقه بلدنيه ضوه
لو سير القبر النبي
مابين اخوتي واستحي
وانه ادري مابينه اجنبي
تاليتي هيج لوحدي
واحمل معاناة السبي
شما تعثر الناكه انذبح
محد يرتب مركبي

عشت عل ونه
وبقيت اتمنه
يطلع حلم كلشي

وافز من حلمي
واشوفك يمي
وسويه خويه نمشي

ويلاه . . مو حلم
حقيقه والحبل بيدي ياحسين
ابد مو هذا تعويدي ياحسين
الهضم يتمشه بوريدي ياحسين

**
طشرنه عاشر كربله
يامحله لمتنه قبل
حنيت لأيام الخيم
من جان ابو فاضل عدل
من جنت حيل مدلله
ومو هيج دمعاتي تهل
لو هاشمي يكود الضعن
جا حلة بعيوني الهزل

احن ليامي
وتهيج الامي
واتحسر عله الفات

وكت خلاني
الخرابه مجاني
الاكول تصير هيهات

ويلاه . . كلشي ضاع
اقره الفاتحه اعله اسمي بليسر
ثكيل من الهضم جدمي بليسر
جم مره نشف دمي بليسر

**
من فاركت صوت الكمر
بل سنطه صارت راحتي
لعليهه يركض جدي امس
رخصت هذيج حجايتي
تغفه رقيه اعله الرمل
ما ارضه مو من شيمتي
حارسنه منعرفه ابد
صعبه افرشله عبايتي

تنادي بأسمك
تريد تحضنك
وتنسه البيه وتنام

تذوب بعطرك
متدري بصدرك
نامت فوكه السهام

ويلاه . . ما يفيد
تطلع روحه وترجع رقيه
وياهه كلشي ما ينفع رقيه
بس بشوفتك تقنع رقيه

**
كلما يطر خيط الشمس
اختنك حته من الهوه
من بعد وجهك اخبرك
اكبر عدو صار الضوه
تلاكيت ويه باب القصر
وبشوفته خدري انجوه
العدد بي ما ينحسب
اضعاف من طف نينوه

العطش عذبني
الابد ما مرني
مرني وردتك وياي

تحامي اعليه
يخو المسبيه
ويخو الماعدها حماي

ويلاه . . هيه هاي
اليبقى بلا اخو ورايه بلايه روح
التوكع منه الحجايه بلايه روح
اليطيح وماله تجايه بلايه روح

**

اللهم عجل لوليك الفرج
_مصطفى سلمان

https://youtu.be/fboGHPnlmZc?si=mFZTWuVBFM8pYbMk

https://youtu.be/oEjWWVKiq64?si=PuDLquFTgxEP_fms

•
ابابج يريحانة علي ساجد بلا ملامح
شدي رحالي لكربله و بيها ولا ابارح
مديني بيد الحب يأم كلبي لهوه ضياعه
بعالم حبيبي الي ختم سهمه عله الجوراح

برحة جماله هايم حساسي
اول حزن بي ينرفع راسي
دار بحنانه كلبي واحوالي
وبفضله صارت طاهره انفاسي

كلبي روه
بحرت مشاعر كلبي بمأتمه
من هب حنانه صرت متيمه
روحي صفت بلحب متنعمه

فضله ضوه
اخلق سبب لعيوني وابجي اله
ادبني خيره التعذب بل الفله
حسانه جعلني صاحب منزله

.. مولاتي على الحب عينيني "..

بين اقترابي والجفه عمري كضه خساير
بين الشيب وما نصح كلبي بمكانه عاثر
ما بين اعدل خطوتي القافله عني تعبد
وما بين اروض هلكلب يوصل الكلبه حافر

ما قابض بجفي عله الخدمه
النعمه يمي واطرد النعمه
وألطف جزاني واني بمجاني
مولاتي كلبي كلبج يفهمه

يمشي العمر
واني بمكاني اراوح والزمن
يمشي بعجاله وضيعت الضعن
يا دوب الحك بيامي البقن

حيل اعتذر
عن السنين الراحت بلهوه
‏ ‏لكل الحضه بيها ناموسي نوه
‏ ‏يجافي المحنه سيد نينوه
‏ ‏
.. مولاتي على الحب عينيني "..

مولاتي بفكاري حده بيها جرح غرامي
ما أثرت بيه شكثر مرت عليه اسامي
عايش بواقع لو حلم كل الاحوال أحبه
صاحب دمعتي منجرح بلواقع ومنامي

اني الحبيبي علترب حاير
عينه العياله وماله ناصر
المحبوبه وحده غيرته تجرحه
توجه ضميره لغربة العاشر

متبري الكلب
من الضياع الاخرني عمر
رزقيني للحب مولاتي صبر
لو ما رحمتج لا ما انكسر

ودمعي يصب
شفته الحياة بلايه دمعتي
ما تسوه حتى صوت احجايتي
كمت اني اعشك يمج سنطتي

‏.. مولاتي على الحب عينيني "..
‏
عندي اهم من النظر دمعة الحب شهاده
بفضلج يبت المصطفى نال الكلب مراده
تيقنت اني اشتم هوه حتى اشعر بحبيبي
‏ ‏من الحر يجمع بلترب يصنع اله وساده

ستوعبت جرحي طيبته تكلف
محبوبي جرحه لو طبت ينزف
بكل لحضه كون أتعايش الغربه
وعيوني اذممها الدمع ليجف

يعلى النداء
يغزي البياض عيوني ومنطلب
لمنعة حبيبي من ماي الشرب
الشيء وحيد بهل دنيا صعب

في كربلاء
ذاك الجمال وذيج العاطفه
كل وحده منهن بلحب نازفه
روحي لعذابه تون متلهفه

.. مولاتي على الحب عينيني "..

ما لاكي لحساسي دوه غير لبجي المصابه
من بالي غربي كل وطن غربيني بلخرابه
مولاتي حسن العاقبة رزقيني وي حبيبي
بلا روح اعيشن بس جسد لو بعد عني بابه

اني العشت من عينه ولعينه
تحز بل الكلب غربة صواوينه
ياهوه يحمي ضهره لو حارب
ولو طاح ياهو يفزع يعينه

عاش الجرح
بكل المشاعر بانت غربته
نفس الحراره النار ودمعته
ذبحة دليله جمرة غيرته

قبل الذبح
من غيرته دك جفه بلترب
شلون لخيامه تتعنه الغرب
هاي المصيبه التحرك بلكلب

.. مولاتي على الحب عينيني "..

ـــــــــــــــــــــــــــــــــــ
اللهم عجل لوليك الفرج
_مصطفى سلمان