جُل أحلامي تحققت ،
رزقكم الله حلاوة ما أشعر به.♥️

#دمتم__بخير
#رينوش_محمد

العز اهل
العز أصحاب ...
في كل مرة بفكر بلقى انو ربنا منعم على سواء كان ع مستوى الأهل أو الاصحاب
في كل مرة ربنا بختني في نص أحسن ناس ♥️
عشت في مدينتين منفصلات
عرفت ناس مختلفين في كل شي ، عرفت احنهم وانقاهم واجملهم.♥️
ع الرغم اني إنسانة قد اظهر اني اجتماعية بس عكس كده تماماً ، علاقاتي القريبة محدودة جداً ، م بعرف أبقي كل الناس في درجة القرب ، ممكن أعرفك واتكلم معاك بس ح تكون عابر زي الف نفر غيرك ،
القريبين معروفين لي نفسهم ولي غيرهم برضو ،
الحمدلله في كل مرة ختيت إنسان قريب عمرو م خذلني ولا خلاني أندم ع الحتة الاديتو ليها في قلبي ،
كنت ولا زلت إنسانة بحب وبقدس الصُحبة ، ببذل كل طاقتي في اني أحب أصحابي واحاول اكون قريبة قدر ما الظروف سمحت!!!
الفترة الفاتت اللي كل القريبين عارفين انا مالي وحاصل معاي شنو ،
لا قالو ريان إتغيرت ولا قالو ريان بقت كعبة ولا بعدت مننا ،
بدل العذر كانو خاتين لي الف عذر ،
بدل المرة كأنو بسألو في اليوم عشرة ،
أبداً ما خلو الوحشة تملأ المسافات البينا ،
عارفين اني ابدا م كده وإنو بس الدنيا جاية علي ،
لا بدلو محلي ولا ختو فيه غيري ،
لسه انا القريبة برضو والحبيبة ،
الدنيا والمسافات والظروف قادرة تبعدني من أحسن ناس عرفتهم بس عمرها ما ح تكون حاجز يقيف قدامنا وقدام حبي الكل يوم بزيد جواي ،
انا ممتنة لي صحباتي البتعدو ب اصابع اليد ،
لكل لحظة ولكل سؤال وكل لهفة وخوف شفتهم في سؤالهم ،
الدنيا أدتني احنهم وافضلهم ، فالحمدلله على النعمة.♥️

#دمتم__بخير
#رينوش_محمد

الإنسان الكتوم !!
كتير مننا لو ما كلنا مرينا بالشخصية دي ،
إنسان هادئ اتواجد في حياتنا في فترة ما ،
إنسان ساكت ع طول ،
بقابل كل حدث في حياتو بالسكوت ،
كل موقف وكل تجربة بتتعلم جوا روحو من دون أنين ،
تحسو جامد ، قاسي ومرات بقولو م عندو احساس ،
ابدا!!!
ماف إنسان حجر لانو هو طين !
اتخلق هين ولين ،
بس الدنيا والظروف والناس جات عليو ،
يوم ورا يوم
وموقف بعد موقف
اتغير للشكل العارفينو!
اكتر إنسان حساس وبعاني من كل حرف هو ده!!
لا بقول متوجع ولا بقول آه!!
بقابل كل شي بالسكوت!
وللأسف البحصل جوا الروح اسوء
بينزف ،
بتقطع ،
بتكوي بالنار كل يوم ،
كل حرف كان مفروض يطلع منو وما طلع ، بيتحفر في قلبو ،
كل ردة فعل ما طلعت في وقتها بتظل تردد الف مرة في عقلو ،
وفي حاجات اكبر من كده !
عموماً ،

"الروح كل يوم بتتحرق من دون نار!"

#رينوش_محمد

ليت الامس يرجع
ليت ما كان لم يكن ،
ليت!
وهل تنفع؟!
#رينوش_محمد

اتمنى انو الحياة م تجبرنا ناخد قرارات توجعنا ،
تخلينا نقرر مصيرنا المربوط ب غيرنا ،
اتمنى انو الحياة تكون عادلة معانا ،
لطيفة بينا وبمشاعرنا المستنفذة ،
على قدر م نحنا بنبين اننا اقوياء ،
على قدر ما انو نحنا اضعف من اي صورة ظاهرة العيون ،
اتمنى انو ما يجي يوم وتكون انت في موقع اختيار بين خيارين اصعبها مُر ،
ارجع واقول
[عابرين مهما طالت مُدة البقاء] .

#رينوش_محمد

هل انا استاهل كل ده؟

عمري ما مشيت
كنت موجودة في كل الاوقات ومتاحة لكل البحبهم ،
لا حصل زيفت احساس ولا شعور ،
بركز مع التفاصيل الصغيرة قبل الكبيرة ،
بلقى اني كنت بدي بدون حدود ،
بطبطب عليهم ،
بخاف على زعلهم ،
بديهم كل ابديت في حياتي بدون ما يطلبوا ،
بس كلو ما كافي
بلوم لمن احس أننا بعدنا ،
بتكلم وبزعل
بس ما الزعل الشديد لا زعل الاحباب البدي طعم لكل علاقة ،
بحاول مع كل البحبهم ،
عمري ما عملت حاجة عشان أرضي شخص ،
بعمل كل حاجة عشان ارضي نفسي،
، عشان انا حاساها مش مجاملة مني
هل سؤال واحد
هل انا كنت استاهل كل ده؟!

#رينوش_محمد

عدنا والعود أحمدٌ❤
#رينوش_محمد

فترة م بعيدة !!!
وقت م كافي ,
مدة قصيرة ،
شعور متضارب ،
لا مبالاة عجيبة للواقع ،

_ م كان مميز ،
بس عرف كيف يخليني مطمئنة!

_ م اقول انو كان مصدر ثقة
بس م كان بكذب في حاجة ،

إثنين مشو ورا التيار ،
سرعة في كل الخطوات
وغالبا اتخطينا كم خطوة ،

الدنيا كانت ماشة بينا ،
ونحنا كأننا مخدرين ،
أو
م واعين بالحاصل

مشينا ودي كانت مخاطرة
اكتشفت عواقبها بعدين ،

قدر ومكتوب ،
نصيبنا ،

ونحنا مخيرين ،
م مسيرين!

بس في حالنا
كنا مسيرين
ورا حماس البدايات
ورا الكلام الحلو
ورا الاهتمام

هو ما ندم!
بس حاجة اشبه بالغفوة
واللي صحيت منها فجأة

لمن لقيت اننا م شبه بعض
كان وقتها مشى وقت ،
م كانت فترة قصيرة ،

انتهت قصة لسه م بدت !!!
انتهت كده.

#رينوش_محمد