ولادة السجاد عليه السلام

مية هلا ياعلي السجاد
مية هلا وارث الأمجاد
هلا هلا هلا هلا ياعلي السجاد
==================
كل سنه مولاي نفرح بلولاده
يا ابن حيدر علي سيد الساده
الليلة بسمك ياعلي دلالي ناده
هلا بميلادك يمن حبك سعاده

مية هلا نادت الشيعه
مية هلا. تعلن البيعه
هلا هلا هلا هلا ياعلي السجاد
==================
علي يالتشبه علي ابكل صفاته
يلي ماخذ نور من نوره وحياته
واليحبك سيدي تقل سيئاته
تصير منزلتة جبيرة بكد صلاته

مية هلا. بمولد الجنه
مية هلا. مانزل عنه
هلا هلا هلا هلا ياعلي السجاد
==================
الف هنياله الحضر هاي المسيه
ياخذي بشاره وعلي من الزجيه
زين الأعباد انولد اجمل هدية
حكنه لونفرح اله الحد المنية

مية هلا. صاحت الزهرة
مية هلا. فرحت العترة
هلا هلا هلا هلا ياعلي السجاد
==================
صرخو صرخة وسممعوها للسموات
علي شع نورة وترس كل المجرات
بيوم ميلادة الحزن مايلفي هيهات
والبشدة ويندبه يكضيله حاجات

مية هلا. كاضي الحاجة
مية هلا. الشيعه محتاجه
هلا هلا هلا هلا ياعلي السجاد
==================
الشاعر_ابومنتظر الموالي

اه يا زينب

_________

شلون تهون يازينب رزية هزت العيله
صوب المشرعه العباس وحسين انهدم حيل
اه يحسين اه يحسين. اه يحسين وامصابه
================
هليله تهون شلون. يم الخدر حاجينه
لاضل الكفل بالدار لا ظل والد سكينه
يم الخدر وين حسين ابن الطاهرة الزهرة
ثاني سبط للمختار. كطعو بالسهم نحرة
بالخيم تلوج ايتام منهو ايواسي مبجاهم
تدرين العطش جتال. يمتى يبرد. اضماهم
اه يحسين اه يحسين. اه يحسين وامصابه
================
اه ياليله العاشر. محنه جبيرة محنتها
يشبون الخيم بالنار. وتكثر حيل ونتها
دخان ورماد ايثور. تعاين زينب الحاله
والكافل مشه لبعيد. بقت لعيون هماله
وينك يا اخو زينب. احضر هجمت العسكر
ياموت اترك العباس. يم عياله خل يحضر
اه يحسين اه يحسين. اه يحسين وامصابه
================
راحت من زلمنه سباع ياوسفى الترب ضمهم
واويلي نصيح بصوت. عالكاع انسفك دمهم
خل نبجي لحد الموت. يستاهل دمع من دم
اه يحسين اه يحسين. لمصابه خل نتحزم
تحضر وي اليعزون. امي بكل عزة تحضر
واليبجي على العطشان. تسجله بجنه الكوثر
اه يحسين. اه يحسين. اه يحسين وامصابه
=================
وينك يابو الحسنين. بنتك ضلت بحيرة
احضرنه يداحي الباب. ذبحو شيخ العشيرة
خيل العده والارجاس صوب الخيم ملتمه
وانه اسمع بجي الايتام. وين احسين ياعمه
محنة عاشر بعاشور. ماتوصلها كل محنه
ودعنه العزيز حسين. وطفله هواي فاجعنه
اه يحسين.اه يحسين. اه يحسين وانمصابه
==================
اه من الزمن غدار. بينة هواي مايرحم
من امصيبه لمصيبه. كلبي عليهن تورم
خلصت العمر بالنوح معروفه بدمع عيني
بيوم السطرة والمسمار. بدت لمصيبه تغزيني
ومصيبه شهر رمضان. حين الطبرو الهامه
واصعبهن على الحوراء. حسين القربن ايامه
اه يحسين اه يحسين. اهيحسين وامصابه
__
الشاعر _ابومنتظر الموالي

جديد _ وفاة السيدة زينب عليها السلام

شيكتب اعليها القلم
يافجيعه ويا الم
عاشت معانات
عدها الفرح مات
___بدت قصتها بمصيبه ودمع وحزان
ما نشف لحضه جفنها على الوليان
اشعظم جور الفاها ايهد الاكوان
والصبر ساعاته سوده والألم حان

حيل زينب انهدم
صوباها شكم سهم
عاشت معانات
عدها الفرح مات
___اخت عباس وكلبها ينبض اهموم
بدت وي لوعة الزهرة تجري الادموم
اعله باب الدار تنضر حطب ملموم
وشبو النار الاعادي وهذا مقسوم

اخت شيال العلم
دهر بيها مارحم
عاشت معانات
عدها الفرح مات
___
والجرح لكبر لفاها بشهر الأصيام
طبرو الهامه الشريفه وراعي الايتام
انهدمت اركان الهدايه وذيج الايام
ودعت زينب ابوها سيد الاسلام

عرب حزنت والعجم
دموعهم تتجارة دم
عاشت معانات
عدها الفرح مات
___بعد حسرتها اعله امها وحركة الباب
جبد اخوها شاهدته بطشت الاجناب
ابو محمد فاركاها والكلب ذاب
والله ماتحمل مصيبة وقصة اغياب

كون مو واقع حلم
للحسن يحله الطم
عاشت معانات
عدها الفرح مات
___
تالي ختمت كل عمرها برض الطفوف
دهر خلاها وحيدة بين السيوف
كبالها صرعه الاطايب عينها تشوف
هدت الخيل واخوها صدرة مخسوف

زينب شكبرة الاسم
تالي ماتت بالهضم
عاشت معانات
عدها الفرح مات
___الشاعر _ ابومنتظر الموالي

والله حيرة            نادت ام الأربعه والله حيرة           حاربتني الفاجعه بيه حسرات ودمع    مثل جمرات الظلع والله حيرة      والله حيرة <<<<<<<<<<<<<>>>>>>>>>>>>>>> هذا مكتوب اعله حالي للمنية  املوعه بدت تلفيني المصايب لهل بيتي مودعه وحدي ابأرض المدينه…

https://www.facebook.com/share/p/fqPgdvcSxb95XPAh/?mibextid=qi2Omg

ليله القاسم وعلي الاكبر عليهم السلام

تعلمي درس منهم تعلمي
افهمي يكاع الطف افهمي
_______
شباب ثنين فزعو وابو اليمة يحبهم
تحدو يوم عاشور وضع فلا عجبهم
تعنو سوح القتال يموت اليدنه يمهم
الاكبر وي جسام طفح منهم عزمهم

ارسمي مجد الهم ارسمي
افهمي يكاع الطف افهمي
_______

يجاسم ابرز السيف وانه سيفي برزته
اعرفنك ابن حيد وابوية انته نصرته
يهز الكاع لو ضاج تعرفه من خزرته
يكله عمري ما ضاع لبو اليمه نذرته

يدمي ابد ما همني دمي
افهمي يكاع الطف افهمي
_______
يالاكبر صاح جسام يبن عمي وعضيدي
نطيت العهد لحسين اقدمله
وريدي
شحلات السيف وياي شمرته تلوك ليدي
من اطبها اسحك الجيش علية شما تزيدي

تكلمي علي الغيرة تكلمي
افهمي يكاع الطف افهمي
_______
تشوفه بناضر العين مثل حيدر ولينه
يهز الكاع لوصال فلا تتعب يمينه
شبل مولانه لحسين طفح غيرة وسكينه
اخذ من عمه عباس بخت ينكط جبينه

يسمي لون يفزع يسمي
افهمي يكاع الطف افهمي
_______
ركض للخيمه جسام سمع صوت العقيله
خيامي شبت بنار وبدت حسرت دليله
يكلها عمة للموت وحك صبر العليله
اكص اركاب الاجناب لحد مادمي اسيله

يهمي شكثر تكبر يهمي
افهمي يكاع الطف افهمي
_______
الشاعر _ابو منتظر الموالي

5
ليلة مسلم. عليه السلام

من نويت اعلى السفر
كلبي يابوية انفطر

الف ياوسفة وهظيمة
صارت بنيتك يتيمة
ارجع ارجع
###########
اه يا ساعة الفركة شكثر تحمل من الم
يا هظيمة انغدر مسلم راح صكار الزلم
والله يابوية بغيابك جنة حيلي منهدم
بوية ارجع بالسلامة تندبك كل الحرم

يااعز من النظر
كلبي يابوية انفطر
ارجع ارجع
###########٣٣
بويه يامسلم نخيتك ارجع من اتسافر
صارت بنيتك حميدة بوية تكسر خاطر
شلون لو هجمو علينة ال امية ابعاشر
صعب يوم الغاضرية عمي رايد ناصر

مسنة بابوية الخطر
كلبي يابوية انفطر
ارجع ارجع
###########
لون تسئلني رقية عمي شنهي اخبارة
تكلي مسلم مايجينة بعدة اظلم دارة
شرد اجاوبها بغيابك اصبحت محتارة
والزمن يابو حميدة بينت اخطارة

ايزمجر اعلينة الشمر
كلبي يابوية انفطر
ارجع ارجع
############
والله محتارة بغيابك من رحت يالغالي
شلون اكضيها الليالي والحزن يبرالي
انت تدري شكد عزيز وشوفتك تحلالي
بنيتك جنها غريبة لون تنظر حالي

راح اموت من القهر
كلبي يابوية انفطر
ارجع ارجع
#############
بوية احجيلك مصيبة من دخلنة الكربلة
يوم حركوه للمخيم شردوها العايلة
وانة وي سكنة نعاين الظلم من حرملة
كمنة نصرخ يالعقيلة وينة راعي المرجله

وين عباس الكمر
كلبي يابوية انفطر
ارجع ارجع
############
تمت بعون الله ورعايت سيد الكائنات محمد واله الاطهار
كلمات خادمكم ##ابو منتظر الموالي

جديد _ محرم _ ١٤٤٦ للهجرة

رتلتهن ايه ايه
وحصنت بيها السباية
ميسرات الهم خذوهن
راحو الصوب المنايه
_______
قل هوه اية عظيمة وفاتحة ام الكتاب
رددتها اعله الاعادي ونزلت اعليهم عذاب
وحصنت بيها الحراير من مشو درب الغياب
حسين مطممن دليلة تنتصر ام الحجاب

جثتي تغطت دماية
لجن فايز بالنهاية
والحرم بعدي ولوهن
راحو الصوب المناية
_______
من على الغبرة واعاين والضعن انوة الرحيل
والدمة مغظي عيوني وما اشوف اله القليل
جني اسمع صوت زينب حايره بهمها الثجيل
ولملمت ضعن اليتامة وحيل اذاها العليل

لليسر صارو ضحاية
والزمن يروي الروايه
ال امية الما رعوهن
راحو الصوب المنايه
_______
ياعيال حسين اصبرو يا اهل بيت النبي
كلمة من حسين ابوكم ما يذلكم اجنبي
انتو محروسين بالله والله كاتب هالسبي
باجر بقصر الشماتة ينتصر طف زينبي

ينرفع صوت الولايه
بمجلس ابناء البغاية
بيوم عاشر يسروهن
راحو صوب المنايه
_______
مودعات الله ورسوله وبالسلامة ياهلي
جثتي ضلت غريبة شلون همي ينجلي
ادري عاشر من محرم بيه اندب ياعلي
ودري قافلت اليتامه بدرب امية تبتلي

ضنهم اتموت الهداية
صيتهم سيء النواية
شوفت حسين احرموهن
راحو الصوب المناية
_______

بكم خرابة نيموهن والشمس تلهب لهب
والاشد من هذا كله زينب المجلس تطب
اه منك يا زماني شكثر سويت العجب
تبقى وحدها العقيلة تموت بديار الغرب

عاشت وياها العباية
عدها وي العفه غايه
تالي بالسوط اضربوهن
راحو الصوب المناية
_______
الشاعر _ابو منتظر الموالي