#گعدية **انه وغربتي وليل المنيه
وحيطان السجن تبچي عليه
وتصيح السموات .. يا موسى ابن جعفر
...
ذبل ليل الله لونيني وهاجت بروحي المحنه
بالسجن خُلصت حياتي وفارگِت لمّة اهلنه
ما ترد ذيچ الليالي والوكت طشر شملنه

عطشانه العيون لهلي
لديرة علي وخلفة علي
بالغربه محد ما إلي
الليل يخلص ونه ونه

اكتب والله مشتاگ بدمعتي
واكسر خاطر الظلمه بصفنتي
تگضي الليل حسبات .. يا موسى ابن جعفر
...
يوسف وسجنه ومصابه عشر معشار بمصابي
سجني ما بي حته شمعه وانطفت شمعة شبابي
تاكل بزندي السلاسل لحد ما دگ موتي بابي

فوگ الغرب فوگ السجن
تلعب سياط اعله المتن
سجني مثل بيت الحزن
انقرت بي قصة عذابي

يوسف ما جرع سم المصيبه
وانه جنازتي ظلت غريبه
نعشك عالجسر بات.. يا موسى ابن جعفر
...
يونس يگولون عنه ابطن حوت سنين گضّه
لچن ما چان الحديد برگبته وساگه يرضه
براحته لربه يصلي من يريد يأدي فرضه

وانه بفرض وبنافله
برگبتي وايدي السلسله
وتكتب دمومي السايله
اخذ يا رب حته ترضه

اوگف بالصلا وبعيني عبره
ومن دمي عباتي تصير حمره
وتنوح المناجاة .. يا موسى ابن جعفر
...
الموت مر بيه ولگاني ميت من الغربه وحدي
شگد تمنيت بمماتي عليه يلتمون ولدي
بنيتي معصومه تجيني وتمسح ادموعي اعله خدي

تالي بسجن عمري گضه
وما شايف وليدي الرضه
والسم سره بدمي ومضه
وگطع حته هروش چبدي

صاحولي امام الرافضيه
وانه آسمي ضوه عيون الزچيه
شلت شگد جراحات .. يا موسى ابن جعفر
...
نعشي من شالته الوادم نحت يصحاب البصيره
اذكرت يوم الغاضريه وشيخ ظل بلا عشيره
ظل ثلث تيام عاري وشيعو جسمه بحصيره

من بعد شيال العلم
حرگو اعله اعياله الخيم
وانسحگ صدره وانهشم
وخذو علوياته اسيره

حسين ضلوعه بالحافر هشيمه
وزينب تنسبي والله هظيمه
نوح اعله السبيات .. يا موسى ابن جعفر
...
خادم الحسين ( عليه السلام)
كرار حسين الكربلائي
( ابو كميل )**

السلام عليكم جميعاََ اي شي تحتاجون بخدمتكم تكدرون تتواصلون عبر حسابي الخاص

@Eng_alhabeeb

كل عام وانتم تحت خيمة سيد الشهداء كل عام وانتم خدام الحسين كل عام وانتم أقرب إلى قلب صاحب الزمان وأحب إلى الله كل عام وانتم بألف خير وصحة وسلامة وعافية وستر وأمن وأمان ♥️

الى مولاي القاسم ابن موسى الكاضم ع

يا قاسم العطاء.    يا قاسم العطاء

باب يم الله اليريدك يوصل  ايدك بابك
قاسم المسموم انته وكلهه هاي احبابك
نلتم ونجمع حزنه  ونوگع اعل  اعتابك
يا انيس الناس انته ورحمه ربك جابك
ذهب. ذهب  گبتك محلاها
ذهب  ذهب  خالقك علاها
يا قاسم العطاء.  يا قاسم العطاء

الله  خلالك  مكانه   بمرقدك  لمن  تزور
سيدي الوادم تجيلك بالصحن لمن تدور
تشبع ابماعون خيرك بالكرم راسك يفور
تشبه العباس  جدك علخلگ كلش غيور
گمر گمر.   تشبه العباسهه
گمر گمر  من تهين ارجاسهه
يا قاسم العطاء.  يا قاسم العطاء

خير   الوادم   تجيلك  ما ترد  اضيوفك
انته يا شيخ الطوايف شاهدات اجفوفك
توگف ابكل الشدايد قاسم احنه انشوفك
قاسم  المضلوم  انته   ولا تضن  انعوفك
حزن. حزن. ما  تنام.  ابليلك
حزن  حزن. منهدم كل حيلك
يا قاسم العطاء    يا قاسم العطاء

هاشمي وطبعك غيور وعامرات ادلالك
الله حييهه  المراجل  شاهدات  افعالك
انته سويت العضائم  شاهدين  اجيالك
انته   علضالم  نعرفك  باينات   اقوالك
كفو  كفو.  ما حنيت الهامه
كفو  كفو   يا سر الامامه
يا قاسم العطاء   يا قاسم العطاء

تبجي علمضلوم ليلك ما تخلصه ابراحه
عايش  ابعاشور  جنك سيدي   ورماحه
انته يل گضه حياته العايش اعله نياحه
حيل يخنگكم محرم  عايشين اصياحه
بجي  بجي  تذكر انته الناگه
بجي  بجي  دمعتك حراگه
يا قاسم العطاء   يا قاسم العطاء

حيدر عبد الحسين الاسدي

شهادة المولى القاسم ابن الامام الكاظم عليهم السلام

غربت هالعمر .. تـاخـذني الحـزن عمتي
ياضيم اليسر .. مـا فارگـني كـل وكـتي

دمـعـة عـيني تـتبده
تكتل عيشة الوحده

...................

كـل هـذا العـمـر عـشتـه بـغربـه وديـره مـاعــنـدي
وانـه ابـن الاطـيـاب اشلون تـالـيها عـشـت وحدي
صـرت سـگـاي بـالـديــره و سلـطـان الخلـگ جدي
عشت غربة خوات احسين ودمعي يسولف بخدي

غـريـبه صفنتي .. وغريبه الـگـاع مـو گـاعـي
جبـيره غربتـي .. ودموعي الوحشتي متاعي

غربتي مو حجي ومُده
تـكتل عـيشة الـوحــده

.......................

الـيسئـلونـه على اسـمـه يـگـوله وايـوگف ابطوله
بــس انـه الـذي عني يـسـئل اســمـي مــا گــوله
يـاهــو مـثلي عـايشها يـخفي اسـمه عـله الحوله
انـه مـن بـنـي هـاشـم و مـا احـجـيها مـعـقـوله

عشت ابلا اسم .. بس روحي التعرف اسمي
حيلي ينـهدم .. وجـووه الساده مـــو يمــي

الضايع اسمه شيرده
تكتل عيشة الوحده

....................

الـغـربـه الاحـنـه عـشـناهـا مـامـرت عـلــى الوادم
جـنـها الـغـربـه مـكـتـوبـة بـس اعـلـه بني هاشم
صعبه انه ابسلف سگاي وابوي اعله الخلگ حاكم
وانـه ابـن الـسمـه والـگـاع وتـالـيـها اضــل هــايم

جـدي الــمـرتـضى .. وسگاي اصبحت كلفه
واخو گلبي الرضا .. بروحي اشگد اله لهفه

مشتاگ الـدفو زنده
تكتل عيشة الوحده

...................

امشـي بـصف نهر واحـجي وي ماي الشرب عتبه
مـايـك يـانـهـر عـالـگـاع كلـهـا اتـضوگ من عذبه
لـيـش احسين يـوم الـذاب مـن كـثر الضمه گلبه
مـارحـت وتـعـنـيتـه ومــن گـطـراتــك اتـشـــربه

لازم يـــانــهـر .. انت التمشي لخيامه
مسكور الظهر .. يـمك طـايح احزامه

ضامي ويحلف بجده
تكتل عيشة الوحده

..................

ابـنيـتي اتـرد الـي تـبـجـي كـل عـصريه مـهظومه
يسـمـوها الـخـلـگ بـنت الـ غريب الضايعه اعلومه
واذكر غربة اخت احسين الطلعت تبجي بالحومه
هـم صـاحـو عـليها اخت الـ غريب السلبو اهدومه

ويلي بكربله .. زيـنـب عـمـتـي بــجـوها
ابن امها عالفله .. حته اهدومه سلبوها

هاي الحيره والشده
تكتل عيشة الوحده

ابو حميدة الشويلي

اللهم عجل لوليك المنتقم الفرج

حيره شلون اواسيكم
يا ساداتي ما عندي
گلب يحمل نواعيكم
ما بيّه حزن يشبه لياليكم
كل جروحكم تهضم
بس ها المرّه مختلفه
خسارة اُم
ام گلوبكم ماتت
القبل لا الها تنكسرون كلكم باچيه اعليكم
واذا چانت خلگها ايضيج تتسله بأساميكم

الحنينه ام گلب طيب وام ضلع ما طاب
الزهره الناحله الدفعو عليها الباب
امصاب الما يشبهه امصاب
امصاب الخله حيدر يضم سره ابّير
ابو نهج البلاغه و يعجزه التعبير
وثگيل السمه صار اويَ الهوى يندار وين ايدير
امصاب العافكم موته
گبل لا موت يلفيكم
حيره شلون اواسيكم

حيره شلون اواصلكم
وبيا دمعه اطب الكم
ودمعتكم يتامه حسين من ينذكر محسنكم
رضيع الكم على حر صدر ابوه غافي
وغفه المحسن على حر نار عتبتكم
لهاي وذيج ما بطلت دمعتكم
اول جرح غرّبكم
امصاب الصار بي گلب الحسن مجمور
وخمس سنين عاف حسينكم مكسور
واول دمع صب من عين عمتكم
من عدها وبده ناعي مجالسكم
ومن عدها وولا كفت بواچيكم
حيره شلون اواسيكم

ليش ١٣ معصوم ما منكم چبد يسلم
ليش اورودكم مو نده ايصبن دم
اسم الام يبچيكم
واسم الاب يبچيكم
واسم الاخت والخوه وكفيل وعم
ليش نحوركم تنكطع ما تنشم
ليش النار تندلكم خيم وبيوت
وما صح اليحاميكم
حيره شلون اواسيكم

ليش اكبر مصايب صارن بها الكون
هنه المرن اعليكم
وليش أي فاجِعه تمر أي بشر بالناس
مثلها الگه سدت بيكم
ليش اولا جرح با الكون يخطيكم
شعجب يهل الله ما صح اليراعيكم
مو الكم خلقها الگاع
شو غربه طواريكم
اذا منكم إمام اسمه ( الرضا ) ومسموم
منو اليطلب مراضيكم

شعجب قرآنكم من ينجمع ما ينحسب قرآن
شعجب امكم الزهره تبني بيت احزان
شو جبتوها قربان بضهر قربان
حتى لو طلع مسجونكم بإفراج
يطلع ميت ويتشمت السجان
ليش بكل جسر اذكر اجنازتكم
وليش بكل نهر ابچي اعله جربتكم
وليش مْن اسمع بْعَودَة امسافر عاد
يكسر گلبي غايبكم
ويم كل باب دمعة ام الاگيكم
مظلومين مظلومين
يا ساداتي شــــرثيكم

عدكم بعد طالب ثار
غاب وطالت الغيبه
يجي وثاراتكم يطلب
بس ياهوه يطلب ثار طول اغياب مهديكم
حيره شلون اواسيكم
حيره شلون اواسيكم

اللهم عجل لوليك الفرج

انور الموسوي

**كل يوم الأعيشنّه ...
محرم ينحسب چنّه
ابد مانشفن ادموعي...
جمر يسعر چوه ضلوعي
٠٠٠٠ ٠٠ ٠٠٠٠
تمر بيّه السنه مولاي 
ومصابك ساكن عيوني
ابچي عليك والوادم
المسودن يسمّوني
لو شافو جرح بالطف
چا ركضو يعذروني
ما سمعو رقيه تصيح
يعمّه احميلي امتوني

جفني من اغمضنّه...
الطف كله اشوفنّه
وكل صوره خذت روحي..
. وافزّن تنزف جروحي
كل يوم الأعيشنّه
٠٠٠٠ ٠٠ ٠٠٠٠
عشگ الدنيه فتره يروح
يل عشگك فلا ينمل
شحلاتي بمجلسك مولاي
كون اصيرن مبهذل
وادگ صدري واصيحن اخ
مثل الوگفت عله التل
واذبل بالمصيبه عليك 
مثل رقيه من تذبل

واصفر ينگلب لوني...
وهلي وربعي يظيعوني
واشوفن لوعت ايتامك...
واشوفن نار بخيامك
كل يوم الأعيشنّه
٠٠٠٠ ٠٠ ٠٠٠٠
نار بگلبي ما تطفه
من الطف ورّثت لوعه
بخيل اشگد  بخيل ايصير
عليك اليحبس دموعه
فشله الزلمه يبچي انگول
وعليك الدمعه مشروعه
يامثلك بشر مذبوح
وحافر كاسر اضلوعه

وفرّت بالفله  اعياله...
وسيوف اتگطع اوصاله
ومن اشرب لذيذ الماي...
توگف صورتك وياي
كل يوم الأعيشنّه
٠٠٠٠ ٠٠ ٠٠٠٠
طحت لاچن عليك الناس
جيمه اتحشم بجيمه
يظامي ومنذبح عطشان
بوكت بيه شحّت الغيمه
عيّشني بجرح يحسين
واچويني بجمر خيمه
وخل گلبي يفر عليك
فرّت طفله بالهيمه

يل عايش جرح بيه...
جرت انفاسي  لطميه
لو ما انته شنهي انه...
اليحبك يرتفع شانه
كل يوم الأعيشنّه
٠٠٠٠ ٠٠ ٠٠٠٠
اعشگنك عشگ للموت
وغيرك ماردت محبوب
الف وتسع ميه تشيل
حتى تطيح مني اذنوب
ينايم منسلب عريان
واكشخ انه لابس ثوب
خليني اخدمك يحسين
العاش بخدمتك مهيوب

من الطم بالحسينيه
هذا اكبر شرف اليه
ويصبح بختي اشكبره..
وتسمع صرختي الزهره
كل يوم الأعيشنّه
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي**

**العشقُ  دربك  ارتجيه
والحب   لااكراه  فيه

!!!!!!!!!!!!!!!!!!!!!!!!!!!!!!!!!!!!!!!!!!!!!!

ليل العاشگ ظعن.. ضاع بطف نينوى
ساعاته بلا صبح.......... ويمر بلا ضوه
باله يجرحه السهم..والجمره بحسرته
للظل اعله الترب.... ... نايم وبلا ذرى

اشم    اعتابك    واشتاگ
وتبرد   شوغتي   ونوحي
چف حاضن جمر يحسين
هيج   بخدمتك    روحي

يل  خيمتك  معبد  جمر
للدمعه  عندك   چم عمر
أول ملك عنده الخدم كلهم سلاطين

يل  شوفتك   ريّع النظر
يل   دوهنت   كل البشر
اي ربي بس لمصيبتك خالقها هالعين

في الوجدِ مالك من شبيه
والحب     لا  اكراه    فيه

!!!!!!!!!!!!!!!!!!!!!!!!!!!!!!!!!!!!!!!!!!

ياروحي  وغايتي   ياشلال  العشگ
الله مسوي الگلب لعيونك بس يدگ
والي  يفارگ  ولف  ماتنشف  دمعته
صدرك للحب ترى والله مو للسحگ

انت  بگلبي   اي    موجود
يعني   الكون  كله.    وياي
سمه وگاع وعرش ونجوم
عجب بس وين صار الماي

صفْي الگلب   بمحبتك
روحه وحياته بخيمتك
العاف  دربك سيدي  مايعرف الراي

اقبلني  بعيوب   العمر
اعرف حلاة الحب صبر
ماحصلت غيرك ابد واحچيله شكواي

قلبي جمالك يعتريه
والحب لااكراه  فيه

!!!!!!!!!!!!!!!!!!!!!!!!!!!!!!!!!!!!!!

الحب   مو  بالمثل   الله  بالحب  شهد
حب يضعف ينتهي..بس حبك ماله حد
كل ساعه بحضرتك تسوه سنين العمر
لو اقيس  محبتك..ضاع  وياها  العدد

نايم   عالتراب    شلون
يا  اجمل   خلق    ربك
نعم انت رحت عطشان
وكلشي تروًه من عذبك

انت الامان لكل  بشر
وألي تحن ليه  ابتشر
صار البچي  لمصيبتك  بي  راحه  للناس

حبك رسم لهل العشگ
ليش اليحبك  يحترگ
شمس الله عاشور الظهر تمطرلك احساس

عبدٌ الهوى لو تشتريه
والحب   لااكراه  فيه

!!!!!!!!!!!!!!!!!!!!!!!!!!!!!!!!!!!!!!!!!!

عينك  شافت  تصد كل  الصار  وجرى
بنيتك خافت مشت عثرت فوگ الثرى
وزينب   شيبة   علي   ظلت  متحيره
يالوعة     هالدرب     يا كسرة   نينوى

شايل  حيرة   المطلوب
وانت اعله الترب عريان
وشفته  ألراد  منك  ثار
وَجرٌ    بالخيم.    نيران

تنهض ردت من وگفت
فوگ الترب كلك طحت
الف وتسعمية جرح ومصيبه عطشان

شفت اليتامه تراكضت
زينب عله التل حشمت
حرمه وچبيره بنص غرب عازتها خوّان

نبكي وحزنك لانعيه
والحب لا إكراه فيه

!!!!!!!!!!!!!!!!!!!!!!!!!!!!!!!!!!!!!!!!!!

جابوا.   بالطف   هزل  لامحمل   لاستر
شلون بحال الهوى شلون بشمس الظهر
وينك   يابو  الفضل   نسوان   بلا اخو
هيمه وسوگ وغرب وباجر  ذاك القصر

حال   الشام  آه الشام
ياحال الغريبه   شلون
مچتوفه صدگ بحبال
ياهالناس هاي ام عون

والزيًد    الهم    والألم
ديوان بي  مجلس زلم
ومن الهضم زينب غدت حالتها حاله
وين    الكفلها   وتلتفت
صاحت يبو فاضل متت
اتمنه    ميته   ولا  أظل  بلا  كفاله

الشام يحكمهُ السفيه
والحب لا إكراه فيه

علي طعمه البطاط**

**ياهلي هذا ضعنكم هاذي زينب مو غريبه
هاشمي ماصاح منكم هاذي زينب مو غريبه

مو غريبه....كرهته هالاااسم
مو غريبه....بعد كافي الجم

ضعني راجع.........خلص درب السبي
ضعني راجع.........يحينا الطالبي
ضعني راجع.......واصيحن ياهلي وين

يشاام هاي بيوت اهالينا
مانام بخرايب بيها تسبينا
يشاام مانام بعد للوطن ردينا

وين اهلنا....وين اهلنا......وين اهلنه
...............................................................
راح اذب حبال اديه حبال المن مو سبيه
ها ينسوان المدينه عني كولن مو سبيه

مو سبيه....دخلت دار الاهل
مو سبيه....انا الخدري مثل

وصوا جاري...ضلي ماشافه بشر
وصوا جاري ....لا يصدگ بالخبر
وصوا جاري.....يسد اسماعه والعين

ياجاار خيالي الماشفت رسمه
بالنار احترگ ماوصفته الچلمه
ياجار بالنار احترگ خدري وصواوينه

وين اهلنا....وين اهلنا......وين اهلنه
...............................................................
يالفضل وينك يعمه مدلي ايدك زينب انا
كافالي فارگت رسمه جيت اريدك زينب انا

زينب انا....وشفت طولك نهر
زينب انا....ردت وجهك گمر

رايه گالو....خضرت بيد الفضل
رايه گالو.....لعمتك شايلها ضل
رايه گالو...هوت محتاجه چفين

وياي يعمه الجود الك جبته
بالماي ابوك الگه طعم بخته
بالماي ابوك الگاها جفينه

وين اهلنا....وين اهلنا......وين اهلنه
...............................................................
راجعه يادور اهلنا بضعن مسبي وين اهلنه
بيه فزن من وصلنه جروح گلبي وين اهلنه

وين اهلنه.....ضعن زينب اجه
وين اهلنه....انگطع بيه الرجه

ياحسافه..... طفه موگد هلي
ياحسافه..... ولا فزاع الي
ياحسافه......جفوها دلال الحسين

خوان ماكو من اجت زينب
وليان تگابل ضعني وتلهب
وليان محد دار الي عينه

وين اهلنا....وين اهلنا......وين اهلنه
...............................................................
الملا/محمد باقر الخاقاني**

**اخر نفس _ ضميته الك
لاتنحني _ اتوسلك
بجروحي جاي انتظرك // اشبكني وعدل ضهرك
//////////////////////////
جنت اتاني جيه منك _ حتى اموت ابين ادينك
جاي انازع وارد اشمك _ شكد صحتلك خويه وينك

الم عيني تحملته _ ودمع عينك يبجيني
اشوف الحيره بعيونك _ مايطلع سهم عيني
لا تاخذني للخيمه _ اموت اهنانه خليني

بعيني السهم _ لمن وكع
من الكفه _ مكابل طلع
ياسهمي عوفه محيرك // اشبكني واعدل ضهرك
//////////////////////////
فوك جسمي تطوف اشوفك _ وترجع اعليه تباوع
وين جفك من كلتلي _ بحسره كتلك خويه ضايع

صحتلك باخر انفاسي _ اريد اخر نفس منك
يتعبنك تره اجفوفي _ لتدور يتعبنك
يخويه بروحي مافكر _ افكر باليسحكنك

عكبي الك _ ماظل عرف
الحافر خشن _ وضلعك ترف
امن تطيح يندل صدرك // اشبكني واعدل ضهرك
//////////////////////////
جاي انته ومن كمتلك _ بل رمح واحد دفعني
صاح ربعه وسلبوني _ من صحت خويه سمعني

صاحو كبل لا يوصل _ اخيه ويلحك انفاسه
اجه مفرع بلا اعمامه _ المايرضه اعله عباسه
تعالو انذبحه خلونه _ ونشيل اعله الرمح راسه

كسرت ضهر _ بأذني اسمعت
بنص الدرب _ شفتك طحت
متعوب لازم خصرك // اشبكني واعدل ضهرك
////////////////////////

حسين غمض عيني بيدك _ خل اودعك من رخصتك
والله لو ما اسهام صدري _ جا كمت هسه وشبكتك

يبو اليمه علي اشهد _ الشاطي ما ظكت مايه
رغم ما شلته بجفوفي _ ولكيته بارد اهوايه
شمرته من تذكرتك _ وكتله بهاي الحجايه

كلبي بعطش _ خل ينجوي
وبشوفتك _ انه ارتوي
حسين البقاء بعمرك // اشبكني واعدل ضهرك
////////////////////////
خويه ارجع للمخيم _ لا سهم تايه يلوحك
روحي جنهه تريد تطلع _ خاف تطلع كبلي روحك

اخاف اتيه اخيامك _ شيطمني من ترجع
خفت من شدة الصدمه _ روحك بالدرب تطلع
شيصير بااختي سولفلي _ اذا ميت خبر تسمع

شيبك كثر _ جنك متت
روح وبعد _ لا تلتفت
الله يعظم اجرك // اشبكني واعدل ضهرك
////////////////////////
اكبال زينب الردته منك _ دمع عينك خويه امسحه
من تنشدك وين اخيك _ روح للعامود طيحه

عمود الخيمه من يوكع _ عليه الحركه تكتلهه
كلهه مكطعه اجفوفي _ وخل تعذرني كللهه
وازاني سهم عيني _ ما خلاني اروح الهه

حسين العطش _ هد عالخيم
بعيني بعد _ عوف السهم
صبر اخيتي بصبرك // اشبكني واعدل ضهرك
////////////////////////
تمت ____ علاء الزيدي**