Ҳүрметли Ўатанласлар!

Бәриңизди миллий қәдриятларымыздың тымсалы болған, ең уллы байрамымыз – Наўрыз әййямы менен шын-жүректен қутлықлайман!

Наўрыз бул жаңаланыў, жасарыў, тәбияттың қысқы уйқыдан ояныў әййямы. Миллий өзлигимизди аңлаўдың руўхый суўсыны болып табылады.

Байрам мүнәсибети менен ҳәр бирииңиздиң шаңарағыңызға аманлық, қут-берекет, ығбал-бахыт ҳәм алдағы ийгиликли ислериңизде бәрқулла әўмет яр болыўын тилеймен.

Ҳүрмет пенен,
Ч.Елмуратов

Бүгин социаллық тармақларда Қоңырат районы ҳәкиминиң биринши орынбасары, қәдирли ағамыз Бахтыяр Қурбановтың биймезгил дүньядан өткени ҳаққындағы кеўил билдириўди оқып, жүдә қыйналдым.

Себеби, Бахтыяр аға менен буннан бирнеше жыллар алдын Министрлер Кеңесинде бирге ислескен едим. Ол алдын бир сектериатта, соңғылығында болса, Жаңадан ашылған "Юксалиш" улыўмамиллий ҳәрекети ҚР бөлиминиң баслығы лаўазымында жумыс алып барды. Статусы жағынан Министрлер Кеңеси баслығының орынбасарына теңлестирилип, Кабинетлеримиз жақын, бөлимниң жумысларын үгит-нәсиятлаўда дерлик ҳәр күни мәсләҳәтлесип туратуғын едик.

Бахтыяр аға негизинен  кишипейил, туўрысөз, орыстәбият инсан еди. Кел Чаржаў, деп орнынан турып күтип алатуғын, биз жақын сәўбетлес аға-ини болдық.

Сиз буннан былай Юксалиштиң баслығы болдыныз, енди сизди Юксалиш аға, деп шақыраман деп ҳәзиллескен едим сонда. Соннан былай ол мениң Юксалиш ағам болды.

Юксалиштиң атынан 3-4 журналистти алып бийпул семинарға да қатнасып, Хорезм ўәлаятына қыдырып та қайттық.

5 жыллықларда Бахтыяр ағамның анасы дүньядан өткен еди. Ас-абатына барып кеўил билдирдик.

Соңғы жылларда Қоңырат районында ҳәкимниң биринши орынбасары лаўазымында жумыс алып барған дәўирде де телефоннан аман-есенлик сорасып туратуғын едик.

Әттең өлимге қыятуғын инсан емес еди. Бенделик екен, қәйтемиз.

Бахтыяр аға топырағыңыз торқа болсын. Бул пайытта анаңыз бенен ушырасып атырған шығарсыз мәгәр.

Сизиң жарқын естелигиңиз көпшилик жақынларыңыз бенен мениң де қәлбимде мәңги сақланып қалады. Жайыңыз жәннет болсын, ағам!

Хош бол, "Юксалиш" ағам!!!

14.03.2024

Жайыңыз жәннет болсын, "Юксалиш" ағам!!!

#Намалы_қосықлар *🎼Аналар*

✍Сөзи: Ч.Елмуратов

🎹Намасы: Б.Қәлменов

🎤Атқарыўшы: Дурдана

#Намалы_қосықлар

"Анажан" 🎼

*✍️ Сɵзи: Ч.Елмуратов*🎹 Намасы: Қ.Әметов*🎤 Атқарыўшы: Ҳ.Назарымбетова*@charjau_elmuratov

Өмиримиздиң мазмуны, тиришилигимиздиң даўамшысы болған әзиз ҳаял-қызларымызды 8-март - Халықаралық ҳаял-қызлар байрамы менен шын жүрегимнен қутлықлайман.

Бир ўақыттың өзинде шаңарағымыздың уйтқысы ҳәм соның менен бирге жәмийетлик искер болған Сиз ҳаял-қызларға, соның ишинде, меҳрибан Аналарымыз, жеңгелеримиз ҳәм апа-қарындасларымызға бәрқулла тәжим етемиз!

Неге дегенде, елимиздиң раўажланыўына мүнәсип үлес қосып, жоқары жетискенликлерге ерисип атырған ҳәр бир ер азаматтың жанында сиздей жанажан ҳаял-қызлар бар.

Ул-перзентлердиң, бизиң ҳәм ели-халқымыздың алдында бәрқулла аман болғайсыз!

АНАЛАР

Эҳ, аналар, аналар,
Ул-қызына паналар.
Меҳрибанды сизлердей,
Ким қаяқтан таба алар?!

Өмир жолы тайғанақ,
Гә муң, гә шад сайрамақ.
Қанатларсыз қус киби,
"Қулыным!"лап аймалап.

"Ана кеўли балада,
Бала кеўли далада".
Өтер екен перзент деп,
Өмири алағада да.

Эҳ, аналар, аналар,
Перзентлерге паналар.
Болмас сиздей меҳрибан,
Сизден өткен даналар.

@charjau_elmuratov

Ҳүрметли Аналар, Апа-қарындаслар, бир-биринен шырайлы жеңгейлер! Гүллән Ҳаял-қызлар!

Бәриңизди бүгинги ең қутлы байрамыңыз бенен шын-жүректен қутлықлайман!

Өмиримиздиң даўамшысы, шаңарағымыздың берекети ҳәм елимиздиң көрки болған Сизлерге беккем денсаўлық, ығбал-бахыт ҳәм алдағы ийгиликли ислериңизде тасқын-табыслар тилеймен.

Биз ер азаматлар бәрқулла Сизиң алдыңызда бас ийемиз. Сизиң гөззаллығыңыз, тапқырлығыңыз ҳәм шийрин сөзиңизден илҳам аламыз, алға өрлеймиз.

Бәрҳә аман болғайсыз әзиз Ҳаял-қызлар.

Ҳүрмет пенен Чаржаў Елмуратов

@charjau_elmuratov