လောက်ကိုင်မြို့လယ်ကို စစ်ကောင်စီ၏ လေယာဉ်များက စက်သေနတ်ဖြင့် ပစ်ခတ်ပြီး ဗုံးများကျဲချမှု ပြည်သူ ၁ ဦးသေဆုံးပြီး ပျက်စီးမှု များပြား

ရန်ကုန်၊ ဇူလိုင် ၁၅

ရှမ်းပြည်နယ်မြောက်ပိုင်း၊ လောက်ကိုင်မြို့လယ်ကို စစ်ကောင်စီ၏ လေယာဉ်က စက်သေနတ်ဖြင့် ပစ်ခတ်ပြီး ဗုံးများကျဲချသွားခဲ့ရာ ပြည်သူ ၁ ဦး သေဆုံးပြီး ပျက်စီးမှုများပြားကြောင်း လောက်ကိုင်မြို့မှ ပြည်သူတချို့နှင့် ကိုးကန့်​ MNDAA၏ ထုတ်ပြန်ချက်အရ သိရှိရသည်။

ဇူလိုင်လ ၁၄ ရက်နေ့ နံနက် ၂ နာရီဝန်းကျင်အချိန်တွင် လောက်ကိုင်မြို့လယ်ကို စစ်ကောင်စီ လေတပ်မှ လေယာဉ် တချို့က လာရောက်ပြီး စက်သေနတ်ဖြင့် ပစ်ခတ်ခြင်း၊ ဗုံးများကျဲချခြင်းများကို လုပ်ဆောင်ခဲ့ကြောင်း၊ လောက်ကိုင်မြို့မှ ပြည်သူများ ထွက်ပြေးကြရကြောင်း၊ လတ်တလော ပစ်ခတ်မှုကြောင့် ပြည်သူ ၁ ဦးသေဆုံးခဲ့ကြောင်း၊ သေဆုံးခဲ့သော ပြည်သူ ၁ ဦးကို ယမန်နေ့ ဇူလိုင်လ ၁၄ ရက်နေ့တွင်ပင် သဂြိုလ်ပြီးစီးပြီဖြစ်ကြောင်း MNDAA ထံမှ သိရှိရသည်

လောက်ကိုင်မြို့မှ ဒေသပြည်သူတစ်ဥိးက "လေယာဉ်က တစ်စီးတည်းတော့မဟုတ်ဘူး။ စက်သေနတ်တွေနဲ့ပစ်တယ်။ ဗုံးကျဲချတယ်။ ပေါက်ကွဲသံကြားတာနဲ့ အားလုံးလည်း ပြေးရတာ။ မှောင်နေတဲ့အချိန်ကြီး အကျဲခံရတာ။ မြို့ထဲ အဆောက်အအုံတွေကို လေယာဉ်ပေါ်ကနေ စက်သေနတ်တွေနဲ့ တော်တော်ကို ပစ်သွားတယ်။ မြို့ထဲ၊ မြို့လယ်ခေါင်ကိုပစ်တာ" ဟု ယမန်နေ့ ရန်ကုန်ခေတ် သစ်သတင်းဌာနထံသို့ ပြောဆိုခဲ့သည်။

စစ်ကောင်စီ၏လေယာဉ်ဖြင့် ဗုံးကျဲမှုကြောင့် ဟွမ်ကျားလိဟွာဟိုတယ် ၊ဖူလီလိုက် ဟိုတယ်အပါအဝင် လောက်ကိုင်မြို့လယ်ရှိ အဆောက်အအုံများ ပျက်စီးမှုများ များပြားခဲ့ကြောင်း သိရှိရသည်။

ပြင်ဦးလွင်တွင် စစ်ကောင်စီက လုံခြုံရေးဂိတ်များနှင့် ကင်းပုန်းဂိတ်များ ထပ်မံတိုးမြှင့်ပြီး ပြည်သူ့စစ်(ခေါ်) ပျူစောထီးအဖွဲ့များ မြို့လုံခြုံရေးအတွက် ပိုမိုအသုံးပြု

ရန်ကုန်၊ ဇူလိုင် ၁၅

မန္တလေးတိုင်း၊ ပြင်ဦးလွင်မြို့တွင် စစ်ကောင်စီက လုံခြုံရေးဂိတ်များနှင့် ကင်းပုန်းဂိတ်များကို ထပ်မံတိုးမြှင့်နေပြီး လုံခြုံရေးဆောင်ရွက်ရာတွင် ပြည်သူ့စစ်(ခေါ်) ပျူစောထီး အဖွဲ့များကို မြို့လုံခြုံရေးအတွက် ပိုမိုအသုံးပြုလာကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့​ ပြောဆိုသည်။

ပြင်ဦးလွင်ကပ်လျက်ရှိသော နောင်ချိုမြို့နယ်ကို TNLA ဦးဆောင်သော တော်လှန်ရေးတပ်များက တိုက်ခိုက်သိမ်း ပိုက်ပြီးနောက် ပြင်ဦးလွင်မြို့၏ အရေးကြီးသော နေရာများ၊ ပြင်ဦးလွင် အဝင်အထွက်လမ်းများတွင် စစ် ဆေးရေးဂိတ်များနှင့် ကင်းပုန်းဂိတ်များကို တိုးမြှင့်လာခြင်းဖြစ်ကြောင်း ၊ အဓိကအားဖြင့် ဂိတ်များတွင် စစ်သားများကို ဦးဆောင်သူများအဖြစ် အရေအတွက် အနည်းငယ်သာ ထည့်သွင်းပြီး ပြည်သူ့စစ်(ခေါ်) ပျူစောထီးများကို လက်နက်တပ်ဆင်၍ အဓိက အသုံးပြုနေခြင်းဖြစ်ကြောင်း သိရှိရသည်။

"ပြင်ဦးလွင် မြို့ ကားကြီးကွင်း/ အတက်လမ်း ၊ ပြင်ဦးလွင်-လားရှိုး လမ်းဘက်တွေမှာ ပိတ်ဆို့စစ်ဆေးရေးဂိတ်တွေ ပိုပြီးတိုးချဲ့လာတယ်။ စစ်ဆေးရာမှာ ရပ်ကွက်အုပ်ချုပ်ရေးအဖွဲ့ နဲ့ ပြည်သူ့စစ် (ခေါ် ) ပျူအဖွဲ့တွေက အဓိက စစ်ဆေးတယ်။ တပ်နဲ့ရဲကတော့ ကြီးကြပ်သူအဆင့်လောက်ပဲပါတယ်။ ပျူတွေကိုတော့ ခပ်များများ သုံးလာတာ။ ဂိတ်တွေမှာ အင်အား အနည်းဆုံး ၄၀ လောက်နဲ့ကို စစ်ဆေးတာ" ဟု ပြင်ဦးလွင်ဒေသပြည်သူတစ်ဦးက ပြောဆိုသည်။

ပြင်ဦးလွင်မြို့ ရပ်ကွက်ကြီး ၁၀ နယ်နမိတ်အတွင်းတွင် ပြည်သူ့စစ်(ခေါ်) ပျူစောထီးများကို စစ်ကောင်စီက လက်နက်အပြည့်အစုံ တပ်ဆင်ပေးထားပြီး စစ်ဆေးမှုများကိုလည်း အဓိက လုပ်ဆောင်စေကြောင်း သိရှိရသည်။

ပြင်ဦးလွင်ရှိ စစ်ကောင်စီတပ်များကမူ စစ်တက္ကသိုလ် အပါအဝင် စစ်တပ်၏ အရေးကြီးသောနေရာများတွင် အထပ်ထပ် ခံစစ်လိုင်းများ ပြင်ဆင်ထားကြောင်း၊ ကတုတ်ကျင်းများ၊ ဘန်ကာများကိုလည်း စစ်တက္ကသိုလ်နှင့် စစ်ဘက်ဆိုင်ရာ အဆောက်အအုံများတွင် အဓိက လုပ်ဆောင် ပြင်ဆင်ထားကြောင်း၊ စစ်တပ်၏ အရေးကြီးသော ကင်းနေရာများကို လုံခြုံရေး ၂၄ နာရီ ချထားကြောင်း၊ CCTV များလည်း တိုးချဲ့တပ်ဆင်နေကြောင်း သိရှိရသည်။

ဓာတ်ပုံ- စစ်ကောင်စီ၏ လုံခြုံရေးဂိတ်တစ်ခု။ (ပုံအဟောင်းဖြစ်ပါသည်။)

သံတွဲ လေဆိပ်ကို သိမ်းပိုက်ပြီးနောက် စစ်ကောင်စီ၏ လေယာဉ်ကွင်းနှင့် လေဆိပ်ကိုပါ ထိန်းချုပ်ထားဟု AA ပြော

ရန်ကုန်၊ ဇူလိုင် ၇

ရခိုင်ပြည်နယ်၊ သံတွဲ လေဆိပ်ကို သိမ်းပိုက်ပြီးနောက် စစ်ကောင်စီ၏ လေ ယာဉ် ကွင်းနှင့် လေဆိပ်ကိုပါ ထိန်းချုပ်ထားကြောင်း AA က ထုတ်ပြန်ပြောဆိုသည်။

သံတွဲမြို့နယ်ကို ဧပြီလ ၁၃ ရက်နေ့မှ စတင်တိုက်ခိုက်ခဲ့ပြီး နေ့တိုင်းနီးပါး တိုက် ပွဲများ ပြင်းထန်ခဲ့ကြောင်း၊ သံတွဲအခြေစိုက် ခမရ ၅၆၆ တပ်ရင်းကို ဇွန်လ ၂၇ ရက်နေ့တွင် သိမ်းပိုက်ရရှိခဲ့ကြောင်း၊ သံတွဲမြို့အနီးပတ်ဝန်းကျင်ရှိ အခြားသော စစ်တပ် တပ်စွဲထားသော စခန်းအချို့တို့ကိုလည်း သိမ်းပိုက်ရရှိခဲ့ကြောင်း သိရှိရသည်။

သံတွဲအခြေစိုက် ခမရ ၅၆၆ တပ်ရင်းကို လက်လွှတ်လိုက်ရသည့် နောက်ပိုင်းတွင် စစ်တပ်က သံတွဲ၊ လေဆိပ်အတွင်း၊ လေဆိပ်အနီးအဆောက်အအုံများ၊ နာမည်ကြီးဟော်တယ်ကြီးများနှင့် ဇီးဖြူကုန်းရှိ သုံးထပ်တိုက် တစ်တိုက်ထဲမှ ခုခံစစ်များကိုဆင်နွှဲခဲ့ကြောင်း၊ သို့သော်လည်း စစ်အင်အား ၁၀၀ ခန့်ဖြင့် ခုခံနေသောသုံးထပ်တိုက် နှင့် ၎င်းပတ်ဝန်းကျင်အနီးအနားမှ နေရာများကို ဇူလိုင်လ ၆ ရက်၊ နံနက် ၁၁ နာရီခန့်အချိန်တွင် လည်းကောင်း၊ ငပလီ(မဇင်) လေဆိပ်အနီး လေဆိပ်အဆောက်အအုံနှင့် ၎င်းအနီးပတ်ဝန်းကျင်များမှ စစ်အင်အား ၄၀၀ ခန့်ဖြင် ခုခံစစ်ဆင်နွှဲနေသော နေရာများအားလုံးကို ဇူလိုင်လ ၅ ရက်၊ နံနက် ၆ နာရီ အချိန်တွင်လည်းကောင်း အပြီးသတ် သိမ်းပိုက်ပြီး ငပလီ (မဇင်) လေဆိပ်ကို ထိန်းချုပ်ထားနိုင်ပြီးဖြစ်ကြောင်း AA က ကြေညာသည်။

သံတွဲဒေသတိုက်ပွဲများအတွင်း စစ်သား အလောင်း ၄၀၀ ကျော်၊ လက်နက်ခဲယမ်း အများအပြားကိုသိမ်းဆည်းရ မိခဲ့ကြောင်း၊ သိမ်းဆည်းရမိသည့် စစ် သား အလောင်းများကို သဂြိုလ်ပေးခဲ့ကြောင်း၊ သံတွဲအခြေစိုက်တပ်ရင်းဖြစ်ပြီး လက်ရှိတွင် တစ်ခုတည်းသော လက်ကျန်တပ်ရင်းဖြစ်သော ခလရ ၅၅ တပ်ရင်းကို AA က ဆက်လက်ထိုးစစ်ဆင် တိုက်ခိုက်လျက်ရှိကြောင်း သိရှိရသည်။

မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၇၆၀ ဦးသေဆုံး

ရန်ကုန်၊ ဇူလိုင် ၇

မြန်မာနိုင်ငံတစ်ဝန်း ဇူလိုင်လ ၇ ရက်နေ့ ရရှိထားသော အချက်အလက် များအရ စစ်ကောင်စီတပ်ဖွဲ့ဝင် ၇၆၀ ဦးသေဆုံးကြောင်း ပြည်သူ့ကာ ကွယ်ရေး တပ်ဖွဲ့များ၏ ထုတ်ပြန်ချက်နှင့်ပြောဆိုချက် များ အရ သိရှိရသည်။

ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။