**جابو كل حطب سموهم أصحاب
بيتي ويحترگ يا غربة ألأحباب
آمر علـ العبد يضربني ويصيح
دفعو الباب دام الزهره بالباب

صحت بويه
انكسر ضلعي
بنتك الحگ عذبوها

ما رعوني
أبأهل بيتك
ليش بنتك ما رعوها

أنا بنت نبيكم .... أنا فاطمه

×××××××××××

طگ ضلعي وتكسر والگلب حيران
ما أكدر أحامي وتستعر نيران
حَسيت أبثگل من يدفع ألباب
مو الله اليوصيكم على الجيران

لا كو غيره
ولاكو رحمه
نار بابــك تستعر

صحت فضه
سَنــدينـــــي
طاح أبني علجمر

أنا بنت نبيكم .... أنا فاطمه
×××××××××××

دفعوني وصحت مني العمر ضايع
بسمار الكِسر ضلعي أبگفه طالع
زهرة حيدرهَ بين الغرب تحتار
واسياط الغدر ضل الاثر طابع

عذبـونـي
بكل حقدهم
بويه ألحگني وتعــال

ارتدو الناس
الليله كلهم
منك الگطعو وصال

أنا بنت نبيكم .... أنا فاطمه
××××××××××

بعد العافيه يـــــا محسن أمك
اخاف ألچم جرح وشلون ألزمك
دخان وترب شبعانه ريتــي
بضلعي المنكسر مشتاگه أضمك

يمه محسـن
خَذت روحي
وانعه بحروف الهجر

ردت أشمك
وبحنانـي
اضمـــك أنته علصدر

أنا بنت نبيكم .... أنا فاطمه
×××××××××××

ضل دمي أثر ما ينمســـــح دوم
يم مهدك اناغي وابچي كل يوم
گلب امك حنين لطولك أشتاگ
ما شفتك ييمه بكشخة أهــدوم

انكضه حيلي
وصار موتك
الحيل ما ضل وصبر

كون أخلــي
روحي يمك
وحشه يمه بالگبـــــر

أنا بنت نبيكم .... أنا فاطمه
×××××××××××

ما لَمَ الجرح ولا تهده هالروح
كلشي لغيبتك يا يمه مجروح
حيدر والحسن وحسين وياه
يم مهدك ييمه زينــب أتنوح

عشت حاله
ما عشتها
أذكر أسمك وأختنگ

وانه يمه
النبض يلجم
بالضلع لمن يدگ

أنا بنت نبيكم .... أنا فاطمه
×××××××××××
عمار التميمي**

**هضموني صحت يا بويه الاصحاب
دارو بالحطـــب مــن صـار الغيــاب

×××××××××××
لروح لوالدي واشكيله بالصار
و اسولفله جمر بسمار وي نار
علينه اتكالبت يا بويه الاقدار
وبعده ما نشف لِهسه الِتراب
×××××××××××
يبو ابراهيم بعدك ما هِدينه
أبنيتك بالهضم صارت حَزينه
الباب الچان يندگ من تجينه
بألم ضلعي أگلك حرگو الباب
×××××××××××
يبويه وحيدر المكسور ظهره
من هاي الوصيه خاضع امره
عليمن يتكل والنــاس هَجره
ما حِسبو بعد تاليها الحساب
×××××××××××
كل هذا الجره بعيوني مو سهله
وي كسر الضلع ما تهده هالعِله
وسياطه النذل علـ العضد خَله
جملد والاثر يلچمني الصواب
×××××××××××
دمعة زلمه لو طاحت هَضيمه
وغيره والصبر جانت عظيمه
ومن غمد الفقار أسمع ظليمه
اثنين اتشابهن وبنفس الاسباب

×××××××××××

لگعد يمـك واحچيلك أونيــن
لليجره بعد عيني عله حسين
تندار الزلم كـــل كتر صوبيـن
واليحرگلي بابي يحرگ اطناب
×××××××××××
عمار التميمي**

**وبمجلسج حته الهـــــوه
عابر وصف اكبـــــر دوه
يا فاطمة بس كون اظل
انه وخدمتي نظل ســوه

خليني ...وفقيني
بالخدمـة متفائل

سنديني ...عينيني
بداعت ابو فاضل
×××××××××××
خير المجالس خيمتج
ارفع چفوفي لنعمتـج
علميني أخـدم بالأدب
خاطر اواسي دمعتـج

سويني ...خادمكم
وما تهده العين

ما رايد .. بس منكم
بس اخدم حسين

×××××××××××
لو اجمع ايام العمـــــر
البيها عشت ليلي جمر
لازم اعيـــــدهن قضى
واطلب بعد منج صبــر

أيامي ... تفديكم
ما عندي أيام

كل عمري ...بس دمعه
من جمر الخيام
×××××××××××
خايف يجف مني الدمع
ولهسه ما جايس ضلــع
من العدم لحد مجلسج
غَيرتي بيه أشكم طبـــع

ممنونج ... جبتيني
لحد مجلس النوح

ثبتيني ... بخدمتكم
واصرخ يمذبــوح
×××××××××××
لهفة عطش لهفة دمع
كون أبمماتي انوجـــــع
حته اشعر بذاك الالـــم
من يسحگ الحافر ضلع

أستشعر ... بالهيمه
وأخر نفس ضامي

أتحضريني... تشوفيني
مـن اللطم دامي
××××××××××
عمار التميمي**

سالفتي الثار.... وبگلبي النار
وأنا أم عباس.... يا مهدي
......
امك واسولف بالقهر
           وامنيتي احضر ثـــارك
كالولي گلبك بيه جمر
           والله اعله ثاره اختارك
والجمره تغفه بالگلب
            تطفه أعله دم فقـــارك
وحزنك ابد ما ينجلي
             ثارك بده أمن صيارك

بسيفك كل ثار    يطفيها النار
وأنا أم عباس      يا مهدي
.......
راح ابدي وياك بجرح
            وجرح المصيبه حسره
بالباب وثجيل الوزن
            طاح أنچفه علـ الزهره
يالمهدي فاطم تنضرب
            وماتت المها بكسره
وكسر الضلع ما ينجبر
            اله اعله ثار العصره

هذا أول حزن     من چلمة وإن
وأنا أم عباس      يا مهدي
.......
الما يبتسم ثغره أبد
            يعني فگدله غالي
جرحي بعد أم الحسن
            انه  فگدتلي  والي
بيتي وهلي وكل دنيتي
           يجرحني هذا حالي
يا مهدي انهض وانتفض
           بس انته الي تبرالي

ما أبطل دمع         وگلبي المنفجع
وأنا أم عباس        يا مهدي
.......
وجه الكرب عني أزل
           چا  عاشگه  أعيونه
من العلي صار الحسن
          وذكرى بقه لضعونه
ما لحگ وضاگ الالم
          والطايفه ايسمونه
شفت ابحقدهم ما رضو
          أبيت النبي ايدفنونه

نعشه ومجروح    ياخذلي الروح
وأنا أم عباس      يا مهدي
.......
عشت بجماله وما عشت
          حسيني واعرفه بصبره
وعباسي ربيته الگمر
           يسند اخــــوه ابضهره
بس الزمن حَضَر شمر
           يجرح حسين بنحره
ويجبر عياله أعله السبي
          وينك جرحنه أشكبره

ليهسه  أطفوف    وأبين أسيوف
وأنا أم عباس      يا مهدي
.....
#عمار_التميمي

وين باجر... ليا وطن رايح دلالي
وين باجر...يا خَلگ تنظر خيالي... وين باجر
..........
مُظلمة الدنيه بغيابك
              وما يحل عني الظلام
واليفارگ نظره منك
              گلبه جمره أمن الخيام
انه فارگتك يخويه
             وحافر أبصدرك ينام
عطر صدرك خاف اشمه
            وينلچم صدر السلام

حيره والله.... ما رعو جسمك سليب
حيره والله.... لينه ينظر  چم غريب... وين باجر
..........
خطوه خطوه من وصلتك
                كبرت أسنين العمر
ما لگيتك ما عرفتك
              انمردن أضلوع الصدر
صرت غيمه فوگ نحرك
               ومُطرت أعيوني أبصبر
والزَمت نحرك أشمه
                أبصوت ناداني الشمر

فوگ صدره.... واشتمت امج يزينب
فوگ صدره.... وذبحت نحره وتعذب... وين باچر
.........
خويه اذا جرحك يلچمك
             اشلون گادر عل الذبح
والرمح خِشبه وحديده
            وانته راسك عل الرمح
والهوه يلچم جروحك
              اشلون اذا كلك جرح
واشتهت روحي گبرها
             الگبر ما بيه أي صبح

يا صبح... ومني ماخذلي عشيره
يا صبح... زينبك  صارت  اسيره... وين باجر
.......
كبالي رفعو راس اخوتي
          والرمح دفعووه غصب
طگ لهاته وطاح دمعه
           وعينه تنظر عل الدرب
ضل يناشگ من سِنانه
           وعل الرمح دمه يصب
وحِسبت نَحره ابجروحه
          اثنعش طبره أمن الضرب

ااه خويه... تعلعلت وانته الذبيح
ااه خويه..... من يذبحك لا تصيح ... وين باچر
......
اليمشي يم راس اليحبه
              أسم الله گله لو عِثر
ولو طلب ماي ويشوفه
                 يجيب بچفوفه نهر
انه ادري راسك انته
                عل الرمح صاير گمر
طبعك انته ما تردني
                  بدونك انه ابلا ظهر

ظهري ورم.... من سياط الما رحمني
ظهري ورم... السوط غافي فوگ متني
.........
#عمار_التميمي

#يوم_سابع

**صاح أخوي
هاي اول مره يسمعها الحُسين
صاح أخوي
ضيع ابدرب النهر ما يدري وين
صاح أخوي

هاي دنيا والقــــدر قصــة غَريب
راعي خيمه وي عضيده السليب
حسين عينه علـ النهر ما غَمضت
سمع صوت أمن النهر زاد النحيب

من سمعها سولف بگلبه الضيـــــاع
ليش گتلي (خويه ) لا قصدك وداع
هاي كلمة وحسره چانت للحسيـــن
عاش ويه حسين والسيـــد مطــــاع
××××××××××××××××××××××
وين أخوه
حسين محني ظهره رايح للنهر
وين أخوه
وايده ما تركت صفاحه يالگمر
وين اخوه

كعد يم راسه ويگله اشلون بيه
خويه گوم ولا ترد خاطر أليـــه
فتح عينه لكن أبعينه مصــاب
السهم نايم والدمه غطه الثنيه

گله گـــــوم وما گـــــدر ينهض اله
شَدّ الحسيـــــن أعله حيله بهالبله
خويه گوم وخل نرد صوب الخيم
راح اضل وحدي غَريــــب أبكربله

يا عباس ... يا خويه
××××××××××××××××××××××
ابلا چفوف
هاي مِحنه وما مثلها بهالمصاب
أبلا چفوف
يا خلگ الينصاب يلزم بالصواب
أبلا چفوف

حيرة العباس مـا صـــــارت مِثلهـــا
من طرف واحد يشبگه صعبه حلها
راد يحضن راسه بس سهمهَ عِرض
الحيره هاي الماكو واحد يگدر الها

طيحت اليسند ظهر يكسر ظهر
ويكسر إِعماد الخيم موت الگمر
الچان واگف علـ الخيم چنه علي
هسه طايح حيله كله أعله النهـر

يا عباس ... يا خويه
××××××××××××××××××××××
علـ الخيام
هاي أخر نضره لخيام الحَميه
علـ الخيام
بعينه دمعه ويعتذر منها رُقيه
علـ الخيام

الخيمه دمعه وترتوي منــك دلال
الماي عوفه وارجـــع لچف العيال
أطفال تعطش بالخيم كلها عليك
بغيبتك يتبدل أبچفــــك حِبـــــال

أخر أوداع الخيم حسره وحنين
وهاي ثاني مره بانت علـ الحسين
يجي من مصاب محني أعله الارض
ويه كل مصـــــاب يكبر بالسنيـن
×××××××××××××××××××××
لا يموت
حسين راجع وحده يصفج بالادين
لا يموت
صاح زينب خويه مهضوم الحسين
لا يموت

خويه هضموني الشماته علهـالنهر
صوت منهم وحـــــدك ابلايه گمر
ها كسرنه ظهرك بـــــدون الكفيل
صحت خويه كوم مو ظهري انكسر

طاح عامود الخيم يمّ الخـــــدر
حَضري روحج خويه لايام العِسر
هاي ساعات وتشب نار الخيـــم
وأبقه عاري علترب أبشمس الظهر

××××××××××××××××××××××**#عمار_التميمي

**اتمدد طول ابطول اوليده
ويشهگ صار ابصدره الموت
( عباس الحك مات الأكبر )
حسين ايصيح ابعالي الصوت

أبنه. الأكبـر
شافه أموذر

∆∆∆∆∆∆∆∆∆∆∆∆∆∆∆

صعبــه اليفگد روح اوليده
أگبال ايموت ايغسله أبيده
وتالـي ايوسده أعله التربان

بس حسين أيشوف الأكبــر
جسمه أگبالــــه صار أموذر
وأبنه يدريّ بي عطشان

يمشي والدمع كفه ابردانه
يعثر ما گدر طاح أبمچانه

يمشي ويعثر باصعب منظر
وهذا الاكبر بس مو الاكبـــر
صـاح لعباس الحگ خويـــه
يا كاشف همي ألحگ أحضر

أحضـــر يمي
اتواسي همي

∆∆∆∆∆∆∆∆∆∆∆∆∆∆∆

ايحاجي الاكبــر يگصر عمــره
وضل مخنوگ ابغصة صدره
كلساع ابنحره يشتم

أخر نظره وأخـــر شمه
لعند الباري يرفع دمـــه
ويمسح عن وجه كل دم

هاذ أخر أمل حي ويشوفه
گاعد يستمع لأخر حروفه

يبنــــي العفا كــــل العفا
ماكو ضوه ابعيني وطفا
طبرة راسك راح أتصيـر
أثنعش طبــره من الگفــا

أمغير حالي
يبني الغالي

∆∆∆∆∆∆∆∆∆∆∆∆∆∆∆

مَــــد أچفوفه ايلامس گلبــه
ورجفة ايـــــد الفاگــد صعبه
ميت ويسولفله أجروح

يهمس بأذنه وتسمع روحـــــه
حسينك مخنوگ ابنص نوحه
لفگدك يبني ايلوگ النوح

حسينك منكسر ظهره ودلاله
ويا أصعب ألم مَــر أعله حاله

عباس أبني ريته گاعــد
اشلون الوالد يفگد والد؟
ريحه جدي وحيـدر هاذ
يعني لأهلي كلهم فــاگد

كاسر حيلي
شمعة ليـلي

∆∆∆∆∆∆∆∆∆∆∆∆∆∆∆

غطه اعيونه ابدمعه وينحب
اشلون ابموتـــــه يقنَع زينـب
وهو أعله فگده محتار

أبوسط الخيمـه أمـــه وعمته
كلها اتريد الاكبـــــر. جيته
أبنار افراگه اتشب النار

الحيل الما يضل بحسين وعمه
الزلمه الينكسر يكســـــرله زلمه

بجيتي أيگله أمضيع دربـــي
وضل يتراجف جدمي وگلبي
مــــن الخيمـه لحــد هنـــا
كلشي يگلي بضيعت تعبـــي

لحالــه ينعه
ورايد فزعه

∆∆∆∆∆∆∆∆∆∆∆∆∆∆

محني ويمشي ويضعف حيله
وصـــــاح أبغصه لحــــگي ليلى
سهر العمر منج راح

هذا الاكبـــر اتغييـــــر وضعه
اسهام ابظهره اسهام أبضلعه
جسمه اتغطه بس جراح

ماتت مهجت أگليبي وحياتي
مــــا ردت النفس رايد مماتي

عباس الحگ صيح الخِدر
خي يواسن ليلى بهالمنظر
يشبعن منه شوف ونـــوح
ساعه ويگطعـــون المنحر

هاي الهيمه
نار ابخيمه

∆∆∆∆∆∆∆∆∆∆∆∆∆∆∆
عمار التميمي**

?? اللحن (الرادود علي الغالي )

ليسـتة #مؤسسة منبريون الحسينية?.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك ??.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://t.me/ahmed_alziwar1