#шакъа_шакъа_юрек_якъа - Огълум бакъ, эвге татар олмагъан къызны кетирсенъ, къаргъарым!
- Къырымтатар къызы дегенде, бу намаз къылгъан, тильни бильген, дин кутькен, адетлер боюнджа яшагъан, ишкир, сыджакъкъанлы бир къызны козьде тутасызмы?
- Ёкъ э! Диндар - чылгъын демек, ватанпервер - мутаассыптыр. Татар ады ве къаны олса, тоже хватит... намаз къылмакъ (окъумакъ дегиль) - совершать молитву (салях)кутьмек - соблюдать сыджакъкъанлы - коммуникабельныйкозьде тутмакъ - иметь ввиду диндар - религиозный (о человеке) чылгъын - одержимыймутаассыптыр - фанатикГлавное, чтобы бизимки олсун - глупое заблуждение

Къырымтатарджа олгъан фаалиетине бакъсакъ, онынъ эки сымасы бар - атик ве азырджевап репчи ве мергин сёзлю, хаялперест ашыкъ. Онынъ биринджи шахсиетини бегенсем де, козюмде тамам экинджисидир, демеге меджбурым. Чюнки онынъ индже фикирлери, хош къыяслары ве ерли меджазлары Ана-тилимизнинъ о къадар да номай къабилиетини ача ки, къырымтатарджа керчек шиириет будыр, дие севинип къалам. Эльбетте, йырджымыз озю тиль тарафындан илерилевнинъ заруриетини анълай ве дуя, эм де шахсий субетлеримиз девамында мунтазам суретте озь башына огренгенини итираф эте. Бизим Темирджан бейимиз киббар киши дегильдир, не ерге чагъырсалар, барып озь чыкъышынен акъшамны яраштыра ве бизимкилерге земаневий иджадымызгъа ишанчны ашлай. Темирджандан илеридеки мувафакъиет ве заферлерини беклеп, ишлеринде къолайлыкъ тилеймиз! Озюмиз исе онынъ иджадындан бир къач нюмюнени огренсек, я хатырласакъ, не гузель олур эди!

#шакъа_шакъа_юрек_якъа - Бизге бирлик олмагъа керектир! Бирлик!
- Эльбетте, керек! Амма сеннен дегиль, меним озь бирлигим бар! Сенинъкинъден даа буюк!
- Аман! Сенинъ бирлигинъ не къадар юфакъ экен!- О юфакъ дегиль! Мында сувукъ, онынъ ичюн о бираз бурюшип кетти, адам аз кельди! Эм де, бирликнинъ буюклиги муим дегиль, шу бирликни догъру ишлете бильмек муимдир!

Бирлик - единство
Юфакъ - маленький
Бутюшмек - морщиться
Миллий бирлик - утопия

آنا تیلی اوجاصینا

Меним сырдаш, фикирдешим,
Не де агъыр экен ишинъ.
Эр кунь кетмек, я вазгечмек,
Занларынъ бар, бу бир керчек.
Беким, джебинъ олса да бош,
Санъа мунасебет нахош,
Турасынъ сен, беклей дерслер,
Невбеттеки эски эсер.

Сёнеяткъан бир оджакъкъа,
Одунларны атаджакъкъа,
Хитабым бар: элинъ янар,
О да одун, лякин шу нар,
Узакъ, унутылгъан атанъ,
Тарафындан фигъан, селям.
Шу откъа якъар атмасанъ,
Ачлыкъ, олюм, тотлу къазан.

Амма омюр этер девам,
Дийдженъ:”Башкъа сыджакъ девам”,
Деванъ олсун янъы алев,
Яранъа тез тедавийлев,
Лякин бирев оджакъ башы,
Истемесе, бермез ашынъ.
Сенинъ оджагъынъ исе куль,
Олюп кеткен, мевта гонъюль.

Эллеримиз янсын, достум,
Кемигимиз олсун одун.
Сыджакъкъа толсун собамыз,
Оны бакъайыкъ озюмиз.
Ана-тили оджасына,
Онынъ мушкюль аджысына,
Бир теселли гъаемиз бар -
Тевеккюль, арекет ве кяр.

۱۱.٠٥.٢٠٢٤ s.