#الليالي_الموسوية ٢ ( گعده )
___

يا هارون گوم و فكهن اعيونك
وللطاموره اگصد شوف مسجونك

حول قصرك ارماد واتسيدها بغداد
وللطاموره اگصد شوف مسجونك
__

انفض اتراب المگابر وافتح اعيونك شويه
وشوف گبرك وين صاير بيا قذاره ويا زويه
وانسى كل ايام عزك من جواري و برمكيه

اگصد القصرك و انظره
بلايه ذكر لا ذاكره
ماله أثر فوگ الثره وشوف قصر الكاظميه

قصرك منهدم بس السجن عالي
و بكرسي الحكم ياهو الگعد تالي

ياهو بالحكم قاد واتسيدها بغداد
و للطاموره اگصد شوف مسجونك
__

عاين التاريخ تعرف موسى من صمته نسفكم
شمس من بغداد شرقت هدمت منهج سلفكم
و تابع ابثورة ضماير شوكه ركزها ابخلفكم

عزريل و بصوره نفخ
من الظلم موسى شمخ
النهج المنافع ما رضخ مو اهل ذمه عرفكم

يا هارون للكرسي الشرف بعته
و الدينار دينك صار و اعبدته

دينك هذا ما فاد واتسيدها بغداد
و للطاموره اگصد شوف مسجونك
_

حاولت تثأر لاميه من بني هاشم بحكمك
حاولت نور الحقيقه يندثر وي ليل عتمك
وانته تدري بالامامه وتد ثابت رغم ظلمك

شما زاد جورك و الحبس
كوثر الكاظم ينبجس
والسحب ما تحجب شمس تبزغ بعز و تهدمك

عمرك راح تجمع بالذهب حسره
هاگ و شوف المن مالت الصفره

طرزت گبت الامجاد واتسيدها بغداد
و للطاموره اگصد شوف مسجونك
__

ياهو هاي النار تنطر ياهو هالجنه تنطره
وياهو اليكحل ترابه وياهو اليغمونه گبره
صد يهارون السجينك صار للاملاك حضره

ينزل ملك يصعد ملك
و بچفوفه يندار الفلك
دامتله ما دامت الك لأن للحق صاغ ثوره

من الله هاي الرفعه لمچانه
هالمسجون حي و مات سجانه

امن الله عنده ميعاد واتسيدها بغداد
و للطاموره اگصد شوف مسجونك
___

ديدن الاحرار راسخ ما تهده اكبر زلازل
وموسى معدنها الحقيقي ما تأثر بي سلاسل
ثورته چانت سكوته عن صلب ايمان كامل

صمته سبقها العاصفه
حقق اهدافه ابمعرفه
المهم دين المصطفى يظل ثابت بالمقابل

ما همه الظلم بس همته الغايه
رايه الدين حافظ بيده عالرايه

رغماً عن الاصفاد واتسيدها بغداد
و للطاموره اگصد شوف مسجونك
__
( المصيبه )

ما كفاهم فقط حبسه قرروا بالغدر سمه
بالرطب يا ويلي افطر بعد صومه و بان همه
بالسجن وحده ليالي ولا اهل يلفون يمه

بالسم ابن جعفر گضه
بالغربه وحده ابو الرضا
ناحت عليه أرض و فضه

و فاطمه المعصومه ناحت والرضا بان انكساره

حسين الأمين

#الليالي_الموسوية ١
____

گيد ايدك اشد لو حبل عمتك
ظلام الشام يذبح لو غربتك

سجنك و الخرايب شبه بين المصايب
______

سجنك هزله وسط الغربه ظل يحدي
و رد سوط الشمر و اتسلمه السندي
جرح لوعة عذابك ينتهي و يبدي
يظل يلهب لحد ما يظهر المهدي

حزنك يختلف و آلامه كلفه
تصحى ايبا جرح و بياهو تغفى

بهموم و نوايب شبه بين المصايب
______

اجيتك دمعي يحدي و بالدمع شفتك
گيد السلسله يشرحها نايبتك
حبل چفك شفت مدري حبل عمتك
هاي الشام لو بغداد ناشدتك

هذا السجن من الطف ظلامه
بس اوياك ما چانت يتامه

تنام اعله الترايب شبه بين المصايب
________

سجنك و الخرابه بي شبه غربه
و محنات و نوايب گلبك اتعذبه
صعبه الحاله بس الهونت الصعبه
ماكو اوياك ثكله و ماكو متسلبه

زينب بالخرابه لمن باتت
چم طفله بهذاك الليل ماتت

وتحرسها الاجانب شبه بين المصايب
______

بالسم اختمت يا موسى هالاحزان
و طلعت امن السجن لكن فقط جثمان
لچن عمتك لمن طلعت بلا وليان
من ذيچ الخرابه الطبت الديوان

تمنت يوم طلعتها المنيه
و لا توگف ابمجلس لآل اميه

وگلب من عدها ذايب شبه بين المصايب
_____

يالمسموم يومك بالگلب لچمه
لچن جرح العقيله هواي اشد هظمه
شافت راس اخوها انگطع عن جسمه
و شافت خيل هشمت صدر ابو اليمه

مصابك بي فرق عن العقيله
اشما تبچي العيون الها قليله

دمعك الها كاتب شبه بين المصايب

حسين الأمين

#الليالي_الزينبية ٦
_

بآخر صوت ناشدتك
للتابوت رايدتك
ترضه اتموت بغربه اختك ياعباس

وحدي اتلوه يابو النخوه
___

حاط الموت روحي و ثگلت اعليه
و صوت ابگلبي فزز كل جرح بيه
أنتظري يزينب بلكي اله جيه
ما ظن يرضه اطبگ جفني بيديه

هايه عادة كلمن ايموت
ايغمض اعيونه اخيه
و آنه وحدي يابو فاضل
و دارت الشمات بيه

هذا البين ناطرني
امنيتي الحين تحضرني
اتغمض العين تدفني يا عباس

الچفك فدوه يابو النخوه
__

ميته اهوايه بس هالمره مختلفه
نعشي ابلا بواچي و محد ايعرفه
ترجيتك تجيني و ما تجي وسفه
مو انته الي يترك اخته بالكلفه

يلي دگيت اعله صدرك
و يم ابويه اتكفلتني
عازتك خويه چبيره
الشام رجعت لوعتني

بالكلفات انشدمن
و الدمعات من يجرن
هالحسرات ميرحمن يا عباس

بشام القسوه يابو النخوه
__

هايه الغربه ما فد يوم عافتني
سبيه ابقيت خويه من رحت عني
هاي الگاع لا حبها و لا تحبني
انحفر لحدي و ردت چفيك تدفني

هذا حلمي بالنهايه
اتراب گبري اتهيله انته
تترس ادموعك غربتي
و نعشي ما ينشال سكته

عيني اتنوح مختنگه
ومني الروح محترگه
كافي اجروح والفرگه يا عباس

بلهفه و رجوه يابو النخوه
_

صحوة موت بيه و حزني متبدي
و أيست و گلت لا ما ترد عندي
و لن چفك احس يمسح دمع خدي
صحت عباس گتلي يا بعد چبدي

هله بجيتك يا كفيلي
و أگعدت يمي بدمعتك
بين وجهك بين موتي
برعشة اچفوفي شبگتك

يا عباس لا تنحب
صوت احساس من زينب
من هالناس اتعذب يا عباس

شهگت خوه يابو النخوه
__

حاولت انسه ذاك الظيم بس شنسه
و اسياط السبي بمتوني لي هسه
شنو گلي اليهظمچ و العتب مسه
گتله الگطع نحرك خدرك ايحرسه

خويه عوف اعذار موتك
نعشي محتاج اليحمله
و هاي گاع الشام غربه
و اليموت ابعازة اهله

ما معذور هالمره
يالمذخور منكسره
و المكسور شيصبره يا عباس

أصبر گوه يابو النخوه

حسين الأمين

#الليالي_الفاطميه ١٦
__

نبضي حسرات وخنگه ترست ريتي
بس معانات من أرد البيتي
هالگلب مات من مشت عافيتي
__

انه للرب معجمه
البيدي شيّدت السمه
و بيه رب العزه باهه كل ملائكته

كلشي دار ابچف ادي
انه اصل الكلشي حي
هسه اصل الكلشي مات ابموت فاطمته

اليرجف الموت الحمر من طاري حربي
و انه الاحني ارگاب هسه انحني ابدربي
احس بعد ام الحسن ما نبض گلبي

بغربه محتار و احچي وي دلالي
شنهو الصار شو تغير حالي
ردني كلمات بالگبر حنيتي
____

اسوالف الفرگه حزن
و اليفارگ يندفن
لچن مو تحت الترب هذا الگبر داره

ميت و عايش سوه
اليدفن ابچفه الهوه
يرد بحظان النوايب دمعه يتجاره

و انه مو زهره افگدت من بيتي جنه
چان كل مصباح منها يشرگ النه
و بعد نور الزهره عيني ابلايه معنه

افگدت نور چان يضوي اعيوني
ضلع مكسور منها بي لوعوني
دمها آيات نزف كل بائيتي
_

الموت مو عمر ابن ود
الهجر من مرحب أشد
هاذي معرگة العواطف انه بيها اخسر

الاهدم بحربي زلم
بعد فاطم منهدم
والله ما تعرفني لو ردت الي الكوثر

البير فايض من كثر دمعي الاذرفه
و لو تصد وجهي الزجيه ما تعرفه
حزني كل حزن المجره ما يوصفه

گلبي مجروح و شيطيب اجروحي
شيعت روح مدري كلشي بروحي
شگد حرامات موتي چان امنيتي
__

بابي كلما افتحه
الروحي اقره الفاتحه
اتشوغ روحي و تنعصر من اذكر العصره

الرحه و العطر اليهب
ايگطع انياط الگلب
و الگه سبحة طين بيها ريحة الزهره

عفيه گلبي شيحتمل من هالرزيه
من اطب حجرتها بهموم العليه
و الگه زينب گاعده و تنظر اليه

بدمعة العين تبچي بنتي يمي
اتگلي چا وين بويه راحت امي
أقسى لحظات لو بچت ذريتي
____

خلص عمري اشما يطول
من مشت عني البتول
دارت الدنيه و خذت ثاراتها مني

امفصل ابداري الألم
ابوجه أطفالي انرسم
فرگة أمهم و المواجع زيدت حزني

عالحسن لمن اصد بعيونه هظمه
و الحسين شگد نشد عن گبر أمه
الليل لو مو بالمناحه يگضي لچمه

بيت الاحزان صار بيت اعيالي
و تشب نيران من اشوف أطفالي
بروحي آهات و بالحزن تاليتي

حسين الأمين

#الليالي_الفاطميه ١٥ ( نزله )
_________

انگله يمتى الي نشدنه فاطمه
هذا نور الجنه امنه فاطمه
بعاطفه گبرچ يلمنه فاطمه

اليوم نتصور و باچر صوره
من ذهب مرقد الچ و نزوره
تظلم الدنيه و يضيع اضواها
و فقط نورچ يضوي هالمعموره

(( و نتعى الگبرچ مشايه ))

يم الحسن يم الحسن
___

هاذي للشيعه حلمها فاطمه
تصبح الكعبه اسمها فاطمه
و عاصمة گبرچ تضمها فاطمه

قطعه باچر من ذهب مصفوفه
من هنا مرقد الزهره انشوفه
و المناير عابرات السبعه
و الملائك نازلات اتطوفه

(( و فطرس بجناحه ايحيينه ))

يم الحسن يم الحسن
__

امن العراق و للمدينه فاطمه
نگصدچ و انمد ادينه فاطمه
و رحمتچ تنزل علينه فاطمه

امن العراق افواج اجت مشايه
حمزه قائد كربله ملايه
امن النجف عبود لازم موكب
اوياه عبدالرضا شايل رايه

(( و جبرائيل ايعزب بيهم ))

يم الحسن يم الحسن
___

يعتنيلچ من طفوفه فاطمه
و لازمه الكافل چفوفه فاطمه
مرقدچ عينه تشوفه فاطمه

الچ من الناحيه يتعنه
بلهفته سيد شباب الجنه
يجي سالم منحره و لا مجروح
حتى لا گلبچ يلچمه بونه

(( و يوسد خده اعله اترابچ ))

يم الحسن يم الحسن
___

مثل حماي الحميه فاطمه
قالها رب البريه فاطمة
لا فتاة إلا الزجيه فاطمة

مو بعيده هالقضيه اعلينه
هيه چم يوم و يرد مهدينه
يعتني بچفيه خضره ايزورچ
و ينبني اعظم صرح بيدينه

(( و صحنچ يصبح أكبر موطن ))

يم الحسن يم الحسن

حسين الأمين

#الليالي_الفاطميه ١٤
____

يا صبر ظل بيه و ام حسن ماهيه

احسب الموتي وراها شگد بعد
الما فگد ما يفهم احساس الفگد
____

غميچ الشوگ زيّد جرحي و آلامي
و مشتاگ انظرلها و الگلب دامي
ولو مو بالحقيقة اتمرني بحلامي
عگب الزهره يمتى تخلص ايامي

الفگد ما يبرد ناره لتظن تخمد

گلبي من الفرگه الف مره انمرد
الما فگد ما يفهم احساس الفگد
________

ظلام الدنيه ماخذ نورها اليضوي
تركني بنايبه و صوت الهظم يدوي
تره الفاگد حبيبه حسرته تچوي
يظل كل باله يمتى الشوفته ينوي

للگبر كل ليله يگصد و يحچيله

يا گبر ماخذ حياتي و السند
الما فگد ما يفهم احساس الفگد
______

خلصت الصبر و اتبدلت احوالي
و للغالي دمع عيناي مو غالي
فاطم حب حياتي و خابت آمالي
مشت عني و بعدها النوح يبرالي

تنتهي ايامي و تبتدي آلامي

اي و حگ القل هو الله احد
الما فگد ما يفهم احساس الفگد
____

انه چنت المدد لليوگع بشده
ما عوفه اليناديني و لا هده
ياهو اليحضر و ظهره إلي يسنده
مثل الماي مني الحيل يتبده

يا عمر ظل ينفع فاطمه ما ترجع

الهجر نار ابدليلي و ما برد
الما فگد ما يفهم احساس الفگد
_______

صعبه من يفز گلبك عليها ايحن
و تركض للگبر عطر الترب تحضن
انه حيدر علي الاسمه يهابه الجن
تغيرت و صرت للنايحه موطن

چفي يلوي عسكر هسه صرت اتعثر

بالحرب كلها تسميني الاسد
الما فگد ما يفهم احساس الفگد
_______

حمره لليفارگ دمعته تنزل
يخلص الليل گلبه بالحزن يشتل
مو بس متنه كله امن الفگد يهدل
يظل بس الهظم و النايبه ايحمّل

حگها تهمل عيني راحت احله اسنيني

أم حسن ماكو مثلها و الصمد
الما فگد ما يفهم احساس الفگد

حسين الأمين

#السيدة_رقية_عليها_السلام ٢
___

انتظرتك بالحزن
صورتك وسط الجفن
تالي اجيت ابلا حظن بويه يحسين
__

يا تعب سهري شوفتك عمري
انتظر حظنك يبويه يعتنيني
أگعدت بحلامي و چنت گدامي
و صدرك امچاني و اسولفلك حنيني

مثل ما بالحلم ردت آنه اشوفنك
تمسح راسي بيدك و اگعد بحظنك

جيتني و شفتك متت
هيچي ابد ما حسبت
راسك بوسط الطشت بويه يحسين
__

اتلاگه وي راسك احساسي و احساسك
دمعك و دمعي جرن بويه سويه
ليش من احچي انته بس تبچي
شنهو ما مشتاگ لبنيتك رقيه

دمع عينك امسحه و اترك احزاني
مشتاقتلك اني يا بعد اني

منتظرتك عالترب
بعد چفك انضرب
فرفح اعليك الگلب بويه يحسين
__

بدمعة اعيوني و هظمة اظنوني
ارد اسولفلك لچن وضعك ذبحني
امن ادخل اولايه انشد اهوايه
اعليك اسئل وين ابويه ما گصدني

ثاري اعله الرمح راسك يماشيني
و عينك تجري دم من تنسطر عيني

بوجهك آثار الحجر
و انعمه مني النظر
ليش صاير بس نحر بويه يحسين
___

ردت توصلي و عينك اتگلي
ها يبنتي يا بعد عمري و حياتي
واگعد بحظنك و ارتوي منك
و صوتك يخفف عليه نايباتي

تالي گاصد و بس بالطشت نحرك
و انته ابحظني مو انه على صدرك

ضاگ من ريتي الهوه
كلشي احس بيه انچوه
انموت گتلك بس سوه بويه يحسين
__

يا بعد عيني ضاعت اسنيني
فوگ راسك موتتي وسط الخرابه
شحتمل بعدك و الجرح بُعدك
افراگك امن الغاضريه اصعب مصابه

يالمذبوح شلها بالعمر بنتك
و على راسك اموت و عيني شايفتك

شيبك امخضب دمه
اشفافك المتخذمه
و مهجتي متألمه بويه يحسين

حسين الأمين

#السيده_رقيه_ع ١
____

عيني عيني سهرانه و تناشد عنك
عيني عيني تغفه من تنام ابحضنك

وصدرك اشبگه واگطع نحيبي
تالي ابأديه راسك حبيبي
____

ذكرياتي بدمعتي اتمر اعله بالي
من چنت بعيونك انظر كل دلالي
كل صباح الخير من وجهك يغالي
و من بعد وجهك شفت سود الليالي

انتظرتك بدمعتي و ادري يلچمك دمع الازغار
انتظرتك ردت اشوّفك من تجي بمتوني الآثار
انتظرتك تالي بس راسك اجه و خلاني احتار

شفتك و حرت معقوله يبويه انته
شفتك و وجهي من دم منحرك خضبته

الشوفت عيونك يسعر لهيبي
تالي ابأديه راسك حبيبي
____

خلي اسولفلك اريد أروي حناني
مثل قوس السهم هجرانك حناني
افتحت ايدي من شفت راسك اجاني
ردت احظنك و النحر ما بي مكاني

شلون اشبگك وين صدرك ليش ما جبته الرقيه
شلون اشبگك ابلا حظن راسك صفه ما بين اديه
شلون اشبگك بويه يذبحني سكوتك رد عليه

حزني حزني و آلامي و مصاب البيه
حزني ايروح حزني من ترد اعليه

يا وسفه للخيل صاير نصيبي
تالي ابأديه راسك حبيبي
_

ما ينسمع كسر الگلب لا حسرة الروح
و الذي مذبوح يفهم حچي المذبوح
شفتك ابدرب السبي گدامنه اتلوح
باوعت بس ما عرفتك من الجروح

دوريتك بالسبي كل الدرب عنك اناشد
دوريتك كل مدينه أدخلها اسأل اجه الوالد
دوريتك ثاري راسك عالرمح گدامي راكد

صحتك اشيحمله درب السبي و لچماته
صحتك و اليرد سوط المتن ضرباته

كلما اناشد ماكو مجيبي
تالي ابأديه راسك حبيبي
__

رغم آلام السياط الورمت اعضاي
امن الخيم للشام سجادتك وياي
افرشها ليليه انتظر توصل يرجواي
تالي اشوفك بس نحر صاير ابيمناي

شباقي بيه لا تگلي امن الحزن يا بنتي هيدي
شباقي بيه امن السبي من الضرب و احبال گيدي
شباقي بيه اسأل امصلايتك ما عافت ايدي

هظمي الشام من الشام كل آلامي
هظمي تالي بس نحرك صفه گدامي

كل طولي مجروح و حظنك طبيبي
تالي ابأديه راسك حبيبي
___

اوياك اخذني روحي بعدك روعوها
و البنيه اتموت اذا ضيعت ابوها
بالسبي بنتك تره شگد عذبوها
و إلي هظمتني يتيمه انتي حچوها

خذني بويه ارد اروح اوياك لا تكسرلي خاطر
خذني بويه السوط ماكل متني و ازرگ كله صاير
خذني بويه الهوه ضاگ ابريّتي و ما بيه اكابر

روحي روحي بعدك ماتت ابلوعتها
روحي اهناك نحچي عن هظم محنتها

و آسف تگلي طوّل مغيبي
تالي ابأديه راسك حبيبي

حسين الأمين

#زين_العابدين_ع ٢
_ - _ - _ - _ - _

يا سيد الساجدين تشبه ولي المؤمنين
بالحبل مچتوف ادين يا علي تشبه علي

امگيديها ايدك بالحبل والجامعه اتحز نحرك
متوارد اويه المرتضى هم الوصيه اتأسرك

شعنده وياكم يمولاي الحبل
انته مچتوف و علي گيدوا قبل
والله صعبه يا علي و ما تنحمل
اگبال عينك يضرب الحره النذل

هد اليسر كل حيلك والحرمه من تشكيلك
وراس برمح يوميلك يا علي تشبه علي
_

جدك قبل هم منچتف والزهره چانت تُعصر
حالك مشابه للوصي اميسريها زينب بالبر

على الناگه و المتن منها جريح
طفل ضايع طفل يا عمه يصيح
و انته تنظر راس الحسين الذبيح
و الحرم گدامك اتگوم و تطيح

طفله تناشد بالناس ماشفتوا عمنه العباس
و گدامك ايلوح الراس يا علي تشبه علي

الباب حرگوها گبل يمك خيم مشتعله
ابيت الوصي اتنزل وحي والخيمه چانت قبله

الباب و الخيمه صفن نفس الأمر
الباب عالزهره احترگ و ام الخدر
الخيمه شبّت و الاطفال بكل كتر
ظلوا ابين الحوافر و الجمر

باب فاطم وجت و الخيمه هم احترگت
نارين عمتك شهدت يا علي تشبه علي

الله يعينك بالسبي ويه الفواطم وحدك
بالكوفه و الشام شكثر بيهن تفطر چبدك

شگد محن شفت و هظم لآل النبي
حجة الله اعله الأرض يمشي سبي
بحرم هاشم يا وسف يحدي اجنبي
ما فزع واحد عليهن طالبي

يا عروة المتقين تسمع انين الحسين
يا سيد الساجدين يا علي تشبه علي
__

من اوصلت يم القصر بالخارجي ينادونك
وراس الحسين بنص طشت وتنظر عليه عيونك

اگبال عينك ينضرب راس الحسين
شفته زرگه من كثر ضرب اللعين
الله اليعينك يزين العابدين
بالطشت راس الابو اتشاهده العين

ثگل الجرح ما يهيد بالشفّه يضرب يزيد
حال الوصي هم تعيد يا علي تشبه علي

حسين الأمين

#محرم_الحرام

اَللَّـهُمَّ اجْعَلْ مَحْيَايَ مَحْيَا مُحَمَّدٍ وَّ آلِ مُحَمَّدٍ وَّ مَمَاتِي مَمَاتَ مُحَمَّدٍ وََ آلِ مُحَمَّدٍ

سيتجدد العهد هذا العام كما في سالف الاعوام مع رثاء سيد الشهداء عليه السلام و سيقرع القلب ناقوس الحزن قصائد محرم الحرام ١٤٤٦ هــ
ابتغاءً لمرضاة الله تعالى و أولياء النعمة الأطهار لا ألتمس غير دعائكم لي و لوالديّ بالأجر و الثواب
و نقول كما قال اسلافنا الأعلام
عهد الله عاهدناك يحسين انظل وياك
دربك ما نبعد عنه حبك مفتاح الجنه
عالفطره حبيناك يحسين انظل وياك

#حسين_الأمين