▫️گولله‌نن ایلغیم‌لار
▫️دکتر حسن ریاضی ( ایلدیریم )

گئجه‌لر اوزون،
گوندوزلر گوده؛
یول‌لار
بوزاریر گونو گوندن؛
ایچیمه چکیلیب
بویلانیرام
آرخایا
اؤنه
بیر عؤمورون چی‌یینیندن.

یاخینلار اوزاقلاشیر،
اوزاق‌لار یاخینلاشیر؛
کور گونلرین ایشیغیندا
گؤزلریم سئچیر
گؤیه‌رن قوم‌لاری،
گولله‌نن ایلغیم لاری.

گون‌لرین گونلویونو
ایل‌لرین ایللی‌یینی،
یول‌لارین یوللوغونو
اؤز رنگینه بویاییر
دویغولاریم!

▫️یئر باغیریر… گؤی باغیریر

▫️مجموعه اشعار ضد جنگ

▫️دکتر حسن ریاضی ( ایلدیریم )

گؤیده اوچور دمیر قاناد بایقوشلار،
بایقوشلاری ایزله‌مکده
قورخو دولو
نیفرت دولو باخیشلار.
دمیر قاناد بایقوشلارین دیمیدیگیندن، جایناقیندان
راکت یاغیر، بومبا یاغیر،
قومپارالار فیشیلداییر،
یئر باغیریر
گوی باغیریر باغیر- باغیر
بومبا یاغیر… یاغیر… یاغیر.
بوغاناقدی آخار باخار
بوغاناقدا کیریییب‌دیر گؤیرچین‌لر،
قارانقوشلار؛
دوشور یئره دسته- دسته سالخیق قاناد بو باخیش‌لار؛
نه گلیرسه گؤزلرینه قاچیشدادیر،
دوداق‌لاردان قیریق- قیریق گولوش اوچور
نغمه اوچور
هارای اوچور
آخ وای اوچور؛
اوره‌کلرین بوداغیندان قیریلیبان
آرزو اوچور
ایستک اوچور؛
ساپاغیندان اوزولوبن
سئوینج ایله
کدر ایله
اوره‌ک اوچور؛
یوواسیندان قوش‌لار قاچیر
قان بویالی بئشیگینده کؤرپه اوچور
اوشاق اوچور
ناغیل اوچور
بؤیوک اوچور
نه‌لر اوچور، نه‌لر اوچور؟
نه اوچورسا ملر اوچور.
اوچوشانلار
گؤی اوزونده توخونورلار بیر بیرینه،
ییغیشیرلار
یاواش یاواش بولوت‌لارین بوز بئلینه؛
اوزلمکده یئر اوزوندن
بوغاناغین آیاقلاری،
دوزولمکده دال با دالا
گؤی اوزونده بولوت‌لارین،
تابوت‌لارین تالا- تالا قاییق‌لاری.
قارا گئییب گوی مئشه‌لر، یاشیل داغ‌لار
یئر یانیقلی، گؤی یانیقلی
بوردا نه وار آل قان آغلار؛
سیزلار، سیزلار اؤلولرین بو قاطاری
هارا گئدیر هارا ساری؟
اؤلولرله دولاجاقدیر گؤی اوزونون قبریستانی،
گئجه گوندوز دیرلری دیده‌جکدیر
یئر اوزونون چوپور جانی.
قارا قیرمیز تابوت‌لاری
آغیر آغیر یئل آپاریر
اوره‌کلره سیغماز غمی،
بو ماتمی
آغلار گؤزلو ائل آپاریر

▫️اوره‌ک ایشیغیندا

▫️شعر : دکتر حسن ریاضی (ایلدیریم)

▫️ترجمه : ابراهیم اسماعیلی جیم

▫️شعری از کتاب : یاغیش یوخوسو

اوره‌ک ایشیغیندا

سوزوله – سوزوله
کئچیرم فصل‌‌لرین، ایل‌لرین ایچیندن
ساچیمین رنگی، سؤزومون آهنگی-
دئیشه- دئیشه
ایچیمده ارییب ایتیر زمان.
بیر قوم ساعاتی کیمی یاشانیر عؤمور-
بو تاییندان ، او تایینا دوشه- دوشه
گؤزلریمده
گونو، گوندن بؤیویور دونیا
حقیقت‌لر، سیرره دؤنور
بیلمه‌جه‌لر چوخالیر،
اینانج‌لار اینجه‌لیر
رؤیالار یوزولماییر،
آرزولار چین اولماییر...
آنجاق اوره‌ک!
سئوگی‌یه دولا – دولا دؤیونور
دورولا- دورولا بوللورلانیر
ایشیق ساچیر.

اوره‌ک ایشیغیندا-
آیدین گؤرونور منه هرشئی!
اوره‌ک‌له باخیرام-
یول‌لارا، آدام‌لارا
باخیرام، سنه، اؤزومه
باخیرام اولوما ، اؤلومه
و بیرده …

▫️ترجمه:

در روشنای دل

نرمک نرمک
گذر می کنم
از میان فصل ها و سال ها.

با تغییر رنگ مو و آهنگ صدا
زمان در درونم گم می شود.
عمر به سان ساعتی شنی
در نشیبی معکوس می گذرد
و دنیا روز به روز
در چشمانم بزرگتر می شود.

حقایق ، راز
جهالت ، وافر
باور ها ضعیف می شوند.
رویاها ، ناتمام اند
و آرزوها چین بر نمی دارند.

باری ، قلب می تپد
کماکان لبریز از عشق
بلورین می شود از صافی ها
نور می پاشد.

در روشنای دل
هستی را نورانی می بینم.
نگاه می کنم با دل
بر راه ها ، آدم ها
نگاه می کنم بر تو ، بر خویش
نگاه می کنم بر ماندن ، بر مرگ
و دیگر ...

سالخیم سویود
شعر : ناظم حکمت
ترجمه و سس : دکتر حسن ریاضی( ایلدیریم )

دوشون سن!
حسن ریاضی (ایلدیریم)

دوننینده گیره‌لنمه هر یولون، زیروه – دئیه، بینه‌لری دوشون سن! دالغاسینا سینه گرمه هر سئلین، دنیز – دئیه، زینه‌لری دوشون سن! یولو جایماز یول یؤنونو ساخلایان، گئج آییلار کئچمیشینده یوخلایان، دوننینه اوز چئویرمه، آرخالان بابا – دئیه نوه‌لری دوشون سن! گونده‌لیکده گوندوزلری ایتیرمه، واختلی اویان، اولدوزلاری ایتیرمه، اَیری باخیب دوم – دوزلری ایتیرمه، باخ…

https://ishiq.net/?p=35085

☀@ishiqnet

▫️  كهر آتلي

▫️صفر خان بیزیم قهرمان

▫️دکتر حسن ریاضی ( ایلدیریم )

اويانيب

عصريلر رين داش يوخوسوندان

سييريليب چيخدي اوباسي نين قينيندان.

ياراقلاندي

آتلاندي

يول لارين سينه سينده

گونلري توزلويا توزلويا چاپدي

كهر آتلي

چاپدي:

باشينين اوستونده اولدوزلو،گونشلي گؤيلر

آياغينين آلتينداتوزلانيب ،اوزنان يولار.

چاپدي:

كچدی كئچيدلری ،گديك لري

قانلي قادالي يول لارين باغريني چاتلاتدي
               كهر آتلي.

چاپدي آتي نين ياليندا:

گون لر اييلدي ،دوزه لدی

كهر آتلي اييلمدي

يول لار جيغیرلاندي ، هاچالاندي

آتلي نين ايستگي،اوميدي پارچالانمادي

چاپدي:

باشي هاوالي ، اوره گي سئودالي

گؤزلر ينده آرزولاري گؤي قورشاغي

سؤزلرينده سحر شافاغي

اولو داغين اتگينه چاتدي

كهر آتلي.

داغلار داغي،اولوداغ

قار قاباقلي، قايا قوللو اولو داغ

قوجاق آچدي    

قوجا آتلي كهري له وداع لاشدي

قارتال كيمي قايالارلا قوجاقلاشدي.

قي اوجالدي

كيشنرتيدن داش آغاندي

داغ ترپندي !

اولوداغين اتگينده قوشا ياتدي

آت سيز آتلي

آتلي سيز آت.

ائل لرين ده يولو دوشجك اولو داغين اتگينه

گؤردولركي، اولوداغين اتگينده:

يئر كيشنه دي

گؤي آغلادي

شيمشك چاخدي .

او آن

سييريليب چيخدي

كيشنرتيدن، چيغيرتيدان

اِِيل لرين اوره ك قينينا سيغينيب،

ياتدي
                 كهر آتلي!

? صفر قهرمانیان ( صفرخان )

? اثر استاد پرویز حبیب پور

▫️بیر مای دونیا ایشچیلر گونو

▫️الی خمیر،  قارنی آج‌‌لار

▫️دکتر حسن ریاضی ( ایلدیریم )

ایل اوزونو
سحر آخشام
جوان، قاری
هیسلی ائوده ایلمک چالیپ، دفه دؤیدوک؛
ایستک‌لری، آرزو‌لاری قینا‌لادیق قینا- قینا؛
بوتا- بوتا ناخیشلارین یاناغینا
دزگاه بویو الوان- الوان خالی هؤردوک.

گلدی تاجر
یاریم آرشین قولتوغوندا؛
حاجی آلدی یاریلیغین،
او آغانین جیبی دولدو.

قانیمیزلا هؤردوگوموز الوان خالی
زنگین‌‌لرین سارایینا بزه‌ک اولدو.

کؤهنه‌ گیلیم، جیریق پالاز
بیر چوخ ائوین دؤشه‌نه‌یی،
بارماقلاردا بالیق آغزی یارا‌لاردا بیزه قالدی.
یایی، یازی ال آیاقدان فیلیق چیخدیق
ایلان‌کیمی سوروندوک بیز،
چؤل- باییردا توز- تورپاغا بوروندوک بیز؛
 باغ- بوستاندا بار بسله‌ییب، بیچینک‌ده بیچین بیچدیک،
یونجا بیچدیک، خشه بیچدیک.
سارس سونبول دنیزینده گئجه گوندوز اوزه‌ر اولدوق،
اتلیک‌لری بئجرمک‌چون یاشیل داغ‌لار اته‌یینده
مال- داوارلا گزه‌ر اولدوق.
امه‌ییمیز
میوه اولدو، تاخیل اولدو،
مال- قار ایله قویون اولدو
ایشلریمیز اویون اولدو.
قول چیرمادیق
نه آپاردیق؟!
اغاج‌‌لارین شیرین بارین
 یئشیک- یئشیک، ماشین- ماشین دلال آلدی.

باغ- باغچادا ‌سیغیرچین‌لار
بوستان‌لاردا تؤر- تؤکونتو دئم قارپیزی
              بیزه قالدی.
بورجوموزون دالی دوشموش قیسط‌‌لارینی اؤده‌مک‌چون
آغ بوغدانی، اتلیک‌لری پول ائله‌دیک،
قوتور‌کئچی ساغمالیمیز
قاراجالی بیت‌لی بوغدا قیش زوماری اولدو، یئدیک.
باشینیزی نه آغریدیم
گئن گؤز سبد چووالیمیز
روزو داری؛
الی خمیر، قارنی آج‌لار
بئله سووار روزگاری!