#يازينب

ياموت اشعندك جاي . جاي جاي جاي
راحت روحي اعله الماي . ماي ماي ماي
يم العلگمي انفاس . راحت مني واحساس . من صحت اعله عباس . ماي ماي ماي

إلمن معتني إلمن . جاي وگلي تاخذمَن روحي انت اتعرف ضلت ترف يم رايته الوگعت
دور بالجسد كله . ماتلگى فقط عِلة
علة فرگته ترحل متى من گلبي ماطلعت

ضلت روحي اويه الكافل .. طاحت يمه تبچي اتشمه صح ميت بس متعوفه
هد روحه او تدري اشايل ? ارويحة زينب لاتتعجب من الضحالي اچفوفه

لو رايد مني الروح . روح روح روح
يم العباس اتروح . روح روح روح
يم العلگمي اتطوف . روحي گاعده اتشوف . تلگى ابين الچفوف . ماي ماي ماي
__
لاروح ونبض عندي . بس مدمع حفر خدي
ما أشتم هوى چيه مو سوى ضلينه ياوسفه
لتدور ولاتتعب . هذا بس جسد زينب
الروح امعلگه وامشبگه بچفوفه الترفه

انچانك تاخذ بس جسمي .. اشويه اشويه وارحم بيه الهسه إمن السوط انحيله
واكتب عالتابوت اسمي .. زينب ماتت لكن رادت تمشي العباس الليلة

من اوصل يطلع صوت . صوت صوت صوت
زينب جاباها الموت . موت موت موت
ردتلك من ابعيد . گوم الها يالعضيد . بس هالمره متريد . ماي ماي ماي
__
من راح إمن المخيم . خذ روحي وعَلي سلم
من ذاكى الظهر الهذا العمر بس ابجسد أمشي
من گالوا وگع وحده . طاحت روحي يم خده
ضلت عالسهم ذاكى الثلم عينه وگطع رمشي

لومه الماي العذبني .. ما فارگني ولاشيبني ولاراحت روحي او روحه
لومه الشام التعبني .. چا هسه آنه موش اهنانه يم عباس اضوي اجروحه

روح العباس وشوف . شوف شوف شوف
اشكاتبلي عالچفوف . اچفوف اچفوف اچفوف
كاتب فوگ الايدين . يازينب إلچ دين . من صحتيلي مرتين . ماي ماي ماي
____
تلگى ارويحتي ابجربة . يم المشرعة امچلبه
مابين النهر تنظر گمر طاح او وگع زنده
تلگاها ابوسط راية . نامت حسرة بفيايه
تنطر كعدته من نومته لاماغفت بعده

كل ليلة الروح ابابه .. تشتم عطره اتقبل نحره ماعفته وما عافاني
دور تلگى اعله اثيابه .. ادموع الفرگه ادموع الحرگه عباس اشگد بچاني

روحي ابگربه اشچم يوم . يوم يوم يوم
مامقسوم انظل دوم . دوم دوم دوم
ابلحظاتي الأخيرات . سأله وگله چلمات . ماضمالي گطرات . ماي ماي ماي
_____
روحي ابكربله ضلت . تمشي اويايه ماقبلت
يم جسم الگمر نزلت مطر واتبلل ابشفته
يم احسيني تتعنه . شبعت بس دمه منه
اتلملم بالجسم صارت هدم روحي على جثته

ونت يم جثته وصاحت . هسه اوصلتك ياروح اختك وين اجروحك لتلچمك
عالراس اتدور راحت . شافت رمحه واهيه اتلمحه وصاحت شيصبر أمك

من تسأل خيچ وين . وين وين وين
حيل اصرخ راح حسين . حسين حسين حسين
دمه اعله الثرى ايسيح . اشما يوگف ترى ايطيح . ذبحوا خيي وايصيح . ماي ماي ماي
____
عنه اخذوني مسبية . ابلا روح وجمر بيه
اصعدت اعله الهزل وآنه الحبل ورملي إيديه
چنت امدللـة ابخيمة . تالي امعذبة ابهيمه
خلصت اليسر خد منسطر وامشي اعله عوچيه

اشگد كسرت ضهري الناكة . اشگد طيحتني اشگد ودتني ادروب الخربة الما طبها
أمشي او أصرخ مشتاگة . الريحة كافل يمي او شايل ماي الاخته ايشربها

تسبه ابلا روح ام عون . ام عون ام عون ام عون
ياموت احكم وشلون . شلون شلون شلون
كل هذا وترى ايهون . من نظرات العيون . صحت ابضرب المتون . ماي ماي ماي

حيدر الحلفي

#الليالي_الفاطمية

خل ننصب اقراية .. يزينب يزينب
لمنه او نشد راية .. يزينب يزينب
بلكت تجي أمنه الزچية
ابوكت العزه هاي المسية
لمنه او نشد راية .. يزينب يزينب

هذا المسه يازينب . خل نبچي لمنه او ننحب
وننصب عزية اعليها
وگفي اعله باب المجلس . اهنا أمنه تگعد تجلس
تستقبل اللي ايجيها

بلكت تجينه ابهالمسه . او ويانه تگعد جالسه
واشكبره بختي يختي لو . چف امي أرجع المسه

بالمجلس الگاها .. يزينب يزينب
وساعة ابقى وياها .. يزينب يزينب
ومن دمعة امي اترس إديه
ابوكت العزه هاي المسية
لمنه او نشد راية .. يزينب يزينب
_____مو گالوا امنه الزهرة . الينصب عزاء اتحضره
او تگعد يخويه ابابه
هلبت تجينه الليلة . او تلتم يخويه العيلة
او كلمن يشوف احبابه

من تستمعها ونتي . بلكت تحن الشوفتي
وابسرعة تحضر هالعزه . اتدورني واتشم ريحتي

ويه امي أتلاگه .. يزينب يزينب
هم مثلي مشتاگه .. يزينب يزينب
وانون سوى او نگعد سويه
ابوكت العزه هاي المسية
لمنه او نشد راية .. يزينب يزينب
_____بالمجلس انتي اقريلي . اشصار اعله أمنه احچيلي
ابطور الحزن ونيلي
ابيا يا يمى زينب إبدي . حتى آنه أللطم خدي
واصرخ بعد عيديلي

راح آنه أكتبلچ شعر . عن امنه أحچي ابكل شطر
خوفي اعله گلبچ ينفطر . امن اكتب إلچ كلمة كسر

خالتسمع الزهرة .. يزينب يزينب
اعليها ابحزن نقره .. يزينب يزينب
خل تستمع ونتي الشجية
ابوكت العزه هاي المسية
لمنه او نشد راية .. يزينب يزينب
_____لو بالعزه شفتيها . يازينب اتلگيها
او گعديها يم المنبر
لا تلطم اتخليها . فوگ الصدر بيديها
يختي لأن ما تگدر

منعيها تلطم عالصدر . أمچ ضلعها منكسر
ومن تنعي خويه بالعزه . إسمي أبد لاينذكر

لو سمعت ابأسمي .. يزينب يزينب
يوگف گلبها امي .. يزينب يزينب
ما أحتمل تنحب عليه
ابوكت العزه هاي لمسية
لمنه او نشد راية .. يزينب يزينب
_____خل ننصب احسينية . وانون سوى ليلية
حتى الزجية اتجينه
او تقره النه عن اطفوفي . اشمكتوب فوگ اچفوفي
يازينب اتراوينه

تحجيلي قصة كربله . عن الشمر عن حرمله
شلون انتي من اتشاهدي . راسي عدوچ شايله

اتگلي الشهر إسمه .. محرم محرم
اتموت انته بي يمى .. محرم محرم
اجروحك ترى بالغاضرية
ابوكت العزه هاي المسية
لمنه او نشد راية .. يزينب يزينب
_____اول عزه يالحره . راح امنه عالطف تقره
وابقصتي أشعر تبدي
تقره اعله گطعة نحري . تقره اعله كسرة ضهري
ولمن أضل الوحدي

تقره اعله صدري الينهشم . تقره اعله صبعي الينگطم
واتحملي ياخويه لو . گالت أضل ابلا هدم

واتگلي گدامي .. يزينب يزينب
تتسلب ايتامي .. يزينب يزينب
وتحچي ابإسم طفلة رقية
ابوكت العزه هاي المسية
لمنه او نشد راية .. يزينب يزينب
_____ثاني عزه اعليچ انتي . قصتچ وحد عن قصتي
بيها خيم محروگه
بيها ركض بالصحره . بيها مشي اعله الجمرة
وطفله تون مخنوگه

بيها يبت حيدر سبي . او نومه عله الشوك او حبي
او صعده اعله نوگ ابكربله . او صعده اعله تل الزينبي

تحچيلچ البضعة .. يزينب يزينب
كل قصتچ او تنعه .. يزينب يزينب
اينادونچ اهناكى السبية
ابوكت العزه هاي المسية
لمنه او نشد راية .. يزينب يزينب

حيدر الحلفي

وانته اعله الرمح ما ينحمل بعدك
واشتاگيت ابوسك والدي ابخدك
واشتاگيت لحظات . روحي ابحضنك اتبات

بينك او بيني مسافه يالهجرت ابنيتك
والرمح عالي يبويه او گمت احن البوستك
ارقيه آنه او يمي رتك تنزل اشتم ريحتك
حتى احضنك حتى اخلي ابراسك انته اعمامتك

حتى اتذكرك واتذكر ايامي
چنت اتگلي بويه ابهالحضن نامي
نامي ابحضني ساعات . روحي ابحضنك اتبات
_____
عالي رمحك وآنه مگدر اوصل الخدك واحب
يمتى تنزل حتى احضنك بويه شيخلصه الدرب
گمت احن العطرك اشتم بويه وايحن الگلب
والله مشتاگه إمن ادينك اشرب الماي العذب

ما مشتاگ تشبگ بنتك الحلوه
او من اضحك تگلي فدوه الچ فدوه
يمك احله ضحكات . روحي ابحضنك اتبات
_____
من يجيني الليل گلي وين انام ابيا حضن
الورده من تعطش يبويه تشتكي الهم للغصن
وانته بس راس ابجواري او روحي الحضنك تحن
وين احط راسي ابحضن من او من اونن وين اون

مشتاگ النفس يا بويه لانفاسك
مشتاگه اخلي راسي يم راسك
واشبع بويه نظرات . روحي ابحضنك اتبات
_____
خوفي لو شبگنه راسك بويه تگرب موتتي
واعله راسك نفس بويه مايظل ابريتي
ويه راسك آنه اريدن ياحبيبي دفنتي
وابحفرتك كون بويه اتصير لازم حفرتي

آنه اوياك اريد اتلمنه بس حفره
راسك يمتى اشبگه بويه منتظره
مو بس مره مرات . روحي ابحضنك اتبات
____
واشحلاة الموته يمك بويه يم راسك اريد
ادري صح بس راسك انته يمي او جسمك بعيد
بس اذا ما موت گربك ما اظن روحي تهيد
هالعمر من غبر وجهك يا ابو اليمه اشيفيد

يم راسك اموتن آنه مقتنعه
الجفن العين لازم ترجع الدمعه
روحي كلها دمعات . روحي ابحضنك اتبات
____
قبل ما موتن يبويه ارد اشوفك بالحلم
انته وي راسك اشوفك لاتجيني ابلا جسم
اتشيلني بالحلم ردتك بويه والجسمك تظم
بنتك ارقيه يغالي او عظم يطبگ عالعظم

قبل الموت جسمك ارد اشبگنه
او عطر اثيابك آنه ارد اشمنه
مر بحلامي لحظات . روحي ابحضنك اتبات

حيدر الحلفي

رقية عليها السلام

انته لو مو انته مو انته
البارحه الشابگته شابگته
حظني شو ماشفته ماشفته

انته معقوله ابوي البالأمس حاظني
لو صدگ لحسين إنته گوم هسه اشبگني
گوم واحظني يبويه ابغربه شو عايفني
جيت ادور عنك آنه والمشي تعبني

اعتذر معرفتك معرفتك
اشموسهم غيرتك غيرتك
او خدك امسومرته امسومرته
____
ماعرفتك بس عرفتك بويه من وجناتك
بيها بوسات العزيزة الحره وابنياتك
عاين الوجناتي بويه بيها اثر لمساتك
راح تعرفني رقية آنه من بوساتك

السوط كلشي ماسح اي ماسح
بس اثر ما رايح ما رايح
خدي من قبلته قبلته
_
فتح اعيونك ثواني وابتسم گدامي
حيل مشتاگه الضحكتك وين ذيجه ايامي
افتحلي حظنك ياحبيبي او گلي غمظي او نامي
فدوه بس لا لا تگلي طلعيلي اسهامي

طلبه يا محبوبي محبوبي
اتغطه انته ابثوبي ابثوبي
ابلا هدم ليش انته ليش انته
_
ردت انام او راسي بويه عالترب خليته
جيت انامن فوگ صدرك والصدر ملگيته
إلسهم شفته اعله نحرك بس ولا جريته
ازغيره ايدي اچبير سهمك والدي حسيته

گمت اظم بالشيله بالشيله
جسمك ابهالليلة ابهالليلة
والصبع دورته دورته
___
امجرحه اجدامي يبويه شوكهم ماذيني
محترگ ثوبي يغالي گوملي او طفيني
ما اشوفن بويه دربي والجمر عاميني
فتح اعيونك اريدك تنظر الأيديني

حرمله طيحني طيحني
عالجمر من ذبني من ذبني
او چفي هالحارگته حارگته

حيدر الحلفي

محررررم 1446هـ الحُسين والزهراء عليهم السلام

هلا يمى تعاي .. جيتي ابوكتچ هالساع
هلا يمى تعاي .. آنه الطايح عالگاع
كافي لا تدوري . آنه اهنانه نظري . ماشميتي عطري
تعاي . تعاي

هلا يمى چنت انتظرچ . أعرف مشتاگه الشوفي
لتمدين ايدچ ليه . ترى مگطوعات اچفوفي
لتدورين اعله اثيابي . كلشي الأجل ابنچ عوفي
جيتيلي اهنا مشتاگه . وبيه اشسوه الطف شوفي

خليني ابحضنچ فدوه . اتراب الطف يحرگ گوه . يمى ابروحي
ذكريني ابذيچ ايامي . اتنوميني يلله اتنامي . طيبي اجروحي

انه جرحي الچبير .. ودعتچ وآنه اصغير
انه جرحي الچبير .. إبنچ مذبوح ايصير
زين وما نظرتي . من گطعوا رگبتي . چا هم يمي متي
تعاي . تعاي
____
صار اسنين ابچي انتظرچ . مشتاگ آنه الحنيتچ
بس ابيا حال اشتمچ . ابدمي اهنانه اتلگيتچ
يمي وملزمتچ وسفه . ولا گمت ولا شميتچ
منتظرچ كل هالمده . او بحضاني ما ضميتچ

منو أمه گاعد يمها . بس مايگدر يشتمها . وشيحملها
هاي اصعب حالة اعليه . أمي اتجيني ابعوچيه . وما گوم الها

ترى هذا اللقاء .. مجروح ايصد مجروح
ترى هذا اللقاء .. أم واضناها المذبوح
ماشايف حبايب . اتلاگوا عالترايب . عاشوا بس مصايب
تعاي . تعاي
____
حگچ لو معرفتيني . ابلا راس او جسمي امگطع
لتشيليني إمن الحومه . اضلوعي ابأحضانچ توگع
لا صدر اللي اتشمينه . كلشي اعله الكاع اتوزع
البي ألف او مية طعنة . شتضني ايرد يتجمع ?

شتلمين إمن الحومه . إبنچ مدفونه ارسومه . ما يرجعلچ
ندري الأيديه مگطومه . مابي يافاطم گومه . شلون ايردلچ

عله روحي السلام .. إقري ونادي يحسين
عله روحي السلام .. راحت فاطم مرتين
مره يم بو فاضل . ومره وآنه شايل . عبدالله واسائل
تعاي . تعاي
____
هم شفتي اخيول اتعدت . ترفس بيه وبطفالي
الگاطع منحر من عندي . شفتيه إمن اتعنالي
ماريد احچيلچ أكثر . بس موقف ضل ابالي
اطلبت الماي وما واحد . يالزهرة اشوي ودالي

ماجبتي ابإيدچ بلله . ماي اشويه العبدالله . ميت ضامي
ماجبتي الزينب خيمة . ماشفتي اشچم ايتيمه . اتون گدامي

سوى من الخيام .. طلعن شفتي النسوان
سوى من الخيام .. صاحن ذبحوه عطشان
زينب دورتني . هم مثلچ إجتني . بس ماوچدتني
تعاي . تعاي
_____
الخد الچنتي اتقبلينه . محفور وما يتقبل
راسي وجسمي اللي اتگطع . مايرجع مثل الأول
عبدالله الميت ضامي . يافاطم ماظن يعدل
الحبل البيدين الحره . ملفوف ولا ماينفل

ماترجع زينب زينب . وما تطفه اخيامي التلهب . راحوا أهلي
ميرد عبدالله ابحضني . ولا لاكبر يرجع إبني . وبويه ايگلي

وله يرجع أكيد .. عباس وبيده اللواي
وله يرجع أكيد .. ونشوف ابإيده الماي
ماترجع إليه . يافاطم رقية . لتدور عليه
تعاي . تعاي

حيدر الحلفي

محررررم 1446هـ ( ألم اللقاء في يوم عاشوراء بين الحُسين والزهراء بعد طول الفراق )

من اسنين فارگتك . ويبني اليوم اسمعتك
يمى اتصيح لحگيلي . وجيت اركاض واشبگتك
ملهوفة الشوفك جيتك . بس امگطعيك الگيتك
يبني اليوم . يبني اليوم

من غبت عنك . أحلف ابإبنك
ماحضرت الواحد او لا صيحت
يمى بس انته . صوتك اسمعتة
وجيتك اركض وآنه عمري مركضت

مو صحتلي وگلت يمى هالأجيتك ماتگوم
چنت مشتاگة اللقائك يمى بس مو هيچي يوم
وين زينب والكفلها ليش باقي ابلا هدوم
ليش وحدك يبني طايح اعليك بس آنه الأحوم

بيك انفاس لا گلي . زينب وين أشرلي
اخيامك وين دليني . بالإحساس بينلي
أللزم چفك أمنيتك . بس امگطعيك الگيتك
يبني اليوم . يبني اليوم
__
جيتك اتلوه . يبني بالگوه
الكربلة تدري اوصلت بآخر نفس
اتگلي لحگيلي . يمى هد حيلي
إلشمر گد ماذبح راسي او رفس

اهنا وگف گلبي او إجيتك يالحبيب اشبگ عليك
ليك مديت ايدي تنهض يمى لكن وين اديك
ذبحتك ماكو مثلها الذابحك شمسوي بيك
حمرة شيباتك ييمى ليش هيچي امگطعيك

صدرك هذ لو ضهرك . اهواي ارماح شو حدرك
والطعنات لبجسمك . وصلت ليش حد نحرك
مشتاگ الحضني ادريتك . بس امگطعيك الگيتك
يبني اليوم . يبني اليوم
_
جسمك انظرلة . مختفي كله
صدرك امغطينة برماد الخيم
والشمر أنظر . صدرك امكسر
وچنها يمك راكضة اهواي الحرم

يبني چم مره اعله جسمك خيل تلفيك وتروح
الخيل من روحك أضنها طَلّعت يوليدي روح
خيل تسحگ خيل تگلب جسمك وتچويه جروح
حتى عطرك راح يبني هسه بس دمك يفوح

كل اعضاك متكسرة . ابصدرك هاي چم حفرة
كلشي البيك ظل يخلص . حتى ادماك بس گطرة
لو رايد نبضي انطيتك . بس امگطعيك الگيتك
يبني اليوم . يبني اليوم
__
ردت اشيلنك . ابحضني اخلنك
يبني بس شلون وانته اتطشرت
بيش المنك . وين اضمنك
اتطيح من اچفوف ادي كلما شلت

صدرك إمن اگفاك وينه عذبوني العذبوك
يمى لسهام اعله طولك چم سهم گلي رموك
قبل ميذبحوك گلي شربة اميه نطوك ?
يبني چنك متت ضامي وحتى محبس سلبوك

مو ذبحوك ماكافي . ليش اهنا اتظل غافي
ابهالـشموس يوليدي . ابلايه اهدوم او حافي
ابثوب امك چا غطيتك . بس امگطعيك الگيتك
يبني اليوم . يبني اليوم
____
إكعد او إحچي . لشوكت أبچي
تعبتني وفدوه الك يمى التعب
وينه عبدالله . يولدي اسم الله
لاتگلي مات ضامي او ماشرب

ذاكى چنه اگماط إبنك يمى چا عبدالله وين
وذيچ من ابعيد طفلة اتصيح وينك ياحُسين
وينه جاسم وين الاكبر وينه عباس الحنين
هيچي تتلگوني يمى من بعد ذيچ السنين

زينب ليش مو يمك . كون اوياي واتلمك
إنته ابعيد لو هيه . گول إحسين بعد امك
اليم اختك چا وديتك . بس امگطعيك الگيتك
يبني اليوم . يبني اليوم

حيدر الحلفي

نص آنه اوياچ خنلوليه
حيدر الحلفي

مستهل آنه اوياچ خنلوليه
حيدر الحلفي

محرررم 1446 هـ ليلة الوداع رقية وعبدالله الرضيع ع

آنه اوياچ خنلوليه خنلوليه عبدالله ابمهده
طول الليل وانشم بيه وانشم بيه ومنعوفه الوحده
ابحظن امه وصوت اخته . بلكت تضحك شفته
عبدالله ابمهده

يالرباب الليلة اريدن أغفه يمه . وحيل اشمه . هذا اخوي الغالي
آنه من لغروب أشعر صاح اليه . يارقية . هذا اخوي الغالي
هذا آخر ليل چنه وي عضيدي . ولازم ايدي . هذا اخوي الغالي
فدوه فتحي اگماطه رايد خيي چنه . حيل احضنه . هذا اخوي الغالي

عالچفين كون اينام كون اينام خيي ويتبسم
ومو بالماي لو بخيام لو بخيام يبچي ويتحلم
واهنا لو نومته . بلكت تضحك شفته
عبدالله ابمهده
____
من حنان اخته أريدن خيي يشبع . كافي مدمع . ذبلت ادري اعيونه
إمن البچي عالماي ذَّبل حتى خده . ازغير بعده . وذبلت ادري اعيونه
اجفونه ماغمضن ثواني ابهالمخيم . اشگد تألم . وذبلت ادري اعيونه
لو ثواني مايشوف إحسين يبچي . ودمعة يحچي . ذبلت ادري اعيونه

مدري اشبيه شو مهموم شو مهموم عبدالله انظرله
يشعر خاف آخر يوم آخر يوم باقيله اويه اهله
مدمع لو شربته . بلكت تضحك شفته
عبدالله ابمهده
____
يارقية اوليدي آخر ليلة عندي . يمنه گعدي . وخلنلولي اثنينه
وخلي آخر صوت يسمع أمه واخته . انصد ضحكته . وخلنلولي اثنينه
خالي باچر يارقية يبقى مهده . ابلايه وردة . خلنلولي اثنينه
منه بس لگماط يبقى أحلى ذكرى . بيه عطره . خلنلولي اثنينه

يضحك ليچ إبني اهواي إبني اهواي من اتشيلينه
هو ايريد تنطي ماي تنطي ماي واتغسلي اجبينه
ماي ايريد اعرفته . بلكت تضحك شفته
عبدالله ابمهده
____
هذي آخر ضحكة من عبدالله شوفي . كلشي عوفي . وخل نناغي اوليدنه
ضامي إبني او ماگدر بضماه يغفه . لزمي چفه . خل نناغي اوليدنه
قَبلي عالمنحر وشيليه ساعة . حل وداعه . خل نناغي اوليدنه
يادللول الولد صيحيه فدوه . نام توه . خل نناغي اوليدنه

يم إحسين خنوديه خنوديه وابحضنه انخله
بلكي اينام لو شم بيه لو شم بيه الوالد وايقبله
ابحضن الوالد عفته . بلكت تضحك شفته
عبدالله ابمهده
____
يالرباب العمي خنوديه يلله . شفته صلى . وصاح ياعبدالله
بلكي من عباس يشتم كل حنانه . ايحس بامانه . وصاح ياعبدالله
الأكبر اباب المخيم يندعيله . ويه ليلى .وصاح ياعبدالله
وجاسم الحزنه عله ابنچ عاف عرسه . اسمعته هسه . وصاح ياعبدالله

سكنة اتصيح بويه إحسين بويه إحسين چيف اصبر يلله
من الموت يرحل وين يرحل وين باچر عبدالله
بچفوفك لو شلته . بلكت تضحك شفته
عبدالله ابمهده

حيدر الحلفي

نص تدري يالوجهك ضوه
حيدر الحلفي