*🎉 Сёння народзіны адзначае сябра Беларускага ПЭНа Ірына Дарафейчук!*

Ірына Дарафейчук – беларуская паэтка, бардэса, журналістка. Нарадзілася ў вёсцы Чудзін Брэсцкай вобласці, дзяцінства правяла на хутары ў Белавежы. З 1981 года жыве ў Полацку.

Пачала друкавацца ў 1991 годзе. Аўтарка паэтычных зборнікаў «Сцяблінка на лязе» (Мінск, 1997), «Паганскае кола» (Полацк, 2003). Лаўрэатка прэміі часопіса «Маладосць» за зборнік паэзіі «Сцяблінка на лязе», лаўрэатка рэспубліканскага конкурсу на лепшы літаратурны твор сярод маладых аўтараў за падборку вершаў у газеце «Літаратура і мастацтва».

Віншуем Ірыну з народзінамі! ❤️****

🔵 Слухаць размову з Ірынай і песні ў яе выкананні для праекта «Сто бардаў Свабоды» Радыё Свабода;

🔵 Чытаць падборку вершаў Ірыны са зборніка «Сцяблінка на лязе» на Камунікаце;

🔵 Чытаць падборку вершаў Ірыны са зборніка «Паганскае кола» на Камунікаце.

Святы Вечар

Каляда, Каляда, на зямлі – Святы Вечар,
Нарадзіўся у яслях Збавіцель і Бог.
І пасталі бярозаў танклявыя свечкі
Паабапал заснежаных, белых дарог.

Сёння сэрцам з усімі куццю раздзяляем,
Хто за стол наш не змог на вячэру прыйсці,
Ўсіх далёкіх і родных сваіх спамінаем
І дабра ўсім і шчасця жадаем ў жыцці.

Можа, хто занямог, можа, хто пахіснуўся,
Загубіўшы сумленне ў нялёгкім жыцці,
Прытаміўся ў шуканні свае Беларусі –
Памажэце й такім на вячэру прыйсці.

За святочным сталом – няхай кожнаму месца
Каля вернага сэрца сясцёр і братоў.
Няхай будзе у вас, бы ў харошай сямейцы,
Ўсім пароўні ў жыцці і куцця, і любоў.

Няхай вера ў любоў, свая мова ў застоллі,
А у думках – зямля, дзе спачылі дзяды,
Няхай ўсюды ласкава спрыяе вам доля,
А любоў, чалавечнасць мацуе рады!

Ларыса Геніюш

❤️ У гэты святочны вечар хай спраўдзяцца словы, напісаныя Ларысай Геніюш. Шчаслівых Калядаў, сябры!

Святочная гісторыя цуду! ❤️****

Выдавецтва «Янушкевіч» паведаміла, што 8 лютага 2025 года ўсё ж такі пабачыць свет кніга Джоан Роўлінг «Гары Потэр і Келіх агню» па-беларуску.

Калі нам стала вядома, што брытанскія праваўладальнікі першапачаткова адмовілі ў падаўжэнні правоў на беларускае выданне серыі пра Гары Потэра (спасылаючыся на жорсткія санкцыі Вялікабрытаніі ў адносінах да Беларусі як краіны-суагрэсара і прынцыповую пазіцыю ў гэтым пытанні аўтаркі), Беларускі ПЭН не мог застацца ўбаку. Наша місія, у тым ліку, уключае спрыянне развіццю беларускай культуры і абароне правоў прадстаўнікоў літаратурнай галіны.

Беларуская мова цяпер знаходзіцца ў небяспецы. ЮНЕСКА прызнала яе «патэнцыйна ўразлівай». Выданне на беларускай мове такіх папулярных кніг, як серыя пра Гары Потэра, безумоўна, дапамагае захаванню беларускай мовы, далейшаму пашырэнню яе выкарыстання, а таксама культурнай разнастайнасці. Забарона публікацыі кніг на беларускай мове спрыяе русіфікацыі і моўнай дыскрымінацыі. Прасоўванне беларускай мовы і літаратуры мае важнае значэнне для культурнага адраджэння ў Беларусі. Гэта магчыма дасягнуць праз падтрымку аўтараў, перакладчыкаў і незалежных выдаўцоў як у Беларусі, так і за мяжой.

❤️ Мы радыя, што Беларускі ПЭН змог паспрыяць выхаду наступнай кнігі з серыі. Шчыра дзякуем Міжнароднаму і Англійскаму ПЭНам за эфектыўную падтрымку!

Беларускім аўтарам, перакладчыкам і выдавецтвам пры парушэнні іх правоў ці абмежаваннях дзейнасці раім не заставацца з праблемай сам-насам, а звяртацца па дапамогу. Мы працягваем нашую адвакацыйную дзейнасць на карысць развіцця беларускай культуры і абароны правоў людзей слова.

Сустрэчы з сябрам Беларускага ПЭНа Андрэем Хадановічам ☀️

✅ «Яшчэ адзін дзень жыцця»: Рышард Капусцінскі ў беларускім перакладзе. Анлайн-прэзентацыя кнігі польскага аўтара.

Андрэй Хадановіч раскажа пра рэвалюцыю, дэкаланізацыю, грамадзянскую вайну вачыма Рышарда Капусцінскага, пра ролю літаратурнага рэпартажу ў сучаснасці.

⏰ 18 снежня, 16:00 (па Менску)
📍 Анлайн
👉 Дэталі тут.

✅ Прэзентацыя кнігі вершаўАндрэя Хадановіча да оперы «Дзікае паляванне караля Стаха» ў Вільні. Сустрэча адбудзецца ў межах імпрэзы-святкавання Калядаў у Беларускім доме.

Падчас прэзентацыі аўтар раскажа пра стварэнне оперы і кнігі вершаў да яе. Чаму Караткевіч і сёння найактуальнейшы для нас аўтар? Ці адгукнулася «Дзікае паляванне» на рэпрэсіі ў Беларусі і вайну супраць Украіны? Як класічная проза пераўвасаблялася ў вершы, а ўкраінскія зоркі вучыліся спяваць па-беларуску?

⏰ 21 снежня, 18:00-20:00
📍 Вільня, Беларускі дом (Vilniaus, 20)
👉 Дэталі тут.