لمولد الامام الحسين ع
.
.
.

حسـين ابن عــلي .. يحــبــي الازلــي

يأول ما الــك نــد .. اتيه بيك اذا عــد
نعم يابعد عافيتي وعنك لحظه ماصد

ماعوفك وحروفـك ملهـوفك بطـيوفك .. گايـــلك نــعم
بحساسي وبنفاسي ونوماسي ماناسي .. قاسملك قسم

الگلب غيرك خلي .. يـحبـــي الازلـــــي

نسـيم احروفك ايمر .. واشعر بيه اكو سر
هواك استنشقه والشوگ بيـه الكربله ايجر

رضوانك عنوانك واحضانك بيبـانك .. يا اطهر عــشگ
يالغـــالي وامالــي يالـوالـي دلالـــي .. بس بسمك يدگ

يمن تسوه هلي  ..  يحـــبي الازلي

يكلشي الأنته وانته .. بس بعيوني شفته
نسيت اشيـاء واشــياء اسمـك من عرفته
احچاياتي وصفناتي وبسماتي ودمعاتي .. صارتلك وقـف
مفتونك من دونـــك مجــنونك وعيونك .. مولاي اعترف

گلت بالذر بلي .. يحــبي الازلـي

يسـألونـــي ولا رد .. مـو شغلة اعاند
بس الشغله يدرون بدليلي انته گاعد

يالبالدم مو مهتـم لا مغـــرم واتـألم .. في حبك عمر
بتكويني تدريني مسميني يحسيني ..عبدك وافتخر

منو الغيرك الي .. يحبــي الازلــي

يصاحب احله ملگه .. مــثلك ويـــن الـگه
اشهگ من يمر اسمك واحسها احله شهگه

تفز روحي وجروحي وصروحي مذبوحي .. ذكرك من يمر
واتجـــمهر واتحـــظر ما اگــــدر اتأخــــر .. والطفـــك افــر

ضريحك منزلي .. يحبـــي الازلــي

اشگد ما انـــي اكـبر .. يمــك كلـش ازغر
طفل چن اني كدامك من المستحه اعثر

مسويني ومنطيني وغانيني امعليني .. اعله امن النجم
اتأمل واتوسل ارد اسـئل من يقبـــل .. ينطي بهـالحجم

فقط انته الولي .. يحــبي الازلي

حيدر تركي الكربلائي

ميلاد الامام الحسين ع
.
.
.

هــايـم هــايـم .. من زغري بحسين
هــايـم هــايـم .. من زغري بحسين

____________________________

هايم وقصة غرامي . ما اوصفها ابكلامي . ابتدة لحسين امامي
من الاصلاب
حبه من الله سجيه . ومن نفخها الروح بيه . إلي حسيته هويه
اغلى الاحباب
اسمه يجري وي دمائي . وصار معروف انتمائي . كربلائي كربلائي
احلى الالقاب
راسم راسم .. صـــورته بالعــين
هايم هايم .. من زغري بحسين

____________________________

ابروحي حسيته وضميري . من اذكره اشتم عبيري . حسين بس حسين اميري
شلون انساه
يجري بالشريان احسه . تره حقي من اقدسه . ماشفت بالدنيه نفسه
ماكو والله
حبه لاماصح نظيره . وروحي بمحبته اسيره . وين ما ناظري اديره
حسين الگاه
دايم دايم .. مــو مـــره مرتــين
هايم هايم .. من زغري بحسين

____________________________

حقي لو اتجنن اني . ابغيره مايلهج لساني . مثله لا ماشفت ثاني
ابين هالناس
بي عطف هالكون كله . دوم يامحبوبي اگله . عيشتي ابلاياك ذله
يابو الاحساس
روحي ابو اليمه اعتبرته . ابحبه دلالي اختبرته . ياگلب لو ما ذكرته
ابجدمي تنداس
لازم لازم .. وتــَـرجع الــــديـــن
هايم هايم .. من زغري بحسين

____________________________

انه مديون ابحياتي . لـ الذي ساكن ابذاتي . حسين روحي وامنياتي
واحلى الاحلام
صورته ابعيني رسمها . لمَن اشتاگ انه اشمها . حقي بعيوني اضمها
من الايام
غارو وگالولي كافي . نشعر ابحبك خرافي . گلت كون الله يشافي
المثلي ماهام
واهم واهم .. والــيحب حبــين
هايم هايم .. من زغري بحسين

____________________________

أحمد الباري واشكره . دوم بس بحسين اقره . صار بيني اوبينه عشره
بگلبي موجود
حبه اني ماورثته . حسين من الذر عرفته . إلتقيت اوياه وشفته
اوبينه اعهود
الخاطره هالكون اضده . هوه يدري اشگد اوده . روحي والدلال عنده
وانتم اشهود
خاتم خاتم .. بـثيديه الاثنــين
هايم هايم .. من زغري بحسين

____________________________

صورة حسين ابخيالي . ماتفارگ لحظه بالي . تشهد اعليه الليالي
وهاي الاشعار
يمي احسه ابكل دقيقه . مو وهم لابل حقيقه . انتو لو ردتو الوثيقه
ابگلبي اثار
والدليل العندي علمي . حللو اجزاء جسمي . احروفه تلگوهن ابدمي
ماكو اسرار
ناجم ناجم .. هـالعشگ من وين
هايم هايم .. من زغري بحسين
_____________________________
حيدر تركي الكربلائي

أنا أتشارك 'ايالباب ومصابه' معك

الفاطميه
.
.
.

آ  يالبــاب ومــصابه .. والدمــعات سچــابه

------

خشب بس من صرت يمهم سمعتك صارت اشگدها
الـدار الكـَــبرت اسمـــك .. الفــضل يرجــع السيدها
والســـوه ألـك معـــروف .. مـو بالشـــين اله اتردها
وراك شـــلــون ترضـــاها .. الزچـــيه ينسطـر خدها
الصاير شنهو اسبابه .. والدمعات سچابه

--------

يبـــاب وقـــالع البـــيبان .. ملـح اچفوفه ماغزر
يناكر عــشرة اهل البيت .. يـملـــوع گلب حيدر
الاكبر مــنك بقاطـــات .. حــيدر قالعــه بخيــبر
شگلت من اسمعت انته .. بگفاك اضلوع تتكسر
الزهره اتصيح يايابه .. والدمعات سچابه

-------

ابمدينة يثـرب البيبان .. حاسدتك لـون تعلم
يالصاير جزء من بيت .. جــبرائيل بيـه ملزم
ستر الله بعظـــمته لاذ .. خلف وانته مامهتم
عجيب امرك يهذا الباب .. الطـشرته فلا يلتم
حيدر يوجع مصابه .. والدمعات سچابه

------

الخشب نوعيـن معروفه .. لو مذموم لو محمود
واحد بيـــه نجــه موسى .. واحد وَجــره نمرود
يمــن نوعيتك امخـلـيه .. گلب المرتضى ممرود
يالخـليته كـــل عمره .. اثيابه امن المأسي سود
لمن فارگ احبابه .. والدمعات سچابه
------

يالكاسر اگلــوب اطفال .. واحدهم جرح عمره
واگف انته مدري شلـون .. يمبـدي الورد عطره
محروگ انـته بالــظاهر .. اواحدهم يوج جمره
يباب اشگلت للاطـــفال .. لمــن طاحت الزهره
يبو حچايات لهابه .. والدمعات سچابه
------
حيدر تركي الكربلائي

شهادة الزهراء
.
.
.

ليل .. لامــاتتــسولف ســـاعاته
ليل .. شيخلص الليل وصفناته
فگد الزهره
تـارك جمره
وســـط اضــلوعي

يجيــني الليـــل وتــأذن .. بيه اللوعه والوحده
وتضكني الســوالف حيل .. مـثل الضاكه لحده
الشــده البيهـا ابو الحمله .. مثلـها ماتجي شده
الگـلبه انـصاب ياهالناس .. ياچف يگدر ايشده

ليل .. وشنسه امن الزهره وشتذكر
ليل .. وحيدر حاير چـــن مو حيدر
الحاير بامره
تــارك جـمره
وســط اضـــلوعي

من يسكت حچي الوادم .. تبدي تحچي صفناتي
اغـَرب وي حچي السكته .. وتـــفــززني دمــعاتي
اصــد لمچــانـــهــا خالــي .. وتعله حيل شهگاتي
اوليـــداتـــي اذا سمــعـــو .. تزيد النوب جمراتي

ليل .. ولو فزو شيسكت اعيوني
ليل .. وخاف الشمات ايسمعوني
الهم اشكبره
تـارك جمــره
وســـط اضــلوعي

علي الماطاحت ادموعه .. بس من خشية الباري
عگــب عيـون ام بيتي .. دمعي بكل وكت جاري
الوادم عايشــه جويريد .. وانــه عايـــش بــناري
ولان نور الله مـو بالدر .. اضلم جاي احس داري

ليل .. الدنيه ابلايه الزهرا سوده
ليل .. عـالفاگد يستـقوي بــزوده
ملح العشره
تـارك جـمره
وســط اضــلوعي

چنت مـو باب لابيبــان .. اشيل ومــا اهم بيها
هــسه ثــوبــي بـالگــوه .. اشيلــه وهاي تاليها
يتبده الحچـي اليــوجع .. كــل ماعيني ابديها
عـيشه ابلايه ام حسين .. هالعيشه اشيمشيها

ليل .. وشيعـــت بهالليــل احلامي
ليل .. عگــب الـزهرا وحشه ايامي
الشيع عمره
تـارك جـمره
وســط ضــلوعي

ادلــــي بالصـــبــر وانـــي .. محـــتاج اليـدلـــــيني
عگــب عيــون ابو فـاطم .. منـــو بفاطم يواسيني
حسبــه اتجيــبني وحسبه .. الذكـــراهـا تــوديــني
احس مو بس دمع عيناي .. احسن كلشي يچويني

ليل .. بدمعات اعويناتي اتسله
ليل .. هيچ يصير اليفـــگد خله
خلي وكسره
تــارك جـمره
وســـط ضـــلوعي

حيدر تركي الكربلائي

للسبي
.
.
.

اكــبر جــرح بعيـون ابوصالح
ظـعن الفـواطم للســبي رايح
العــمـاته .. لچماته
وماتنشف .. دمعاته

صــباحــا ومــســاء .. بــكاء الـكـــربلاء
حياة المهدي ابوصالح عــباره عن عزاء

معانات وجـــراح .. بــدت فـوگ الرماح
ويه الروس الي نشالت ظعن عماته راح

جلالة ســـتر ال البـــيــت مگــيودات اديـهن
المصيبه الذبح عبــاس هــوه الــيحدي بيهن

لو هده ونــهن من يطـــب ديره
بالسوط يضرب راس ابو الغيره
مأساته .. وجمراته
وماتنشف .. دمعاته

الحنت ظهر الامـــام .. وتخـــلـــي مــايـنام
العلــويات اخـــذوهـــن بـدون أي احـــترام
بعرض حامي الدخيل .. الغـرب گامت تعيل
شــماته ولان شـــافوهن نـــساء ابـــلا كفيل

ظعن مو للسبي لا كون ينحـط بين الاحداق
يطاف بظعن ال البيــت وسفه بين الأسواق

ال الله العفــاف مفـــصله الظلهن
المايســوى واليــسوى يـصد الهن
ولوعاته .. وحسراته
ماتنشف .. دمــعــاته

على الهــزل يـــسيــر .. جـــرح گلبه الچبير
ويسمع صوت عمـــته ام عون لمن تستجير
تصد يسـره ويـمـــين .. تــــدور عـــالحسين
نخت والـشمر گال الها اگطعت بيدي الوتين

ايسي مايرد حسين زينـب لاتحشمين
هذاك العالرمح راسه چنج ماتشوفين

شافت اخوها عاري ومسلب
من حقها لـمن تنــعمي زينب
احچاياته .. اوناته
ماتنشف .. دمعاته

الامام المهدي شاف .. امــيرات العفاف
بحالة مزريه عالنوگ من كلــشي تخاف
الناس اخذت قرار .. تشــامرهن احجار
المثلهن زحمه يتــشامر وحــدتـهن مزار

وادم من اســــطوح الدور نار تــذب عـليهن
وقسم من عدهم يضحكون چي ذبحو وليهن

الچانت حمايه تطلع اوياهن
صاحوا سبايه هسه جبناهن
حچاياته .. اوناته
ماتنشف .. دمعاته

الف موته يموت .. ابوصــالح سكوت
كلما شاهد بعيــنه ظـعن زينب يفوت
ظعن للســبي سار .. ظــعن كـله مرار
اذا لكبــار سابـيهن شــنو ذنـب الزغار

شنو ذنب الأطفال تروح بله بظـعن الاحزان
اديهم كلــش ازغيـرات وحبال السبي امتان

بالشام مــن دخــلو خـرايبهم
فوگ الســبي زادت مصايبهم
وغـصاته .. ولهفاته
ماتنشـف .. دمعـاته

حيدر تركي الكربلائي

للاربعين
.
.
.

عطشانه اهـواي .. بـس مـو للـماي
الوجهك يحسين
عطـشانه اهـواي

_____________

صــار اچــم يـوم امفـارگني
وخدي امن المدمع يحرگني

اســئــل عــنــك يـامـاي الله
يـالوجــهـك چـان امــغرگني

محــروگــه ابــدلالي الـخيمه
وگـلــي اســئل عـنك ياغيمه

يـامــاي اعيــوني الشـيــلمك
يـالمــتبدي بحظــن الـهــيمه

اشتاگت عيناي .. بـس مـو للـماي
الوجهك يحسين
عطـشانه اهـواي

_____________

ميته امن الشوگ امخليني
مـن عذبك يمــته اتـرويني

حارگني افــراگـك حارگني
ومحـد ياخــويه ايطـفيني

شمـات اهــواي الـشـافوني
وعنـك كـل ساع ايسئلوني

يابس حسيته امن اغيابك
يابو اليمه السان اعيــوني

ثــق يارجـواي .. بـس مـو للـماي
الوجهك يحسين
عطـشانه اهـواي

_____________

احتاجيتك بــدروب الــغربه
چــتالــك من مـتنـي ايظربه

دورت اعــلــيـك ابأشــيــائي
المــاضلت منهن بــس تــربه

سلبـوهن كـلهــن مــن عنـدي
وضلت بس دمـعاتي ابخدي

اشعر كل دمعه امـن افـراگك
يمـكن يابــو اليــمــه ابگــدي

احچـيلك هاي .. بس مو للماي
الوجهك يحسين
عطشانه اهواي

_____________

بحچايـاتــك جــاي اتــذكر
وافـرك بچفـوفي واتحـسر

من سمعت حسراتي الناگه
شـو گامـت تمشي وتتـعثر

شــوگك موتنــي وتدريني
راح اغـفـه وبلـكت تلفـيني

اول مــاغمــضت اعــيوني
لن سوط ابمـتني ايوعيني

هـمــي وبلـواي .. بـس مـو للـماي
الوجهك يحسين
عطـشانه اهـواي

_____________

اشتاگيــتك ياروحــي وعــمري
وشوگك مدري اشسوه بصدري

اعلــه افــراگـك لا مـامتــعـوده
وكلــش زيــن ابـزيــنب تــدري

ابهجـرك مــدري اشـصاير بــيه
اختــك بخـــلافــــك مــعـــميه

مــن يـوم الشـفــتك عالغـــبـره
اتطــشــر وانـــلـــم يــــومـــيه

ملهوفه اعظاي .. بـس مـو للـماي
الوجهك يحسين
عطـشانه اهـواي

_____________

تعــبنـــي افراگــك تـعــبني
شمـعه وهجــرانـك ذوبــني

احلــم ترجع واگـعـد والـگه
راس گــدامــي ايــعـــذبـني

راسك من ابـچي ايضــمونه
ومن اسكت همه ايطــلعونه

ماكفــاهـم جــرح امــتوني
رادو دلالـــي ايجـــرحــونه

نوحي ومبچاي .. بـس مـو للـماي
الوجهك يحسين
عطـشانه اهـواي

_____________
تمت والحمد لله
حيدر تركي الكربلائ

أنا أتشارك 'انما الجنة بين الحرمين' معك