"بیستا برمه"

خواننده: #اکبر_رستگار_سوادکوهی
شاعر: #شعبان_نادری_سوادکوهی

دل خروار به خروار غم هنیشته
اسری بمو مه چش دم هنیشته
مه تنگ دل کوتر پر بزوئه
بورده هلال ماه ر سر بزوئه

ته غم خوامبه چش جا خون ببارم
کلو کلو دل ارمون ببارم
بووم او آ کلاک اسری بشندم
ته قد اسیر خاک آ اسری بشندم

ته سارق دچی رختا من بمیرم
ندی دنیای بختا من بمیرم

هر شو برمه گلی تسه خو شومبه
ته لباس پلی تسه خو شومبه
بعد ته پاپلیه بال بسوته
منه پر هایتنه اقبال بسوته

بخته چلچلا در برو بریم
برو خوامبه بوینم ته گل دیم
برو درد دارمبه درمون ندارمه
اتا دم بوینم ارمون ندارمه

چه بوردی جان دل
دری کمین منزل
مه دل بی ته گلی گلی بموندس
مه سر بی ته سر زندی بموندس

کمین سبزه ته گل رو ر دارنه
کمین ویشه ته بک و بو ر دارنه
ته آسمون وارش یاد بدایی
لَله‌وا ر نواجش یاد بدایی

بهار گل رنگ
رفق روز تنگ
کجه بوردی منه دل قد ندانه
مه دل ته دوری طاقت ندانه

غم و غرصه تنه خشک چو کنده
غرصه غرصه غرصه تن او کنده
مرد ر بیستا بیستا برمه کشنه
مرد ر جوون مرگ غرصه کشنه

سفری چلچلا
لالالالالالا
هرچی بارم ته داغ توم نوونه
ته نوم دنیای دل جا گوم نونه

@savadkohmp