https://vt.tiktok.com/ZSjfNsy82/

**တရုတ်-မြန်မာ နှစ်နိုင်ငံအကြား နားလည်မှုစာချွန်လွှာနှင့် သဘောတူစာချုပ် ၇ ခုကို နစကဥက္ကဋ္ဌနှင့် တရုတ်ဝန်ကြီးချုပ်တို့ တွေ့ဆုံမှုအပြီး လဲလှယ်ခဲ့ကြ

တရုတ်-မြန်မာ နှစ်နိုင်ငံအကြား ပူးပေါင်းဆောင်ရွက်ရေးဆိုင်ရာ ကိစ္စရပ်များဆိုင်ရာ နားလည်မှုစာချွန်လွှာနှင့် သဘောတူစာချုပ် ၇ ခု လဲလှယ်ခြင်းအခမ်းအနားကို နိုဝင်ဘာလ ၆ ရက်မွန်းလွဲပိုင်းက ကူမင်းမြို့ရှိ Haigeng Garden Hotel ၌ နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နှင့် တရုတ်နိုင်ငံ ဝန်ကြီးချုပ် H.E. Mr. Li Qiang တို့ တွေ့ဆုံမှုအပြီးတွင် ပြုလုပ်ခဲ့သည်။
ယင်းတို့တွင် မြန်မာကောင်စစ်ဝန်ရုံး၊ ကူမင်းမြို့နှင့် တရုတ်ကောင်စစ်ဝန်ချုပ်ရုံး၊ မန္တလေးတို့အကြား မြေနေရာငှားရမ်းခြင်းစာချုပ်၊ သင်တန်းကျောင်းများ အဆင့်မြှင့်တင်ခြင်းစီမံကိန်းများ၊ စိုက်ပျိုးရေးထွက်ကုန်များအတွက် ဓာတုဆိုင်ရာ လိုအပ်ချက်များ နှင့် အပင်ပိုးမွှား ရောဂါကင်းရှင်းရေးဆိုင်ရာ သဘောတူညီချက်တို့ပါဝင်သည်။
ထို့အပြင် တိကျစွာတိုင်းတာခြင်းနည်းပညာပူးပေါင်းဆောင်ရွက်မှု လုပ်ဆောင်ရန်အတွက် နားလည်မှုစာချွန်လွှာ၊ တရုတ်နိုင်ငံ၏ စံချိန်စံညွှန်း သတ်မှတ်ရေးဆိုင်ရာ စီမံခန့်ခွဲရေးဌာန(SAC) နှင့် မြန်မာနိုင်ငံ သုတေသနနှင့် တီထွင်ဆန်းသစ်မှု ဦးစီးဌာန (DRI) တို့အကြား နားလည်မှု စာချွန်လွှာ၊ အားကစားကဏ္ဍမြှင့်တင်ရေး နားလည်မှု စာချွန်လွှာ စသည်တို့လည်း ပါဝင်ကြောင်း သိရသည်။
ထိုသို့လဲလှယ်ခြင်းကို နှစ်နိုင်ငံ တာဝန်ရှိသူများက နစကဥက္ကဋ္ဌနှင့် တရုတ်ဝန်ကြီးချုပ်တို့ ရှေ့မှောက်၌ ဆောင်ရွက်ခဲ့ကြကြောင်း သိရှိရသည်။**

မြန်မာနိုင်ငံတွင် စည်းလုံးညီညွတ်ရေးမူကို အခြေခံသည့် အသိုက်အဝန်းဖြစ်‌စေရေး ဒေသတွင်းသာမက နိုင်ငံတကာနှင့်လက်တွဲ လုပ်ကိုင်သွားမည်ဟု နစက ဥက္ကဌ ပြော

မြန်မာနိုင်ငံအနေဖြင့် ချစ်ကြည်ရင်းနှီးမှုနှင့် စည်းလုံးညီညွတ်မှုကို အခြေခံသည့် သာယာဝပြောသော အသိုက်အဝန်းဖြစ်စေရေးအတွက် ဒေသတွင်းသာမက နိုင်ငံတကာနှင့် ဆက်လက် လက်တွဲလုပ်ကိုင်သွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ယနေ့ နိုဝင်ဘာ ၇ ရက်၌ တရုတ်နိုင်ငံ ကူမင်းမြို့တွင် ပြုလုပ်သည့် (၁၁)ကြိမ်မြောက် ကမ္ဘောဒီးယား-လာအို-မြန်မာ -ဗီယက်နမ် လေးနိုင်ငံပူးပေါင်းဆောင်ရွက်မှု ထိပ်သီးအစည်းအဝေးအတွင်း အလှည့်ကျ ဥက္ကဌအဖြစ် တာဝန်ယူ ဆောင်ရွက်ရသည့် နစက ဥက္ကဌက အမှာစကားပြောကြားစဉ် ထိုသို့ ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံအနေဖြင့် ကမ္ဘောဒီးယား-လာအို- မြန်မာ-ဗီယက်နမ်( Cambodia - Lao PDR – Myanmar - Viet Nam (CLMV) အဖွဲ့ဝင်နိုင်ငံများနှင့် အနီးကပ် ပူးပေါင်းဆောင်ရွက်၍ အဖွဲ့ဝင်နိုင်ငံများ၏ ဘုံရည်မှန်းချက်ဖြစ်သည့် ရေရှည်တည်တံ့သော ဖွံ့ဖြိုးတိုးတက်မှုများ ရရှိအောင် ဆောင်ရွက်သွားမည်ဖြစ်ကြောင်း ကတိပြု ပြောကြားသည်။

အလားတူ နစက ဥက္ကဌ က မြန်မာနိုင်ငံအနေဖြင့် အဖွဲ့ဝင်နိုင်ငံများအကြား အလှည့်ကျ ဥက္ကဋ္ဌတာဝန်ယူ‌ချိန်အတွင်း ထိပ်သီး အစည်းအဝေးကို ပုံမှန်ကျင်းပနိုင်ရေးနှင့် မိမိတို့ပူးပေါင်းဆောင်ရွက်မှု၏ အသီးအပွင့်ရလဒ်များ ထွက်ပေါ် လာစေရန် အဖွဲ့ဝင်နိုင်ငံများအားလုံးနှင့် နီးကပ်စွာ ပူးပေါင်း ဆောင်ရွက်ခဲ့သည်ဟု ပြောသည်။

ထို့ပြင် လေးနိုင်ငံ စည်းလုံးညီညွတ်မှု၊ ခံနိုင်ရည်ရှိမှုများနှင့် ယခုနှစ်အတွင်း ဖြစ်ပေါ်လာသည့် စိန်ခေါ်မှုများကို ကျော်လွှားနိုင်ခဲ့ကာ ပူးပေါင်းဆောင်ရွက်မှု မူဘောင်အောက်တွင် သက်ဆိုင်ရာလုပ်ငန်းစီမံချက်များကို ထိရောက်စွာ အကောင်အထည်ဖော်ခြင်းဖြင့် မိမိတို့ဒေသတွင်းရှိ ပြည်သူများ၏ သာယာဝပြောမှုနှင့် ကြီးပွားတိုးတက်မှုကို ပိုမိုအထောက်အကူပြုမည်ဟု ယုံကြည်ကြောင်း ပြောကြားခဲ့သည်။

လေးနိုင်ငံ (C-L-M-V) အဖွဲ့ဝင်နိုင်များအနေဖြင့်လည်း ပိုမိုခိုင်မာသည့် ကတိကဝတ်များနှင့် ပူးပေါင်းဆောင်ရွက်မှုအရှိန် အဟုန်ကို ဆက်လက် မြှင့်တင်သွားရမည်ဖြစ်ကြောင်း ဖြည့်စွက်ပြောကြားသည်။
7.Nov.2024;Thu