سولفت للــوادم اجــروح وغــرام
ابكلشي عنك يا ترف چان الكـلام

اشما يكبر الحب تنجرح ..
صورة غرامك
اشما تطـلع اعليه شمس ..
اذكـر خيامـك

مـن أغمض عـيني اوديـلك سـلام
ابـكـل مجـالسنه گلـت قـال الإمام

ما أمّلك ..
ممكن أهلي انه أمّـلهم .. ما أمّلك
مو أعز من عنده اگلهم .. ما أمّلك

تمطر ابحب وضوه
والله اعز امن الهوه
ما امّلك ..

========ـ

اتعايشينه امن الطفوله اوي الجرح
من وعـينـه وأنتـه بـعــدك مـنـذبـح

مثل اليعيش ابلا ضوه
اليهجر ثنيتك ..
يندل بالادروب الصدگ
اليندل عزيتك ..

من عشت حد مامتت اعظم صرح
انته تـشرق احلا مـن وجـه الصبح

يا حبيبي ..
الما تلچمه اجروحك عينك .. ما يحبك
الما عــرف قيمـة حـنـينـك .. ما يحبك

ما اعــيش ابـلا دمـع
ابچي من كثر الشمع .. يا حبيبي

========ـ

الراية الاسّمك عليهه اشگد حنينه
يحرس الخـدام فـيّها ابـكـل مدينه

حته الحمام امن الخطر
يخفگ عليهه ..
عيشتنه صعبه و رآيتك
سهلتهه بيه‍ه ..

احنه وادم نعشگك عينك علينه
وما نمّـل اشما تدور الدنيه بينه

سولفتلك ..
كل حچي گلبي حبيبي .. سولفتلك
ولايگ الجرحك نحيبي .. سولفتلك

انطيتك احچاية گلب
ما ازل امن الــدرب  .. سولفتلك

========ـ

ماكو أمان وانته أمان الخائفين
وانه واحـد ما اله غيـر الحُسين

رايــد ثبــاتي ابمجـلسك
ولتهد أديه ..
مــا يسـوه كلـمن فـارگـك
يابو رقيه ..

الدنيه كلهه ايام واتگضي السنين
ماشفت غيرك يبو جروحي حنين

ماكو منك ..
ما لگينه ابگد حنينك .. ماكو منك
يمي ما ناديت وينك .. ماكو منك

ساكن ابعيني الجرح
انـته يا تــاج الــرمـح

========ـ

- خيري الصفراني ✍️

تدري أنته لو ما تدري
أنـته الاعــزّ من عمري
ابدم الگلب .. تمشي تره

بس أسمك اعلشفافي
وگلبي ركضلك حافي
خل يدري كلــــمن مادره

يمشي العمـر واكبرنه
وبعده الحزن تارسنه
بعيني انطبع .. ما ينقره

اجروحك أبد ما تلچمه .. الما عاشر الدمع
ما بـاچي من كثري تره .. يا سيدي الشمع
طبعي اهيّـم ابمجلسك .. والغيبه مو طبع

حنانك عـايش ابعيني
حنانك دومه يسگيني
اشحلاتك يابعد حيلي
حنانك ملـجئ وديـني

=======ـ

ايـدور العـمر واسنينه
وبـيــك انته شينسينه
حُـبك كبر .. گـبـل العمر

عـنـدك رهـينه اعيوني
يلـمـا تِـخـيب اضنـوني
بس بيك أريد .. انه انكسر

استـجـدي مـنك دومي
يگضي واعيـدن يـومي
يا بـو علي  .. بيك اشكثر

امدللني اكثر من هلي .. امعلمني عاللّطف
مـن الـطـفوله الكُبرتي .. خفت انه انجرف
الغـيرك أسير ابـدنيتي .. يا بسمل الصحف

اخذني امنايدي لجروحك
أخـذني اتـلـوه وي روحك
اعلـبـابك احچي وي گـلبي
غــريبه اعـيــونه مذبوحك

=======ـ

غالي انتَ مو حيّ غالي
ومــالك مـشـاعــر بالي
وأقرب بشر .. بالنسبه ألي

غـرگنــي خير افضالك
ليلي ونــهـاري اقــرالك
حچي الگلب .. يابو علي

لتغــضهه عني اعيــونك
والله اضـيـع ابــدونـــك
وخلي التعب .. ما ينچلي

معنى الحـنـان ابعــالـمك .. وامحيّر البشر
امدليني ابدروب الصدگ .. بالدنيه والدهر
مــن العطـش ميـت لـچن .. يركـعلك النهر 

يضامي وساگي هالـوادم
يضامي أرحـم بشـر نـادم
دخـيّـلك سيــدي ادخيلك
اخاف اتسمه مـو خـــادم

=======ـ

جرحك يعيش اويايه
غالي وحچيت اهوايه
بيك انتهي .. وبيك ابتدي

ما همني غير امصابك
خــادم مـطيع ابــابـك
تقـبــل عبـد .. يا سيدي

ما ينـگـطـع ضل نـوحي
جروحك اهيه اجروحي
و أسـود الك .. دوم ارتدي

عاش بحدر عيني الجرح .. ما فارگه الجرح
ياخذني لمصاب السبي .. كل ليلي كل صبح
يا ايــهــا الـــــوادم تــره .. حبيبي منذبح

ابصحاري جسمه يتلوه
ابصحاري انذبحت الخوه
يگــوم ويــوگـع ابـهيـمه
بــدونه الـدنيه مـا تسوه

=======ـ

- خيري الصفراني ✍️

يـا قـمـر أم البـنـين أدخـيـلك
قوه الله وحيله كلهه ابحيلك
يا غياث اخيام زينب والأمان
تخسف الكونين لو كـر ويليك

يتـربات الـهيبه
ويـ سيـد كربله
يصگر الملزومه
وعميد المرجله

~~~~~ـ

مـن بــداياته ونـذرهه أسنينه
كـافـلـه اخيـام الــدلال ايمينه
رحمـه للعـبـاس عباس الجمال
كله متـكــون ابنــظــرت عـينه

الضوه ايشع من طوله
وعبيده العادته
ونــهـر كلـه ابــروده
نبــع مـن ريشته

~~~~~ـ

أول الفــرسان دوم انــشـوفه
والقيامه اتـصير مــن اجفوفه
ينحني الـتاريخ لابن ام البنين
صولته ابنص الحـرب معروفه

ثلـث منه الهاشم
ثلـث مـن البدو
الرعب من الكافل
طغه منه الكفو

~~~~~ـ

ملحمــة حيدره ابنص الحـومه
ومـالـت اعله الــوادم الملـزومه
نار واصياح وردم بالجيش صار
الحرب لشيوخ الحرب محسومه

ابن حيدر صارم
صنيع المعرفه
گطع نسل القاده
اجاهم عاصفه

~~~~~ـ

صاحـب الـرآيه الچبيره الهيبه
حـلـف شاطي ماي كله ايجيبه
من جماله اخيـام زينب تستنير
وجهه اكــثر مـن بيـاض الشيبه

الخيم كلهه اتريده
أمان ومفخره
المــدد يا كـافــلهم
يسبع الگنطره

~~~~~ـ

- خيري الصفراني ✍️

#لسان_حال_الخدام اللذين لايتمكنون هذا العام من الذهاب لمولاتي زينب ع بسبب الأوضاع .. ?

الـعـام گـوه ودعـيـناهـه ومشينه
العام مدري شلون مامتنه ابچينه
ابـاب زينب مـن تشابگنه بجروح
العوده گلنه نرجع وبس ما اجينه

مـكسـوره خـدامچ ..
گطعوا درب شامچ .. 
ما حـرگوا اخـيامچ .. حرگوا گلبنه
حـرمـونـه يا زينب ..
وبينه الگلب شيّب ..
واعله الصور ينحب .. والشوگ اخذنه

غـريبه رجـعـتي يبت حيدره
رجعتي گعدتي ابضلامچ تره
نصيح اويه أبوفاضل المعذره

++++++ـ

اشلون هذا العام ما نوصل وطنهه
ندري هسه امتانيه وفارغ صحنهه
لا أهــل لا خــــادم أتـعـنــه يـــزور
هضمه هـاي و زيدت ؤنهه وحزنهه

هاي السنه اگبالچ ..
مـا نشـتم اتـرابچ ..
وما نحتمي ابابچ .. هاي المصيبه
بالحسره ضلينه ..
ويـاهـو اليودينه ..
يم عون اعذرينه ..  اه ياغريبه

السنه يبچي بابچ علينه اشكثر
بــدون الـزيـاره اشـيفيد العمر
اعلحسرة مقامچ يطول الكسر

++++++ـ

بــاب زينب ينتظر ويـن الـيجـونه
زينب ابهاي هالسنه ماعدهه عونه
ياهو اليساعدهه من تبچي وتنوح
فـوگ مـا يتـعب گـلبـهه ايتـعبـونه

عالـگـبه مكـتـوبه
متـعـوبه متعـوبه
مو چنتي مهيوبه .. صرتي سبيه
جمره الدمع صاير ..
راجعـلــچ العاشر ..
مدري شنو الكاسر .. منج خطيه

عله الؤن فلا يلگه عونه الگلب
لان يـم مقـامج يـزينب حرب
يعين الله گلبچ مصايب يصب

++++++ـ

أن شاءالله اتعدي محنتچ ياغريبه
ونـرجـع اردود ونعينـچ عالـمصيبه
و لابد ابهــاي هالسنه زايــر يجيج
صح بعيدين احنه بس بينه النهيبه

يالـحــره نــدعيـلچ
ابعون الله وابحيلچ
جـم خـادم ايجيلـچ .. عنه ابنيابه
يحچيهه جـمــرتنـه ..
مـنـعـوهـه لـمــتـنه ..
تــدريهـه كــسرتـنه .. يالبل خرابه

اعلجمرة دمعنه اشتياگ وحزن
يسـولــف گلبنه ابزيـاره ويـحن
فــلا يهــده سـاعه يـزيـنب يؤن

++++++ـ

- خيري الصفراني ✍️

https://youtu.be/B6vWxXOG9eA?si=1wPDAKNRnp3GX_kc

#چنت_أكول..

راح أموت ..
ياهـو اليشيل النعش ويّفزع إخوتي
راح أموت ..
ومـاكو واحد محتـرگ ويهمه موتي
راح أموت ..
أشكي من الأمي واتشيّب شـكوتي

ليـلي مـو مثـل اليـمركم ليلي لـيل
يهلي مامش عافيه وماعندي حيل
حـتـه بحـلامي گطـعـتوا بيه ليش 
يهلي مكسوره تره وحـملـي ثـگيل

عگب افياكم ماكو افياي
عگب الخوّه ما ضل رأي
خلصت بس الروح تگول
شـالـع گـلبي الماي الماي

======ـ

چنت اگول ..
العدهه سبع أخوان دوم اتضل أميره
چنت اگول ..
انه عـلــويـه وحلـم مـاصـير أسـيـره
چنت اگول ..
العاش عمره ابعزه مايصفه اعلحيره

تـالـي ضلـيت الـغـريبه المـالي رأي 
انه مـو دون الخـلگ يكتـلني مــاي
شنسه مـن ايامي من عشت ابدلال
ما يســويهه الـزمن وتــردلـي هـاي

مشــتـاگه انـه الــذيـچ أيـام
ما چنت اعــرف بيـهه الشام
أمشي ابرأيي وعندي اخوان
واگـعـد أميـره ابنص اخيـام

======ـ

كافي ضيم ..
والله من يوم اهدعش ما مستراحه
كافي ضيم ..
راح يـوگـف گـلبي مـن كثـر النياحه
كافي ضيم ..
اتحملت والله اشكثر غربه وجراحه

ذبلت اوراق العمر واجروحي نار
المـا اريده ايصير گوه اعليه صار
والله شيبتني البـواچي اتعـذبيت
جرحي مثل ادموعي يخواني حار

كافي اجروح وكافي اهموم
خل ارتـاحــن لــو بـس يوم
يلچم كلشي الــروح اهواي
ولا مــر اعله عيـونـي النوم

======ـ

كلشي راح ..
وكلهه تدري افراك ابو سكينه الكتلني
كلشي راح ..
وهــذا آخـر يـوم بي يـوجعـني متني
كلشي راح ..
عمري يگضي وللأزل مايگضي حزني

ياتراب اليدفن جروحي وتطيب
وانه بالـغــربه ولا يمـي الحبيب
الشام ما يرحم گلب والهمّ چبير
مدري شيريده بعد والله عجيب

وكتي ابلا رحمه امن ايدور
ماخـذ كــل أهلي ابـعـاشور
اتغرب عمري ابگــاع الشام
گـلبي اليمته ايضل مكسور

======ـ

- خيري الصفراني ✍️

#صافي_بالي !!

تسد اعيونهه الوادم .. وتـنـام الليل مرتاحه
أهاليهه الخلگ يمهه .. ولا ضكـتهـم انيـاحه
وانه الگابلـوا روحي .. غربـه ونـاس ذبـاحه
شينوم جفن عيني .. الگلب مابطل اصياحه

لا اخوتي ولا أمـان .. وين وداني الـزمان
شالت الخوه وهلي يمكن نسونه 
هوسه والوادم شمات .. گلبي ياخواني مات
وهذا حال الفاگد وما عده عونه

صافي بالي ..
ياهلي صار اشكثر ما صافي بالي
هـذا حالي ..
لا گلب لا حيل خله اعليه حالي
ابـلا دلالي ..
الله ليـراويك روحي ابـلا دلالـي

--+-----+---+----+---+ـ

التعب ماعايف عيوني .. ضيم ابضيم متروسه
الرآيه الغطت امتوني .. شفتها ابهيمه مديوسه
حگي امنسحل بروحي .. البراري تحرگ اشموسه
وعلي مشتاگه للكافل .. چـنـت ابفيه محروسه

راحت أيام الدلال .. وهسه بأيام الحبال
والله دنيه وصارت الخوّه بعيده
وين أهلنه گمت اصيح .. عثروني وصرت أطيح
شنهو حاله اليوگع ومچتوفه ايده

وين اخوتي ..
بيه شمسوي زماني وين اخوتي
ايا يـموتي ..
روحي مشتاگه وتريدك ايا يموتي
هذا صوتي ..
يهلي مبحوح وانادي هذا صوتي

--+-----+---+----+---+ـ

شكثر تتحمل الفرگه .. يا هو اليرحم بروحي
ياهو اليگعد اشكيله .. واحچيله عله جروحي
اخذ مني الذبح كلشي .. خلاني ابطرگ نوحي
يم راس الاخـو انـعه .. يمحبوبي ويمذبوحي

گتله يامن طشروك .. انه اختيك وين اخوك
من حضن گلبي خذوا طولك يغالي
ابوجهك الدم والتراب .. يشلع بگلبي العذاب
شاهداني اليدعي بس يلمح خيالي

اهوايه أخوه ..
مو ملامح حرمه عدهه اهوايه أخوه
والله گوه ..
گمت اجـر انفـاسي يهلي والله گـوه
هايه بلوه ..
طـاحــت اعليه وعـمـتني هايه بلوه

--+-----+---+----+---+ـ

رفعت ايدي وحبل بيهه .. هيج الينسبي حاله
صحتلك گوم يحسيني .. اجـتك خيـل چتاله
تره الحافر يخويه اعمه .. يسحگ كلشي اگباله
عمت عيني اعلچثمانك .. محد غسله وشاله

من عگبكم حالي حال .. ظهري ياخواني مال
ذبحك الذابحني ياخويه وعماني
تالي خدري ابلا فياي .. خلوه اعيونك وراي
تلتفت مهمومه وانه الهمّ چواني

كلهه طاحت ..
ربعك وخواني وخيامي انتلاشت
الخوه مالت ..
مالت الدنيه ابكبرهه الخوه مالت
واستراحت ..
روحي من اتموت اگولن واستراحت

--+-----+---+----+---+ـ

- خيري الصفراني ✍️

#ماتت_شهيده

مچتـوفه أيـده .. تالي الصميده
ومولاتي فاطم .. ماتت شهـيده
الـفــارگ حبيبه .. فـايــر لـهـيبه
يابو الــمــلاحم .. صبرك عجيبه

بيمن تنخيت ؟! .. بيمن تگويت ؟!
من شالوا اگبالك علي نعش الزجيه
يتمايل الحيل .. يالـرايح ابليل
تـدفـن حياتك بالگبـر ابهـاي المسيه

اموادع البتول .. والهجر يطول
ضايع الدرب .. وَجّر الگـلـب .. كـلااام
تــوگع وتگـوم .. عالنعش تحوم
يحرگ الدمع .. منكسر ضلع .. حرااام

========ـ

لـيـل وشـمـاته .. كسرن عبـاته
هالليله حـيـدر .. كـاره حيـاته
ضلمه الـمدينه .. والحمره عينه
أم بيته راحت .. وراحت سنينه

بوابة النوح .. فاطم والاجروح
يلفــارگك حتـه الهـوه واتـنـادي وينه
متبلل ادموع .. ومدنگ اتلوع
شنهي الوگع منك علي عگب الحنينه

كلشي والله ضاع .. من هوى الوداع
عاصرك ندم .. حيلك انهدم .. تصيح
يا جبل تطيح .. وسفه ياجريح
يا علي حرت .. يا علي متت .. جريح

========ـ

شيفض عــذابه .. ذابـل شبابه
كلشي اعلروحه .. ما خله بابه
زهــرائـي نــاده .. ليلي ابسواده
من عني رحتي .. ماكـف عناده

گلبچ ولا حاس .. متشيب الرأس
حته الهـوه واگـف تره بس وگفتي
طماچ التراب .. بس جرحي ماطاب
يالمنكسر منچ ضلع گلبي كسرتي

بيمن استجير .. والكسر چبير
هذا يا ألم .. طولي كله دم .. عذاب
غربه هالحياه .. گلبي ما نساه
هالجرح صعب .. يشلع الگلب .. مصاب

========ـ

مذبوحه روحه .. من گد جروحه
معقـوله حـيدر .. الكسره تــلـوحه
هالدنيه هضمه .. غـربه ومضلـمه
عـگـب الـزجيه .. ياهــو اليـلــزمه

أطـفاله اتنوح .. بالحسره مذبوح
حيدر علي ابوكت الدفن محد يعينه
شيّب يهالناس .. من جدمه للراس
مو فاطمه تحت الترب دافن سنينه

جرحه مايطيب .. والصبر عجيب
مابقه أمل .. منحني الجبل .. غريب
أول الجروح .. مابقاله روح
ويلي وحّده .. والتعب بده .. يشيّب

========ـ

- خيري الصفراني ✍️

يـم اخـوتي گـابلـتهم وكـت الـغروب
ولكسر ضلع أمي دمعي يكسر اگلوب
بذكريات أمي نسولف والعشگ
وللسبي تستعد روحي وللـحرگ
وكت الغروب
••••••••••••••••••ـ

نحـچي يـم قـرآن أمــي بالمـدامع
ذكـريات البـَخـرت بيتي ابمـواجـع
ومـا تحـمـل ؤني حيدر بره طـالـع
مـن دمــع اطـفـاله ما يگـدر يباوع

امنـين ما الـتـفت الـگه الأمي صوره
بعيني مرسوم الضلع واسمع كسوره

وادعي حلمانه ييمه اومـو صدگ
وللـسبي تستعد روحي وللـحرگ
وكت الغروب
••••••••••••••••••ـ

لو دعت گال الـحسن امـي ابجيها
تمـطر الـدنيه خبـز من تـحت اديـها
يغفه حته الطير دافي شگد حجيها
امـي تضحك والألـم مـرسـوم بيـها

فارغ امجانج ييمه وصعب الغياب
بيه اثر دم الضلع من عصرت الباب

يمه مشتاگ اعله حضنج انشبگ
و للسبي تستعد روحي وللحرگ
وكت الغروب
••••••••••••••••••ـ

گلهم حسين وتشم ابنحري جانت
كربله اتردد شفتهـه ابيوم مـاتت
عطر صدرك ينثر يا وسفه صاحت
تكسر الخاطر شفتها الدمعه طاحت

مو ضلع يوجعني گـالـت بل ندابه
صـوت زينب آه يحـسين ومصـابه

نلتقي بالطف واشوفك منسحگ
وللسبي تستعد روحـي والحــرگ
وكت الغروب
••••••••••••••••••ـ

قـدمـت أمـي عـبـايـه الـنـايـبـاتي
خاف نيران الـوكت تحـرگ عباتي
بيهه اشم دخان من حرگ امنياتي
عمت عيني عليج گالت كل حياتي

اتكلي هسه انه علي يمي واخـوتج
وانتي من كثر البجي ينباگ صوتج

ويـمه گـلبج عـن اخـوتج يفترگ
وللسبي تستعد روحـي والـحـرگ
وكت الغروب
••••••••••••••••••ـ

علــمــتـني يـخـوتـي امــي الحنينه
شلون احمي حجابي لو جَتفو ادينه
وجان يلچمـهه الـضلع وسمـع ونينه
هسه راحـت يخــوتي وشـلون بينه

امـي مـن گـالـتـلـي زينب بالـسـلامه
گمت احس الدنيه صارت بس ظلامه

وگمت احـس السمه اعـليه تنطبگ
وللـسبي تستعد روحــي والـحـرگ
وكت الغروب
••••••••••••••••••ـ

يـمه احـنه هـلـگـعـدنه مـضيعينج
اعله الفراگ وعالألم الله الـيـعينج
مثل سبحه اطشرن وسفه سنينج
شلـون كلبج طاوعج عفتي بنينج

صرت افزن لو سمعت ابچلمة امي
والتفـت فــرحـانه وتـخـيلــهه يمي

وجرحي كل لحظه اشوفه ينفتگ
وللسبي تستـعد روحـي والـحـرگ
وكت الغروب
••••••••••••••••••ـ

- خيري الصفراني ✍️

#محرم_1446هـ
( وداع الاكبر )

اوليدي شنهو الغيّره
مـو مــلامـح حيدره
اشبقه بعـد الي  .. علي لا مو علي
مصيبه .. مصيبه

========ـ

طاح .. بجــراح .. ذاك أبني مـدري گلبي
يالروح .. مذبوح .. وجروحه ضلت تربي
لــوّع .. و ادمـوع .. غشّت يـويلـي دربي
اصيح .. اصيح

ما خله دمعه ابعيني المصاب
من روحي قطعه فوك التراب
اتوچه گوه وجرحي ما طـاب
اصيح .. اصيح

أكبري راح وحرت
من مشيت اتعثرت
بالدنيه چا شلي .. علي لا مو علي
مصيبه .. مصيبه

========ـ

ويـن .. يا زيـن .. ذاك الجـمـال ورسمه 
شوف .. ملهوف .. بنفاسي ماكو نسمه
يلعوُّد .. أيـعــود .. نـحـرك و أرد اشمـه
يريت .. يريت

وذره اعله وذره اعلارض ليش
يبني وتهوس فـوگـك الجيش
بعدك سنيني اشعدها وتعيش
يريت .. يريت

يركض بروحي التعب
وحيلي يا بـويه نهـب
يا لچمه تنجلي .. علي لا مو علي
مصيبه .. مصيبه

========ـ

ضاع .. بالگـاع .. يبني الدلال وصعبه
هـاي .. دنـياي .. صارت حبيبي غـربه
ويلاه .. عالآه .. وتــاه المخـيـم دربـه
عجيب .. عجيب

يبني ارجع اعلخيمه واشلون
بالله وشكولن يبني لأم عون
ما ضلت اعله وليدي المتون
عجيب .. عجيب

يبني أرد لـو ما ارد
دم بچه اعليه الورد
شكول انه الهلي .. علي لا مو علي
مصيبه .. مصيبه

=======ـ

صوت .. والموت .. يدّنه بـويه ليه
غـاب .. الهاب .. وي وجهك المسيه
روح .. يالروح .. بس أمـك الخطيه
اموت .. اموت

يبني ابحصيره جبتك اوياي
يا مـاي بس الــذابحـك مـاي
وانه ابـغــيابـك مــا الي رأي
اموت .. اموت

ياضوه وراح الضوه
ضلمه صارت نينوه
چنت الي ولي .. علي لا مو علي
مصيبه .. مصيبه

========ـ

- خيري الصفراني ✍️