2540 – Әнас ибн Мәликтен Пайғамбарымыздың ‎ﷺ былай дегені жеткізіледі: «Расында, Аллаһ (Тағала) иман келтірген адамның ізгі амалдарына байланысты әділетсіздік етпейді және Ол оған (басқа риуаятта: «Осы өмірде де ризық береді» деп айтылған) әрі Ақыретте (де) сый-сауап нәсіп етеді. Кәпірге келсек, Аллаһ (Тағала) оны жасаған ізгі амалдары үшін осы өмірде ризықтандырады, алайда Ақырет өміріне келгенде, оның сый-сауап алатын ізгі амалы болмайды» («әс-Сахиха», 53).

2539 – АбдуЛлаһ ибн Амр былай баяндаған: «Мен Аллаһ Елшісінің ‎ﷺ былай дегенін естідім: «Расында, Аллаһ Қиямет күні бүкіл жаратылыстарының алдында менің үмметімнен бір адамды таңдайды. Оның алдына (амалдары жазылған) 99 дәптері қойылады, әрі әр дәптерінің көлемі назар жететіндей жерге дейін болады. Кейін оған: «Сен осы (жазылған дәртерлерден) бір нәрсені жоққа шығарысың ба? Оны жазғандар саған әділетсіздік жасады ма?», - деп айтылады. Ол: «Жоқ, уа Раббым!», - деп жауап береді. Оған: «Сенде ақталу үзірің бар ма?», - деп айтылады. Ол: «Жоқ, уа Раббым!», - деп жауап береді. Оған: «Жоқ, бар. Расында, Бізде сен үшін бір жақсы амал сақталған. Саған бүгін еш әділетсіздік жасалмайды», - деп айтылады да, (сосын ол үшін) «Мен Аллаһтан басқа құлшылыққа лайықты Құдай жоқ егендігіне және Мухаммад Оның Құлы мен Елшісі екендігіне куәлік етемін» жазылған кішкентай қағаз шығарылады. Кейін оған: «Бар да, амалдарың өлшенетін жерде бол», - деп айтылады. Ол: «Үлкен дәптерлердің алдында бұл кішкентай қағаз не болмақ?», - деп сұрайды. Оған: «Бүгін саған ешқандай әділетсіздік жасалмайды», деп айтылады. Әрі дәптерлердің барлығы (таразының) бір жағына, ал әлгі қағаз басқа жағына салынады да, әлгі 99 дәптерлер ұшып кетеді, ал бұл қағаз ауыр болады. Өйткені Аллаһтың атымен ештеңе салмақты бола алмайды»» («әс-Сахиха», 135).

2538 – Шәддәд ибн Аустан Пайғамбарымыздың ‎ﷺ былай дегені жеткізіледі: «Расында, Аллаһ (Тағала) менің алдыма бүкіл жерді жинап көрсетті және мен оның шығысы мен батысын көрдім. Расында, менің үмметім маған жинақталып көрсетілген жерге дейін иелік етеді» («әс-Сахиха», 2).

2537 – Әнас ибн Мәликтен былай жеткізіледі: «Пайғамбарымыз ‎ﷺ былай деген: «(Қиямет күні) бір адам екі және үш адам үшін шапағат етеді және бір адам басқа адам үшін шапағат етеді» («әс-Сахиха», 2505).

2536 – Абу Мусадан былай жеткізіледі: "Аллаһтың Елшісі ‎ﷺ былай деген: «Менің үмметім рахым етілген үммет, оған Ақыретте жаза болмайды, алайда осы өмірдегі жазасы - бүліктер, жер сілкіністері және жанартаулар болады»" («әс-Сахиха», 959).

2535 – Әнас былай деген: «Бірде Пайғамбар ‎ﷺ бір нәрсемен сыналған адамдардың қасынан өтіп бара жатып: «Бұл адамдар бастарына түскен нәрседен құтылуды сұрамайды ма?!», - деді» («әс-Сахиха», 2197).

2534 – Қатададан: «Маған Әнас ибн Мәлик бір адамның былай дегенін айтқаны жеткізді: «Уа Аллаһтың Пайғамбары! Кәпірлер Қиямет күні беттерінің үстінде жүретін күйлерінде тіріледі ме?» Пайғамбарымыз ﷺ: «Осы өмірде кәпірді екі аяғымен жүретін қылып жаратқан (Аллаһ), Қиямет күні оларды өз бетттерімен төмен қарап жүретін етіп қоюға құдіретті емес пе?!», - деді. Қатада былай деген: «Әрине, Раббымыздың ұлылығымен ант етемін» («әс-Сахиха», 3507).

2533 – АбдуЛлаһтан былай жеткізіледі: «Пайғамбарымыз ‎ﷺ дұға етіп: «Уа Аллаһ! Бізге біздің Меккемізде береке бер. Уа Аллаһ! Бізге біздің Мәдинамызда береке бер. Уа Аллаһ! Бізге біздің Шамымызда береке бер. Уа Аллаһ! Бізге соғымызда және біздің муддымызда береке бер», - деп дұға жасады. Сонда бір адам: «Уа Аллаһтың Елшісі! Біздің Ирак үшін де», - деді. Пайғамбарымыз ﷺ одан теріс бұрылды, ал әлгі адам бұны үш рет қайталап, әр сөзінде «Біздің Ирак үшін де», - деді. Пайғамбарымыз ﷺ оған теріс қарап, кейін: «Ол жерде жер сілкіністері мен бүліктер болады және шайтанның мүйізі сол жақтан шығады»,*** - деді» («әс-Сахиха», 2246).

*Бүгінгі Палестина, Иордания мен Сирияның жерлері.

** Көлем өлшемі: 1 сағ = 4 мудд; 1 мудд = ересек ердің қос алақанның мөлшері.

2532 – АбдуЛлаһ ибн Умар былай деген: «Аллаһтың Елшісі ‎ﷺ бір адамды бір қызметке тағайындаған болатын. Сонда ол: «Уа Аллаһтың Елшісі, мен үшін таңдаңыз», - деді. Сонда ол ﷺ: «Үйіңнен шықпа»*, - деді» («әс-Сахиха», 1535).
* Яғни бүлік кезінде.

2500 – Уқба ибн Амир әл-Жуһани былай деген: «Мен Аллаһ Елшісінің ﷺ былай дегенін естідім: «Менің үмметімнің опаты Кітап пен сүтте». Сонда адамдар: «Уа Аллаһтың Елшісі! Сіз Кітап пен сүт дегенде нені мензедіңіз?», - деп сұрады. Ол ﷺ: «Олар Құранды үйренеді және оны Аллаһ Тағала түсіргеннен басқа мағынада түсіндіретін болады. Әрі сүтті жақсы көргендіктен жамағат намаздары мен жұманы тастап, шөлде тұратын болады», - деп жауап берді» («әс-Сахиха», 2778).