догIаш-м делхаргда, тIоадаеш аре
хьона дагаухаргда селханен даьре.
хьал хьежаш сигала бIаргара хиш ухаш
делхача догIано уж къайлакхухьаш.

догIаш-м делхаргда хьо коре хьежаш
хьайга мел дийцачох хIанз а ца тешаш.
дегала йоаландаь ягIаргья тийна,
дегала хилар да ер дерриг дийнар.

догIаш-м делхаргда, хьа сатем боабеш,
хьа дег тIа бола муъ лазарца хьоабеш.
вахара наькъаш да лоаца а, готтиг
хьона ховре, соца яр…соца - хьа моттиг.

Ахмад Шадиев
@ahmad_kehko

лелий хьо дарз хьекхаш дег чу,
ша санна шелъенна кер чу?
фу вахар со воацаш эшаш,
хьанех я хьо тахан тешаш?

йилхарий даьлча вай довне,
тIоадаеш хьай гIайба гIовге?
хьан хиннад гIанаш хьа суртех?
таръеннай сона хьо чуртех.

бакъдолаш дешаш да дахаш
иштта хул массане яхаш:
«ца хайташ ший дег чу доалар
хийла йоI иразагI йоалар».

Ахмад Шадиев

ЙиIий уйлаш.

юрта хазар детташ герзаш,
йоагIар я хьа саг.
херцар дег чу са синбердаш
елхаш санна дак.

укх коа бахка бийза замеш,
бахар кхыча юрт.
нанна хьалха аз ца йохаш
лохабинзар корт.

наха хьона харжача йоIо
хьа коа баьккхар ког.
«Ираз хилда хьа», - аьлар шорттиг
тоха ца луш дог.

«лаьрхIар хилац дегIар мара», -
аьлар нанас шийла.
са бе баьлла нув Iобежар,
елхар даьнна гIийла…

Ахмад Шадиев