.

ای کوُنول مین نامه یاز بیر گولوذارین عشقینه!
جان ائوین‌دن سئیره چیخ بیر خوش گوذارین عشقینه!

هانسی رسسامین الی‌ایله جانلانیر دونیا ائوی؟
هر چمن مین غونچه آچمیش نوُوبهارین عشقینه!

گَل_گَل ای سئودالی بولبول، گَل گزک گولشن‌لری،
سن گولون عشقیله دیللَن ، منده یارین عشقینه!

مجنون اوُز شوریله چوخدا عالمه سس سالماسین،
هانسی نامرد جان اَسیرگَر بیر نیگارین عشقینه؟!

گون کئچیر، دوُوران کئچیر، اوُز حوُکمونو وئرمیش زامان،
نی توتولسون، باده گلسین روزیگارین عشقینه!

اینسان اوغلو جان وئرر پروانه تک آتش‌لره،
دوز سوُزون، دوز ایلقارین، دوز اعتیبارین عشقینه!

"وورغونون" اوُز عالمی، اوُز قلبی، اوُز ایلهامی وار،
مهر و اولفت‌دن یارانمیش بیر دیارین عشقینه!

#صمد_وورغون

??? @ZElKH ???

.

دونیا کیمینه کئف، کیمینه دهشت
بونلاری قانانا یازیغیم گلیر !
دویوب دوشوندوکجه عؤمرون سونونو،
اینسانام، اینسانا یازیغیم گلیر!

دؤوران تزه‌له‌دی یئنه دردیمی،
ساز ندیر، بیلمه‌ین ترپه‌دیر سیمی،
بیر عاغیلسیز ناشی قَوواص‌لار کیمی_
دوشنده عوممانا یازیغیم گلیر !

عؤمور یولاریندا آغاردی بیرچک،
آی ائللر، آتالار عالیم‌دی گئرچک
جوت اولسا میلچک‌ده قالیب گله‌جک_
تک اولان آسلانا یازیغیم گلیر !

خیلقتین سیررینی دویا بیلمیرم،
هر سؤزو آشیکار دئیه بیلمیرم،
نییه سیزیلداییر، نییه بیلمیرم_
ناله‌لی کامانا یازیغیم گلیر !

گؤزومدن یاش آخیر اوزومه دن- دن
آمان آی آیریلیق اولمایایدین سن
بیر اؤلوم یاخشیدی سئویلمه‌مکدن
طالع‌سیز جاوانا یازیغیم گلیر!

ایگید ار آدلانار غئیرت اولاندا
اوزده حیا اولار، عیصمت اولاندا
دیل بیلمز نادانا قیسمت اولاندا
اهلی- حال جانانا یازیغیم گلیر !

بیر آن چاتیلمازمی قاشی اووچونون؟!
آخمازمی گؤزوندن یاشی اووچونون؟!
دَیَنده گولله‌سی ناشی اووچونون_
یارالی جئیرانا یازیغیم گلیر !

دؤورون گردیشینه اویا بیلمه‌ییب
قلبیندن قوباری یویا بیلمه‌ییب
عشقینی کیمسه‌یه دئیه بیلمه‌ییب
گیزلیجه یانانا یازیغیم گلیر!

ظالیم زامان کیمی ائتدی بختیار
اورک‌لرده کدر، حسرت‌، اینتیظار
آمان آللاه داغلار بویدا دردی وار _
بهمن تک اوزانا یازیغیم گلیر !

#بهمن_وطن‌اوغلو

??? @ZElKH ???

.

لَبینین، باده نه شئی‌دیر کی، صفاسین وئرسین!
اوزونون، گون‌ده نه جورعت کی ضیا*سین وئرسین!

اولماسا شربتی_لَعلین، دیلی_مجروحوموزون_
مِئی‌ده یوخدو او لیاقت کی، قضاسین وئرسین!

اوُزگه معشوقه‌سینی، ایسته‌مه‌رم حوری اولا _
رَببیم هر عاشیقین اوُز ماه‌لیقاسین وئرسین!

مین بَلا یار یولوندا منه چکدیردی رقیب،
غیری بیر سوُز نه دئییم، تانری بلاسین وئرسین!

فله‌یین جاهینه گوُز دیکسَم اگر نامَردم ،
عشق فئیضی منه قوی فقر لیباسین وئرسین!

شور سالمیش چمنه بولبول، اگر عاشیق‌سه _
بیر کره ناله‌مین عوُمرونده نواسین وئرسین!

"واحید"‌ی گوشه‌ی مئیخانه‌ده دفن ائیله‌دیلر _
مَست اولانلار ائشیدیب، خئیر_دوعاسین وئرسین!

*ضیا: نور ، ایشیق

#علی‌_آقا_واحید

??? @ZElKH ???

.

.

حسرتیمین قاطار_قاطار کاروانی باشلاندی‌می؟!
اوره‌ییم یامان دوُیونور، یوخسا تلاش‌دان‌دیمی؟!
اوزاق ایل‌لر یاخین گلمز، هارایلاسان یوز دفعه _
خاطیره‌لر اونودولور ، یادداشدان، هوشداندیمی؟!

داها عوُمور داغلاریما ، یاواش_یاواش چن دوشور،
لاله_نرگیز اوزاقلاشیر ، بنوُوشه‌لر گئن دوشور ،
زامان منی تئز قوجالدیر ، ساچلاریما دَن دوشور،
بیلمیرم غم‌دن_قَهَردَن، یوخسا کی یاشدان‌دیمی؟!

بیر سونانین حسرتین‌دن، دردیم درده جالاندی،
کوُنلوم ائوی، شَهَرلَردن، داها بئتر تالاندی ،
"وطن‌اوغلو" آتش‌لره قالام_قالام قالاندی ،
ظالیم قیزی دوُنوب باخمیر ، اوره‌یی داشدان‌دیمی؟!

#بهمن_وطن_اوغلو

??? @ZElKH ???

.

آی نااینصاف! سنله ایلقار ائیله‌ییب،
وعده وئرمه‌دیک‌می بیر آیه ؟! سوُیله!
ایل ده کئچدی، پیمانینا گلمه‌دین _
دئمه‌دین دردینی بیر آیه؟ سوُیله !

بو دوستلوقدان کوُنول دویماز، یاریماز ،
من چوخ سئودیم، حاییف سِئودی یاریم، آز ،
بیر انسان کی درسین آلا یاریم ، آز _
ذیکر ائده بیلرمی بیر آیه؟! سوُیله !

طیفیل ایکن اورجاح اولدوم درده من،
قَم ائوینه پنجره من ، در ده من،
هاردا گوُرسن "ایسمیخان" تک درد اَمَن _
دئ گینن دردینی بیر آیه سوُیله !

#ایسمیخان_دیدرگین

??? @ZElKH ???

.

بو اوغورسوز محببته ،
شیرین شکر دئییرم من!
درده باخ کی بو آجینی _
شکر کیمین یئییرم من!

آهی _ آلوو، کوُز عشقیمین،
همدمیدی سوز عشقیمین،
بیل سنین یوخ ،اوُز عشقیمین_
اوُنونده باش اَئییرم من!

"شوجاعتم" بختیم کوردو،
گوجوم چاتمیر چکم دردی،
عوُمروم شام تک اَرییه‌ردی _
نه یاخشی کی شاعیرم من!...

#شجاعت_كلبجرلی

??? @ZElKH ???