هلي وين. واحبابي 
يحضرون. بمصابي 
…………….
انه العقيله والزمن اذاني
من الطفوله للقبر بچاني
كدامي ذبح كل هلي وا خواني
ام الحزن لا عابَ من سماني

كلف حيل. يصوابي 
…………….

لاخر نفس والدمعه بين عيوني
مراني موتي وهمه ما مروني
بس العليل وغربه اليشيعوني
سته اخوتي مهضومه ما حضروني

يشعرون. بعتابي 

…………

اجنازه ابلا اب لا اخو ترضوها
بس الاجانب يا هلي يشيعوها
انه العقيله اللمحه ما لمحوها
وادم غرب حدر اللحد دفنوها

الزمن دار. يحبابي 

………….

درب السبي الحد هسه يتراوالي
زينب اسيره هايه اول تالي
حادي الضعن بسياطه مرمر حالي
گدامي رافع راس اخويه الغالي

الجفن سال بخضابي  

………….

زينب انه هيبه علي واولاده
رايه ابقى ارفرف عالزمن وعناده
بمرجانه ما افكر ولا بزياده
غير انه زينب وانه عمت الساده

يدنگون. لترابي 

…………..

عالتل متت لمن شفت ذباحه
گاعد على صدره ويذبحه براحه
موتي الصعب لمن سمعت صياحه
ومحد يغيثه ويصفگ اعله الراحه

ولا چان. بحسابي  

…………:

يابالفضل غطي النعش بالرايه
رش الگبر من جودك ومن مايه
بجيتك توافي الليله حگ اربايه
من المرض شوفك يخوي ادوايه

اتانيك. دك بابي 

#عباس_هابيل_الزينبي
#الليالي_الزينبيه

وين الهواشم وين الكفيل
ايقبلوها غربه نعشي تشيل
خل يحضروني ويشيعوني
لا يتركوني بارض الشام
............
حيرة الماعدها والي بالغرب يهلي چبيره
وانه مو بس مالي والي انه مهضومه واسيره
لا بنيني او لا اخوتي لا رفاگه او لا عشيره
محد اتشاهد عليه يا ابو فاضل والله حيره

ابغربه واريدن اهلي يجون
ايكفنوني ويشيعون
بكل لحضه حسره گلبي شيصبره
حيرني امره ضل محتام
...........
ياهو الشيعني باچر ونعشي بس غربه تحمله
والنعش مابي مهابه الما تشيعه ناسه واهله
النعش لو بعده صايح يخوتي ابتشييعه يحله
حچاية الما عدها والي بگلبي تنبت چنها نبله

محد يهابه تابوتي ليش
وانه بمهابه كل عمري اعيش
تشيّعني غربه ياخوتي صعبه
المتاذي گلبه شلون ايناام
...........
راح اموتن بس يخوتي لو يصيحون اعله نعشي
زينب اخوانچ اجولچ بيا هلا اتلگاكم امشي
انتو مو بس روحي انتم الزينب انتم صرتو كلشي
من سنه ونص وانه ابچي ودمعي ماعايفلي رمشي

روحي تردلي وجرحي يطيب
عافيته بهله دومه الغريب
انتم دنيتي انتم منيتي
اوعزي اوهويتي وامري الهام
...........
من سنه ونص ما شفتكم يا اخوتي ويا بنيني
روحي خلصت بس وحقكم ميته بس عايش حنيني
يالهواشم يهلي فزعه حرمه انه ومحد يجيني
غربه التْسبل چفوفي وغربه التغمضلي عيني

شيعو العقيله يهل الشيم
وسفه نعشها اتشيعا الخدم
يهل العقيله شيعو العقيله
ما من وسيله بهالايام
...........
من سنه ونص ذكرياتي بس چفوف وبس مناحر
شما اغمض يرجع الطف من سنه ونص كلشي عاشر
يرجع اگبالي كفيلي ابلا چفوفه بجوده حاير
ويرجع احسين ايتگطع اوصدره ينداس ابحوافر

ما فارگتني احداث الطفوف
مذبح اخوتي يوميه اشوف
ما اگدر اصبر كلساعه اذكر
چف خوّلي يسطر بالايتام
...........
براية العباس اريدن عالنعش تصبح غطايه
حته شام الشوم اعرفه احنه مو وادم سبايه
كون اخوتي اولدَ عمي وكل بني غالب ورايه
بجود ابوفاضل اريدن گبري كون يرشلي مايه

اتمنى يمي بموتي الحنين
ينزلني بيده الگبري الحسين
بحزني وسكوتي منتضره موتي
وجيت اخوتي بالاحلام
...........
عباس هابيل الزينبي
#الليالي_الزينبيه

اقره الفاتحه واعقدها لنيه
عد ام البنين الحاجه مگضيه
.................
من توگع بشده وماكو حل الها
للمايسوه بالك روحك اتذلها
انخه ام البنين المعضله اتحلها
تنطي بلا مقابل كلها حنيه
................

اقره الفاتحه واهديها للحره
اسهل منها ماكو تصبح الخطره
بس حلفها گلها ابداعت الزهره
وي ام البنين الحيره منسيه
................

حرز اسم الوفيه اتطمن احروفه
للذريه تنطي امراد موصوفه
سورة فاتحه الراچيته معروفه
خل يندبها كلمن ماله ذريه
................

الصعبه اعله الطبيب اعليها فد سهله
هاي ام البنين الدوه الكل عله
مرهم عالجروح الحره تتخله
سبحان الخلق هاي الكلابيه
................

مذخوره الوفيه الساعة العازه
كل خادم تحضره بيوم الجنازه
باچر عالسراط بيوم الموازه
باچر عالسراط الجيه حتميه
................

باب الحاجه صارت ساعة الشده
من تعكد الشيله ماتضل عگده
اليگصدها بدمعته ابفرحته اترده
همومك لونخيت احسبيه مجليه
................
#عباس_هابيل_الزينبي
#وفاة_ام_البنين

ياعلي ياعلي ماتت إمُنا فاطمه.
ياعلي ياعلي ماتت إمُنا فاطمه.
................

هاي اصعب صرخه تسمع يالولي
صعدت امن المسجد العرش العلي
صرخه من اطفال مهجتها اتغلي
محتواها ماتت امنا ياعلي

ياعلي ياعلي صرخه اهتزت الها السمه
...........

الحسن يركض اجه المنبر ابو
يناشغ ابدمعاته خلفه حسين اخو
امنه ماتت ياعلي يصيح اسمعو
كلشي يبرد حقه لو مات الدفو

ياعلي ياعلي امنه الحبيبه امخذمه
..............

بموت فاطم حيدره لمن سمع
هوه عالمنبر لچن گلبه وگع
ثگلن الخطوات بالگوه طلع
جبل حيدر بس عله الزهره انصدع

ياعلي ياعلي انهض يحماي الحمه

..............

ياعلي بويه كسر ضهري الزمن
لفني وي امي يبويه بفد چفن
ياهو مثلي بللحد دافن وطن
بلكي تكعد گلها عد راسچ حسن

ياعلي ياعلي فرگتها تذبح مؤلمه
...........

حسين يم جدم امه وَايقبل الجدم
يگلها بيت بلايه ام يكسر زلم
رد عله شيلتها بالشيله يشم
يفز كون اتمنه والصاير حلم

ياعلي ياعلي من هسه اشعر بالضمه
.............

يمه اكعدي الدار من بعدج ضلام
انه متعوده عله ايدج يلا انام
نار گلبي اعليچ چن نار الخيام
فرفحتلچ روحي چن جنح الحمام

ياعلي ياعلي دموع زينبكم دمه

#عباس_هابيل_الزينبي
#الليالي_الفاطميه1446

ما يغيرون الضمير اهل النفاق
احزام ضهر المذهب يضل العراق
.........

اقسم بدم الزچيه وبالضلع
العراق وصوتي عالي وينسمع
انه للمذهب اضل سيف ودرع

انه اهل البيت ضد اهل الشقاق
.............

خل بني صهيون تسمع مايلي
ابنَ ود لو رجع يرجعله علي
تصعد الغبره لچن من تنجلي

دمه فوك الكاع تلگونه يراق
...............

خل تدور الدنيه ويزيد الهضم
ماتخوفني تره بكسر العظم
مثل حيدر انه ما ارضه بضلم

دمي حار وحنه صار بكل زقاق
.............

لاتحاججني او حججكم واهيه
انتو مثل الدنيه دوله وفانيه
ماتخلص زلم كلها الضاحيه

زلم عدها الموت ما مثله مذاق
............

انه عندي اللسان مايهوه السكوت
انه عالحگ ما اسوم لو اموت
زلم عندي اسباع تتمنه تموت

زلم عندي الموت تعتبره سباق
............

العراق انه واضل فوك النجم
وي بني صهيون ما عندي سلم
يجي يوم بكيفي اطشرها والم

انه فارسها ويضل بيدي الوثاق
..............

انه ابو الفزعه العراق انه الكفو
احضاني للبردان تتحول دفو
لچن تصبح شوچ لو شافت عدو

مستعد دومي وفلا ذب النطاق

#عباس_هابيل_الزينبي
#الليالي_الفاطميه1446

بـ أرض طوس غابت الگمره
سلامات يا ضنى الزهره
...................

مرتين مات الموته بالغربه
كل نسمه تدخل ريته حربه
بكل نبضه يصرخ ياهلي گلبه
الما يمه اخوته موتته صعبه

بالوداع ينكسر ضهره
...............

بس الله يعرف حالته شلونه
الحد موته تنزل دمعة عيونه
بس الغرب راحو يدفنونه
چاوين اخوته ما يشيعونه

اويلاه محد ايحضره
..............

يا ارض طوس اتوشحي بحزنج
راح اللذي يشيل الخطر عنج
راح الحشا ما خيبه الضنچ
لـ الله بسمائه وصلي ونچ

الرضا مات وحسرته بصدره

...............

ابعث عزائي الموسى ابن جعفر
حزنانه كلها البالبحر والبر
چن دله گلبي وفرگته المجمر
حزنانه كلها البالبحر والبر

خسرناه بحسره وبعبره
.................

والسيده معصومه اعزيها
هليله ليل افراگ واليها
بفگد الرضا هاليوم اوسيها
ضلت بعد من ينشد اعليها

بلا اخوان كسرتچ كسره

#عباس_هابيل_الزينبي
#الليالي_الرضويه

سلاماً على الضعن الزينبي
سلاماً عدد خطوات السبي
...........
سلاماً عالجروح الكلش كبار
سلاماً عاليتامه الكلش زغار
سلاماً عالعبي المحترگه بالنار
سلاماً عالمشن فوك الرمل حار

حسافه يحدي بيه الناصبي
............
بعد عباس اخوها والمهابه
زينب بت علي اتنام بخرابه
تصيح حسين عذبني غيابه
كسر ضهري ابو اليمه بمصابه

تناديه وحشه دونك موكبي
............

سلام اعله العقيله كل رمح صاح
من روس الهواشم فوك الرماح
على الحره البقت تصفك على الراح
وتصيح شلون بيه وكافلي راح

قهرهم عطر دخان العبي
.............

من راس الرمح ويشوبح العين
يدور عن رقيه راس الحسين
الرمح صاير جسم بس ماله چفين
يهز نحر على اصراخ النساوين

بالدموع نگع الرمح الأبي
..........

بعد ذيج الهوادج هزل النوگ
وبعد ذيج المهابه تدخل السوگ
انشلع گلب العقيله من العروگ
گلبها ابخيمة العباس محروك

ينادون هذا ضعن الطالبي
.............

ضعنكم ياعلي تاه او تحير
لاعباس يحديّ لا ابو الاكبر
يمن سلمان حاضر يمته تحضر
تلم شمل السبايه بهيمة البر

اويلاه عذبو ال النبي
..............
عباس هابيل الزينبي

أيام الاميرة راحت ايامي
سبية وروس اخوتي تمشي گدامي
............

مامتعوده امشي بضلمة الليل
يحزام الضهر ماضل بعد حيل
عجاج تراب خويه وفزعت الخيل

وانه محيره وتتعثر اجدامي
..............
اخوي اويه الهوه بالريه ياناس
مثل النعمه دوم الاخو ينباس
فوك التاج تاج يصير عالراس

هيبه يشيل راسي ابمشيه كدامي
..............

الاخت من دون اخوها شلون ترتاح
تضل امحيره ومكسورة اجناح
عگب الراح تصفك راح عالراح

گلب الماله اخو متجرح ودامي
.............

بعد جفوف اخوتي صارت حبال
هاي الماتمر لاتخطر ابال
خويه تمرمرت بايتام واعيال

هاي الماتمرني حته باحلامي
..............
حيرانه ومنو اليرحمله حيران
اختكم حايره ومن دون وليان
وكت العازه خويه يريد خوان

لا حادي البقالي ولا بقه الحامي
..............

زينب عالهزل ماضني ترضون
انتم عالرماح وتبجي العيون
يخوتي ام عون ماضلل الها كل عون

نار البيه تشبه نارها اخيامي
..............
اهل الشام تكره سفرة الشام
شحال العبرته بحبال وايتام
عيوني امن الطبك ماتقبل اتنام

طاحت روحي لمن طاحن اعلامي
..............

جنت مدلله من چنتو وياي
وكت خلاني اصفك فوك يمناي
تعبنه عساهه ابذمته الماي

ياضامي الاسكته والضعن ضامي
..........

#عباس_هابيل_الزينبي

عمه سيفي انطيني
وحده ظل احسيني
……
الا من ناصر لمن شفته يصيح
خطوه اركضله وعشر خطوات اطيح
اسد واگف شفته لاچنه جريح
شلون ما اباوعله اشوفنه ذبيح

واگف امتانيني

…………..

ناوليني السيف صحت بعالي صوت
احنه مابينه العله اوساده يموت
فوتت العباس عالجيش ارد افوت
وبيهم اخطب والحرس كلهم سكوت

كربله تناديني
……………

الموت بالطف شيمه مو گطعت نفس
احنه ما نركب هزل نركب فرس
وحق ذاك الجسمه بسهام انترس
بذله ما ننطيها ايس يالحرس

رايد انصر ديني
……………

عمه اريد افزع مثل عمي الگمر
بس اضل بالخيمه اموت امن القهر
مثل ابو فاضل ارد من النهر
لو مثل جسام ارد دم بالنحر

مثله اضحي بعيني
……………..

مستعد ياعمه اتلگه النبل
ولا اشوفنج اسيره وعالهزل
خل اشدن شارب بشارب واحل
قبل ما تتگيد چفوفي بحبل

قبل لا يسبيني
…………….

ارد اوصيجن سكينه ويارب
انتن بغابه واسد هالغابه غاب
من تطيح ازلامچن فوگ التراب
اتحجبن بخضاب لو طاح الحجاب

هالأمر ياذيني
……………
عباس هابيل الزينبي

قد حان وقت الاربعين.
وجهت قلبي للحُسين
...........
ابْرزنامة الحبُ الحُسينيه
حانتْ زياره الاربعينيه
هاي الشعيره الكربلائيه
انخلقت لجلها احشود شيعيه

ما ننسى دربك يالحنين
.............
هذا الوقت كل عام انتضره
من البحر اتوجه النحره
الخطوه الاولى تبدي بالبصره
وماتنتهي اله بطوفة الحضره

خادم اضل طول السنين
..............
يبقى العراق بكل زمن غايه
من كل بلد تگصدله مشايه
هذا الوطن منبع الوفايه
يحب الحُسين ورافع الرايه

بيه الوطن سالم إمين
..............
قصة عشگ كل عام تتكرر
بين اليزور وبين ابو الاكبر
الملتقى يم مذبح المنحر
عالفرگه يا مولاي ما اگدر

عاشگ لحد قطع الوتين
..............

شلي ابجدم مشايه ماتطلع
انْشلت عساهه وكون تتگطع
ايصيح الحُسين شلون ما افزع
لو ما اكض شباچه ما ارجع

يحسبني من الزائرين
.............

هذا المشي طول الزمن دائم
منا لحد ما يضهر القائم
بهذا الدرب من الزغر هايم
بكل خطوه اواسي زينب وفاطم

متمسك ابحبله المتين

#عباس_هابيل_الزينبي
#المشايه