Yer mahzuna... Yer rangi siniq...
Havoda ham rutubat, tuman...
Har nigohda o‘ksish, xo‘rsiniq...
Har lahzaning zahri – yosuman...

Sharqiroq suv – zanjirband, xalqob...
Ariqlarning yo‘q qo‘ng‘irog‘i...
Iltifotlar bo‘lgan kabi sob,
Tabiatning bisyor firog‘i...

O‘t-o‘lanlar – suprindi, chirik...
Butkul g‘oyib kechagi farah...
Xarobalik ishg‘oli yirik...
Mung‘ayadi ship-shiydam daraxt...

Yer istardi: ko‘rinsa shirin,
Tuysa umr zarifligini…
… Uchqunlagan oppoq qor, yerning
Berkita qol g‘aribligini…

1999 yil.

@Gulchehra Nurullaeva
Instagram
YouTube
Facebook

(«Siz… Sen… U…» turkumidan)

Ko‘rmoqdamiz, qahraton qish, nayranglaringni,
Hammadan ham navbahorga qayrayapsan tish.
Boisi: u oq qordagi oy ranglaringni
Eritdi-yu, ko‘zga botdi shumshuk ko‘rinish...

Derazaga chizgan bezak-suratlaring ham
Bo‘g‘otdagi shokilalar bo‘lmadi san'at...
Duv to‘kildi, quyosh yuzin ocharkan ko‘klam...
Erib bitdi, oqib bo‘ldi, nuradi tal'at...

Bizga quchoq ochar ekan bahor-guloyim,
Ko‘k libosda ko‘rarkanmiz ona maskanni,
O, sen qattol, sokingina tortib muloyim,
Yamlab qo‘yding bir kechada ungan-o‘sganni...

Ne ham derdik, yuguraver go‘shalar osha,
Omad kulib, davring kelib qolmish harqalay...
Bu ham bizga bitta saboq, bitta tamosha...
Ko‘zasidan chiqqan jinni ko‘rganmiz talay…

1999 yil.

@Gulchehra Nurullaeva
Instagram
YouTube
Facebook

(«Сиз… Сен… У…» туркумидан)

Кўрмоқдамиз, қаҳратон қиш, найрангларингни,
Ҳаммадан ҳам навбаҳорга қайраяпсан тиш.
Боиси: у оқ қордаги ой рангларингни
Эритди-ю, кўзга ботди шумшук кўриниш...

Деразага чизган безак-суратларинг ҳам
Бўғотдаги шокилалар бўлмади санъат...
Дув тўкилди, қуёш юзин очаркан кўклам...
Эриб битди, оқиб бўлди, нуради талъат...

Бизга қучоқ очар экан баҳор-гулойим,
Кўк либосда кўрарканмиз она масканни,
О, сен қаттол, сокингина тортиб мулойим,
Ямлаб қўйдинг бир кечада унган-ўсганни...

Не ҳам дердик, югуравер гўшалар оша,
Омад кулиб, давринг келиб қолмиш ҳарқалай...
Бу ҳам бизга битта сабоқ, битта тамоша...
Кўзасидан чиққан жинни кўрганмиз талай…

1999 йил.

@Gulchehra Nurullaeva
Instagram
YouTube
Facebook

Фақат тушда жайрон кўрсанг, майлига,
Хилватларда хайрон юрсанг, майлига,
Аҳволингдан нодўст хурсанд, майлига,
Лекин ўзни ёлғонларга берма, дил.

Шохмассанки, буташлардан пастлашиб,
Кетаверсанг ҳар иқлимга мослашиб...
Юролмас бўл алдов ила дўстлашиб...
Чақноқ кўзни армонларга берма, дил.

Сендайларга таъқибларнинг дасти бор...
Чидаш бергил, назарларнинг пасти бор...
Нолимагил, кенг осмоннинг ости бор...
Эркин сўзни унвонларга берма, дил.

Берар бўлсанг, юрагингни оққа бер,
Эндигина таниганинг Ҳаққа бер,
Едирар-у ўзи емас халққа бер,
Лекин ўзни ёлғонларга берма, дил,
Унвонларга, армонларга берма, дил.

1996 йил.

@Gulchehra Nurullaeva
Instagram
YouTube
Facebook

Нима бўпти, шеърга чўзиб даст,
Кутмас бўлсам эҳтиромини...
Мария* ҳам шоир бўлибмас,
Қалпоқ тўқиб, топган нонини...

Нима бўпти, иқболим матни
Умрим бўйи турмаса яхлит...
Гоҳ яшасам, танлаб хилватни,
Хонанишин Аннага** тақлид...

Нима бўпти, боғласа минг ип,
Чирмаб олса само висоли...
Мен яшасам, эркимни севиб,
Севгипараст Сапфо*** мисоли...

Балки дерсиз: «Яратган шоҳид,
Йўлолмассан уларга сира...»
Нима бўпти, қолипларга зид,
Мен яшасам, бўлиб Гулчеҳра...

1996 йил.

Мария Цветаева – рус шоираси
Анна Ахматова – рус шоираси
**Сапфо – қадимий юнон шоираси

@Gulchehra Nurullaeva
Instagram
YouTube
Facebook

(«Сиз... Сен... У...» туркумидан)

Сизга хуш келардим, эшитмасданоқ
Сўзларингиз билсам энг олий фармон...
Кўнглимда не шаҳар, не овул, не боғ,
Хоҳиш-майлингизга тутқизсам ҳар он...

Сизга хуш келардим, юрсам мабодо
Елдан ҳам беовоз, майсадан ҳам паст...
Мадҳга ўч райингиз бўлиб муддао,
Саркаш кимсаларга тикласам қафас...

Сизга хуш келардим, алмаштирсам гар
Чаққон елпатакка ҳайронангизни...
Бадбўй кўчангизни билсам муаттар,
Қаср деб кўрсатсам вайронангизни...

Шунда бўлар эди йўлларим текис,
Фароғат – харидор, омадлар – жазман...
... Эвоҳки, эвоҳки, эвоҳ, билсангиз,
Сизга хуш келишга муҳтож эмасман...

1996 йил.

@Gulchehra Nurullaeva
Instagram
YouTube
Facebook

ФОЛ

(“Сиз... Сен... У...” туркумидан)

Ёғдулари тилло-ю кумуш
Кечангизнинг, кундузингизнинг...
Беталофат буржларда, демиш
Мунажжимлар юлдузингизни, –
Тун ичидан шодмон чиқасиз...

Омадлисиз... Чўлда сардоба
Сизни чорлаб, чиқмагай сароб...
Яшаркансиз тутиб зардоблар,
Тегрангизда қурбонлар сероб, –
Хун ичидан сарбон чиқасиз...

Тасир-тусир... Қий-чув... Оҳ-воҳлар...
Ҳаёт – банди илинган япроқ...
Изғир ёлғон, изғир гуноҳлар...
Не-не қилмиш гувоҳи – тупроқ... –
Дом ичидан ҳоқон чиқасиз...

Буюкликка соҳиблар сероб...
«Маним», – дейсиз бундай толени...
Адолатнинг кўзига қараб
Айтар бўлсам сезгим фолини,
Шон ичидан бешон чиқасиз...

Қурбон чиқасиз...

1992 йил.

@Gulchehra Nurullaeva
Instagram
YouTube
Facebook

СУҲБАТ

– Азоб ичдинг ютум-ютум,
Тўкилгани бағрингда.
Куйламайсан... Созинг бутун,
Умринг кечар яримта...
Чирқираган «оҳ»ларинг мўл,
Куйлайверсанг бўларди...

- Ўқ отмаса соз чертар қўл,
Ёлғон қандоқ ўларди...
- Букун эса тўй-тўйлайди
Масрур-масрур қўшиқлар,
Пана излаб кураш пайти,
Энди жасур қўшиқлар...

– Жилмаямиз истеҳзоли,
Сўз айтмоқни ор, деймиз.
Умрни бут айлар толе
Бизларга ҳам бор, деймиз.
Нечоғ хуштаъм, нечоғ хушбахт,
Ойдан, кундан ёруғ у.
Кўкармоққа кутар фурсат,
Тупроқдаги уруғ у...

1992 йил.

@Gulchehra Nurullaeva
Instagram
YouTube
Facebook