Gedib mamana demə
Səs:Məmiş xan
@Axaaq

دوداق دیمز

چوخدور سنین نازینا حئیران
نازینی آز ائیله آ جئیران
او قدر یوخ دئدین قاچدین
اوره‌یی سن ائیله‌دین قان

عشقینله هر گونو یاشاییر
ایچینده آغرینی داشیر
هر گئجه خاطیره یاشاییر
سنه عاشیق اولان اینسان

تک سندن خاطیره قالدی
خاطیره‌ن ایاقدان سالدی
گؤزو کوردو، دیلی لال‌دی
سنه عاشیق اولان اینسان

گؤزو یولدا، اوره‌یی قان
آختاریر هر لحظه، هر آن
عشقیندن اؤله‌جکدیر اینان
سنه عاشیق اولان اینسان

مرتضی آیرملو
@Axaaq

جمعه بازار

چيخ قاتار يولونا، باهار گلنده
من سنه چيچكلی باهار گؤنده‌ريم
ويصال مئيوه‌سيندن دادا بيلمه‌ديک!
سنه هر مئيوه‌دن، نوبار گؤنده‌ريم

چيخ قاتار يولونا، پاييز گلنده
اوچان دورنالاردان سالام گؤنده‌ريم
چيخ قاتار يولونا، قاش قارالاندا
او غريب آخشامی، غمی بيتيريم!

چيخ قاتار يولونا، كولک اسنده
داغيلان ساچينی دارایيم سنين
چيخ قاتار يولونا، هر گون هر زامان
بيليم كی من هاردا، آرایيم سنی

بابا وزیر اوغلو
بو گون شاعیرین دوغوم گونودور. بو عزیز گونو قوتلایاراق بابا معلیمه جان ساغلیقی و اوزون عؤمور آرزولاییریق.
@Adabiyyatsevanlar
@Axaaq

گر‌ک ائله بیر زامان گلسین کی دونیانین بوتون نعمت‌لری بوتون اینسانلار آراسیندا برابر بؤلونسون.

بابک خرمدین
@Axaaq

بو تیکان چیچه‌یین بیری

تنهالیق تیکانسا منه
بو تیکان چیچه‌یین بیری
اؤزوم دور گل اؤز قوجوما
آغلاما گؤیچه‌یین بیری

نفرت مولکو منده هامار
گؤز ایشله‌دیکجه یئری وار
یئدیرتدیییم سیغال، تومار
یئدیییم کؤته‌یین بیری

ساده‌لییه باخ بوندا سن
احوالینا یانیرام من
حره‌میندی مقصده‌جن
اوره‌ییم ائششه‌یین بیری

ابوالفضل محمدزاده
بوراخمیشام بوداغی کیتابیندان
@Axaaq

گَزه‌گَن‌لرین آدی آنا دیلیمیزده:

منظومه شمسی:گونش دؤنگه‌سی
سیاره:گَزه‌گَن
عطارد:اَردن آی
ناهید:چولپان
زمین:یئر
مریخ:قیزیلدیز
مشتری:اَران‌دیز
زحل:سَکَن‌دیز
اورانوس:آلتای خان
نپتون:تالار خان
خورشید:گونش
@Axaaq

قوهوما کج باخیب دوستو اونوتماق
دوشمنین قدرینی بیلمک دئمکدی
نامردی اوجالدیب گؤیلرده توتماق
مردی تاریخلردن سیلمک دئمکدی

یالاندان باریشماق،یالاندان کوسمک
باشسیز کولک کیمین هر یئره اسمک
نانجیب آداملا دوز چؤرک کسمک
یاشایا-یاشایا اؤلمک دئمکدی

آی"علی"دست توتوپ سَس-صَدا سالماق
ائل لرین قلبینده قالماق اوجالماق
تمیز آد قازانیب رحمتی آلماق
یئنیدن دونیایه گلمک دئمکدی

علی صفر اوغلو
@Axaaq

اوره‌ییم
قار دولوسو
قیش ایسته‌ییر
قاردان آدام
قار تک آدام ایسته‌ییر
دولو دولو اوره‌ییم
نه یامان یاغماق ایسته‌ییر

فریبا مرتضایی
@Axaaq

هئی نسیمی بابا!
اوشویورم،
دونیا سویوقدور
چک اوستومه دَرینی!

محمدرضا لوایی
@Axaaq

چاپا چاپا آتین عؤمور

ایشیق گؤردوب ایپ-ایشیقدا
چاشدیق بیر آن بیز ایشیق دا
بو پرستیژ، یاراشیقدا
گؤرمه‌میشدیک بوتون عؤمور

سؤز وار چیخار باشدان توستو
آچیلمیشدی سیررین اوستو
سیقارئتله دوداق سوسدو
توستوله‌دی توتون عؤمور

شیرینلیگی سوزه-سوزه
غلیظ‌لیگی چیخدی اوزه
قیسیرلاندی "سئوگی" بیزه
اممه‌دی هئچ سوتون عؤمور

بو دونیانین ایلکین، سونون
جاندان جانین، دوندان دونون
شو یاپسا دا بیزه اونون
گؤسترمیشدی لوتون عؤمور

قنناسلیغین، کورنازلیغین
اینسان درین-دایازلیغین
گؤروب دونیا غمبازلیغین
دیده‌له‌دی اَتین عؤمور

حکیمه باباکشی زاده-نغمه
@Axaaq