السلام على زينب الكبرى (ع)
________

شلون اغمض اعيوني حيره
ما وصل بدر العشيره
وينه عباس  ..  وينه عباس

@@@@@@@@@@@@@@@@@

خـل يشــد اعنـان مهـره يعتـنيـنـي
خل يجيب وياه چف يسدلي عيني
لخاطري لوعندي خاطر خل يجيني
هــوه الاتمنــاه يـرجــع مـو بنيـنـي
هايـه انفاسي الاخيره
ما وصل بدر العشيره
وينه عباس  ...  وينه عباس

@@@@@@@@@@@@@@@@

لو يزيح اتراب صدره بهل مسيـه
يوگف اگبالي واشوفه يصد عليه
راح احلفه بروح اخونه وبالحميه
يم الحسيـن انـدفـن بـالغـاضـريه
اكبر احلامي الزغيره
ما وصل بـدر العشيره
وينه عباس  ...  وينه عباس

@@@@@@@@@@@@@@@@

وينه ما بين بقالي بعمري لحضات
ارد اسئله بالله يرضه بگاع شمات
عيني تغفه والأماكن بيهه لجمات
هنانه دمعه هناك طفله ونار اهات
طفله ماتت مو چبيره
ما وصل بدر العشيره
وينه عباس  ...  وينه عباس

@@@@@@@@@@@@@@@@

خاف مـا يندل مكاني بديـره الشـام
دهري دولبني رجعـت بدون الايتـام
عيـن حمره متون زرگه و نار الخيام
لسه احس بجسمي تاكل والله مانام
راح اموت وهم اسيره
ما وصل بـدر العشيره
وينه عباس  ...  وينه عباس

@@@@@@@@@@@@@@@@

ادري ما معقوله يرجع و شيـرجعـه
راسه مگطوع وسهم عينه شيطلعه
بس دليلـي يـا خلايـق واش يقنعـه
يگلـي ميعوفـچ يزينب عنده فزعه
القلب صوته وضميره
ما وصل بـدر العشيره
وينه عباس  ...  وينه عباس

@@@@@@@@@@@@@@@@

حيدر العمار الخزعلي
.

قصيدة ( ياموت وينك فرفحت)
يوم ام البنين ع

لسان حال ام البنين ع

••••••••••••••••••••••••••••••

ياموت وينك فَرفَحت 
يـاريت وَياهـم رحـت
مَليت من عُمري صِحت  ....  ياموت وينك فَرفَحت

**

عـافوني نخله ابـلا سعـف مـا بيه جُمـار
چن ريشه وسط العاصفه بيه الوكت دار
ماعـندي ضحكه ولا فـرح و محَمله بنـار
و دياري ضلمه چـن كهـف داري گبر صار
ضليت عود بنص فله
و الماي صارت كربله
مليت من عمري صحت  ....  ياموت وينك فَرفَحت

**

وينـه اليگـلي لو چـذب باجر يَرجعـون
جَبلني ريته من مِشه وغمضلي العيون
ما سَبل ايدي لارضه امشي مع ام عون
حيرني الحسين وحرت اوصلهم شلون
ضليت ميته بلا دفن
للعين ما غمض جفن
مليت من عمري صحت  ....  ياموت وينك فَرفَحت

**

امنيتي ضلت نلتقي من الضعن سـار
آخِذ رُقيه بالحضن واحضنهه الصغار
واگعد اناغي للـطفل و اقـرالـه اشعار
عبدالله يشبه حيدره بس عوزه فقار
بـدگات گلبي انلچم
ياريت غيبتهم حلم
مليت من عمري صحت  ....  ياموت وينك فَرفَحت

**

من أيست من الضعن گُمت اندب الموت
يا مـوتي گتله مروتك و ابچي بلا صوت
اتمـنه كــون بِشيـمتك تهـديلـي تـابــوت
انقلي روحـي لكربله خل امشي بَسكوت
حاچيته گتله مُـروتك
ألحگلي بلكت فَزعتك
مليت من عمري صحت  ....  ياموت وينك فَرفَحت

**

يـَ  م الحُسـين بكـربلـه تتــلاگــه الارواح
ياريت روحي تفترك عن جسمي و ارتاح
وارجع واشوفنهم صدگ وهمومي تنزاح
مــا راح اعـاتبهم تـره ليش الضعــن راح
ياريت يلتــم الشمـل
ويعود الاكبر والطفل
مليت من عمري صحت  ....  ياموت وينك فرفَحت

**

حيدر العمار الخزعلي
.

جديد
قصيدة ( فدوه ننخاك )
شهادة الصديقه الزهراء (ع)

________

بيامكان ويا زمن
عاقد لأم الحسن
مأتم بعصر الفتن
فدوه ننخاك ... فدوه ننخاك

:::::::::::::::::::::::::::::::::::::::::::::::::::

بيامكان الزهره عاقد مجلس الهه
يالحزين الباقي وحدك من اهلهه
يمته نحضر كلنه يمك من اجلهه
ونلطم بهـاي المصيبه الما مثلهه

نترس المجلس دمع
ننحب لأجل الضلع
ننعه وانته تستمع
نلطم اوياك ... فدوه ننخاك

:::::::::::::::::::::::::::::::::::::::::::::::::::

بالمدينه يَّـم ابوهه لـو قبرهـه
حاضر انته هالمسيه ياذخرهـه
والله شـده لا زچيه ولا أثـرهه
يمته تضهر تجبر بأيدك كسرهه

أخضر لهسه الكسر
ننتظر ليل و فجر
تعلن وتبني القبـر
يعله بحماك .. فدوه ننخاك

:::::::::::::::::::::::::::::::::::::::::::::::::::

يـَّم علينه يابـو صالـح يا مـدد
مجلس امك لوقُرب نحر الولد
الله يدري انته هسه بيـا بلـد
بالخـرايب لـو بعد مِبعـد بَعد

وحده يدري بياكتر
گاعد ودمعك جمر
واحنه بحبال الصبر
يمته نلگـاك .. فدوه ننخاك

:::::::::::::::::::::::::::::::::::::::::::::::::::

ضني يم المات ابوهه آبنينوى
وهيه عاميهه الرماد البلـ هوه
بغربه خوله لسه تنطر بس لوه
تستجير اصيح بأسمك ياضوه
ضلمه والديره بخطر
ياابن فارس مُضـر
هايه خيبر و الخبر
عمتك اهناك ... فدوه ننخاك

:::::::::::::::::::::::::::::::::::::::::::::::::::

الخيام اردود وجت من جديد
بعلبك ارض وسمه نار وحديد
الاسيره اصيح وينك من بعيد
الطفل دم ابثيابـه مـن الوريد

اليهود بكل شبـر
سوو اشسوه شمر
بالسلاح وبالغدر
شاخت اعداك ... فدوه ننخاك

:::::::::::::::::::::::::::::::::::::::::::::::::::
حيدر العمار الخزعلي
.

شهادة الرسول الكريم
النبي محمد (ص)

قصيدة ( نادت فاطمة )

---------------------------------------------------

بچـه حيدر علي ويه الزچيـه

على نعش النبي بهاي المسيه

ونادت فاطمة بآآه .. ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

حگچ تنوحين المسه حگچ تلطمين

الموسد ابنعشه نبي معذوره تبچين

موعجبه يا فاطم ابد فوگه تموتين

تنشغلچ اقطاب السمه لمن تنشغين

بچت ارض وسمه بهاي الرزيـه

علـى نعـش النبي بهـاي المسيه

ونادت فاطمة بآآه

ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عُگبه ينتظرچ عجب و الدنيه تنـدار

يا كوثر الله ورحمته ما عدكم أنصار

باچـر يسلبـوكم عَلـن وابعتبـة الـدار

يوگع جنينچ والضلع ايصوبـه بسمار

علي يبقه ابحزن بعد الوصيه

على نعش النبي بهاي المسيه

ونادت فاطمة بآآه

ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اتلث ليالي ابلادفـن يالزهره طاهه

وابنـچ يضـل ابكـربله مثله وراهـه

يبقه ذبيح ومنسلب ضامي بلضاهه

وزينب يفاطم علهزل تنصب عزاهه

على جسمه تصد هيـه وسبيه

على نعـش النبي بهاي المسيه

ونادت فاطمة بآآه

ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ابشكله مسموم الحسن باچر يزهـره

وحده يضل بحجرته ورسومه صفره

لـتسمـه يا فاطم مَـره و القصـه مُـره

و التبچي گـدامـچ غـداً نبلـه تشمـره

هـايـه أم الجمـل و أم الأذيـه

على نعش النبي بهاي المسيه

ونادت فاطمة بآآه

ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اصحابه ماعدهم شرف اهل السقيفه

سـاعـة مراسيـم الدفـن خلـو خليفـه

للشـورى گـالـو نحتكم حيـدر نعيفـه

واگلوبهم تنگـط حقـد لامـو نظيفـه

بايعت حَبتر غَصب عافت وليه

على نعـش النبي بهـاي المسيه

ونادت فاطمة بآآه

ويلاه آ ويلاه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
حيدر العمار الخزعلي
.

قصيدة. (محفوظه صورهم )

-------------------------------------------

خـدامـه ايعـرفهـم .. يتعنـه لگبـرهـم
عنده كلش اعزاز .. محفوظه صورهم

===============================

الخدام كلهه امسجله عنده الاسامي

و الصور مـن تنعـرض ينظــر إمامـي

حسين بعيونه الخدم واسمـع كلامي

گـلـه أنتـه سيـدي و اهلـي وعمـامي

لتخاف المنيه .. مذبوح الزچيه
يمشي بيك جناز ..
عنده كلش اعزاز .. محفوظه صورهم

===============================

العاش بعيونه دمع لتضن يتـركـه

ولا تضن حته الگـبـر بـاجـر يضكه

حسين واگف للخدم ياهو اليحركه

والـي ما عنـده سَند گلــي شيفـكه

يحتار ابسؤاله .. لو منكر اجالـه
منه نظره يعتاز ..
عنده كلش اعزاز .. محفوظه صورهم

===============================

احنه من نبچي اله شنهو دمعنه

والله مولانـه تـره كـاسـر ضلعنه

فدوه نغديله و نـذر فدوه تعبنه

احنه من غيره عدم وبيه اقتنعه

ابخيره اكتفينه .. وبأوسع سفينه
باچر كلشي نجتاز ..
عنده كلش اعزاز .. محفوظه صورهم

===============================

الچانو اويانه أمس واضح دربهم

وندعـي الله للمضـو يقبـل عملهم

وين الحسين ومصابه هـم مثلهم

تخلص ايام الحيـاة ابحق بختهم

مابين المجالس .. ابسود الملابس
هذه اكبر انجاز ..
عنده كلش اعزاز .. محفوظه صورهم

===============================

الـرزق ام الحسـن تـرضـه عليـنـه

واحنـه لـزهره نـواسي لـو بچينـه

عدنه عشرين بصفر واجب مشينه

والطبـخ صـاير رسـم لامـو بدينـه

وضلوع الزچيه .. الخدمه الهويـه
واحنه بيهه نمتاز ..
عنده كلش اعزاز .. محفوظه صورهم

===============================
حيدر العمار الخزعلي
.

السلام عليكم ورحمة الله وبركاته
اخوتي خدام الحسين وفقكم الله جميعاً

كل من قرء قصيده من هذه القناة
تفضلكم بأرسالها عبر الرابط الخاص بنا
ليتم نشرها في منصات التواصل الاجتماعي لننال الأجر والثواب معاً ...

@HaeiderALkhazaily

حيدرالعمارالخزعلي
.

دعم مؤسسة منبريون الحسينية
#افضل قناة للنعي
https://t.me/+P0VV4bLqtzuKdcQS
#للاشتراك بالدعم @ahmed_alziwar0

اجمل قصائد محرم للعشرة الثانية وبعبارة جميلة جدا تجدونها هنا
https://t.me/alitajali

نعي
للسيده رقيه (ع)

ــــــــــــــــــــــــــــــــــــــــــــــــــــــــــــــــــــــ

يا صغر عُمـرچ رقيه و خلصـت ايامـچ
و لهسـه الخيـم چـن مشتعلـه جدامـچ
من الضرب ويلاه امرضرضه اعضامچ
والگلب مصيوب يااصغر سبيه

ماتت اعله الراس و الدمعه بجفنهـه
مجتوفه بخشن لحبال ومورم متنهه
بالخرابه علي السجـاد يا وادم دفنهه
والثياب السود اكفان لرقيه

ماتت ابحسرة أبو و الشوغه كتلتهه
وكت الغسل ياناس خافت الغسلتهه
ليش الجسم مطعون تسئل ابعمتهه
خوفي لامرض يندار بيه

هاي السياط اصيح زينب ورمنهه
كملي الغسل بهداي لتخافين منهه
مابيهه مرض لاداي و المثل سنهه
بحضن الأبو موش المنيه

ــــــــــــــــــــــــــــــــــــ
حيدر العمار الخزعلي
.

قصيدة ( بعد طف المنيه)

ــــــــــــــــــــــــــــــــــــــــــــــــــــــــــــــــــــــ

بعد طف المنيه  ..  مشت زينب سبيه
بدت رحلة حزنهه .. وتصد عالغاضريه

•-•-•-•-•-•-•-•-•-•-•-•-•-•-•-•-•-•-•

ارد اسـولفـلك عليهـــه خلـي بـالك واستمـع
من وگع كافل ضعنهه وانسحگ اشرف ضلع
رگضـت الـوادم عليهه وبـس حوافر تنسمـع
عجت الحومه و تشاهد يقترب منهه الجمع

اجت خيل ال اميه  ...  على زينب سويه
وحيده ابلا گمرهه  ..  وتصد عالغاضريه

•-•-•-•-•-•-•-•-•-•-•-•-•-•-•-•-•-•-•

حارت ابين العساكر و الخيم طاحن سوه
سلبو كلشـي ابثوانـي و الجمر ويـه الهـوه
طاير و ينـزل تشوفـه وچـن جهنـم نينـوه
من بعد طيحت گمرهه ماكو چاره ولادوه

العده دارت عليهه  ...  بعد طيحة وليهه
انكسر زينب ظهرهه  ..  وتصد عالغاضريه

•-•-•-•-•-•-•-•-•-•-•-•-•-•-•-•-•-•-•

شردت ايتام الهواشم چم فرس بيهم عثر
و زينـب ادور يـوادم عـن دَليـل وعـن اثـر
ساعه تصرخ ياسكينه ساعه تصرخ ياگمر
تيهـت خويـه رقيـه والحـرم كلهه ابخطـر

شكبر هاي الرزيه  ..  بنت خير البريه
جمر يلهب صدرهه  ..  وتصد عالغاضريه

•-•-•-•-•-•-•-•-•-•-•-•-•-•-•-•-•-•-•

من بعد هـاي المصيبـه زينب بظهـر الهـزل
تلتفـت صوب الشـريعـه ترفـع الايـد بحبل
تكله شاهد يابوفاضل هاذه حالي شحتمل
هـايـه چفيـن الاميـره مقيـده بأمـر النـذل

بحبل چفين اديه  ..  شگلت يابو الحميه
خلص زينب صبرهه  ..  وتصد عالغاضريه

•-•-•-•-•-•-•-•-•-•-•-•-•-•-•-•-•-•-•

العـذاب المـر عليهـــه لاتضـن شــالـه گلـب
تكتــم الونـه وتكــابـر تنشتــم لـو تنضـرب
ورمـن حتـه اديهــه تشگـــف ابيـن الغـرب
والقصور اعليهه دخلت بلسياط وبالغصب

لقصر ابن الدعيه  ..  اجت بنت الزچيه
ولا واحد حضرهه  ..  وتصد عالغاضريه

•-•-•-•-•-•-•-•-•-•-•-•-•-•-•-•-•-•-•
   ( حيدر العمار الخزعلي  )
.