یوللا اؤزگه دیلده اؤتن‌لره...

Instagram & telegram
@ana_dilim_az

یازی - پوْزو یانلیش‌لاری (۸)

آنا دیلیمیزده عرب الیفباسی دئییلن الیفبایلا یازی‌لار یازارکن بیر سیرا یانلیش‌لیق‌لارلا قارشی‌لاشیریق
اوْنلاردان بیری؛ سؤزلریمیزی جمع باغلاماق اۆچۆن اوْنلارا (لر، لار) اکلرینی آرتیردیغیمیزدا یازیلیشی همن سؤزلره بنزه‌ین آنجاق آنلامی فرقلی اوْلان سؤزلرله دییشیک دۆشمکلری‌دیر.
بیلدییینیز کیمی دیلیمیزده؛  بلیرسیز(مجهول) ائیلم‌لر(فئعل‌لر)، سؤزلره چئشیدلی اک‌لرین آرتیرماسی‌لا یارانارلار.
بیر سیرا فئعل‌لره ایل/il,ıl اکی آرتیرماقلا، بلیرسیز فئعل‌لر یاراتماق اوْلار
ایندی بو فئعل‌لر غئیری قطعی گله‌جک چاغدا، بئله یازیلارلار
اؤرنک اۆچۆن؛
یاز + یل ؛ یازیل
یازیلارام، یازیلارسان، یازیلار
یازیلاریق، یازیلارسیز، یازیلارلار

ایندی همن یازیلار (نوشته خواهد شد) فئعلی‌ایله یازی‌لار (نوشته‌ها) سؤزۆنۆ، یازارکن نئجه یازمالی‌ییق؟
گؤرۆندۆیۆ کیمی هر ایکی سؤزۆن یازیلیشی بیر- بیرینه بنزه‌ییر
اوْ اۆزدن بئله سؤزلرده فئعل‌لره آرتیریلان لر،لار اک‌لرینی یاپیشیق و آدلاردا آرالی یازاریق.

یازیلار (نوشته خواهد شد)
یازی‌لار (نوشته‌ها)

قاپیلار ( توسط سگها گاز گرفته میشود، در هوا قاپیده میشود )
قاپی‌لار (درها)

آییلار (بیدار میشود)
آیی‌لار (خرسها)

یاریلار (نصف میشود)
یاری‌لار (نصفه‌ها)

دریلر (چیده میشود)
دری‌لر (پوستها)

سۆرۆلر (شخم زده میشود، رانده میشود/خواهد شد)
سۆرۆ لر ( دسته‌ها و گله‌ها)

بونلاردان قیراق بیر سیرا یئرلرده سؤزلری قیسالداندا، یانیلمالار اۆز وئره بیلر
اؤرنک اۆچۆن ایله/ایلا اک‌لرینی له/لا یازماق،
بیلدییینیز کیمی ایله/ایلا اک‌لرینی له/لا کیمی ده یازماق اوْلار، آنجاق یازیلیشی بیر اوْلوب آنلام باخیمیندان فرقلی اوْلان سؤزلرده ایله/ایلا اک‌لری‌ایله یازماق داها دوْغرو اوْلا بیلر
گؤزله؛ منتظر باش/مواظب باش
گؤزله(باچشم) سؤزۆنده له اکی یئرینه، ایله اکی‌ایله یازیلسا داها دوْغرو اوْلار؛ گؤزله ------» گؤزایله
{گؤزلرین گؤزلریمه گؤزله‌ییرم گؤزله دئدی
سئوگی‌سین محبتین سؤز له دییل گؤز له دئدی}

یا بویوروق(امری) فئعل‌لرده لا/له اک‌لری یاپیشیق و ایله/ایلا اک‌لری آیری یازیلمالی‌دیر.

آیاقلا (لگد مال کن)
آیاق‌لا /آیاق‌ایلا(با پا) [بوجور یئرلرده آیری یازا بیلسک ائله لا/له ایله یازماق اوْلار].

یئلله (باد بزن)
یئل‌له /یئل‌ایله( همراه با باد )
{بیر اوچایدیم بو چیرپینان یئل‌ایله
باغلاشایدیم داغدان آشان سئل‌ایله
(اوستاد شهرییار)}

داشلا (سنگ‌باران کن)
داش‌لا (با سنگ)

اوْخلا (تیرباران کن)
اوْخ‌لا (با تیر)

لا/له اک‌لری‌ایله یارانمیش اوْلان دۆزلتمه ائتکیلی(اؤتۆملۆ، متعددی) ائیلم‌لر، غئیری قطعی گله‌جک چاغیندا یازیلارکن، همن یازیلیش‌لاری اوْلان جمع باغلانمیش اوْلان آدلارلا دییشیک یازیلمالی.
داغلار (داغ می‌زند)
{اوْخودوغون ماهنی اۆره‌ییمین باشین داغلار
سایاچی هر ایل سۆرۆنۆن یئنی قوزولارینی دامغالارلا داغلار}
داغ‌لار (کوهها)
{ آ داغ‌لار آ داغ‌لار سنده نه‌لر وار}

باغلار (می‌بندد، وابسته میکند)
{ ووردوغون دیل یارالاری اۆرگیمده یارا باغلار
وطن سئوگیسی اینسانی یاشادیغی توْرپاغا باغلار}
باغ‌لار (باغها)

یوْللار (می‌فرستد)
یوْل‌لار (راهها)

گؤزلر (منتظر میماند)
گؤز لر (چشمها)

یئل‌لر (باد میزند)
یئل‌لر (بادها)

غئیر قطعی گله‌جک چاغدا اۆچۆنجو جمع  کیمسه‌نی یازارکن دیققت ائتمه‌لی‌ییک
یازارام، یازارسان،یازار
یازاریق، یازارسینیز، یازارلار

یازارلار (خواهند نوشت)
یازار لار(نویسندگان)

چاپارلار (خواهند چاپید)
چاپار لار (پیکها، نامه‌رسانها)

و....

بو اۆزدن عرب الیفباسی‌لا یازیلان یازی‌لاردا اک‌لری داها دیققتله یازمالی‌ییق

داودعبدی
@davud_ebdi

اوْ ۲۱ آذردن بیتمه‌ین ۲۱ آذرلره....

آذر، آذربایجان آیی‌دیر
ائله بو سؤزۆن تصدیقینده تکجه بونو بیلمک یئترلی‌دیر؛
یوردوموزون لاپ گؤزل و غورور وئریجی گۆنلری ‌ده بو آیدا یاشانیب، لاپ قارا و نیسگیل‌لی گۆنلری ده.
آنجاق نیسگیل‌لردن، اۆزۆنتۆلردن دییل، پهلوی‌لرله - قدار خانلارین ظۆلمۆندن قورتولموش بیر اسیر خالقین سئوینج‌لریندن، قادین‌لارین اؤز مقدراتینی تعیین ائتمگین موتلولوغوندان، بی‌ریالاری کیمی، ریاسیز بیر میللتین وار - یوْخونو بیر-بیری‌ایله بؤلۆشمه‌لریندن، وطنی قوْروماغا کؤنۆللۆ اوْلاراق، فدایی‌لر دسته‌لرینی یاراتماقلاریندان، ائل گۆجۆ - سئل گۆجۆنه اینانیب؛ یاتیردیلمیش اوْلان کرخانالاری یئنی‌دن ایشلک دوروما گتیرمکلریندن، خییاوانلارا آسفالت دؤشه‌مه‌لریندن، گئجه - گۆندۆز، ایستی - سوْیوق، وار - یوْخ دئمه‌دن گؤیلۆ - گؤزۆ توْخلوقلا ایش بیرلیک‌لریندن و.... یازماق ایسته‌ییرم
لاپ دوْغروسو اوْ گۆنلردن نه‌قدر دئسک، ساناماقلا - یازماقلا بیتمز.
آنجاق یازیب - یازمادیقلاریم ۷۸ - ۷۹ ایل بوندان قاباغا آیید اوْلسا دا، اوْ بیر ایلین موتلولوغو، غورور وئریجی‌لیگی، و اوْلوملو(موثبت) ائتکی‌لری بو گۆنۆمۆزه دک گلیب چاتیب، هله ده یاشاماقدادیر.
بو ایللر ایچره، رسول رضانین گۆنئی‌ین  فیرقه‌لی گۆنلریندن چکدییی اوْ فیلمه بلکه ۱۰۰ دؤنه‌دن چوْخ باخمیشام، آنجاق هر دؤنه اؤزۆنه اؤزل بیر یئنی‌لیگی وار. منه هر دؤنه‌سینده یئنی بیر شئیلر اؤیره‌دیب، داها سوْنراکی ایزله‌نمه‌یینه ماراقلاندیریر. آنجاق هر دؤنه، گؤزلریمدن سئوینج یاشلارینی آخارتدیغی یئرلر ثابیت‌ قالیر؛
تابلوْلارین تۆرکجه‌یه چئوریلدییی‌ایله آنادیل‌لی اوْخوللارین آچیلیشی، بیر ده کؤنۆللۆ فدایی‌لره وطنی قوْروماق اۆچۆن سیلاح داغیتماسی صحنه‌سینده، بیر گنج عسگر ، سیلاحی الینه آلاندان سوْنرا، گۆلر اۆزله، سیلاحی اوْنا وئرن قوْموتانین الینی اۆرکدن سیخما صحنه‌سی، سئوگی‌ایله ایمضالانان بیر تعهددان خبر وئریر.
آذربایجان‌ین بیر ایل‌لیک میللی حوکومتی اوْ قدر جهانشمول و مترقی بیر اوْلای اوْلموشدور کی، بوگۆن بو میللتین؛ هم دینچیسی، هم دیلچیسی، هم میللتچیسی و... اوْ شرفلی گۆنلرله، بؤیۆک اینسانلارا فخر ائده بیلیب، یوردوموزا ۱۳۲۴ - جی ایلین بایرامیندان دا گؤزل و بؤیۆک بیر بایرام آرزی ائدیر.
اؤزۆ ده ائله آذربایجان آیی اوْلان آذر آییندا.

داودعبدی / بیر یئنی ۲۱ آذر آخشامی...

@davud_ebdi

گؤروش
قادین اثرلری کتاب ائوی‌ طرفیندن قورولموش گؤروش جلسه‌سینده کتابلاریمین اوخوجولاریلا صمیمی بیر اورتامدا ماراقلی و اونودولماز دیالوقلاریمیز اولوب، ائولرده قورولان کتابخوانی جلسه‌لرینده کتابلاریمین اوخونولدوغو، بیر داها تورکجه یازماغیما اورک-دیرک اولدو. "مشروطه خانیم" رمانیمدان اوخودوغوم بیر بؤلوم او قدر گؤزل قارشیلاندی کی، واختی اؤلدورمه‌دن درحال رمانی ائدیت ائتمک قرارینا گلدیم.
اوزون ایللردن سونرا تورکجه اوخوماغا ماراقلانان و "قوشلار داها قورخمورلار" رمانیم ایله تورکجه اوخوماغا باشلایان یاشید‌لاریم و باشقا دوستلارین دوشوندوروجو و دقتیمی چکن سؤزلری تورکجه یازماغیمین ان دوغرو یول اولدوغونو بیر داها منه اثبات ائتدی.
قانادلارینی گؤسترمکدن چکینیب، تصوورلرینده امن بیر حاشیه‌ده اؤزلرینی قوروماغا چالیشان بعضی دوست-تانیشا باخمایاراق، آنا دیلینی اوخوماغا ماراق گؤسترن بو قورخماز قوشلار تورکجه یازماغا دوام ائتمکده منه داها آرتیق اومود وئردیلر. بو قورخماز قوشلارین هر بیری‌نین آدی نیلفر ایله نرگیز اولا بیلر دئیه دوشونورم.
گؤروش جلسه‌سینه گلن تانییب-تانیمادیقلاریما، "آگورادا یاندیرین منی"حیکایه کتابیمدان "قارقادوزو" حیکایه‌سینی گؤزل سسی ایله سسلندیرن کبری خانیم میرحسینی و قادین اثرلری کیتاب ائوی‌نین بوتون امکداشلارینا تشککورلریمی بیلدیریرم.
اوسته‌لیک بو جلسه‌ده یئنی وفات ائدن شاعیریمیز معصومه جبارپورون خاطیره‌سی ده عزیزلندی.
@qadin_kitabevi
@ana_dilim_az
#قادین_اثرلری_کیتاب-ائوی

https://t.me/ruqayyekabiri

گؤوده‌میزین اۆیه‌لری‌نین آدی...

Instagram & telegram
@ana_dilim_az

گۆن آیدین سئویملی یوْلداشلار

قادین اثرلری‌نین کیتاب ائوی، خزل آیی‌نین ۲۴ـجو گۆنونده، آرا گۆن(سه‌شنبه) ساعات ۱۰دان ۱۶یا کیمی آچیق‌دیر.

گؤروش هامی‌ اۆچون آزاددیر.

ایزلیک:(تبریز) قوْنقا باشی، شفا خسته خاناسی‌نین یانی، مشاور کۆچه‌سی، سوْل ال، آغ نرده‌لی قاپی، نۆمره ۶

Instagram & telegram
@ana_dilim_az

گۆن آیدین سئویملی یوْلداشلار

قادین اثرلری‌نین کیتاب ائوی، خزل آیی‌نین اوْن یئددینجی گۆنونده، آرا گۆن(سه‌شنبه) ساعات ۹دان ۱۲:۳۰ دقیقه‌یه کیمی هابئله ناهاردان سوْنرا ۱۴دن ۱۸:۳۰دقیقه‌یه کیمی قادین‌لار و آغالارین گؤروشو اۆچون آچیق‌دیر.

ایزلیک:(تبریز) قوْنقا باشی، شفا خسته خاناسی‌نین یانی، مشاور کۆچه‌سی، سوْل ال، آغ نرده‌لی قاپی، نۆمره ۶

Instagram & telegram
@ana_dilim_az

سالاملار، سایغیلار، سئویملی یوْلداشلار.
هر چاغینیز اۇغورلا دوْلو اوْلسون.

هر ایل خزل آیی‌‌ گلدیکده بالالاریمیز آنا دیل‌لرینی ائوده بۇراخیب اوْخولا گئتمه‌لی‌دیرلر؛ اوْ اۆزدن بیز ده ایلده بۇ آی اؤز آنادیلیمیزه گؤره کیلاس قوروب نئجه یازیب اوْخوماسینی اؤیرتمه‌یه چالیشیریق.
اؤزونوز، یوْلداشلارینیزدا، قوْهوملارینیزدا ماراقلی اوْلان وارسا، کسین خبر وئرین گلیب بۇ کیلاسلارا قاتیلا بیلر.

ایلگی یوْلو:
@anadilimaz_admin

Instagram & telegram
@ana_dilim_az