سربست:

.

ناری ائله سویمازلار سئوگیلیم
پیچاغی جییه‌رینه ساپلاما لوطفن
قانی گؤزلریمده گزیر آمما ال‌لریمه باخ
اولای‌سیزلارین سون دایاسینی هاردان بیلیدیم؟
گون چیخانا بیر آددیم وار دئمک؛
ایندی نفسین‌دن بیر ایچیم وئر
سونرانی، سونرایا بوراخماق اولماز؛
گل بیراز قولاق ایچ اؤلوم سسینه
بیراز آراق دینله
بیرده سسله سسینه اؤلوم
سسینه اؤلوم، هه؛
اؤلوم سسینه
هله‌ده ناریم چاغیریر
ناری اینجیتمزلر کی آمما...

«ناری ائله سویمازلار» دئیه‌ردی آنام
«جییه‌رینی سؤکوب قانینی تؤکمه‌یین بالا»
شیدیرغی قان یاغیر گؤیوم‌دن،
"آنا"
چیغیردیم؛
یئریم‌دن اود قالخیر
چاغیردیم "آتا"
قورخو آخیر آرخلاردا آمما؛
قان یئرینه...
بو سؤزلری بوراخیب قان یئرینه
یئنه دؤنمیه‌جک یئرینه قان
قاییتمایاجاق قان یئرینه
سن دؤنملیسن،
اینان دؤنومه
بیرده کی اؤلوم
بوغازیما کندیر هؤرولوب
ایچییمده نم کیمسه گولله‌لنیر
بیر دووارلارا باخ
دولان شهری؛ بیلیرم
باخسان‌دا
گؤرسن‌ده بئله
یئنه هله‌هله قانمایاجاقسان؛
یورولوب بلکه‌ده،
گلدییین یوللاری قاییداجاقسان.‌‌...

#آتیلا_حاجیزاده

___
#پاراگراف
@paragraph
@paragraph
___
#آتیلا_حاجیزاده
@Atilla_hacizade
@Atilla_hacizade
___

.
غزل مثنوی:

سن، من، گئجه، یاغیش، ساریلیردیق،
دایان دایان...
بیر دینله
یوخ،
یالان دئمیرم
آنلاماز اینان...

خیش-خیش سوپورگه ماهنی چالیر یارپاق اویناییر
هیق-هیق ایچین چکیر؛
بو شعیرلر بوتون یالان

اینسان دوشوندویو پارادوکسو یاشار دئدیم
دینسیزلیییم‌له آندا وئریریردیم سنی قوران

باخدیم،
بیر آندا قان دامیر اووجومدان؛
آخ منیم
آغزیم قان، اوز-گؤزوم قان، ائویم قان، بینالی قان

چیخدیم داما اوچانمادی، دیسکیندی گولله‌لر
آرتیق سؤزون، شیکنجه‌دی؛ قارقیشلارین چیبان

آرتیق کور اولموشام دئیه‌سن، قومدو گؤزلریم
مین بیر یاشیندا فحله‌دی، یورقوندو گؤزلریم

باخ بیر گئری ذکالی مرضلر چؤکوب دیزه
قر-قهبه آرخاسینجا سورونمک یئمز بیزه

کیم آرخاییندی؟
-ایستیرس آغزیمدا توپلانیب
ائولر آلوولانیر،
یئنه قوشلار توتوقلانیب

یولدا سویوقلوق اؤلدوره‌جک دیر یا قار منی
گئتسن داها گئری گتیرنمز باهار منی

بیر آن گؤزون ساتاشدی دئیه اسدی ال-قولو
یالقیزلیغین درین یئری دیر اینتیحار یولو

مندن سوروشمایین کی-کیمین بو-بو-بو  قا-قان
هر نه دئسم اینانمایین، هر بیر سؤزوم یالان

اؤلدوردو،
هانسی ایت قودوران یئرده قوت-قوشون-
بایرام پایین بوجور اؤدویردی آدام ساتان

تئز-تئز سوروشما هاردا جسد،
چوخدان اؤلموشم
بیلمم کیم آلدی نعشیمی؛
بوش وئر
راحات دولان...

#آتیلا_حاجیزاده ___
#پاراگراف
@paragraph
@paragraph ___
#آتیلا_حاجیزاده
@Atilla_hacizade
@Atilla_hacizade ___

آدیم قارانقوش‌ایدی اؤلوم‌دن اؤنجه
اورتا شرق اوشاغی بو آدی وئرمیشدی منه
بیز گون پایی اؤلوروک سئوگیلیم
بوردا اؤلوب‌، اؤلنمه‌ین‌لره شاعیر
مین دؤنه اؤلن‌ شاعیرلره قارانقوش دئییلیر؛

نئچه دؤنه اؤلدویومو بیلمسم بئله یادیمدا قالیب؛
ایلکین‌ده غزه‌ده گولله‌لندیم
کابول‌دا آسیلدیم
سونراسی
قاراباغ‌دا یاندیریلدیب،
شام‌دا یاخیلدیم
باغداد-دا کسیلیب
حلب‌ده سویولدوم
گؤزله،
بو هامیسی دئییل
هاراسی‌دیر هله؟
اورتا شرق‌ گونده بیر قانا قانع یوخ، کی یئرینه
مین اویون گتیرر باشینا؛
هله چکیب دووار دالیندا،
پیس اویون گتیرر باشینا....

نئچه دفعه اؤلدویومو خاطیرلاماسام‌دا؛
اورمودا آسیلان آزاد وطنین
تبریزده یاندیریلمیش
زنجان دا باسدیریلمامیش نعشی
هله‌ده گولله‌لنیر خیاوان‌دا سئوگیلیم
منده چوخدان‌دی
اؤلوب باسدیریلمیشام گؤزلرینین بوجاغیندا
چوخ اوزولمویه‌سن دئیه یازیرام بونو
اؤز آرامیزدا قالسین آما
«من هرگون یئنی‌دن دوغولورام
آتام‌لا آنامین سئویشمه‌سیندن.....»

#آتیلا_حاجیزاده
________#آتیلا_حاجیزاده@Atilla_hacizade
@Atilla_hacizade
________#پاراگراف@paragraph@paragraph

#یئنی_غزل
#آتیلا_حاجیزاده

تاپانچانین اوجونو آرخادان قویور باشیما
آتام همیشه دئیه‌ردی اوغول سیلاح داشیما

-باشین بدنده آغیرلیق ائدیر جاوان دئیه‌سن
سورو تک آرخادان-اؤندن تؤکولدولر باشیما

دالان-بوروق کوچه‌ده گولله‌لر قوواندا بیزی
بیری قابیرقاما ده‌یدی اوبیرسی قارداشیما

جانیم دوداقدا،
ده‌لینمیش،
ییخیلمیشام قاپی‌دا...
هله آنام نیگران‌دی ضرر گله قاشیما

خوروز یومورتا قویان یئرده کیم گؤروردو منی
حئییفلنیردی قوجا سئوگیمه، جاوان یاشیما

باشین بدنده آغیرلیق ائدیر دئیه‌ن کارآگاه
اؤبور طرف‌ده سؤیوش یاغدیریردی یولداشیما

کؤتهله‌نیب، جانا گلدیم؛
دانیشمادیم
و اولار-
گؤزوم اؤنونده نئچه دامجی تؤکدولر آشیما

کیم آد وئریب آخی سسلندیم؛
آرخایینجا دئدی
نه فرقی وار بیزی کیم ساتدی؛
اوستونو قاشیما...

ـــــــــــــــــــــــــــــــــــــــــــــــــــــــ
#آتیلا_حاجیزاده
@Atilla_hacizade
@Atilla_hacizade

#پاراگراف
@paragraph
@paragraph

ـــــــــــــــــــــــــــــــــــــــــــــــــــــــ

گئجه‌نین بوز چاغی‌دیر،‌ گئت-گئده ایتلر اولاشیر
قوجامان دونیا گؤزومده اه‌رییب، خیردالاشیر

الی باغلی، دیلی باغلی خیاواندا گزیریم
نه یازیق کی هره بیر جور سینه‌سیندن آلیشیر

گئجه‌نین خان چاغی‌دیر، گؤی دئمه دئ قان چاناغی
قاپ-قارانلیقدا اؤلوم کؤلگه‌میز ایله ساریشیر

لئش یئیه‌ن‌لر شهرین هندورینده ییغیشیب
ایچکی چاققیشدیراراق ایت‌ ایله چاققال باریشیر

قورخولوقلار دیکیلیب‌دیر خیاوانلار بویوجا
قاپی‌دان، پنجره‌دن ائولره دئولر یاناشیر

هاواسین قان-قوخو آلدی بو وطن آدلی یئرین
الیم هر بیر طرفه ده‌یسه کثافت بولاشیر

گولله‌لر ییخدی یئره عصریمیزین عاصی‌لرین
اوخشاما قایناییر، عیصیان کوچه‌دن شهْره آشیر

قاتی ساللاخ‌خانایا دؤندو بو اؤلکه ائله کی
هر اوباشدان‌ وده‌سی بوینوموزا ایپ دولاشیر

الینی وئر الیمه، دوش یولا، سیل اوز-گؤزونو
او قدر آغلامیشیق گؤز یاشیمیز آرخا داشیر

سؤزون ان قیساسی دوستوم سن اؤزون سال-چیخ ائله
ان جاوان چاغدا آخی ساچلاریما دن یاراشیر؟

#آتیلا_حاجیزاده
@Atilla_hacizade
@Atilla_hacizade
______
پاراگراف
@paragraph
@paragraph

قرار درنه‌یینین ۱۰۸-اینجی نؤوبه‌سین‌دن قیسسا راپور/ایکینجی بؤلوم

حبیب ساهیر حاققیندا قورولان اوتوروم‌دا/محمد صوبحدئل:
ساهیر تئوریک آلقیلارینی آذربایجانلاشدیریب، یئره‌ل ورژن سونوردو.
#آتیلا_حاجیزاده

نیه‌کی ساهیر، آذربایجانین آز تانینمیش شاعیر-تئوریسیینی «میرزا تقی رفعت»-ین چئوره‌سینده قورولان «فارسجا و تورکجه یئنی شئعر» قاورامینی داشایان پلاتفورم‌‌دا، ائییتیلمیشدیر‌.

میرزا رفعت-ین ائتگیسینده اولان حبیب ساهیر سونرالار ایستانبول‌دا تحصیل آلیب، تورکجه ادبیاتین آنادولو حیصصه‌سینی‌ده، آذربایجانین، هم دیوان ادبیاتی همده آشیق ادبیاتینی درین‌دن اوخودوغو کیمین موطالیعه ائتده‌رک، تورکیه ائله‌جه دونیا ادبیاتیندان گتیردییی دیل ایجراسین، سؤزجوک آلانی، فورم ایله تکنیک‌لری «آذربایجانلاشدیریب» اثرلرینده سونموشدور.

میللی حؤکومت سونراسی اونون میراثینی منیمسه‌یه‌ن حبیب ساهیرین یارادیجیلیغینا «حسرت» پرسوناژی آرتیلیب، داهاجا آذربایجانلاشماغی وورغولادی؛ ائله‌جه دیل قاورامی باره‌سینده فرقلی جیددییت گؤستریب، ۱۹۷۹-اونجو ایلده آنا دیلی حاققیندا چاپ اولان اثری، آذربایجان ادبیاتینا درین باخیشی همده «شعر دن حیکایه‌یه، تئوری دن پراتیک ایجرایا» قدر یارادیب سوندوغو اثرلرین کناریندا  اونون آذربایجانین دیل، کولتور، مدنیتینه قارشی اوره‌تیلن دهشت آتموسفئرده پئشه‌کار آرتیست قامتینده هونه‌ر یارادیب، آذربایجانلی مودئرن ادبیاتی سیمگه‌لییب ساووندوغو، ساهیری داها یئترلی تانیماق اوچون سایقین اؤرنکلر ساییلیرلار.

حبیب ساهیر دوشونجه آلانین‌دا‌ مودئرنلشمه‌نی اؤنریب، مشروطیت‌ دن میللی حؤکومته قدر دوام ائدن موجادیله‌ ائتگیسین‌ آنلاییب، آکتیو  تاریخین باشلانیشینی راکئد ادبیاتین سونو آلقیلاییب وورغولاییردی.

سون سؤز اولاراق یئنی گنج دئکلمه‌تور «یاسمین بخشی»-نین حبیب ساهیردن ایفا ائتدییی شعرین سون بئیتی تکرارلایاراق راپورو بیتیریرم:
یالتاق شاعیر یولون آزسین
تکجه فارسی غزل یازسین

۱) حبیب ساهر (۱۹۰۳/۱۲۸۲ - ۱۳۶۴-۱۹۸۵) تباری میانالی، تبریزده دونیایا گلمیش شاعیر، یازیچی و چئویرن. حبیب ساهر آذربایجان تۆرکجه‌سینین یئنی شعری‌نین آتاسیدیر . اوْ بوتون ایراندا اوْلان دیللرینده‌ده یئنی شعر آتاسی کیمی ساییلیر.

پ.ن: حبیب ساهیرین اؤلومون‌دن ۴۴-۴۵ ایل کئچدیینه رغما آدی، اثری همده دوشونجه‌سی آذربایجان میللتلشمسینده درین ائتگی بوراخدیغی اوچون سلطنت طلب‌لرین فرقلی چئشیدلرینین (ایرانشهری، پان فارس، پان ایرانیست، نایاک ایله ساییر...) آراسیندا اؤرگوتله‌شن فاشیست‌لر هله‌ده ساهیرین آدین دویدوقدا قاشینما توتوب، گؤتلرین میخ ده‌لیرمیش کیمی صاندال‌دا ویرنیخمالارینا ندن اولور؛ بو لمپن پوروواکاتورلار اوتوروم سونراسی سوسیال مئدیا‌دا اوشاقلیق عوقده‌لرین بوشالتماغا جهد ائدیرلر؛ یازیقلار..‌.

ـــــــــــــــــــــــــــــــــــــــــــــــــــــــــ
@Atilla_hacizade
@Atilla_hacizade
#پاراگراف
@paragraph
@paragraph

قرار درنه‌یی
@gharar_poet
@gharar_poet

تحکیه درنه‌یی
@tahkie
@tahkie

.
صاباح تحکیه درنه‌ییمیزده (سعادت آختاریشیندا) آدلی یئنی حیکایه‌م جمعی اوخونوش سونراسی صؤحبته قویولاجاق، بو ائلان واسیطه‌سی ایله یولداشلاریم‌دان دعوت ائدیرم بو اوتوروم‌دا ایشتیراک ائتمک ایله باخیشلار و تنقیدلرینی اسیرگه‌مییب، یاردیما گتیرسینلر.

_

?تحکییه ادبی درنه‌یی(473-جو جلسه)
?اوخونان اثر:
? سعادت آختاریشیندا – آتیلا حاجی‌زاده
?ایران(تورک) ادبییاتی
?اورمیه-چهارراه آپادانا- مجتمع فرهنگی هنری اورمیه
?سه شنبه- 27 شهریورماه 1403
?ساعت:17-19:30

#ادبییات #آذربایجان_تورکجه_سی #آذربایجان_چاغداش_نثری #داستان #مودئرن_نثر #تحکییه #اورمو #آتیلا_حاجیزاده #ایران_تورک_نثری #حئکایه #تورک_نثری
__
@Atilla_hacizade
@paragraph
@tahkie

.
‍ کور اولموشام دئیه‌سن کؤلگه‌می زوران گؤرورم
نقدری گؤز تیکیرم چئوره‌ده دومان گؤرورم

یئنیلمیشم گئجه‌نین قاپ-قارا قارانلیغینا
بو ظولمتین سحره چاتماغین گومان گؤرورم

دئشیک-دئشیک دئشیلیب‌دیر الیم، قولوم، آیاغیم
یولون قاریش-قاریشین‌‌دا سیریق تیکان گؤرورم

بو یئرده تاپماییرام سیز دئیه‌ن ملک‌لردن
بیاض گئییم‌لر ایچینده اورانقوتان گؤرورم

دئدیز وطن گتیریب‌سیز بو زیندان ایچره؛
آما
بولار پیشیک دئیه‌نی من نیه سیچان گؤرورم؟

آیا؟
گونه؟
سحره؟
هانسینا گوونملی‌یم...
باخینجا دسته‌ییم ایچره قارا ایلان گؤرورم

بیراز کناردا گزین زهله‌کار قوماربازلار
آغیز دولو قوسورام سیزلری هرآن گؤرورم

دونوب گئری دئیه‌سن تاریخین واراق‌ واراغی
باخینجا نیزه باشین‌دا یئنه قوران گؤرورم

گئجه،
گونوز،
خیاواندا آزادلیغین باغیران
دوورلارین سینه‌سینده ندن‌‌دی قان گؤرورم؟

بیراز کناردا گزین
آخ...
بیر ایش چیخارداجاغام
یاواش-یاواش گؤزومه چوخ اویان-بویان گلیسیز...

◼

چوخ ایچمیشم دئیه سن کئفلی‌یم باغیشلایاسیز
اؤنومده‌کی کاغاذین خط‌لرین زوران گؤرورم

#آتیلا_حاجیزاده

آ.ی: بو غزل ۹۶-دا یازیلیب بوگون جیددی بیر ائدیت، پالاییش، حذفییات‌دان سونرا، قوللوغونوزا سونولور.
________
@Atilla_hacizade
@Atilla_hacizade

.
گئجه یاری، سحر ائرکن یا هر بیر هانسی ساعات
قارانقولوقدو،
گونش فیکرینی باشین‌دان آت
بو زهریمار حالیما بیر گیله اؤزون‌دن قات
هئچ اولماسا اؤزونو باغریما سیغیندیر یات

کاسیب محلله‌لرینده گئجه یئتیم قالاجاق
سن اولماسان منی کیم اوخشاییب، اوووندوراجاق‌

دومان، دومان و دومان، اؤرتولوب کوچه-باجایا
گونش کوسوبدو شهردن، گومان قالیب‌دیر آیا
ایتیرمیشم اؤزومو، دوشموشم اوتای-بوتایا
کیم آختاریر منی هئی...؟ «من» دونن ییخیلدی چایا

اینان؛ بولار ایتیریب ‌لر آداملیغی، شرفی
شهر چاییندا آخان قان آلیب‌دیر هرطرفی

باخیش باخیشلاریما،‌
-کیم چاغیردی بیرده منی...
ال آت گؤتور آیاق آلتینداکی قارا کفنی
آپاردیلار منی ۳-گون قاباق بوگون‌ده سنی
نه آختاریرسان آخی؛
-گل بوراخ بو ایش-پئشه‌نی؛

بوراخما اللریمی گل هله بیراز دینله
تاراق، تاراق، تاتاتاق، تاق، گلن-گئدن، گولله

دئدیم بیزیم قایالار سیندی‌لار، اه‌ییلمه‌دیلر
اؤلوم موجادیله‌سین یئندی‌لر، یئنیلمه‌دیلر
نقدری آغلادیم-آنلاتدیم آمما بیلمه‌دیلر
آپاردیلار منی ۳-گون قاباق، گتیرمه‌دیلر

دایان-دایان قاچیرام گئتمه قول-قیچیم یوخدو
داغیتما، ییخما، تلسمه هله زامان چوخدو

لال اولموشام،
یالاواج ایتلره پای اولدو دیلیم
و ۱۰۰-یاشیندا قوجالمیش کیمین سینیب‌دی بئلیم؛
قارانقولوق کوچه‌لرده اوزولدو سندن الیم
اؤلوم دوروبدو اؤنومده، دایان بیرازجا گلیم

شهرده قورد-قوشا دولموش،
کسیبدیلر یانیمی...
گلین، گلین، سوزولوب گؤزلرین آلیر جانیمی

تاراق، تاراق، تاتاتاق تاق، گلن گئدن، گولله
دوزولدو قارشیمیزا بیر سورو کسیک کلله
آمان‌دی دینمه، دانیشما، یئنه تپیک، سیلله
دا بس‌دی قورتار اه‌هَح، آز داوار کیمین اینله

گلیردیلر سسیمه نم ندنسه قویمادینیز...
ندن بو قدری گؤزل‌سیز، نه دیر سیزین آدینیز؟

ندن بو قدری گؤزل‌سیز؟ ندیر سیزین آدینیز؟
منم، اونوتمادیغیز سئوگی، ایتگین ائولادینیز
بیراز باخین اوزومه، بلکه سونرالار تانیدیز
نقدری آغلادیم-آنلاتدیم آمما قانمادینیز

و سویدولار دریمی بوکدولر قارا کفنه
گونش کوسوبدو شهردن گومان قالیب‌دی سنه

دولاندیریب‌دی، یوروب، یولدا قویدوغون ایزلر
سیزیلداییب گئجه-گوندوزلریمده عکیزلر
اوتانمادیق، یئنه‌ده هئچ اوتانماریق بیزلر
دولوبدو دؤرد یانیمیز، هرگلن بیزی ایزلر

بوراخما اللریمی بیر داها، آمان گونودور
و تاریخین گؤزه گؤرسنمه‌ین یامان گونودور

#آتیلا_حاجیزاده

آ.ی: ۹۸-ده یازیلیب پایلاشیلمامیش بو مرکب، جیددی ائدیت و پالاییش سونراسی قوللوغونوزا سونولور؛ ائلجه آرتیرمالییام، حرفه‌ای تفقید-دن ایستیقبال ائدیرم.

___@Atilla_hacizade
@Atilla_hacizade