#_قصيدة_وداع_الخدام

نزلو الرايات   رفعو الاهات 
اصعب لحضات وداع الخدام

خلصت  والوداع ادموع ويتعب
احله ايامنه العشناها بالموكب
دربك مدرسه وقانونها يعجب
ناجح خادمك والما خدم يرسب

وداع ومر يهم   اسرع من حلم   
وفلينه الحزم  و انتاني لعام

اصعب لحضه عالخادم تضل هايه
اذا صاح ابو الموكب نزل الرايه
و يباوع للدرب ما بيه مشايه
الحسره بكلبه تبقه للسنه الجايه

بروحه تشب نار   ويسال محتار
وين الزوار   وين الاعلام

من يبدي يلم بالموكب ويجمع
وي كل حاجه حس بكلبه يتكطع
من يرفع غطه الموكب بجي يشبع
امنيت الخدم للبيت ما ترجع

شكد يتمنون   وكلهم يدعون
ما تخلص كون   و تزيد ايام

حلم كون وبعد ما خالصه الخدمه
وترد اضعاف تكبر بيهم الهمه
محلاها عله حب حسين هاللمه
يرب اتدوم عالخدام هالنعمه
يا ريت تزيد    وما تكضي نريد
صارت تعويد   هالخدمه الهام

شهرينك كضن بس ما كضن بيه
عايش جرحك بروحي نفس ريه
اذكرك وابجي الك يحسين يوميه
لعزاءك عمري منذور و ثوانيه

**بدموع العين  ابجي عله حسين
خلصن شهرين  عليهن احتام

ربما خادم الحسين. عليه السلام..
✍️حسين الخزعلي**

#_قصيده_للمشايه

حجاية اعذب من الماي   مية هلا بالمشاي
"" "" "" "" "" "" "" "" "" ""
حجايه اترد الروح  وبيها الخدام يصيحون
حجايه ملكه من اهل الموكب اهلا باليمشون
مية هلا بالزاير صاحو تتلكاك ام عون
وحسين الخطاره متاني واصحابه يتانون

رايـة عباس فيـاي     مـية هـلا بالمـشاي
"" "" "" "" "" "" "" "" "" ""
حجاية اتشد الحيل اتكوي ترد حيل الرجلين
و ما جن الخادم يحجيها جن كايـلها حسين
يالزاير مـر خل نتبـرك وفـراشـك بالـعين
تفضل شرفنه بموكبنه والله احنه متانين

وكلها ترحب بالجاي    مـية هلا بالمشاي
"" "" "" "" "" "" "" "" "" ""
هلا بالزاير كلها تصيح مختلف الاعمار
تردد بيها كبار الموكب وتردد الزغار
تسبيح الخادم هالكلمه بدروب الزوار
شيخ الزاير بس يتدلل شيطلب يسمع صار

شيخ و خدامه اهواي   مية هلا بالمشاي
"" "" "" "" "" "" "" "" "" ""
ما يتعب خطار حسين وما تتعب الجدام
وكفو علم اباب الموكب يا محله الخدام
بكل خطوه الواهس والهمه تصعد فوك الهام
و من يسمع كواكم الله ترجع حيله لعام

علي وياك تشد هاي   ميـة هـلا بالمشاي
"" "" "" "" "" "" "" "" "" ""
ماكو بكل قانون الخدمه تخدم هيج اعداد
خير حسين الخله الوادم تاخد منه مراد
بالموكب كل واحد ماخذ وضع الاستعداد
ما يعبر زاير كون الا و يـتبرك بالـزاد

ويسمع من عدهم راي  ميـة هـلا بالمشاي
"" "" "" "" "" "" "" "" "" ""
على حب حسين الكل طلعت واتعنت افواج
ويم كبره الوادم تتزاحم ومزاحم امواج
كالزاير عرش الله الزاير ويسمونه الحاج
ضيف الله الكاصد لحسين ويامرنه شيحتاج

تفضل على حب مولاي  مـية هـلا بالمشاي

ربما خادم الحسين. عليه السلام..
✍️حسين الخزعلي

#_قصيده_للمشايه

مثل النهر   مسراهم    الله وعلي   ويـاهم
من كل جهه ترف راية   اتعنولك المشايه
كل الهلا وحياهم

نهر    مسرى الخدم      نهر      تمشي الامم
نهر   و يرف علم      نهر    درب الاشم
اجه طوفان الاحرار    الحشود البيها نفخر
الارض لحسين تندار   او اله شما بيها تكبر

من الجهات الاربع    شفنه البيارغ ترفع
من البحر عنايه    تعنولك المشايه
كل الهلا وحياهم

مشي   حل الفرض  مشي   نطوي الارض
مشي   من يعتـرض   مشي  صوت النبض
مسير الاعضم انسان   بدت تمشي الملايين
مسير الانس والجان  اللقاء بحضرة حسين

حان اللقاء    الاعظم   ارض وسمه    تتحزم
وكل الخلائق جايه   تعنولك المشايه
كل الهلا   وحياهم

فرض  الممشه انكتب    فرض  علينه وجب
فرض   مو مستحب    فرض    يحله التعب
ازور حسين كل عام    وعـد لازم اوافي
الدرب لو ينزرع جام    مشي اتعناله حافي

لازم مشي   اتعنه   حافي عله درب الجنه
هذا وعد و احجايه    تعنولك المشايه
كل الهلا  وحياهم

حسين    هذا الاسم    حسين     هوه المهم
حسين   بهمه وعزم    حسين  يمشي النجم
النجوم وكل الافلاك      تعنت للزياره
وتزور افواج الاملاك   وتحط فوك المناره

بسم الاله  او امـره    كل شي انخلق   بالحضره
حسين الهدف والغايه    تعنولك المشايه
كل الهلا   وحياهم

نحب   درب العشك       نحب      ما نفترك
نحب  حب من صدك     نحب   بي نلتحك
الكلب ياخذنه لحسين    بالارواح الجريحه
نشوفه وتدمع العين   بتعبنه نطب ضريحه

من نوصل  نشم عطره     ونكله يبن الزهره
حاجتنه يمك هايه     اتعنولك المشايه
كل الهلا وحياهم

ربما خادم الحسين. عليه السلام..
✍️حسين الخزعلي

#_قصيده_للسجاد_ع

علــــي اه  ـــــ   علـــــي  آه

ابجن يا عيون و هلن ادموع
ابو السجاد هاي الليله مفجوع
ينعه على الولد والنوح مسموع
على المسموم نار تشب بالضلوع

علــــي اه  ـــــ   علـــــي  آه

اه يبني يصيح بصوت وينوح
اه يبني العشت عمرك بالجروح
راحت وي ابوك بكربله الروح
و مو هاليوم وي عباس مذبوح

علــــي اه  ـــــ   علـــــي  آه

ابو السجاد صاح بنبرة الشوك
وينحب عله وليده وكلبه محروك
اه يبني التعب من فرة النوك
المتعبه السبي و بالسوط مطكوك

علــــي اه  ـــــ   علـــــي  آه

حسين انحنه وضهره اعليه حدب
وكابل زيـنب وعـالولد ينـحب
يكله وليدي من السم تعذب
يلوج من الوجع والله يزينب

علــــي اه  ـــــ   علـــــي  آه

اخذ حيلي علي من شفته ممدود
و يتكلب من السم جبده ممرود
انكسر كلبي يزينب كسرة العود
على اوليدي الدمع هاليوم مريود

علــــي اه  ـــــ   علـــــي  آه

ما يهده الكلب والجرح يبره
وكسرتي عله الولد ما منها كسره
يبني من البواجي عيوني حمره
نضر عيني انحفر هالليله كبره

علــــي اه  ـــــ   علـــــي  آه

ربما خادم الحسين. عليه السلام..
✍️حسين الخزعلي

#_قصيده_للسجاد_ع

علي علي شاهد واعرف   
علي علي قرأن الطف

علي بالطف عاش وشاف جان اهناك شاهد
يعرف شكو جان يدور ما قاتل بس قائد
فارس بخيام حسين مثل المصحف كاعد
منزل بالطف قرأن بامــــر الله الواحد

علي علي  نازل مصحف   
علي علي قـرأن الطف

حيدر جده ومعروف وما يحتاج نوصفه
ابن الزهره ام حسين ابن حسين نعرفه
مافارك وجه الله يدعي ورافع جفه
وبالطف يقره الدخان حتى النار تطفه

علي  علي  مـا يتوصف   
علي علي   قران الطف

علي طب قصور الشام بعلمه يقود ثوره
قائد ما شايل سيف يحمل جان صبره
يخطب بلسان حسين كباله يشوف نحره
نفس احساس المذبوح ويحمل نفس الفكره

علي علي  يخطب ماكف  
علي  علي قران الطف

عابد ساجد لله  طـول الليل راكع
زاهد عالم بالدين بوجه النور ساطع
من نعد الاسماء هوه امام الرابع
البكاء الشاف حسين بالصحراء ينازع

علي علي  دمعه الماجف   
علي علي  قران الطف

كل عمره يشوف الصار  بالطف ويتحسر
خلص عمره السجاد يشوف كباله المنحر
اتمنه يقاتل بالسيف بكربله ويه الاكبر
يفزع ويخونه الحيل عالمعركه مايكدر

علي علي   ضل يتحسف 
 علي  علي   قرأن الطف

اكو فكره ابالي اتدور اذكرها واتعجب
ياناس شلون النوك شالت هذا الكوكب
حبال السبي كيف تدور وعله جفوفك تنضب
قران بصف قرأن  عالنوك انته و زينب

علي  علي بيرغكم رف   
 علي  علي   قران الطف

ربما خادم الحسين. عليه السلام..
✍️حسين الخزعلي

#_قصيده_لدفن_الاجساد

احضـر يا علـي  مكسور الكلب
شلون ادفن هلي   كلهم بالترب  
بعدهم اشعر بغربه   ادفنهم هلي صعبه
احضر ياعلي

احضر يجدي  هالليله وحدي كسر كلبي الحزن
احبابي كلهم    تغير شكلهم    ثلاثه بلا دفن
بالصحره و بلايه افياي هلي جوه الشمس نيام
اولادك علي تدري  صارلــهم ثلـث تيـام

ضلت عالثره    اجساد الاهل
اه يا حيدره     مكطوعه وصل
الينضر ينكسر كلبه   ادفنهم هلي صعبه
احضر ياعلي

تدري الضحايه   ضلو رمايه    يجدي عله الارض
ياجدي حيره  شيخ العشيره  انسلب طول بعرض
مخضب ياعلي مترب   مرمي وسلبو اهدومه
ابوي بكربله اتعذب    ولسا مرمي بالحومه

لسه بكربله  ضل عله الثره
محد غسله  اوصاله مطشره
نهبو والدي نهبه   ادفنهم هلي صعبه
احضر ياعلي

يعيش بمصيبه لفارك حبيبه بسجن يكضي العمر
يا جدي حيره    ابوي بحصيره  انـزله للكبر
هذا اكبر جرح شفته   ويلجم فاطمه الزهره
ابوي بلحده وسدته  وعبدالله على صدره

دورت الصــــــبع       والــــدمع يهلي
ومن نحره استمع   يمي ادفن علي
المنضر راسك يشيبه    ادفنهم هلي صعبه
احضر ياعلي

بدفن الصحابه   شفت المهابه   بجثثهم تنرسم
فوك الوطيه  غيره وحميه  وشفت نعم الزلم
واحدهم علم ويـرف   والطف انسبه اسبايه
ومو دم النحر ينزف  وفه وكلمن فرض رايه

ضحو بالنفس      وتشهد كربله
ادفنهم واحس    من العايـله
احس مثل اهلي مو صحبه   ادفنهم هلي صعبه
احضر ياعلي

يا داحي خيبر    الجرح الاكبر  على شاطي النهر
حامي الضعينه   أمكطعينه  وسهم صاب النضر
حصص عالمشرعه توزع  و اتطشر ضوه الكافل
حرام اجفوفه تتكطع  الما ترحم ابد عايل

شيفيد العمر   و ابو فاضل رحل
بتراب الكبر   شلون ادفن جبل
النهر بيده ورفض عذبه   ادفنهم هلي صعبه   
احضر ياعلي

ودعت الاحباب  بحضان التراب   بقيت بلا اهل
ادفن بخوتي   واتمنه موتي   يقربلي الاجل
عيشه بلا ابوي حسين  صعبه وعمري ماريده
والكلهم هله ماشين    بالله الدنيه شتفيده

دنيه بلا ابو   مو دنيه اسر
والفارك اخو   ضهره ينكسر
الضهر فركتهم تحدبه   ادفنهم هلي صعبه
احضر ياعلي

ربما خادم الحسين. عليه السلام..
✍️حسين الخزعلي

#_قصيده_لرقيه_ع

جيبولي ابوي الليله اريده  
ما تغفه عيني الا عله ايده

بنته والي حك من اطلبه  
مو بيدي بس كلبي يحبه
متعوده اغمض عيوني جنبه 
بلايه ابوي الدنيه غربه

اشعر بلا والد وحيده    
ماتغفه عيني الا عله ايده

من هو اليدليني بمكانه  
لو ما يجيني امشيله انه
مشتاكه لعيونه وحنانه
الفارك ابو يتعبه زمانه

ما احتمل عنه بعيده  
ما تغفه عيني الا عله ايده

اليعرف خبر عن والدي يكول 
ماكو خبر من عنده معقول
تيهت ابوي بزحمة خيول  
و اتذكـرت كالولي مكـتول

كالولي ابوج انحز وريده 
ما تغفه عيني الا عله ايده
من البواجي عيوني حمره
الله الوحيد بحالي ادره
اسال عالمضيعله شذره 
ردت الابو وجابولي نحره

كلبي انمرد محد يفيده
ما تغفه عيني الا عله ايده

وينه ابوي او وين الاحضان  
هذا عله بالي كله ماجان
جابولي راسه وشفته ذبلان 
وكالولي مات حسين عطشان

اخباره كالو هاي اكيده 
ما تغفه عيني الا عله ايده

ما يرجع ايسي وبطلي النوح 
هذا ابوج وراسه مذبوح
ياربي اريدك تاخذ الروح 
ما ريد اعيش وكلبي مجروح

خذني لبوي اني الفئيده 
ما تغفه عيني الا عله ايده

ربما خادم الحسين. عليه السلام..
✍️حسين الخزعلي

#_قصيده_للسبي

الى الشام الضعن راح    ومشت ويانه الارواح
روح اخواني وياي  جنهم غيمه فوكاي
وعلم عباس ما طاح

الى الشام الضعن سار يتامه و ارامل
وامان بروحي حسيت واحس بضعني كافل
صعدنه ومـو سبيات بخدرنه نباهل
علينه فياي الحسين وعلمنه ابو فاضل

عاشت ذيج الجفوف   وما كطعتها السيوف
بضعني يرفرف الواي   جنهم غيمه فوكاي
وعلم عباس ما طاح

بالطف ميت السيف وعايش شامخ الراس
روس اخواني وياي مشو بالضعن حراس
الشام ودربه البعيد ما همني ولا الناس
امشي وعيني تندار لحسين ولـعباس

حج وتطوف العيون    على حامين الضعون
بكيف اخواني مسراي   جنهم غيمه فوكاي
وعلم عباس ما طاح

الدرب خل يطول اهواي خل لا نوصل الشام
ما حس بالتعب لا واخـوتي وياي ما دام
ما فاركني عبـاس و روحه تمشي جـدام
الضعن وجفوف الحسين تمسح روس الايتام

رغم طول المسافات   ما حس بالمعانات
اخوتي الهوه والماي  جنهم غيمه فوكاي
وعلم عباس ماطاح

بأمان الله والاخوان للشام احنه ماشين
مشينه وما رجف خوف كلبنه بزود الحسين
ِضل سد ساتر النه و بيهم تفرح العين
عباس عله يسراي وابو الاكبر عل يمين

السبي ما جن سبي هان    و اني بين الاخوان
امشي وتربي عيناي     جنهم غيمه فوكاي
وعلم عباس ما طاح

روح بروح نمشي سوه و ما فاركتهم
اصابع جف الاخوان بمسيري لازمتهم
امشي و راسي مرفوع كل مره شفتهم
مات الجسد والروح ما عافت اختهم

من سمعو سبي وشام   كسرو ضهـر السهام
وكلمن صاح بحماي  جنهم غيمه فوكاي
وعلم عباس ما طاح

ربما خادم الحسين. عليه السلام..
✍️حسين الخزعلي

#_قصيده_للعاشر

بعيد  واجيتك ركض    و تعب  يخويه النبض
ياحبيبي ياحسين

على تل الصبر  و اديرن بالنضر
ولمحتك من بعد واحس كلبي انعصر
اشوفك تنذبح وامـوت من القهـر
ركض كلبي الك وصل شم النحر
المسافه من الخيم ليك السمه من عدها اكرب
خويه امنيتي احاجيك واكـلك راسي شيب

حسين طايح عالارض   وتعب  يخويه النبض
ياحبيبي ياحسين
وصلتك من بعد  الف عثرة جدم
عله وجهي شكدطحت وادوس عله الالم
متت لمن شفت غفه بكلبك سهم
بخاصرتك رمح ولحيتك كلها دم
وكعتك تاخذ الروح الرمح من ضهرك شراد
ورمل متروسه الجروح  ولا يرهملك اضماد

ضمه  وروحك تنقبض    وتعب يخويه النبض
ياحبيبي ياحسين

اشوفك عالارض طحت طيحة سمه
يالمغيم عطش وعلى شفافك ضمه
وريدك منكطع و نزف نحرك دمه
يالمغطي الرمل  ضلوع مهشمه
سمعت بكسر الضلوع   واني بنص الخيام
حافر خيل مطبوع  بصدرك وانهى العضام

خيل صدرك ترض   وتعب يخويه النبض
ياحبيبي ياحسين

متت من السحك متت من النزف
ملامح ما بقت وعليك الدم يجف
تعرف زينب بعد يخوي المختلف
رغم ما منذبح علي كلبك يرف
يبعد اختك يلحسين عله وجهك ليش مكلوب
ملامح شوفتك وين   كلك خويه مسلوب

سليب طول و عرض     وتعب يخويه النبض
ياحبيبي ياحسين

عله صدرك منجفي اشوفك وانذهل
يا وسفه الاخو  المثـلك ينكتل
اعدلك حاولت وما ضن تنعدل
اشبكك بس ردت يالكلك نبـل
عله شبكك كلبي محتام يخويه شلون الوحك
تلجمك خاف السهام وتفـزز جروحك

سهام   صدرك تعترض   وتعب  يخويه النبض
ياحبيبي ياحسين

ربما خادم الحسين. عليه السلام..
✍️حسين الخزعلي

#_قصيده_للمشايه

خضر دربك مواكب     وراح انشوف العجائب
ومن كل انحاء العالم   خدم
بدربك يبدي التنافس   واسمك ينطينه واهس
مختلفين و نتوالم     خدم

يحسين الدرب كلما انظره
بي شي يختلف حيرني امره
مزروعه المواكب جنها شجره
والخدمه الحسينيه احله ثمره
ولو موكب اقرر اني اعبره
الكه معزب يمد روحه سفره

اكثر شغله التعجب     بروحه الخادم يعزب
مايغله عليك الغالي    نعم
بين احبابك تحدي      يباتون الليله عندي
وزوارك مثل اعيالي     نعم

بدربك مختلف كلشي يعجب
يحسين الطفل ناصبله موكب
لازم بيده ماي وبي يعزب
الوادم مو بديها الوادم تحب
يصيحون الخدم والمدمع يصب
تدلل يزاير كلشي اطلب

علينه ادلل يزاير      شتطلب يلغالي حاضر
زادك مطبوخ وجاهز     يعم
ارتاح بموكبنه فدوه     اتفضل شرفنه جوه
وخادمكم ما متعاجز     يعم

شحجي عالكرم والله انه حاير
خدامك صدك جنهم مناير
شيخ انته يكلوله يزاير
تدلل علينه و انته تامر
فراشك ملبسك يلغالي حاضر
بات الليله يمنه وامشي باجر

شرفنه بهالخدامه      وباجر  روح بسلامه
اهلا باليحمل جفه     علم
شيخ علينه اتِدلل        الموكب باسمك تسجل
واحدهم واكف وكفه    علم

من يبدي المشي تبدي المواقف
ودربك ينزرع كله مضايف
بين احبابك انشوف التكاتف
ماجنهم غرب جنهم معارف
و اتصير الميانه و السوالف
واحدهم علم للخدمه واكف

تجمعهم هالمسيره        كلهم نفس العشيره
نشوف الالفه وتجمعهم      قيم
نفس المبدأ يمولاي      تجمعهم خدمتك هاي
الزارك واليخدم كلهم       قيم

من كل الدول جايين اشاهد
زوارك ملايين انت واحد
كبة حضرتك تنهي التباعد
حته المو عرف بالحضره كاعد
مذهول اصبح بهاي المشاهد
سر هذا عله العزوبيه شاهد

ضل حاير ب المراسم      ما شايف هجي وادم
اتعجب واحتار شعدهم    كرم
و اتعلق بالزياره        حس جن هوه بدياره
لو رد ينقل موقفهم      كرم

محتاره الصحافه العالميه
بيا جانب تركز بالقضيه
تحجي عله الكرم لو ع العزيه
والخدمه بطريقك ميه ميه
رفعة راس خدام الزجيه
عدهم هِمه هِمه حيدريه

شفناهم بالصداره       زلم و كلهم غياره
كلمن يخدم بحروره    و الم
شتوصفهم والله تعجز       موقفهم هوه الابرز
بكل انحاء المعموره       الم

ربما خادم الحسين ع...✍️ حسين الخزعلي