#محرم_1446هـ
( لا ياخيمنه )

لا ياخيمنه اشطيحچ
شبسـرعه وتـعـوفني
هم انه محترگه وعلي
بس ماطحت شوفني

مابيه حيل وما طحت .. اركض و المّ اعيالي
وبسرعه شو فيّج وگع .. ما فكريتي ابحالي
كلشي انگضه لامن أهل .. ضلت غريبه عيوني
دارت عليه اهل الغرب .. وما رد الي كفـالـي

لا يا خيمنه .. ياهو اليلمنه
ذبحوا زلمنه .. واويلاه

ما عدنه رآيه .. هاي النهايه
وكلهه ضمايه .. واويلاه

~~ـ

لا يا خيمنه اتـمـهلـي
بس خل تعدي الليله
زحمه امن ابوفاضل تره
وي غربه تگعد عيله

متعجبه حگج يا خيم .. أم الخدر هـاي انه
ياهضمه راحت هيبتي .. ولا واحد الشچانه
انه الاميــره امـدلله .. چنت بحميّت اخواني
وبسرعه شيبني الوكت .. من الهضم ذبلانه

ماضلي والي .. رايح دلالي
بالغربه تالي .. واويلاه

شافو عباتي .. وطاحن خواتي
ماصح مماتي .. واويلاه

~~ـ

من عالهزل شفت الاخو
هـوه وگلت مــو هـوه
معــقــوله واليـنـه يـؤن
ومــن الــذبح يتـلــوه

دار النظر صوب الخيم .. وشافج رماد ابهيمه
ياخويه اصيحه وماسمع .. الحگلي يابو الشيمه
ركضن بنــاتـك بالـفـله .. وانته اعله هاي النومه
راح الستر يابو الستر .. والجيش مثل الغيمه

غــاروا علينه .. خويه انسبينه
ومحد يجينه .. واويلاه
مچتوفه اديه .. التموا عليه
يا بــو رقـيــه .. واويلاه

~~ـ

لا ياخيمنه اشچم طفل
يتـچــوه مـن الجـمــره
دخـانـج امطفي الچفن
وعيـوني صارت حمره

نارچ وره ارقيه اركضت .. والضيم دار اعليه
وانفاسي مخنوگه وعلي .. لا راي ضل البيه
وين اطي وجهي لياكتر.. ياهو العدل وشكيله
حيــرانه كـلـش وحــدي .. ومـچـويات ايديه

حيره اعله حيره .. چنت الاميره
وهسه الاسيره .. واويلاه

امشي بكسرتي .. اه يا غربتي
خلصت عشرتي .. واويلاه

~~ـ

- خيري الصفراني ✍️

عيوني هلت وبيه ضلت ريحت امي
ما جفتني ولا نستني ريحت امي
يهل الرحم حاجوني // بالبيت اشم صدكَوني

وحدي ضليت من مشو عني الحبايب وحدي ضليت
طبت البيت والله كَمت اكره يعالم طبت البيت

اشلون ايطيب جرحي وهيه مو يمي
وهاي الدنيه كلها ما تعوض امي

امي جنه وبالمحنه ترست الكَاع
امي شمعه ودمعه دمعه ترست الكَاع
كلش عميت عيوني // بالبيت اشم صدكَوني

اشكَد حنينه الله خالقها اعله ذوقه اشكَد حنينه
وما درينه نفكَد النعمه يعالم ما درينه

لا تاخذ ضواي وتسعد الضلمه
التموت امه تذبحه جلمت اليمه

يمه وينج فكي عينج لا تروحين
بيتي خالي وهذا حالي لا تروحين
امن الون تغير لوني // بالبيت اشم صدكَوني

ضهري مكسور والله من كثر المصايب ضهري مكسور
بين الكَبور فرفحت روحي عله امي بين الكَبور

امي الشبعت الجوعان خبزتها
ماتت وانه ضلت عندي شيلتها

كلبي ذايب والمصايب شيبتني
وين اهاجر والمكَابر شيبتني
عالراح اون خلوني // بالبيت اشم صدكَوني

لا يبسمار لا تصوبها بضلعها لا يبسمار
والدمع حار خدودي ما شبعت بواجي والدمع حار

ليش الضالم اعله العين يسطرها
بيمن يطلب امي وهيجي يعصرها

امي طاحت وفضه صاحت اتلاحكَيني
ابني عصروه وضلعي كسروه اتلاحكَيني
اهل الغدر فجعوني // بالبيت اشم صدكَوني

كَام الحسين ايعاتب الباب بدمعته كَام الحسين
هم الك عين يالخذت مني الزجيه هم الك عين

الحسن يبجي والمصلايه حاضنها
ويكَلي انطيني سبحت امي اشمنها

شفته ينحب وكَلي زينب ماتت امنه
وحكَه حيدر ناره تسعر ماتت امنه
وانه صحت عينوني // بالبيت اشم صدكَوني

اشبيها دنياي من زغر سني ولتني اشبيها دنياي
بكربله اهواي رايح اتعذب يدنيه بكربله اهواي

باجر راح اشوف اخيام محتركَه
وامتوني تصير امن الضرب زركَه

ابن امي باجر بالحوافر صدره ينداس
ايضل ينازع وانه اباوع صدره ينداس
وراح العده يسبوني // بالبيت اشم صدكَوني

تمت
تحسين الخفاجي