ኢጎ እና የአሁኑ ቅፅበት

የአሁኑ ቅፅበት ወዳጅህ አድርገህ መወሰን የኢጎ ፍፃሜ ነው። ኢጎ በአሁኑ ቅፅበት ማለትም ከህይወት ጋር አንድ መሆን አይችልም። ምክንያቱም የኢጎ ተፈጥሮ እራሱ አሁንን ቸል የማለት፣ የመቃወምና፣ ዋጋ ያለመስጠት ነው። ኢጎ የሚኖረው በጊዜ ውስጥ ነው። ኢጎ ብርቱ ከሆነ፣ በህይወት ውስጥ ብዙ ጊዜ ይወስዳል። እናም አብዛኛው የምታስበው ሃሳብ ካለፈው ጊዜ እና ከመፃኢው ጊዜ ጋር የተገናኘ ይሆናል። በዚህም የማንነት ስሜትህ፣ ማንነትህን ካለፈው ጊዜ ይቀዳል። ሙላትህን ደግሞ ከመፃኢው ጊዜ ይጠብቃል። ፍርሀት፣ ድብርት፣ ጥበቃ፣ ቁጭት፣ ፀፀት፣ ንዴት በጊዜ የተገደበው ህላዌ ብልሹነቶች ናቸው።

ኢጎ የአሁኑን ቅፅበት የሚያስተናግድበት ሶስት መንገዶች አሉት። እነዚህም፣ ለሆነ ግብ እንደ መረማመጃ፣ እንደ እንቅፋት ወይም እንደ ጠላት ናቸው። እነዚህ ልምዶች ሲነሱ እንድታስተውልና መልሰህም መወሰን እንድትችል፣ እያንዳንዳቸውን እንፈትሻቸው።

1.ለኢጎ የአሁኑ ቅፅበት የተሻለ ከተባለ፣ ሊሆን የሚችለው ለሆነ ግብ እንደ መረማመጃ ሲሆን ነው። ምንም እንኳን መፃኢ ጊዜ እራሱ በአእምሮ ውስጥ ከሃሳብነት ያልዘለለ፣ ሲመጣም የአሁን ቅፅበት ሆኖ ከመምጣት ውጪ መሆን የማይችል ቢሆንም፣ የአሁኑ ቅፅበት ግን በጣም አስፈላጊ ተደርጎ ለሚወሰደው መፃኢ ጊዜ እንደመረማመጃ ተደርጎ ይወሰዳል። በሌላ አገላለፅ ሌላ ጊዜ ላይ ለመሆን በጣም ከመጣደፍ የተነሳ፣ አሁንን በደንብ መኖር አትችልም።

2.ይህ ልምድ እጅግ ሲጎላ ደግሞ (የተለመደም ነው) ፣ የአሁኑ ቅፅበት ሊቀረፍ እንደሚገባ እንቅፋት ተደርጎ ይወሰዳል። በዘመናችን አኗኗር፣ በየሰው የእለት ኑሮ ውስጥ ጥድፊያ፣ ሰቀቀን እና ጭንቀት የሚነሱትና መደበኛ ሁኔታ የሆኑትም ለዚሁ ነዉ። ህይወት ማለትም አሁን እንደ "ችግር" ታይቷል፣ እናም ከመደሰትህ፣ በትክክል መኖር ከመጀመርህ በፊት ልትፈታቸው የሚገቡ ብዙ ችግሮችን ማኖር ትጀምራለህ። ችግሩ ግን ፣ አንድ ችግር በፈታህ ቁጥር ፣ ሌላ ችግር ደግሞ ብቅ ይላል። የአሁኑ ቅፅበት እንደ እክል እስከታየ ድረስ፣ ችግሮች ፍፃሜ አይኖራቸውም።

3.ሌላው በጣም የከፋና በጣም የተለመደው ደግሞ፣ የአሁኑን ቅፅበት እንደ ጠላት ማየት ነው። የምትሰራውን ስራ ስትጠላ፣ አካባቢህን ስታማርር፣ የሚከሰተውንና የተከሰተውን ነገር ስትረግም፣ ወይም ከራስህ ጋር የምታወራው ነገር በነበርና ባልነበር ሲሞላ፣ ስትወቅስና ስትወነጅል፣ ከሚከሰተው ነገር ጋር ስትጣላ፣ ሁሌም ቢሆን ከዚያ ውጪ መሆን ከማይችለው ክስተት ጋር ስትጣላ፤ ህይወትን ጠላት እያደረክ ነው፤ ህይወትም "የምትፈልገው ጦርነት ነው፣ የምታገኘውም ጦርነት ነው" ትልሀለች።

ከአሁኑ ቅፅበት ጋር ያለህን ብልሹ ግንኙነት እንዴት መቀየር ትችላለህ? በጣም አስፈላጊው ነገር፣ ራስህን፣ ሃሳቦችህንና ድርጊቶችህን መመልከት ነው። በምትመለከትበት ጊዜ፣ ከአሁን ጋር ያለህ ግንኙነት ብልሹ እንደሆነ በምታስተውልበት ጊዜ፣ ህላዌህ ውስጥ ነህ። ተመልካቹ፣ በውስጥህ የሚያንሰራራው ህላዌ ነው። ብልሹነቱን ባየህበት ቅፅበት፣ ብልሹነቱ መክሰም ይጀምራል።

👉 ከወሰን ባሻገር መሆን

ንቁ ከሆንክ፣ ትኩረትህ በአሁን ላይ ብቻ ከሆነ፣ ያ ህላዌ በምትሰራው ስራ ላይ ይፈስና ለውጥ ይፈጥራል። በዚያ ውስጥ ጥራትና ሀይል አለ። የምትሰራው ነገር፣ በዋናነት ለሆነ ግብ (ገንዘብ፣ ክብር፣ አሸናፊነት) መረማመጃ ካልሆነ፤ ይልቁንም በራሱ ምሉዕ ከሆነ፣ በምትሰራው ላይ ሀሴት እና ህያዉነት አለ፤ በህላዌህ ውስጥ ነህ። እንዲሁም ከአሁኑ ቅፅበት ጋር ወዳጅነት ካልፈጠርክ በቀር፣ ህላዌ ውስጥ አትሆንም። የተፈጠርነው ገደብን ለመኖር ብቻ ሳይሆን ከገደብ ባሻገር በመጓዝ በሕላዌያችን እንድናብብ ጭምር ነው።

መፅሀፍ፦ አዲስ ምድር
ደራሲ፦ ኤክሀርት ቶሌ

@Zephilosophy
@Zephilosophy

እውነተኛ ማንነትን ማግኘት

ህይወታቸውን ሙሉ በኢጎ የተያዙ፣ የማያስተውሉና የማያስተውሉ ሆነው የቀሩ ሠዎች፣ ስለማንነታቸው ሲያወሩ ወዲያውኑ ስማቸውን፣ ስራቸውን፣ ግላዊ ታሪካቸውን፣ የሰውነታቸውን ቅርፅና ሁኔታ፣ ሌሎች ሊዛመዷቸው የሚችሉትን ሁኔታዎች ይነግሩሀል። ሌሎች ደግሞ እራሳቸውን ዘላለማዊ ነፍስ ወይም ህያው መንፈስ አድርገው እንደሚያስቡ በመናገር የተሻሉ መስለው ሊቀርቡ ይሞክራሉ። ነገር ግን በእውነት እራሳቸውን አውቀውት ነው ወይስ በአእምሮአቸው ውስጥ መንፈሳዊ-ቀመስ ፅንሰ ሐሳብ እየከተቱ ነው? እራስን ማወቅ፣ የተወሰኑ ሃሳቦችን ወይም እምነቶችን ከመቀበል በላይ ጥልቅ ነው። መንፈሳዊ ሃሳቦችም ሆኑ እምነቶች ጠቋሚ ቢሆኑ እንጂ፣ የሰው አእምሮአዊ ቅኝት አካል የሆነውን ቀድሞ የተገነባውን ጠንካራ የማንነት ፅንሰ ሃሳብ የሚያመክን ሃይል እምብዛም  የላቸውም። እራስህን በጥልቀት ማወቅ፣ በአእምሮህ ዙሪያ ከሚመላለስ ምንም አይነት ሃሳብ ጋር፣ አንዳች ግንኙነት የለውም። እራስን ማወቅ፣ እራስህን በአእምሮህ ውስጥ ከማጣት ይልቅ፣ በህላዌህ ውስጥ መትከል ነው።

👉ማንነቴ ብለህ የምታስበው ማንነት

የማንነት ስሜትህ በህይወትህ ያስፈልገኛል የምትለውንና ቦታ የምትሰጠውን ነገር የሚወስን ይሆናል። ለአንተ ቦታ ያለው ነገር ደግሞ፣ ሊረብሽህም ሆነ ሊያበሳጭህ አቅም አለው። እራስህን ምን ያህል በጥልቀት እንደምታውቀው ለመመዘንም፣ ይኽንኑ መስፈርት ልትጠቀም ትችላለህ። ቦታ የምትሰጣቸው ነገሮች የሚገለፁት በምትናገረውና በምታምነው ብቻ ሳይሆን በድርጊቶችህና በምትወስዳቸው አፀፋዊ ምላሾች ላይ አስፈላጊ እና ቁምነገር መስለው የሚገለጡትንም ያካትታል። እራስህን እንዲህ 'የሚያበሳጩኝና የሚረብሹኝ ነገሮች ምንድን ናቸው?' ብለህ ልትጠይቅ ትችላለህ። ትንንሽ ነገሮች አንተን የመረበሽ አቅም ካላቸው ማንነትህ በትክክል እንደዛ ነው፤ ትንሽ ነህ። ሳታስተውል የምታምነውም ይህንን ነው።

የምር የምትፈልገው ነገር ሰላምን ከሆነ፣ ሰላምን ትመርጣለህ። ከምንም ነገር በላይ ቦታ የምትሰጠው ለሰላም ከሆነ እና እራስህን ከትንሽ " እኔነት" ይልቅ መንፈስ እንደሆንክ በእውነት የምታውቅ ከሆነ፣ ከፈታኝ ሰዎች እና ሁኔታዎች ጋር ስትገናኝ ፍፁም አስተዋይና የረጋህ ሆነህ ትቆያለህ። የተፈጠረውን ሁኔታ ወዲያው ተቀብለህ፣ እራስህን ከማግለል ይልቅ ከሁኔታው ጋር አንድ ታደርጋለህ። እና ከዚያ አርምሞ ውስጥ የሚመጣ መልስ ታገኛለህ። መልሱን የሚሰጠውም ማንነትህ (ጥልቁ ተፈጥሮህ) እንጂ፣ ማንነቴ ብለህ ያሰብከው (ትንሹ እኔ) አየሸደለም። ምላሹም ሀያልና የተሳለጠ ሲሆን፣ የትኛውንም ሠውም ሆነ ሁኔታ ጠላት አያደርግም።

አንተ ኢጎህን አይደለህም፤ ስለዚህ በውስጥህ ያለውን ኢጎ ስታውቅ እራስህን አወቅክ ማለት ሳይሆን፣ ማንነተህ ያልሆነውን አወቅክ ማለት ነው። ነገር ግን በትክክል እራስህን ለማወቅ እንዳትችል ያደረገህን ትልቅ መሰናክል የምታስወግደው ማንነትህ ያልሆነውን ስታውቅ ነው።

ማንነትህን ማንም ሊነግርህ አይችልም። ማንነትህ ምንም አይነት ሀሳብ አይፈልግም። እንዲያውም እያንዳንዱ እምነት መሰናክል ይፈጥርብሀል። ምክንያቱም ሲጀመር የተፈጠርከውን ነህ። ነገር ግን መረዳት ከሌለ፣ ማንነትህ ወደ አለም ብርሀን መምጣት አይችልም።

👉  መትረፍረፍ

የምትረፍረፍ ምንጩ በውጪ የለም። የማንነትህ አካል ነው እንጂ። ነገር ግን ውጪ ያለዉን መትረፍረፍ በማወቅና በማመስገን መጀመር ትችላለህ። በዙሪያህ ያለውን የህይወትን ሙላት ተመልከት። ምነም እንኳን መትረፍረፍ ከተሰማህ ነገሮች ወደ አንተ መምጣታቸው አይቀሬ ቢሆንም፣ መትረፍረፍ እንዲሰማህ፣ ንብረት መያዝ አይጠበቅብህም። መትረፍረፍ፣ ላለው የሚመጣ ነገር ነው። ይህ የዩኒቨርስ ህግ ነው። መትረፍረፍም ሆነ ጎዶሎነት የሚገለጡ የውስጥህ እውነታዎች ናቸው።

👉 መልካም አና መጥፎ

ብዙ ሰዎች በህይወታቸው የሆነ ወቅት ላይ ከመወለድ፣ ከማደግ፣ ከስኬት ከመልካም ጤንነት፣ ከእርካታ እና ከማሸነፍ በተጨማሪ እጦት፣ ውድቀት፣ ህመም፣ እርጅና፣ መጃጀት፣ ስቃይና ሞትም እንዳለ ያውቃሉ። እነዚህም በስምምነት "መልካም" እና "መጥፎ" ፣ "የሰመረ" እና "ያልሰመረ" ተደርገው ይወሰዳሉ። የሰዎች ህይወት "ትርጉም" የሚኖረው መልካም ከተባለው ጋር ሲያያዝ ሲሆን፣ ይህም መልካም የተባለው ነገር ደግሞ ሁልጊዜ የመንኮታኮት፣ የመሰባበር፣ የመበጥበጥ አደጋ ይጋረጥበታል። ህይወት ትርጉም ስታጣና የሚገልፃት ነገር ሁሉ ስታጣ፣ ትርጉም የለሽና መጥፎ በሆነው አደጋ ውስጥ ገብታለች። ፈጥኖም ሆነ ዘግይቶ፣ የትኛውንም የኢንሹራንስ ፖሊሲ ብንገባ ህይወትን የሚያምስ ነገር መምጣቱ በማንም ላይ አይቀሬ ነው። አመጣጡ፣ በእጦት ወይም በአደጋ፣ በህመም፣ በአካል ጉዳት፣ በእርጅና ወይም ሞት ሊሆን ይችላል። ነገር ግን በሰውየው ህይወት ውስጥ የመጣው እክል እና ይሄን ተከትሎ የሚፈጠረው አእምሮ የፈጠረው ትርጉም መንኮታኮቱ፣ ለመለኮታዊው ስርአት በር ከፋች ሊሆን ይችላል።

ሃሳብ፣ ሁኔታዎችና ክስተቶች ልክ የግላቸው ተፈጥሮ ያላቸው ይመስል፣መልካም እና መጥፎ እያልን እንሰይማቸዋለን። በሃሳብ ላይ ባለን ቅጥ ያጣ አመኔታ ምክንያት እውነታ ይሰነጣጠቃል። ይህ መሰነጣጠቅ ወዥንብር ቢሆንም፣ በውዥንብሩ እስከተጠመድክ ድረስ ግን እውነት ይመስላል። ቢሆንም፣ ዓለም ግን እርስ በእርሱ የተሳሰረ፣ አንድም ነገር የብቻው ህልውና የሌለው፣ የማይከፋፈል ህብር ነው። የሁሉም ነገሮችና ክስተቶች በጥልቀት መተሳሰር የሚያመለክተውም "መልካም" እና "መጥፎ" የሚባሉት አእምሮአዊ ስያሜዎች፣ በተጨባጭ ውዥንብር እንደሆኑ ነው። እጅግ የተገደቡ ምልከታዎች ሲሆኑ እውነት መሆን የሚችሉትም በአንፃራዊነትና በጊዜያዊነት ነው። ይሄ በሎተሪ እጣ ውድ መኪና በገዛው አስተዋይ ሰው ታሪክ ውስጥ ውብ ሆኖ ተብራርቷል። ጓደኞቹና ቤተሰቦቹ ስለርሱ ተደስተው በዚያውም ደስታውን ለማክበር መጡ። "በጣም አይገርምም!። እድለኛ ነህ" አሉት። ሰውየውም ፈገግ ብሎ "ይሆናል" አለ። መኪናዋን በመንዳት የተወሰኑ ሳምንታት አጣጣመ። አንድ ቀን ግን፣ የሰከረ አሽከርካሪ በመንገድ መገናኛ ላይ ገጨውና በከፍተኛ ጉዳት ሆስፒታል ገባ። ጓደኞቹና ቤተሰቦቹ ሊጠይቁት መጡ " እንዴት አይነት ክፉ አጋጣሚ ነው?" አሉ። ሰውየው በድጋሚ ፈገግ ብሎ "ይሆናል" አለ። በሆስፒታል በነበረበት ጊዜም፣ በምሽት የመሬት መንሸራተት ተከስቶ መኖርያ ቤቱን ባህር ውስጥ ከተተው። እንደገና በሚቀጥለው ቀን ጓደኞቹና ቤተሰቦቹ መጥተው " ሆስፒታል ውስጥ በመሆንህ እድለኛ አይደለህም ታዲያ?" አሉት። እርሱም መልሶ "ይሆናል" አላቸው።

የአስተዋዩ ሰው "ይሆናል" የሚለው አባባል፣ የሚከሰተውን ሁሉ ለመፈረጅ አለመፈለጉን ያመለክታል። ከመፈረጅ ይልቅ፣ የሆነውን ሁሉ በመቀበል ከመለኮታዊዉ ስርዓት ጋር ንቁ አንድነት ይፈጥራል። ተራ የሚመስል ክስተት በህብሩ ሸማ ውስጥ ምን አይነት ስፍራ ሊኖረው እንደሚችል አእምሮ በፍፁም እንደማይረዳ አውቋል። ነገር ግን ድንገተኛ የሚባል ክስተት የለም፤ በራሱ እና ስለራሱ ብቻ በብቸኝነት የሚኖር ክስተትም ሆነ ሁኔታ የለም። አካልህን የገነቡ አተምች በውስጥህ የሚገኙ ከዋክብት ይመስላሉ፤ እናም የትንሽ ክስተት መንስኤው ወሰን የለሽ እና በማይጨበጥ መልኩ ከህብሩ ጋር የተሳሰረ ነው። የማንኛውንም ክስተት መነሻ ወደ ሗላ ሄደህ መመርመር ከፈለግክ፣ እስከ ፍጥረት መጀመሪያ ድረስ መጓዝ ይኖርብሀል። 

ምንጭ ፦ አዲስ ምድር
ፀሀፊ :-ኤካሀርት ቶሌ

✍ይቀጥላል✍

@Zephilosophy
@Zephilosophy

[የሕሊና ጸሎት]
___
ደምስ ሰይፉ

'አንዳንዶች' ሆይ...
.
.
.
'ሕዝብ' 'ሕዝብ' በሚለው አንደበታችሁ ውስጥ በሕዝብነት ስፍር በምላሳችሁ የምላመጥ ስም የለሽ መሆኔን...
___
ልባችሁ ቅንጣት ፍቅር ሳይኖራት ስለኔ መሰዋታችሁን በመለፈፍ በስሜ የምትነግዱ መሆኑን...
___
ከገዛ ክፋታችሁ አገዛዝ ነፃ ሳትወጡ 'ነፃ አውጭ ነን' ስብከታችሁን በየ አጋጣሚው ስትሰብኩ የማያቀረሻችሁ መሆኑን...
___
ወገኔ ሰው ነው ብዬ ከምኖርበት ቀዬ በመንደርተኛነት ጥንወት ታውራችሁ እንደ አውሬ አሳዳችሁኝ ስታበቁ ስለ ሰብዓዊ መብት ስታወሩ የማያቅለሸልሻችሁ መሆኑን...
___
'ዲሞክራሲ' በማስፈን ስም አገዛዝ ለማንበር እንደምታሴሩና ለዚህ ክፋታችሁ እኔኑ ጭዳ ከማድረግ የማትመለሱ መሆኑን...
___
ያለፈውን 'ጨለማ' የምትተቹት የተሻለ ቀን ለማምጣት ሳይሆን የተረኝነት አዙሪት ለማንበር መሆኑን...
___
ከሰላሜ ይልቅ ወንበራችሁ እያስጨነቃችሁ እንኳ 'የዜጎች መብት ይከበር' የምትሉት በአስመሳይነት መሆኑን...
___
ወ
ዘ
ተ
.
.
.
አ
ው
ቃ
ለ
ሁ
.
.
.
ግና
.
.
.
ዛሬም ተስፋ ሳልቆርጥ የፍትህ ጸሐይ እስክትወጣ የምጠብቀው "የማይነጋ ለሊት የለም" ያሉኝን አምኜ ነው...
___

@Zephilosophy
@Zephilosophy

የብቸኝነትና የባዶነትን ስሜት መጋፈጥ

በውስጣቸው ከራሳቸው ጋር ብቻቸውን የሆኑ፣ አዕምሮና ልባቸው ከብቸኝነት ስቃይ የፀዱ ሰዎች እውነተኞች ናቸው

አዝናኝና አስከፊ ነገር በሞላበት ዓለም ሁሉም ሰው ተሳታፊ ከመሆን ይልቅ ተመልካች መሆኑ አያስገርምምን? አብዛኞቻችን ትንሽ ነፃ ጊዜ ስናገኝ አንድ የሚያስደስተን ነገር እንፈልጋለን፡፡ ከተማ ውስጥ ከሆንን  ቴሌቪዥን ወይም ሞባይል እንከፍታለን ወይም ወሬ እንጀምራለን፤ አለዚያም መፅሀፍ ወይ መፅሄት እናነሳለን፡፡ የመደነቅ የመዝናናት፣ ራሳችንን የመርሳት የማያቋርጥ ፍላጐት አለን፣ ብቸኝነትን፣ ጓደኛ ማጣትን፣ ሳይረበሹ መቆየትን እንፈራለን፡፡ ሳናወራ ወይም ሳንዘፍን በፀጥታ በመስክ ወይም በጫካ ውስጥ እየተራመድን ስለ ራሳችንና በውስጣችን ስላለው ነገር የምናስተውል ጥቂቶቻችን ነን፡፡ አብዛኞቻችን እንዲህ ማድረግ የሚሳነን ስልቹዎች ስለሆንን ነው፤ በመማር ወይም በማስተማር፣ በቤት ጣጣ ወይም በስራ ተጠምደናል፡፡ ስለዚህም ነፃ ጊዜ ስናገኝ በቀላሉ ወይም በከባዱ መደነቅን እንፈልጋለን፡፡ እናወራለን ወይም ወደፊልም ቤት እንሄዳለን - ወይ ወደ አንዱ ሃይማኖት እንዞራለን። ሃይማኖትም አንደኛው ዓይነት ከስልቹነት የማምለጫ መንገድ ሆኗል፡፡

ይህን ሁሉ ተገንዝባችሁ እንደሆነ አላውቅም:: አብዛኞቹ ሰዎች በአንድ ነገር ተጠምደዋል - የተወሰኑ ቃላትን በመደጋገም፣ በዚህ ወይም በዚያ ጉዳይ በመስጋት - ምክንያቱም ከራሳቸው ጋር ብቻቸው መሆንን ስለፈሩ። የሚረብሻችሁ ነገር ሳይኖር ብቻችሁን ለመሆን ብትሞክሩ ምን ያህል ከራሳችሁ መውጣት እንደምትፈልጉና ማንነታችሁን ለመርሳት እንደምትሹ ትገነዘባላችሁ። ለዛም ነው ይህ ግዙፍ የደስታ መዋቅር፣ ፈጣን ረብሻ ስልጣኔ የምንለው ነገር አካል የሆነው:: አስተዋዮች ከሆናችሁ የዓለም ህዝቦች ይበልጥ እየተረበሹ እንደመጡ፣ ውስብስብና ዓለማዊ እየሆኑ እንደሄዱ ትመለከታላችሁ። የደስታው መብዛት፣ አዲስ የሚወጡ ፊልሞች መብዛት፣ የጋዜጦች በስፖርታዊ ጉዳዮች መሙላት - እነዚህ ሁሉ ያለማቋረጥ መደሰትን እንደምንፈልግ ያመለክታሉ፡፡ ውስጣዊ ባዶነት ስላለብን ግንኙነቶቻችንና ማህበራዊ ለውጦቻችን ከገዛ ራሳችን ለማምለጥ እንደ መሳሪያ እንጠቀምባቸዋለን፡፡ ብቸኝነት የወረራቸው ብዙ ሰዎች እንዳሉ አስተውላችኋልን? ከብቸኝነታቸን ለማምለጥ ተሽቀርቅረን ፣ ግብዣ ወዳለበት እንሔዳለን፣ ቴሌቪዥን እናያለን፣ ሞባይል እንነካካለን፤ እናወራለን ወዘተ፡፡

ብቸኝነት ምን እንደሆነ ታውቃላችሁ? አንዳንዶቻችሁ ቃሉን ባታውቁም ስሜቱን በደንብ ታውቁት ይሆናል። ብቻችሁን ሽርሽር ስትወጡ ወይም ከሞባይል ስትላቀቁ ወይ ከሰው ጋር መነጋገር ስታቆሙ ይህ ሁሉ ነገር እንዴት አሰልችቷችሁ እንደነበር ትገነዘባላችሁ፡፡ ይህን ስሜት በደንብ ታውቁታላችሁ፣ ነገር ግን ለምን እንደሰለቻችሁ አታውቁም፤ ምን ብላችሁ ጠይቃችሁም አታውቁም:: ያን ስልቹነት በጥቂቱ ብትመረምሩት መንስኤው ብቸኝነት እንደሆነ ትገነዘባላችሁ፡፡ አብረን መሆን የምንፈልገው፣ መዝናናት የምንፈልገው፣ የሚረብሹንን መምህራን ወይም ምርጥ ፊልሞች የምንሻው ከብቸኝነታችን ለማምለጥ በማሰብ ነው፡፡ ውስጣዊ ብቸኝነት ሲሰማን የህይወት ተመልካች እንሆናለን ፤ ይህን ብቸኝነታችንን ተገንዝበን አልፈነው ስንሄድ ብቻ ተሳታፊዎች መሆን እንችላለን፡፡

ብዙ ሰዎች እንዴት በብቸኝነት መኖር እንደሚችሉ ስለማያውቁ ትዳር ይይዙና ሌላ አይነት ማህበራዊ ግንኙነት ይመሰርታሉ፡፡ ይህ ሲባል ግን አንድ ሰው ብቻውን መኖር አለበት አይደለም። መወደድ ስለፈለጋችሁ ብቻ የምታገቡ ከሆነ ወይም ሰልችቷችሁ ስራችሁን ራሳችሁን እንደ መርሻ ከተጠቀማችሁበት መላ ህይወታችሁ ረብሻን ፈላጊ እንደሆነ ትገነዘባላችሁ፡፡ ከዚህ ልዩ የብቸኝነት ፍርሃት በላይ የሚሆኑ ጥቂቶች ብቻ ናቸው፡፡ ነገር ግን ከዚህ ፍርሃት በላይ ሲኮን እውነተኛው ሀብት ይገኛልና ሁሉም ሰው ፍርሃቱን መብለጥ አለበት፡፡

በብቸኝነትና ብቻን በመሆን መካከል ከፍተኛ ልዩነት አለ፡፡ አንዳንድ ወጣት ተማሪዎች ብቸኝነት ምን እንደሆነ አያውቁ ይሆናል፤ በዕድሜ የገፉት ግን ይህን ጠንቅቀው ያውቃሉ። ብቸንነት ጨርሶ  የመቆረጥ፣ ያለምንም ምክንያት በድንገት የመፍራት ስሜት ነው። አእምሮ የሚጠጋው ነገር ሲያጣ፤ የባዶነቱን ስሜት የሚያስወግድለት ነገር ሲያጣ ይህ ፍርሃት ይሰማዋል። ይህ ብቸኝነት ነው፡፡

ብቻን መሆን - ግን ፍፁም የተለየ ነገር ነው፤ በብቸኝነት ውስጥ አልፋችሁ ስትገነዘቡት የሚመጣ የነፃነት ሁኔታ ነው። በዚያ የብቻ መሆን ሁኔታ ውስጥ ስትሆኑ በስነ - ልቡና ረገድ የማንም ጥገኛ አትሆኑም፡፡ ምክንያቱም ደስታን፣ ምቾትን መፈለጋችሁ ያቆማል፡፡ ይህን ጊዜ ብቻ አዕምሮ ሙሉ በሙሉ ብቻውን ይሆናል፤ ፈጣሪ ይሆናል፡፡

የብቸኝነትን፣ የባዶነትን ልዩ ስሜት የመጋፈጡን፣ ያለ መፍራቱን፣ ስሜቱ ሲመጣ ሞባይል ያለመጠቀሙን፤ በስራ ያለመጠመዱን ወይ ወደሲኒማ ቤት ያለመሮጡን፤ ከዚህ ይልቅ ስሜቱን የመመልከቱን፣ የመገንዘቡን ነገር መፍጠር ያለበት ትምህርት ነው:: ስጋትን የማያውቅ ወይም ያላወቀ ሰው የለም፡፡ ይህንን ስሜት በወሲብ፣ በሀይማኖት፣ በስራ፣ በመጠጥ፣ ግጥሞች በመፃፍ ወይም በልባችን የተማርናቸውን ጥቂት ቃላት በመደጋገም ወዘተ ለማምለጥ ስለምንሞክር ፈፅሞ አንገነዘበውም።

ስለዚህም የብቸኝነት ህመም ሲመጣባችሁ ትታችሁት ከመሮጥ ይልቅ ተጋፈጡት፡፡ ትታችሁት ከሮጣችሁ ፈፅሞ አትገነዘቡትም፤ ሁልጊዜ በየጥጋጥጉ ቆሞ ይጠብቃችኋል። ስሜቱን ተገንዝባችሁ አልፋችሁት ብትሄዱ ግን ማምለጡ፣ መዝናናቱ አስፈላጊ እንዳልሆነ - ትረዳላችሁ፤ አዕምሯችሁ የማይበላሽ፣ የማይነጥፍ ብልፅግናን ይጎናፀፋል፡፡ 

ይህ ሁሉ የትምህርት አካል ነው፡፡ በትምህርት ቤት ፈተና ለማለፍ ብቻ የተወሰኑ ትምህርቶችን የምትማሩ ከሆነ ትምህርት ራሱ ፣ ከብቸኝነት የማምለጫ መንገድ ይሆናል፡፡ ትንሽ ብታስቡበት ይገባችኋል።

በውስጣቸው ከራሳቸው ጋር ብቻቸውን የሆኑ፣ አዕምሮና ልባቸው ከብቸኝነት ስቃይ የፀዳ ሰዎች እውነተኞች ናቸው- ምክንያቱም እውነታውን ከራሳቸው ይረዳሉ፣ ጊዜ የማይወስነውን መቀበል ይችላሉ፡፡

ክሪሽና ሙርቲ

@Zephilosophy
@Zephilosophy

"ምን ሆኛለሁ?"

የግድ ሊያነቡት የሚገባ የስነልቦና መፅሀፍ!

ከአዲስ አበባ ዩኒቨርሲቲ በስነልቦና ሳይንስ ተመርቃ የእርቅ ማዕድ ኘሮግራም መሰራች እንዲሁም እንመካከር የEBS ኘሮግራም ከዛም ባለፈ የአእምሮ ቁስለት (trauma) ላይ ለ17 አመታት የስነ ልቦና ሕክምና ስትሰጥ በቆየችው በ ትዕግስት ዋልተንጉስ እና ከዛዉ ከአዲስ አበባ ዩኒቨርሲቲ በትያትር ጥበባት የመጀመሪያ ዲግሪውን አግኝቶ በተለያዩ የመንግስትና የግል ኘሬሶች ከሪፖርተርነት እስከ ዋና አዘጋጅነት እንዲሁም ሦስተኛው አይን፣ ሰዓት እላፊ፣ ሩብ ጉዳይ እና ከትዳር በላይ ትያትሮችን "ፍልስምና" በሚል ርዕስ 6 መፅሀፍትን በማሳተም ለተደራሲያን እንዲደርስ ባደረገው በቴዎድሮስ ተክለአረጋይ የተዘጋጀ እንደ ሀገር ፈር ቀዳጅ የሆነ መፅሀፍ ነው።

በታመመ ቤተሰብ ውስጥ ማደግ ፈተና ነው፡፡ ፍቅር፣ ትኩረት፣ መደመጥ የምግብ ያህል ይርበናል፡፡ ቤተሰብ ለእኛ ጊዜ የለውም፤ ምናልባት በአደንዛዠ እፅ ተይዟል፤ ቤት ውስጥ ቀን ተቀን የሚደበድብ ወንድም ወይም እህት፣ አክስት ወይም አጎት ይኖራሉ፡፡አንደኛው ወይም ሁለተኛው ወላጅ የአዕምሮ እክል ሊኖርበት ይችላል፡፡ እንደ ችግሩ አይነት ስሜትም ይቀያየራል፡፡ አሳዳጊ ራሱ የተሸከመው የልጅነት የአዕምሮ ቁስል ይኖረዋል፡፡ ወላጆች ከመጠን ባለፈ በሀይማኖት ውስጥ ጠልቆ በመቅረት የልጆችን ፍላጎት ከፈጣሪ አይበልጥም በማለት ረስቷል፡፡ እዚህ ቤተሰብ ውስጥ የልጅ አካላዊ እና ስሜታዊ ፍላጎቶች አይሟሉም ፡፡ በታመመ ቤተሰብ ውስጥ ቤተሰብ ለልጁ እንዴት ማሰብ፣ ፍላጎቶቹን ማስተናገድ፣ ከሰዎች ጋር መቀላቀል እንዳለበት ሚና ተሰጥቶታል፡፡ ልክ እንደ መድረክ ወይም ቴሌቪዥን ድራማ በዚሀ ቤተሰብ ውስጥ ሚና አለን፡፡ አንድ ድራማ ውስጥ የሚጫወት ተዋናይ የተሰጠውን ሚና በደንብ ካልተጫወተ ቦታውን ሊነጠቅ እንደሚችል ሁሉ በታመመ ቤተሰብ ውስጥም ልጆች ሚናቸውን ካልተወጡ ከባድ ችግር ይፈጠራል፡፡

ይህ መጽሐፍ ለየትኛውም አይነት የባህሪ አለመረጋጋት በራሱ መድሀኒት አይደለም። ችግሩን ማወቅ እና መረዳት ለችግሩ መድሀኒት እንዳለውና መድሀኒቱ የት እንደሚገኝ ነው የሚጠቁመው፡፡ ዛሬ ላይ የምናየው ችግር ከአሁን ይልቅ የትናንት የዞረ ድምር ውጤት እንደሆነ ማወቅ በራሱ ለመፍትሔው አንድ መንገድ ነው፡፡ ይህን መንገድ ነው መጽሐፉ የሚያሳየው፡፡ በዚህ መጽሐፍ ማሳየት የፈለግነው ሰዎች ለገጠማቸው ችግር መፍትሔውን የማይገኝበት ቦታ ላይ እንዳይፈልጉ ለማስቻል ነው፡፡ የሰዎች ትናንትና ከዛሬያቸው ጋር እንዲታረቅ (ትናንትናቸው ከዛሬያቸው ጋር እንዲጨባበጥ) ለማስቻል ነው ።

ትዕግስት ዋልተንጉስ

ሁላችሁም ገዝታችሁ አንብቡት ታተርፋበታላቹ።

@Zephilosophy
@Zephilosophy

መላውን ዓለም ከመጨበጥ ይልቅ ራስን መጨበጥ የተሻለ ነው
ኦሾ

ሰው ሲወለድ እንደ ዘር ሆኖ ነው - እንደ አንድ እምቅ አቅም፡፡ ሲወለድ ልከኛ ሆኖ አይደለም፡፡ ይህ ደግሞ በጣም ልዩ ነው - ምክንያቱም በመላው ህልውና ውስጥ ሰው ብቻ ነው አንድ አቅም ሆኖ የሚወለደው፤ ሌሎች እንስሳት ልከኛ ሆነው ነው የሚወለዱት፡፡

አንድ ውሻ ሲወለድ ውሻ ሆኖ ነውና መላ ህይወቱንም እንዲያ ሆኖ ይኖራል። አንድ አንበሳ ሲወለድ አንበሳ ሆኖ ነው፡፡ ሰው ሲወለድ ግን ሰው ሆኖ አይደለም፡፡ ሰው ሲወለድ እንደ ዘር ሆኖ ነው። ሰው ሊሆንም ላይሆንም ይችላል። ሰው የወደፊት ተስፋ አለው! ሌሎች እንስሳት ግን ተስፋ የላቸውም፡፡ ሁሉም እንስሳት ሲወለዱ በደመነፍስ ፍፁም ሆነው ነው፡፡ ሰው ብቸኛው ፍፁም ያልሆነ እንስሳ ነው። ስለዚህም በሰው ላይ እድገት፣ ዝግመተ - ለውጥ ይቻላል።

ትምህርት በእቅምና በልከኝነት መካከል ያለ ድልድይ ነው። ትምህርት በዘር መልክ ራሳችሁን እንድትሆኑ ያግዛችኋል፡፡ በተራ ትምህርት ቤቶች፣ በኮሌጆችና በዩኒቨርስቲዎች እየተሰጠ የሚገኘው ትምህርት አይደለም። በእነዚህ ተቋማት የምታገኙት ትምህርት ጥሩ ስራ፣ ጥሩ ገንዘብ እንድታገኙ የሚያደርጋችሁ ብቻ ነው:: እውነተኛ ትምህርት አይደለም፤ ህይወትን አይሰጣችሁም። በቃ የኑሮዋችሁን ደረጃ ከፍ ቢያደርገው ነው፤ ነገር ግን የተሻለ ኑሮ የተሻለ ህይወት አይደለም፤ ሁለቱ አንድ አይደሉም።

በዓለም የሚሰጠው ትምህርት ተብዬ ነገር ዳቦ እንድታገኙ ብቻ የሚያዘጋጃችሁ ነው። ኢየሱስ እንዳለው «ሰው በምግብ ብቻ አይኖርም::>> ዩኒቨርሲቲዎቻችሁ ደግሞ ይህን ነው እያደረጉ ያሉት - በተሻለ፣ በቀለለ፣ በተመቸ፣ ጥረት፣ ድካም በሌለበት መንገድ ዳቦ እንድታገኙ ያግዛችኋል። ስራቸው በሙሉ እናንተን ዳቦና ቅቤ እንድታገኙ ማዘጋጀት ነው፡፡ ይህ አይነቱ ትምህርት በጣም፣ በጣም ኋላቀር ነው:: ለህይወት አያዘጋጃችሁም፡፡

ስለዚህም ብዙ ሮቦቶች ሲረማመዱ ታያላችሁ:: እንደ ተላላኪዎች፣ የጣቢያ ተቆጣጣሪዎች፣ ዋና ሰብሳቢዎች ብቃት አላቸው:: ፍፁማን ናቸው፣ ጥበበኞች ናቸው:: በጥልቀት ብትመለከቷቸው ግን ለማኞች እንጂ ሌላ ምንም እንዳልሆኑ ትረዳላችሁ፡፡ የህይወትን እንዲት ቅንጣት እንኳን አልቀመሱም፡፡ ህይወት ምን እንደሆነ፣ ፍቅር ምን እንደሆነ፣ ብርሃን ምን እንደሆነ አያውቁም፡፡ ስለ እግዚአብሄር ምንም አያውቁም፣ ህልውናን አልቀመሱም፣ እንዴት መዝፈን፣ መደነስ፣ መደሰት እንዳለባቸው አያውቁም:: የህይወትን ሰዋሰው የማያውቁ መሀይማን ናቸው። አዎ፣ ከሌሎች የበለጠ ያገኛሉ፤ ከሌሎች የበለጠ ብልጣ ብልጦች ናቸው፤ በስኬት መሰላል ከፍ ብለው ይወጣሉ - በውስጣቸው ግን ባዶ፣ ምስኪኖች ናቸው፡፡

ትምህርት ውስጣዊ ብልፅግናን ያጐናፅፋል፡፡ የበለጠ መረዳ መስጠት በጣም ኋላቀር የትምህርት አሰጣጥ ዘዴ ነው። ኋላ ቀር ነው ያልኩት በፍርሃት ላይ የተመሰረተ ስለሆነ ነው፤ ካልተማርኩ በህይወት መቆየት አልችልም፣ በሚለው አስተሳሰብ ላይ የተመሰረተ ስለሆነ ነው። ሗላቀር ነው ያልኩት በውስጡ ነውጥን ስላዘለ ነው፤ ውድድርን ያስተምራችሗል፣ ምኞታም ያደርጋችኋል። ሌላ ምንም ሳይሆን ሰዎች እርስ በርስ የሚጠላሉበት የውድድር ዓለም ለመፍጠር የሚደረግ ዝግጅት ነው።

ስለዚህም ዓለም የእብዶች መኖሪያ ሆናለች። በዚህ ሁኔታ ፍቅር ሊወጣ አልቻለም። አንዱ  የሌላኛውን ጉሮሮ በሚበጥስበት በዚህ ነውጠኛ፣ ምኞታም የውድድር ዓለም ውስጥ እንዴት ፍቅር ሊታይ ይችላል? ሗላ ቀር ነው ያልኩት «በደንብ ካልተማርኩ፣ በቂ ከለላ ካላገኘው፣ ደህና መረጃ ካልያዝኩ በህይወት ፈተና ውስጥ አሸናፊ አልሆን ይሆናል>> በሚል ፍራቻ ላይ የተመሰረተ ስለሆነ ነው። ህይወትን እንደ ትግል ብቻ ነው የሚመለከታት፡፡

እኔ ትምህርትን የማየው ህይወትን እንደ ትግል ሳይሆን እንደ ደስታ ሲቀርፅ ነው፡፡ ህይወት ውድድር ብቻ መሆን የለባትም፣ ደስታ ጭምር እንጂ፡፡ ትምህርት በዓለም ላይ ከሚገኙ ዘፈን፣ ዳንስ፣ ቅኔ፣ ሙዚቃ፣ ስዕል፤ ዛፎች፣ አዕዋፋት፣ ሰማይ፤ ፀሃይ፣ ጨረቃ እና ሌሎች ነገሮች በሙሉ ሊያዋህዳችሁ ይገባል፡፡

ትምህርት ራሳችሁን እንድትሆኑ ሊያዘጋጃችሁ ይገባል። አሁን ግን አስመሳዮች እንድትሆኑ እያዘጋጃችሁ ነው፤ ሌሎችን እንዴት መምሰል እንዳለባችሁ እያስተማራችሁ ነው፡፡ ይህ ትምህርት ማሳት ነው፡፡ ትክክለኛ ትምህርት ራሳችሁን በእውነተኛ መንገድ እንዴት እንደምትሆኑ ያስተምራችኋል። እናንተ የተለያችሁ ናችሁ። እናተን የሚመስል ማንም የለም ፡ ወደፊትም አይኖርም። ይህ እግዚአብሄር ያጐናፀፋችሁ ታላቅ በረከት ነው። ይህ የእናንተ ክብር ነው! ልዩ መሆን ነው፡፡ አስመሳይ አትሁኑ፤ የካርቦን ቅጂዎች አትሁኑ።

እናንተ ትምህርት የምትሉት ነገር ግን ይህን እያደረገ ነው፡፡ የካርቦን ቅጂዎችን ይፈጥራል፤ እውነተኛ መልካችሁን ያጠፋል። <<ትምህርት>> የሚለው ቃል ሁለት ትርጉሞች አሉት፤ ሁለቱም ደግሞ ውብ ናቸው። አንደኛው ትርጉሙ ተግባር ላይ ባይውልም በደንብ ይታወቃል- አንድ ነገር ከውስጣችሁ ማውጣት። <<ትምህርት» ማለት በውስጥ ያለን ማውጣት፣ ውሀን ከጉድጓድ እንደ ማውጣት አቅምን በተግባር ማውጣት ነው።

ይህ ግን አልተተገበረም፡፡ ከዚህ ይልቅ ነገሮች ወደ ውስጥ እንዲገቡ እንጂ እንዲወጡ አልተደረገም። ህብረተሰብ እና ታሪክ፣ ሳይንስ እና ሂሳብ ወደ ውስጣችሁ ያንቆረቁርላችኋል። እናም ፓሮቶች ትሆናላችሁ። ልክ እንደ ኮምፒዩተር ይጉሰጉሱባችኋል:: የእናንተ የትምህርት ተቋማት ነገሮች በጭንቅላቶቻችሁ ውስጥ የሚታጨቁባቸው ስፍራዎች ናቸው፡፡

እውነተኛ ትምህርት በውስጣችሁ የተደበቀውን (እግዚአብሔር በውስጣችሁ እንደ ሃብት ያስቀመጠውን) አውጥቶ፣ ገልጦ አንፀባራቂ እንድትሆኑ ያደርጋችኋል፡፡

ትምህርት ሌላም ትርጉም አለው:: ትምህርት (Education) የሚለው ቃል የመጣው Educare ከሚለው ቃል ነው:: ትርጉሙም ከጨለማ ወደ ብርሃን ማምጣት እንደማለት ነው፡፡ ከጨለማ ወደ ብርሃን ማምጣት በጣም አስፈላጊ ትርጉም አለው፡፡ ዮፓኒሻዶች እንዲህ ይላሉ «ጌታችን ሆይ፣ ከሃሰት ወደ እውነት ምራን፡፡ ጌታችን ሆይ፣ ከሞት ወደ ህይወት ምራን፡፡ ጌታችን ሆይ ከጨለማ ወደ ብርሃን ምራን፡፡» ይህ ነው «የትምህርት» ትክክለኛ ትርጉም፡- ከጨለማ ወደ ብርሃን።

ሰው ግን በጨለማ፣ ባለመንቃት ውስጥ እየኖረ ነው:: ሆኖም በብርሃን ምሉዕ መሆን ይቻላል፡፡ ነበልባሉ እዚያ አለ፡፡ ይሁንና መንበልበል፣ ወደ ውጭ መውጣት አለበት፡፡ ንቃት እዚያ አለ፤ ይሁን እንጂ መቀስቀስ አለበት:: ሁሉም ነገር ተሰጥቷችኋል! ስትወለዱ ይዛችሁት መጥታችኋል፡፡ ሰብአዊ አካል ስላለን ብቻ ሰው ነን ማለቱ ስህተት ነው፡፡ ለዘመናት ለብዙ መሳሳቶች መንስኤ የሆነው ይህ አስተሳሰብ ነው፡፡

ሰው ሲወለድ እንደ አንድ እድል፣ ሁኔታ ሆኖ ነው። ይህን የተጠቀሙበት ደግሞ እጅግ ጥቂቶች ብቻ ናቸው - ኢየሱስ፣ ቡድሀ፣ መሐመድ፣ ባሃውዲን። እውን ሰው የሆኑት እጅግ ጥቂቶች ናቸው- በብርሀን ሲመሉ የቀረ ጨለማ አይኖርም፣ በነፍስ ውስጥ የሚተርፍ አለመንቃት አይኖርም- ሁሉም ነገር ብርሃን ሲሆን፣ እናንተ ንቃትን ስትሆኑ...

ንቃት፣ ንቃት ብቻ፣ ንፁህ ንቃት... ይህ ያለው ብቻ ምሉዕ ይሆናል። ይሄን ጊዜ ህይወት ቡራኬ ትሆናለች።

ትምህርት ከጨለማ ወደ ብርሃን ይወስዳችኋል።

@Zephilosophy
@Zephilosophy

....✍ ካለፈው የቀጠለ

ከስጋዊ አካል ወጥቶ ወደ ንቃተ አካል የሚደረግ ሽግግርም ከሁለንተናዊ ህልውና ጋር የመዋሀድ ሂደት ነው፡፡ ሂደቱ ወደ ውህደቱ መጨረሻ ሲደርስ ልክ እንደ አሊስ ተሞክሮ እኔነት ይጠፋና በሁሉም ፍጥረቶች ምንነት ውስጥ ዘልቀን እንገባና እንዋሀዳለን፤ ሁለንተና እንሆናለን፡፡ የ20 ዓመቷ ኮረዳ ጃኒት ከወንድ ጓደኛዋ ጋር ሆና የኮሲዮስኮን ተራራ ስትወጣ ድንገት ያጋጠማት ስጋ አልባ ጉዞ ይሄንኑ ሁለንተናዊነት የሚያረጋግጥ ነው፣

“ድንገት ከስጋዊ አካሌ ወጣሁና የአካባቢው አካል ሆንኩ፣ አካባቢውን ማየት ሳይሆን እኔ ራሴ ሙሉ በሙሉ የአካባቢው አካል ሆንኩ፤ ከመቅፅበት የዛፎች ቅርፊት፣ የቅጠሎች ህዋስ፣ የአየሩ ሞለክዩል ሆንኩ፤ በአንድ ጊዜ ሁሉንም ነገር ሆንኩ፡፡ በፍቅር፣በሰላምና በደስታ ስሜቶችም ተሞልቼ ነበር፡፡”  (Jeanette's experience 12/05/05)

እግዚአብሔርም የዚህ ውህድ የመጨረሻ መልክ ነው፤ እንደዚህ ዓይነትን ውህድ ምስራቃውያን ሁለንተና (Nirvana, the ultimate) ይሉታል፡፡ እግዚአብሔር የሁሉ ነገሮች ምንነት (Essence)ውህድ ነው ሁለንተና፡፡ እኛ እንደምናስበው እግዚአብሔር ሰዋዊ (ንቁ) ብቻ ሳይሆን፣ እንስሳዊ፣ ቁሳዊ፣ እፅዋታዊ፣ ሰማያዊ (cosmic) ውህድ ያለበት ሁለንተና ነው፡፡ እግዚአብሔር ሁሉም ንቃቶች፣ ሁሉም ዓይኖች፣ ሁሉም ጆሮዎች፣ ሁሉም ስሜቶች፣ ሁሉም ውበቶች... ሁሉም ህጎች፣ ሁሉም ሥርዓቶች፤ ሁሉም ጥበቦች፣ሁሉም ሳይንሶች... ... ነው፡፡ ባሩክ ስፒኖዛም እንዳለው፣ ‹‹እግዚአብሔርና ተፈጥሮ ሁለት የተለያዩ ነገሮች ሳይሆኑ፣ ፍፁም አንድ ነው፤ ተፈጥሮ የእግዚአብሔር ሌላኛው አካሉ ነው፡፡››

ኦሾ ይሄንን ሁለንተና (nirvana) ወይም 7ኛ አካል.. እንዲህ በማለት ይገልፀዋል፤

‹‹ፍፁም ነፃነትና ዕውነት የሚገለፅበት ከአምላክ ጋርም ውህደት የምንፈፅምበት አካል ነው፡፡ እዚህ ሁለንተና ላይ በሕልውናና በሕልውና አልባነት መካከል ልዩነት የለም ሁለንተና ምንምነትና የትምነት ነው፤ ልዩነት የላቸውም፡፡ ሁለንተና ምንምነትና የትምነት ስለሆነ የተከሰተ ነገር አይደለም፤ በቦታና በጊዜም የሚወሰንና የሚገለፅም አይደለም፤ በተወሰነ ህልውናነት ብቻ የሚገለጥም አይደለም፤ ሁለንተና ሁሉም ነገር የትምና መቼም ነው፡፡ ሁለንተና የትምነት መቼምነትና ምንምነት ስለሆነ የመንስዔ ውጤት ዓለምን ተሻግሮ ፍጥረት ከመጀመሩ በፊት ነገሮች በውህደት የነበሩበት የመጀመሪያው ክስተት ነው፡፡››

ከስጋዊ አካል የመውጣትን ክስተት (Astral projection) ከህልም ወይም ከሃሳብ መሰረቅ የተለየ ክስተት መሆኑን ማወቅ ተገቢ ነው፡፡

ህልም ስሜት አልባና የተዛባ ሊሆን ይችላል፣ የንቃተ አካል ጉዞ ግን ትክክለኛና በስሜት የተሞላ ነው፡፡

ህልም ስጋዊ አካል ውስጥ የሚፈጠር ሲሆን ንቃተ አካል ግን ከስጋዊ አካል ወጥቶ የሚሄድና ስጋዊ አካልን ማየትም ሆነ መንካት የሚችል ነው፡፡

ንቃተ አካል የነፃነት፣ የደህንነት፣ የላቀ ንቃት የሚሰማው ሲሆን መብረርና በጠጣር ነገሮች ውስጥ ሳይቀር ማለፍ የሚችል ሲሆን፤ ህልም ግን እነዚህ ስሜቶች አይሰሙትም፡፡

ንቃተ አካል ከስጋዊ አካል ሲወጣና ወደ ስጋዊ አካል ሲመለስ ያለውን ሁኔታ ይገነዘባል፤ ህልም ላይ ግን እነደዚህ ዓይነት ግንዛቤ የለም፡፡

የንቃተ አካል ጉዞ (astral projection) ማንኛውም ሰው ላይ ሊከሰት የሚችል ሲሆን ክስተቱ ድንገተኛ (spontaneous) ወይም ሆን ተብሎ የሚፈፀም ሊሆን ይችላል፡፡ ማንኛውም ሰው የሕይወት ኃይሉን (bio-energy) በመቆጣጠር፣ ከአካላዊ ስሜቶች ነፃ በመሆን (አካልን በመርሳት)፣ አእምሮ ውስጥ የሚመላለሱ ሃሳቦችን ቀስ በቀስ በመግደል፣ የስጋ አልባ ጉዞን ለማጣጣም በራስ ላይ ጠንካራ ፍላጎት በመፍጠር፣ ቁርጠኛ በመሆንና ትኩረትን በከፍተኛ ደረጃ በማሰባሰብ ከስጋዊ አካል ወጥቶ የንቃተ ኣካል ጉዞ ማድረግ ይቻላል፡፡ እነዚህ ሁኔታዎች በተሟሉበት ደረጃ ማንኛውም ግለሰብ ባላሰበው ቅጽበት ስጋ አልባ ጉዞ ሊያደርግ ይችላል፡፡

ስጋ አልባ የንቃተ አካል ጉዞ የተለያዩ ደረጃች ያሉት ሲሆን፣ ደረጃዎቹም የሚወሰኑት የሕይወት ኃይላችን ላይ በሚኖረን የበላይነት፣ የሕይወት ኃይላችን ባለው የጥራት መጠንና በአስተሳሰብ ደረጃዎች ሲሆን፣ እነዚህም ሁኔታዎች ከልምድ ጋር አብረው የሚያድጉ ናቸው፡፡

የንቃተ አካል ጉዞ አካላዊ የውስጥ ለውስጥ ምልከታንም (internal autoscopy) ሊያካትት ይችላል፡፡ ይሄ ምልከታ የራስን የውስጥ አካል አሠራር፣ አደረጃጀትና የርስበርስ መስተጋብር (ለምሳሌ የደም ዝውውርን) መመልከት የሚያስችል ነው፡፡ ስጋ አልባው ጉዞ የትንቢትና የኋላ ምልከታም አለው፤ ወደፊት ምን እንደሚከሰት፣ ወደኋላ ደግሞ ስጋዊ አካል ውስጥ ከመግባትህ በፊት እንዴትና ምን እንደነበርክ መመልከት ያስችልሃል፡፡

በስጋ አልባ ጉዞው ያገኘውን ልምድ ፅፎ በኢንተርኔት ያሠራጨው ሎሪ አን አልቫሬዝ፣

“ሽብርተኞች፣ በአሜሪካ መንትያ ህንፃዎች ላይ መስከረም 11፣ 2001 ላይ የፈፀሙትን አደጋ፣ በአሜሪካዋ ኮሎምቢያ መንኮራኩር ላይ የደረሰውን አደጋ፣ እናቴ ያጋጠማትን የቆዳ ካንሰር፣ የእህቴን የደም መዛባትና ሌሎች ጥቃቅን ድርጊቶችን ሁሉ አስቀድሜ አይቻለሁ፡፡” ይላል፡፡

ስጋ አልባው ጉዞ የርስበርስ ምልከታንም (extra pysical) መከወን ያስችላል፤ በዚህ የርስበርስ ግንኙነት ውስጥ እያንዳንዱ ንቃተ አካል ከሌሎች ስጋዊ ሰዎች ጋርም ሆነ ከሌሎች ስጋ አልባ አካሎች (ንቃተ አካሎች) ጋር ግንኙነት መፈጸም ይችላል፡፡ በመፅሐፍ ቅዱስ ውስጥ ብዙ ነቢያት ትንቢት መናገር፣ ማየትና ከመለኮት ጋር መገናኘት የቻሉት በስጋ አልባው የንቃተ አካል ጉዞ ነው፡፡ ሐዋርያው ዮሐንስ፣ ‹‹በጌታ ቀን በመንፈስ ነበርኩ፣ በኋላዬም የመለኮትን ድምፅ የሚመስል ታላቅ ድምፅ ሰማሁ፤›› ብሎ የፃፈውም ሆነ፣ ቅዱስ ጳውሎስ

“ከጌታ ወዳለው ራእይና መገለጥ እመጣለሁ፡፡ ሰውን በክርስቶስ አውቀዋለሁ፤ በስጋ እንደሆነ አላውቅም፤ እግዚአብሔር ያውቃል፡፡ እንዲህ ያለው ሰው ከ14 ዓመት በፊት እስከ 3ኛው ሰማይ ድረስ ተነጠቀ፤ ወደ ገነት ተነጠቀ፤ ሰውም ቢናገር የማይገባውን የማይነገረውን ቃል ሰማ፡፡...›› 2ቆሮ.12 ÷ 2 – 4

ብሎ የፃፈው ሁሉ በስጋ አልባው የንቃተ አካል ጉዞ ወቅት የተፈፀመ ነው፡፡

@zephilosophy
@zephilosophy

ከስጋ እስር ቤት መውጣት፤ መቼምነትና የትምነት

ምንጭ ፦ ፍልስፍና ፩
ደራሲ፦ ብሩህ አለምነህ

በትርፍ አንጀት በሽታ ክፉኛ የምትሰቃየው Laura H. ኦፕራሲዮን ለመሆን ማደንዘዣ ተሰጥቷት ራሷን ስታ ተኝታለች፡፡

“እንደ ድንገት ግን ኦፕራሲዮን በምደረግበት ክፍል ውስጥ ከስጋዊ አካሌ ወጥቼ ኮርኒሱ ስር ሆኜ ዶክተሮቹ የኔን አካል ኦፕራሲዮን ሲያደርጉት እመለከት ጀመር፡፡ ዶክተሮቹ የሚያወሩትን ነገር ሁሉ እሰማ ነበር፡፡ ዶክተሮቹ የሚያወሩት ስለአንዲት ስለሚያውቋት ሴት ነበር፡፡ እኔ ሊገባኝ ባይችልም ስለውስጥ አካሌም እያወሩ ነበር፡፡ ከማደንዘዣው ስነቃ ታዲያ ዶክተሮቹ ሲያወሩት የነበረውን ነገር ብነግራቸውም፣ እነሱ ግን ‹‹ሰዎች ማደንዘዣ ሲወስዱ አስቂኝ ህልሞችን ያያሉ፤›› ብለው ቢያስተባብሉም ንግግሬ እንደረበሻቸው ግን ፊታቸው ላይ ያስታውቃል፡፡ ከዚያ በኋላ ሊያናግሩኝ እንኳን አልፈለጉም፡፡››

ሁላችንም በስሜት ህዋሶቻችን መታሠራችንን፣ በስጋም መወሰናችንን ይታወቃል፡፡ አዲስ አበባ እየኖርን በተመሳሳይ ሰዓት አውሮፓ ላይ ምን እየተደረገ እንደሆነ አለማወቃችን በርግጥም በስጋ በመወሰናችን ነው፤እዚህ ቁጭ ብለን ከጀርባችን ምን እየተደረገ እንደሆነ አለማየታችን በርግጥም ንቃታችን ስጋችን የቆመበትን ስፍራ ማዕከል አድርጎ የስሜት ህዋሶቻችን የተዘረጉበት አድማስ ድረስ ያህል ብቻ የተወሰነ ስለመሆኑ ማረጋገጫ ነው፡፡

ንቃታችን በስሜት ህዋሶቻችን አድማስ ያህል የተወሰነ ቢሆንም ይሄ ግን የመጨረሻው እውነት አይደለም፡፡ ከስጋ ባርነት ነፃ የሚወጣ፣ ከስሜት ህዋሶቻችንም ድንበር የሚዘል ሌላ ንቃተ አካል እንዳለን የአንዳንድ ሰዎች ተደጋጋሚ ተሞክሮ ያሳየናል፡፡ ይህ ንቃተ አካል፣ ስጋዊ አካላችንና የስሜት ህዋሶቻችን ያሉባቸውን ድክመቶችና ውስንነቶች ሁሉ አካክሶ የሚገኝ ነው፡፡ በጊዜ አይወሰንም፤ ያለፈውን፣ የአሁኑንና የወደፊቱን ማየት ይችላል፡፡ በጠጣርና ብርሃን ማለፍ በማይችልባቸው ነገሮች ውስጥ ሁሉ በንቃት ማለፍ ይችላል፡፡ ከላይ የቀረበው የሎራ ተሞክሮም ይህንኑ የሚያሳይ ነው፡፡

ስጋዊ አካል ከንቃተ አካል የተለየ ነው፡፡ ንቃተ አካል ስጋዊ አካል ውስጥ ገብቶ የሚኖር ቢሆንም በራሱም ግን ከቁሳዊ ባሕርይ በላይ የሆነ የተለየ ህልውና አለው፡፡ ስጋዊ አካል ቁሳዊ የሆነና በስሜት ህዋሳቶቹ አማካኝነት ከቁሳዊው ዓለም ጋር የሚግባባ ሲሆን፣ ንቃተ አካል ግን ስጋዊ ኣካልን እንደ ልብስ የሚጠቀምና ቁሳዊ ያልሆነ ህልውና ነው፡፡ ንቃተ አካል ከስጋዊ አካል ወጥቶ ሲሄድ ስጋዊ አካል በድን ሆኖ ይቆያል፤ በዚህ ወቅት በስጋዊ አካል ፈንታ ንቃተ አካላችን ብዙ ነገሮችን እየተከታተለ ይቆያል፡፡

ይህ ንቃተ አካል ነፍስ ብለን የምንጠራው ነገር ይሁን፣ አይሁን አላውቅም፡፡ ፕሌቶ ግን ከዛሬ 2300 ዓመት በፊ ስለ ነፍስ እንዲህ ብሎ ነበር፤

"የሰው ጥንተ ተፈጥሮ (ምንነት) ያለው ነፍሱ ላይ ነው፡፡ ነፍስ በስጋ ከመታሰሯ በፊት የራሷ ሕልውና የነበራትና ከስጋ መሞት በኋላም ሕያው ሆና የምትኖር ናት፡፡”

ይቺ ነፍስ እንደፈለገች ስጋችን ውስጥ ግብት ውጥት የምትል አይደለችም፡፡ አሁን እያወራን ያለነው ግን ሞት የሚባለውን ክስተት ሳያስከትል ወደስጋዊ አካላችን ግብት ውጥት ስለሚለው ንቃተ አካል ነው፡፡

እንደዚህ ዓይነት ክስተት በሩቅ ምሥራቅ ሀገሮች መንፈሳዊ ሕይወት(ተመስጦ) ውስጥ የተለመደ ቢሆንም በምዕራባውያን ሳይንቲስቶችም በተደጋጋሚ የተስተዋለ ክስተት ነው፡፡ መቀመጫውን ለንደን ያደረገውና በዚሁ በንቃተ አካል ላይ ትኩረት ያደረገው International Academy of Consciousness (IAC) የተባለው ተቋም አንድ ጥናት አድርጎ ነበር፡፡ የጥናቱ ዋነኛ ዓላማ ንቃተ አካል ከስጋዊ አካል ተለይቶ መሰብሰብ በሚችላቸው መረጃዎች ላይና መረጃዎቹንም ወደ ስጋዊ አካል (አእምሮ) የሚተላለፍባቸውን ሂደቶች ማጥናት ነው፡፡ አምስት የተለያዩ ምልክቶች ተዘጋጅተው ስፔን፣ ፖርቹጋል፣ አሜሪካና እንግሊዝ እንዲቀመጡ ተደረገ፡፡ ሙከራው ምን ያህል አዋጭ እንደሆነና የውጤቱን አስተማማኝነትም የሚያረጋግጡ ኦዲተሮችና ዳኞች ሁሉ ተሳትፈዋል፡፡

የጥናቱ ውጤት በ2002 ኒዮርክ በ3ኛው ዓለማቀፍ Projectiology ጉባኤ ላይ ይፋ ሆኗል፡፡ ለሙከራው ፈቃደኛ ሆነው ከተሳተፉ 105 ሰዎች መካከል 52ቱ 93 የተለያዩ መረጃዎችን ከስጋዊ አካላቸው በመውጣት በንቃተ አካላቸው መሰብሰብና ሪፖርት ማድረግ ችለዋል፡፡ በጥናቱ መሠረት ንቃተ አካል የነገሮችን ቅርፅና ቀለማት ኬሌሎች መረጃዎች በተሻለና በቀላሉ መለየት ይችላል፡፡

“ከስጋዊ አካሌ ውጭ ነበርኩ፤ ሁሉም ነገር አስደስቶኛል፡፡ በስጋ አልባው ንቃተ አካል ውስጥ ሆኜ መጀመሪያ የተገነዘብኩት ነገር የንቃተ ህሊናን በሁሉም ስፍራ የመገኘት እውነታ ነው፡፡ ሁሉንም ነገሮች በሁሉም ደረጃ መመልከት ችያለሁ፤ ሌላው ይቅርና ወደ ቢራቢሮነት ለመፈልፈል የተዘጋጀው ዕጭ (caterpillar) የሚሰማው ስሜት ሳይቀር ተሰምቶኛል፡፡ ሕይወት በሁሉም ደረጃ እኩል እንደሆነና በሁሉም ፍጥረቶች ውስጥ ያለው የንቃት ደረጃ ተመሳሳይ እንደሆነ ተመልክቻለሁ፤ ዋጋቸውም ከእኛ ከሰዎች ያላነሰና የከበረ ነው፡፡ የሁሉም ፍጥረቶች ምንነት ሞለኪዩል ጀምሮ የፍጥረት ተሰምቶኛል፤ከእያንዳንዷ የትየለሌነት፣ አስገራሚነትና ውበት ተሰምቶኛል፡፡ ከዚያም ወደ ህዋ ተጓዝኩ፤ በዚያም ማለቂያ የሌለው አውታር (dimension) እና ማቆሚያ የሌለው ፍጥረት እንዳለ ተመልክቻለሁ፡፡ በዚያ ከምናስበው በላይ የሆኑ እጅግ በርካታ ነገሮች አሉ፡፡” (Aliece's Out of Body Experience associated with nitrous oxide at Dentist office, reported on 15 July 2007)

ይሄ የአሊስ ተሞክሮ ንቃተ አካል ከስጋዊ አካል ሲወጣ ወደ ሁለንተናነት ሊያድግና ሊዋሀድ እንደሚችል የሚያስገነዝበን አጋጣሚ ነው፡፡ በዓለም ላይ ያሉ ነገሮችና ክስተቶች ሁሉ እርስበርስ የተቆላለፈ መስተጋብር እንዳላቸው ሁላችንም የምናውቅ ቢሆንም፤ ይኼኛው ተሞክሮ ግን የፍጥረታትን ሁሉ የአንድነት ህልውና የሚያስገነዝበን ነው፡፡ አሊስ በዚህ ተሞክሮዋ የጠፈርን ሥርዓት፣ህግና ሚዛን ተገንዝባለች፤ እሷ ራሷም የዚህ ሥርዓት አካል እንደሆነች ተገንዝባለች፡፡ ኦሾ፤ ሰው ሰባት አካሎች እንዳሉት ይጠቅስና ስለ 6ኛው ፅንፈዓለማዊ አካል (cosmic body) ሲናገር እንዲህ ይላል፤

“እስከ 5ኛው አካል (physical body, etheric (emotion) body, astral body, mental & spiritual body) ድረስ ከ‹‹እኔነት›› ማዕከል መላቀቅ አይቻልም፤ ከ5ኛው ወደ 6ኛው አካል (cosmic body) ስንሸጋገር ግን የእኔነት ማዕከል ይጠፋል፤ ልዩነት ይጠፋል፤ ወሰን አልባና በሁሉም ነገር ውስጥ በንቃት የምትገኙ ውህድ ሁለንተና ትሆናላችሁ፡፡"

ይሄንን ሁለንተናዊ የሆነ ህልውና እንደ ውቅያኖስ ውሰዱት፤ ውቅያኖሱ በውስጡ የተናጠል ህልውና ያላቸው የሚመስሉ፣ ሆኖም ግን የእሱ አካል የሆኑ ብዙ ዓይነት ፍጥረቶችን ይዟል፡፡ በየአካባቢው ያሉ ወንዞች፣ ሀይቆች፣ ባህሮች፣ ዝናብና በሁሉም ነገር ውስጥ ያለው እርጥበት ሁሉ የውቅያኖሱ አካል ናቸው፡፡ እነዚህ በዓይነትና በህልውና የተለያዩ የሚመስሉ የውቅያኖሱ ክፍሎች ሁሉ ወደ ውቅያኖሱ ሲገቡ ፍፁም ውህድና አንድ ይሆናሉ፤ የህልውናቸው ልዩነት ይጠፋና ሁለንተናዊ የሆነ አንድ ህልውና ውስጥ ይጠቃለላሉ፡፡

✍ይቀጥላል✍

@zephilosophy
@zephilosophy