نبذه بسيطه عن قسم المعلوماتية الصحيه
منقول من الدكتوره فاطمه عيسى ?

باقي #نبذه_عن_قسم_التثقيف_الصحي✍??️
المادة تقسيمها يختلف كل سنة نحنا كان تقسيمها 18 جزئي و درجتين ورقة بحث و 60 فاينل و برضو 20 للزيارات ?

الزيارات الميدانية ❤️ حتديروهن يوم في الاسبوع، تمشو لمكان محدد و معاكم مانيوال فيه اسئلة تحطو أجوبتها من خلال الي فهمتوه في الزيارة للمكان هذا و بعدها تسلمو الاوراق و تديرو قروب ديسكشن مع دكاترة القسم يسألوكم على الزيارة و تجاوبو، الدرجات على الحضور لمكان الزيارة و على اجابات المانيوال و اجاباتكم في الديسكشن مع الدكاترة ?

و هذينا المواد الي في سنة ثالثة و نظامهن و ان شاء الله تتوفقو في المجال هذا و تحبوه كيف ما انا خشيت في القسم و حبيته ?

منقول من ساجده العمروني ?

5/#نبذه_عن_قسم_التثقيف_الصحي✍??️
على مستوى عالمي هو مجال مهم جدًا لانه مجال وقائي بالدرجة الاولى و علاجي بالدرجة الثانية يعني المثقف الصحي وظيفته حماية المجتمع من الامراض و المشاكل الي لها اثر سلبي على صحة الافراد و معالجتها و

المشاكل هذي مش شرط تكون مشاكل طبية ممكن تكون مشاكل نفسية او اجتماعية.

دورك الاساسي كمثقف صحي هو تعزيز صحة الافراد و تزويدهم بالمعرفة و المعلومات الي تفيدهم و تهمهم و ابسط مثال ع اهمية دورنا كمثقفين هو الاحداث الي صارت بعد اعصار دانييل شفتو كيف كان لازم من وجود مثقفين صحيين لتوعية الناس بالمشاكل الصحية و النفسية و الاجتماعية الي ممكن يتعرضولها.
ميزة المجال هذا هو انك وين ما تنحط تلقى شغل.

المدارس المستشفيات المراكز الصحية النوادي الرياضية الشركات المصارف يعني اي مكان فيه مجموعة من الناس.
و طبعا عندنا نحنا ادارة الخدمات الصحية تتعين و تتوظف فيها كمثقف صحي و مراكز الرعاية الصحية الاولية الي في كل مكان في بنغازي فيهن مكاتب للتثقيف الصحي جزء بسيط منها مفعل و جزء كبير مش مفعل لان مافيش حد يشتغل فيه

لذلك سوق العمل محتاج بشدة لمثقفين صحيين يشتغلو في الاماكن هذي، كل مركز رعاية صحية اولية فيه مكتب للصحة العامة فيه اخصائي مكافحة العدوى و اخصائي تغذية و اخصائي ضمان الجودة و معاهم اخصائي توعية و تثقيف صحي و هذا مكان العمل الرسمي و الاول في الدولة للمثقف الصحي.

قسم التثقيف الصحي في جامعة بنغازي هو ثاني قسم يفتح على مستوى الشرق الاوسط، اول قسم للتثقيف الصحي فتح في السعودية في جامعة الملك سعود. يعني جامعتين في الشرق الاوسط بس الي يعطن شهادة بكلريوس تثقيف صحي جامعتنا و جامعة الملك سعود و فتحوه بعد ما شافو كيف ان الدول الاوروبية و امريكا يعطو في المجال هذا اهمية كبيرة و الشرق الاوسط مازال متأخر في مواكبة المجالات الي تحسن من مستوى الصحة.
بالنسبة للمواد سنة ثالثة حتكون فيها عشر مواد:

مواد عامة:
١-تشريعات صحية
٢-معلوماتية صحية
٣-طرق بحث
مواد مشتركة:
١-طب شرعيForensic
٢-امراض معدية و غير معدية CD
مواد للقسم:
1-طرق و اساليب التثقيف الصحي/ methods and materials of health education
2- Growth and development/ النمو و التطور
3- health promotion issues/ قضايا تعزيز الصحة
4- foundation of human behavior/ اساسيات السلوك البشري
5- Social and cultural determinants of health/ المحددات الثقافية و الاجتماعية للصحة
methods تتعلمو منها طرق التثقيف و الاساليب الي تستخدموها عشان تطبقو الطرق هذي و الوسائل الي من خلالها حتديرو التثقيف و كيف برضو تدربو اشخاص على انهم يثقفوا مجموعة من الناس و حتلقو فيها حاجات شوية تشبه الي قريتوه في مادة التثقيف سنة ثانية و تقسيم الدرجات 20 جزئي 20 تطبيق عملي و 60 للفاينل. الجانب النظري دكتورة هند و الجانب العملي استاذ نور الدين عمران حيعلمكم كيف تستخدمو وسائل التثقيف و يدربكم عليها و العملي ممتع جدًا حتتقسمو مجموعات و تجهزو محتوى توعوي و تختارو وسيلة تثقيف مثلا راديو فيديو الخ و تدربو عليه باستخدام المعدات (كاميرا مايكروفون الخ) و يتم عرض المحتوى الي درتوه تقييمكم بناء عليه

بالنسبة growth and development حتقرو فيها مراحل تطور الانسان من ناحية جسدية و وظيفية من فترة الحمل لعند الولادة و بعدها من الطفولة للشيخوخة كل مرحلة تقروها بروحها من ناحية تطور جسدي (جزئية دكتورة اسماء بالخير) و من ناحية تطور عقلي و وظيفي (جزئية دكتور هيثم بعيو) و تقسيم الدرجات 20 جزئي و 60 فاينل و في عشرين درجة للزيارات الميدانية. المادة جميلة و مش صعبة ممكن جزئية دكتور هيثم واجدة و تبي واحد يقراها اول بأول اما الباقي يبي فهم بس و مش صعب. ❤️

مع دكتورة فاتن القطراني حتفهمو مادة health promotion او تعزيز الصحة و شن وظيفته و أهميته و شن الفرق بينه و بين التثقيف الصحي و شن هي طرق تعزيز الصحة و كيفية تطبيقها و تقييمها و المادة تبي تركيز و قراية اول بأول عشان لو تراكمت حتكون قرايتها صعبة للامتحان. تقسيمتها برضو 20 جزئي و 60 فاينل و 20 للزيارات و دكتورة فاتن تدير في كويزات و تطلب منكم تديرو برزنتيشن واحد مهم تديروهن. ?

بالنسبة behavior حتلقوها متشابهة مع الميثودز واجد و المادة حتفهم منه طبيعة سلوك الانسان عشان تعرف كيف تأثر عليه لما تبي تديرله تثقيف و توعية بناء على طبيعة سلوكه و طرق التواصل الفعالة و انواعها. المادة 30 جزئي 70 فاينل دكتورة ريما مرسال و دكتورة لمياء. ?

اخر مادة السوشال social and cultural determinants حتاخذوها مع دكتورة عائشة النجار و دكتورة زينب زهري حتفهمو من خلال المادة هذي الجوانب الاجتماعية و الثقافية الي لها اثر على الصحة شنو هي الجوانب هذي و شنو اثرها على الصحة و كيف تقدر تحسن من مستواها و كيف تقدر تحددها.

4/ #نبذه_عن_قسم_الإدارة_الصحية ??‍???‍?⏱️
عندها عشر مواد
نبدو من الاصعب للاسهل و ح نبدأ بالخمس مواد
لانه كل تخصصات عندهم خمس مواد مشتركة الي هن ( فرونسك، ريسيرش، كمبيوتر، التشرعات ، CD , ) بس المادتين الوحيدات الي نفس منهج ونفس دكاترة هن الفرونسك و CD اما مواد تلاته لخرات كل تخصص ع حسب دسامة المادة او ع حسب منضور القسم اما كمبيوتر هو نفس شيتات ونفس دكتور للإدارة وتغذية.
1_ #Accounting
محاسبة اوعر مادة في تاريخ كله مادة مش تخصص بس عطوها قالو عشان ما يضحكوش عليكم بعد تشتغلو في مستشفيات ? قالو بيش تقعدو عارفين كل شي هي تخليك تعرف مثلا لو قعدت رئيس قسم اي قسم مثلا قسم الأورام يعطوك ميزانية كيف تقدر تصرفها في قسم وهكذا كانو يبو يخلوها انجلش بس طلبة دارو احتجاج لانها والله واعرة وصعبة تبيلها قراية بشوية بشوية من توا نصيحه لازم تأمنو حد يقريها لكم ماتعبوش ع جامعة
2_ #health_Administration
أصعب مادة في القسم وهي مادة تخصص
تحكي على ادارة الصحية الي في مستشفيات وفيها كورسات واجد بككككل وتلخبط يعطو فيها 3 دكاترة
دكتور فتحي ، دكتورة فاطمه و دكتورة فاتن
مادة عندها #اورال نحن كنه اول دفعة نديروها مادة سمحه وممتعة بس متعبه تبيلها جهد
وفيها زيارات للعيادات قبل وفي رابعة ان شاءالله مستشفيات لانها انتم تالته لازم تعرفو نظام العيادات المجمعة قبل بعدها مستشفيات العامه الاورال عشر درجات و زيارات عشر درجات .
3 _ #Fronsic
مادة دسمه جدا نفس منهج بشري نزلونا شيت في دور اول 40 Mcq بس كاين اغلب درجات شورت نوت شيتات نهائي كلهن كانن شورت نوت مادة كويسة تستفسدو منها واجد وتحيطكم بمعلومات مهمة جدا في حياتكم المهنية
4_ #planning
مادة هذي يعطي فيها اكيد تعرفو دكتور محمد الفلاح بس منضنيش ح يعطي سنه هذي بس معاه دكتورة تجديدة ودكتورة عطاتنا اول مرة هي دكتورة ايمان جديدة بس والله لو ماعطكمش الفلاح سنه هذي يقعد يستر الله لانه مادة دسمه بككل وتبيها عقل يشتغل تحكي على تخطيط وأستراتجيات تخطيط وتفصل نظام الصحي في ليبيا وفي دول الاوروبية، وفي عالم وتوضح في ليييا قطاع صحة كيف ماشي ومن وين الفلوس وتحكي ع منضمات الصحة العالمية في جزئية دكتورة تجديدة بالتفصيل لكل منظمة صحية في العالم.
مادة تعرفكم بالصحة العامه بصورة كلية ومفيدة طبعا خذينا تحليل درنا اسمه analysis swo S-W-O-T اقرو عليها ع غوغل وعليها 10 درجات انا درتها كل شي من راسي الكلام وهك خذيت 10 ❤ تحكو على موضوع برنامج صحي و ديرو .
5_ #Research
البحث او طرق البحث انتم ك أطباء صحة عامة لازم تقعدو مش دكاترة بس لا ، لازم من انكم تقعدو باحثين علميين حطوها في بالكم
توريكم كيف ديرو بحث العلمي، ومعاها proposal الي هو (مقترح البحث مشروع تخرج بتاعكم ) يعطي فيها برضو دكتور محمد فلاح بس ومعاه دكتورة لمياء و ودكتورة ايمان
طبعا بروبوزال عليه 10 درجات
اقسام لاخرة مادروش زينا معلوماتية و البيئة دارو زي مشروع متكرر او قديم واقسام لاخرة لغو لهم بس نحن درنا كأنه مشروع تخرج
الشق العملي ماسكته دكتورة ايمان العقيلي يشلوكم للقسم تختارو كم مشروع قديم تعطو بطقاتكم للسكرتيرة تروحو بيهن للحوش دكتورة ايمان تعطيكم أوراق فيهن اسئلة تجاوبو علين كلهن 10 درجات مادة مهمة جدا للصحة العامه
6_ #Computer

مادة غليظة بكل بس صعب امتحاناتها لازم ما تقروها اول بأول فيها معمل كمبيوتر نجاح معمل من 12/20
7_ #health economic
مادة بالعربي بس فيها رسم بياني وفيها مسائل كويسة يعني بس فيها افكار تحكي على الاقتصاد الصحي كيف مستشفيات كيف انهن مقسمات فرق بين القطاع خاص وعام وشن علاقة الإدوية والمستلزمات الطبية وكلام واجد المهم يعطي فيها دكتور علي غزالي محاضراته يهبلن ويدير في حلقة نقاشات بينه وبين طلبة وديمه يخلي فينا نفطرو قبل محاضرة مايبدش في محاضرة دغري
#ملاحظة راه دكتور علي غزالي ومحمد فلاح ياخذو في حضور وغياب ، دكتور غزالي كاين يبي يدير بحوث بس ماصارش، مادة كويسة يدير في كويزات
8_ #CD communicable diseases and non communicable diseases
امراض معدية وغير معدية بس في شيتات صعبات وفي سهلات ف تعتبر مادة وسط تحكي ع اي وباء تشبه شوية الابدو وشوية من بارا يعني بنت خالة الابدو وبنت عم البارا تبيلها تركيز وتلخيص وحفظ
9 #Legislation_health
التشرعات الصحية كتاب كبير ويدره الكبد يحكي ع القوانين عطانا استاذ علي السايح قوانين الصحية ويحكي ع الصحة العامه وشن قوانينها وقوانين الصيادلة والممرضين واخصائيين وكل موظف ويحكي حتي ع اجازة العمل زي اجازة الامومة و الحج وكل شي ما يتعلق بالقوانين الصحية نحن أصعب تشرعات في كل الأقسام بس كتاب مهمة ننصحكم خلو ديمه عندكم تستفيدو منه في مستقبل .
10 #public_health
مادة يعطي فيها دكتور غزالي مادة كيوت تحكي فرق بين قطاعات العام والخاص
ربي يوفقني ويوفقكم ادعولي معاكم ?

منقول من سندس البرغثي ?

3/#نبذه_عن_قسم_الصحه_البيئيه??

هنا 10 مواد عندك مادتين مشتركه بين التخصصات كلهن الي هنا فرونسك وCD
الفرونسك طب شرعي تلخبطك في البدايه بس هيا كويسه والدكتور اخر السنه دار اربعين امسكيو وجابهن بوجهن نفس السنه الي قبلنا يعني اربعين درجة ان شاء الله مضمونات ?

وعندك ال CD دسمه شويه بس ساهل كلام مكرر يعتبر ونبدو في مواد التخصص هنا في مواد عندنا نفس الاسم مع التخصصات الاخري بس المنهج مختلف يعني كل تخصص والحاجه المتعلقه بيه ?

المواد هنا :- تشريعات وانفورماتك وريسيرش

التشريعات بالعربي وكلام قانون ومواد قانونيه والجو هذا تبي حفظ بس ومش صعبه امتحان الفاينل جاء كل سؤال امسكيو وصح وخطا عليه ثلات درجات ❤️

والانفورماتك ماده خفيفه والدكتوره خيالي يشرح بضمير ولو تبي مساعده عادي بكل ويحب الحضور وياخد فيه وفيها امتحان عملي مافش اسهل منه ?

والريسيرش هيا مادة بحوث حتستفيدو منها في رابعه يعني كيف اديري بحث التخرج والخطوات ?

التحليله تبي قرايا اول بأول بس وتمشي والامتحاناات مش صعبات جن كلهن بالمعمل

وعندك البيست هذي بنت عم البارا غير اكبر منها بشويا واجده بس ساهل وقريا اول بأول عشان تفرق بين الحشرات وهكي والجزئي امشي مع تشيير دكتوره اسماء الامتحان ايجي منه والمعمل طالب معانا هو الي دار الشيت تقريبا كل سنه هكي والامتحان مايطلعش منه

والايكولجي هذي تخصصنا هيا والكميونتي حاجات شور البيئه كلامهن ع الميه والثلوت والمجتمعات والجو هذا بسيطات

واخر حاجه المايكرو معروفه طبعا كيف كل سنه
ان شاء الله بالتوفيق ?..

منقول من أية العريبي ?

2/#نبذه_عن_قسم_المعلوماتية_الصحية ??‍???‍?

أولا ما معنى المعلوماتية الصحية ?
هو قسم متخصص داخل منظمات الرعاية الصحية أو المؤسسات الأكاديمية التي تركز على إدارة وتطبيق تكنولوجيا المعلومات والبيانات الصحية.

تتضمن المعلوماتية الصحية استخدام التكنولوجيا وتحليلات البيانات وأنظمة المعلومات لتحسين تقديم وإدارة وتحليل معلومات الرعاية الصحية. 
يتكون القسم عادةً من متخصصين ذوي خبرة في علوم الكمبيوتر وأنظمة المعلومات وإدارة الرعاية الصحية والمعرفة السريرية.

فيه 10 مواد
2 منهن عامه
اللي هنا الطب الشرعي
يحكي علي الاخلاقيات الطبية
والعنف ضد الاطفال حوادث السير
والموت وطريقته ومراحله كورس ع
التسمم وكم كورس شبيهات للفارما

الامراض المعدية والغير معدية
عبارة عن الامراض المنقولة يا اما
عن طريق الهواء او الماء و الغذاء
وكل منهن في كورس بروحه
اذا كان فايروس او باكتيريا
وشيت الامراض غير المعدية (المزمنة)
اللي هوا الحاجات اللي نعرفوهن كلنا

وبعدها يجن مواد التخصص اللي هنا 8
5 منهن فيهن معمل اللي هنا

(انظمة قواعد البيانات)
مادة تعتبر دسمه تحكي علي
هيكلية الانظمة وتعريف البيانات لكن من ناحية
المعمل ممتعه بكل على MySQL والاستفادة فيها كبيرة يعطي فيها
د.صلاح العوامي

(تحليل البيانات)
مادة حلوة وساهلة واغلب شغلها عملي
تحكي علي تصنيف البيانات وتعليم الالة
اشتغلناها علي برنامج R
د.ايمن قنوص

(البرمجة)
مادة حلوة وتبي فهم وقراية من البداية
وهيا عبارة عن لغة البرمجه جافا واشتغلنا عملي
على blue J
د.هناء حماد
د.رجاء

(طرق البحث)
مادة جميلة وتبي فهم ومتابعه من بداية السنة
لان اغلب شغلها كله يتعلق بطريقة البحوث كيف بحث
التخرج والعملي متاعها على برنامج SPSS
د.عبدالفتاح البرشه
د.ابراهيم البكوش

(انظمة المعلوماتية الصحية)
مادة جميلة بكل وتحكي علي برامج والتطبيقات
بين الرعاية الصحية والتقنيات الالكترونية ومعاها جزئية (معالجة الصور) وكان العملي
متاعها على برنامج Matlab
د.عبدالفتاح البرشة
د.هناء حماد

المواد اللي بدون عملي
(اساسيات المعلوماتية الصحية)
ماده دسمه شوية وتبي حفظ وتركيز وفيها تاريخ المعلوماتية واصلها والاخلاقيات والحاجات العامة
د.صلاح العوامي

(التشريعات الصحيه)
ماده ساهلة ومادة معدل وتحكي علي القانون
ومفاهيمه والقانون الصحي الليبي والانشطه
والاجرائات الوقائية والشق اللي في تخصصنا
د.خديجة الفيتوري

(الادارة)
حتى هيا تعتبر مادة جميلة وسلسة وتبي حضور
والواحد يقدر يستفيد منها يرفع معدله
د.انيس الحضيري

بالتوفيق للجميع ?
.. منقول من الآء ناصر?

1/#نبذه_عن_قسم_التغذيه_العلاجيه ??

قسم يستقبل عادة في تقادير من الممتاز الى الجيد على حسب مستوى الدفعه

فيه 11 ماده و هي السنه الاكثر مواد على صعيد باقي سنوات الكليه ❤️

1- فود كمستري food chemistry
تحت اشراف أ.د. محمد بوزقيه
شبيهه شوويه بالبايو كمستري لكن على شكل اعمق و متخصص في هيكلية المواد المغذيه و خصائصها زي المياه و الكارب و غيرهن
ماده فيها معمل و نزيك ?

2- فود مايكروبايولوجي f. Micro
ماده جميله و مش صعبه واجد و فيها الكائنات الحيه و مدى تأثيرهن على الغذاء و امتى نقولو الغذاء هذ ملوث او لا و شن الطرق اللي نستعملوهن للكشف على البكتيريا
و معمل متاعها حتى هو سمح و ممتع

3 - المغذيات Nutrients
ماده تحكي على المواد المغذيه لكن من ناحية الوظيفه و ألية العمل في الجسم و تحكي على الطاقه و البروتين و الكارب و غيرهن
ماده مافيهش معمل و جزئي من 30 + فاينل 70

4- التغذيه التطبيقيه Applied nutrition
تحكي على التغذيه من Infant الى pregnancy الى feeding الى adolescence يعني مراحل نمو الانسان و في كل مرحله شن اهمية التغذيه و كذا و التركيز اكثر شي في الجزئي كان على حديثين الولاده سواء خدج او طبيعين و الرضاعه و الفطام و غيرهن

5- التغذيه العلاجيه clinical nutrition
ماده مهمه جدااا فيها مهام اخصائي التغذيه الاربعه ABCD
Anthropometry
Biochemical
Clinical
Dietary
حتاخذو امراض و تحاليل و قياسات و كيف تاخذو الهستوري من البيشنت و تحللو الغذاء متاعه بعدين بال food composition table

الماده 6 - تغذيه علاجيه تطبيقيه
C. Nutrition practice
تابعه لرقم 5 و هي اللي فيها المسائل و الmanual و زيارات المستشفى لتطبيق الكلام النظري في الماده 5

7- طرق البحث Research methodology
ماده تحكي على المشاريع و بحوث التخرج كيف تديرهن و شن الخصائص اللي بيكونن في بحثك قبل ما تطرحه و على اي اساس حتديره + من وين تجيب افكار بحوث

8- تشريعات صحيه health legislation
ماده بالعربي و فيها التشريعات و النصوص و القوانين الخاصه بالغذاء و الامن الغذائي ..

9- معلوماتيه صحيه health informatics
فيها مقدمه على المعلوماتيه الصحيه و تاريخها و اهميتها و وظائفها و غيره
و فيها معمل (بالعربي) و المعمل على برنامج اكسل

10 - الطب الشرعي Forensic
في الجزئي تاخذو مقدمه على كيف تتعرف على الجثه و اعراض ما بعد الموت و الاصابات اللي ممكن تصاب بيها الجثه بعد الوفاه و حوادث السيارات و تأثيرهن
والفاينل حتاخذو علم السموم (الكحوليات و المخدرات)

11- مادة الامراض المعديه و الغير معديه Cd
خليط بين المايكرو و البارا و الباثو
ممتعه و نزيكه في الجزئي على المايكروبات بس
و الفاينل مايكروبات و امراض زي السكر و الضغط و غيرهن

ملاحظه 10 و 11 لجميع الاقسام في نفس الوقت ياخذوهن ❤️

منقول من ايه منصور?

السلام عليكم ورحمة لله وبركاته ??‍⚕️??‍⚕️

#منقول من طالبة دفعة 22?

#نبذه_عن_ثالثة_صحه_بصفة_عامة
و الجاي حنحكي على تخصصات ف منشورات .

سنة ثالثة التنسيب لتخصصاتها يكون عن طريق جمع (مجموع الطالب في السنتين الاولى و الثانيه) نسبة المجموع العام فيهن تأهلك لتخصصك و بناء على رغباتك
● حيكون المطلوب منكم قبل تجديد القيد
تعبئة الرغبات (5 رغبات)
و على نسبتك حيكون تنسيبك و من بعدها المفاضلة
في دفعتي انا كان في احقيه لكل قسم بأنه يستقبل 78 طالب باستثناء التخصصات الجدد

المتعارف عليه ان قسم التغذية ياخذ الاكثر مجموع بمعنى من ممتاز لجيد جدا و ممكن نسبة بسيطه من الجيد

و بعدها الاقسام بالترتيب
الصحه البيئية
الاداره الصحية
و التثقيف الصحي + المعلوماتية الصحية كانن على الاغلب بالرغبه لكن السنه اعتقد في شروط حيكونن للتنسيب لهن .

يختلف عدد المواد باختلاف التخصص
لكن في مادتين عامات لكل الاقسام (الطب الشرعي + الامراض المعديه و الغير معديه) تاخذوهن كلكم في نفس المدرج

و في مواد مشتركه بالاسم فقط باختلاف المنهج و المحاضر لكل تخصص
(طرق البحث - المعلوماتيه الصحيه - التشريعات الصحيه)

نلتقي في المنشورات القادمة?