ف أنا بكتبلك ..
من قبل الدمعه اللي ف عيني ما تكُف وصول
ودي أصعب حاجة أعملها ف بُعدِك يا حبيبتي
بس منيش لاقي ف غيرها حلول

وحياة الحب اللي أنا شوفته ف عنيكي آخر مرة رأيتها
وحياة الخوف اللي ف قلبك وعياطي اللي مأثر ع الشوف
فيه كوم أصوات جوا دماغي من غيرك صعب اسكتها
والدنيا تسوء وبتتشقلب وريحتها بتقلب حزن وخوف

وحياة الفرقة اللي هتهلك ف روحين بيموتوا ف بعض بشكل
وحياة شوارعنا اللي بدونك الأرض هتخسف ملامحها
وحياة المدة اللي تخطت السنة وشوية ف قصتنا
أنا جاي الليلة عشان روحك اديني الفرصة وهصالحها

#عبدالرحمن_صلاح

عارف بكرا ..
أنا خايف منه بوصف يفوق الكلمة ومعناها
ودي حاجة كبيرة ميوصفهاش شاعر زيي ..
قلمه اللي بيكتب بيه شاحته
واقع ف القاع ..
والقاع عمال يحفر ف قيعان أميال تحته
بيحاول يخرج بس مفيش ولا شيء بيده
يلزمله حبال ..
وايادي تشده عشان يتجرأ ويخطي
الدنيا بترمي سهام من نار
مش لاحق غير إنه يوطي ..
علشان الجاي ميلسعهوش
كان نفسه يحبك والله ..
لكن معهوش
ولا حتى بيملك قلبه عشان تاخديه ك رهان
شاعر وبيخسر ف الدنيا
ف بيكتب لجل يدوق الفوز ..
وبيطلع ف الآخر خسران

#عبدالرحمن_صلاح

عيط ولكن برضوا على مهلك
الدنيا صعبة .. وإنت مستهلك
والحزن زي نداهه تندهلك
وانت اللي مغصوب ع الوجع مندوه
قافل على عقلك ب ميه ترباس
وبرغم ذلك كل يوم بتتوه

#عبدالرحمن_صلاح

ليلة الوداع ..
هحضن صورنا كل ما تمر الثواني
وامشي الشوارع قبل عيني ما تشتي وتحولها طينة
وهشم ريحتك ف الهدايا وف الأغاني
وأكتب قصيدة رثاء على روح المدينة

وهشيل حجارة ساعتي علشان ف الوجع
الدنيا بتغير زمانها دقيقة البُعد بسنين
هحفظ ملامحي وبهجتي وضحكة عيوني
قبل أما نص الليل يجيني ويقلب الكوكب حزين

هاخد منوم لجل أموِت خوفي لحظة
و اسيب لقلبي ف الوجع شبرين مساحة
هخفي الصور والذكريات والشات عشان
هضعف وأحبك وإنتي تتحبي الصراحة

#عبدالرحمن_صلاح

هتحكي..!
طب هتحكي لمين
هتهرب..!
مش هتلقى مكان
وكيف هتعيش بدون مأوى
يكونلك ف الليالي أمان
بتدمن وحدتك إدمان
وشمس الصبح بتعريك
هتفضل صاحي طول الليل
مفيش ولا حد يسأل فيك..?

#عبدالرحمن_صلاح

ساحرة الخلايق بس أنا حاوي
قلبي مريض وعنيها بتداوي
لونِك سحاب الليلة يا سماوي
سحراني سحر الحب يا حبايب
بلمح خيالها ف روحي بترفرف
تنده وجودك رجع الغايب

#عبدالرحمن_صلاح

كانت جميلة وحُسنها ساحر
قادر يخلي العاصي بيه تايب
تنده صباح الخير بصوت هادي
ف انده وجودك رَجَع الغايب

#عبدالرحمن_صلاح

كل واحد فينا لازمُه
حد جنبه يكون ملازمُه
كل حلم وكل كرب
حد يبقى بجد جيشنا
لو لقينا الدنيا حرب

#عبدالرحمن_صلاح

الخوف ملعبك كل شيء بخيوط
وأنا كل ليلة جوا اوضتي بموت ..
وترد فيا الروح صباحي الجاي
لو شوفتي روحي بس بقسملك
لتشكي إني لا يمكن أصبح حي

#عبدالرحمن_صلاح

بلاش تمشي عشان من غيرك الدنيا
بيبهت لونها وسماها
وتدبل روحي وياها ..
كإنك أكسجين الروح
بلاش تمشي عشان واللهِ من غيرك
هكون مكسور وكلي جروح

#عبدالرحمن_صلاح