✍ Дилобар Ўролова
🎤 Хамидулла Хайруллаевич.

@uralova_dilobar

✍ Дилобар Ўролова
🎤 Шерзод Карим

@uralova_dilobar

ШУКРОНА!

Жуда хотиржамман!
Жуда миннатдор,
Бу сизга ғалати туюлар балким.
Ахир ишонганим Парвардигор бор,
Шу сабаб ботиним топади таскин.

Ҳеч кимни учалик ёниб суймайман,
Танҳо ўзи арзир муҳаббатимга.
Дўстларим хиёнат қилса куймайман,
Беркитиб юрмайман юрак қатимга.

Ахир кимга фойда, бағримни ўйсам,
Ҳеч ким эшитмайди дил оҳларимни.
Бандаман, ногаҳон хато қипқўйсам,
Роббим кечиргайдир гуноҳларимни.

Ўзидан раҳмату, ўзидан шафқат,
Бераридан бир он умид узмайман.
Аллоҳим қаҳридан қўрқаман фақат,
Бошқа ҳеч нарсага кўнгил бузмайман.

Тақдиримга неки битган бўлса ҳам,
Бесабаб юбормас хотирим тўқдир.
Жоним қадар суйдим ул Зоти Карам,
Мени ҳам суйса ҳеч армоним йўқдир.

✍ Дилобар Ўролова

@uralova_dilobar

ЖУМА МУБОРАК!

Ассалому алайкум аҳли мўмин мусулмон,
Омонат бу дунёда, соғ-саломат бўлсин жон.
Даставвал кўнгилларга ёр бўлсин тоза иймон,
Расулим умматига ЖУМА айём муборак!

Ўзи синов бергучи, офият ҳам ўзидан,
Аритсин ғамларини бандаларин кўзидан.
Ташвишли кунида ҳам шукр тушмас сўзидан,
Расулим умматига ЖУМА айём муборак.

Қодир қилсин Яратган бўлмоқликка сер эҳсон,
Ҳар бир инсон қалбида уйғоқ яшасин виждон.
Яхшиликлар қилайлик, ошкор этмасдан пинхон,
Расулим умматига ЖУМА айём муборак.

Йўқлайлик ота-она, дуосини олгани,
Жигарлар орасига меҳр-шавқат солгани.
Ҳақни ёд этиб қилсак, ҳар иш хайрли бўлгани,
Расулим умматига ЖУМА айём муборак!

Чин ишқимиз Аллоҳга ва унинг Расулига,
Минг шукр берди ўзи яшаш бахтин қулига.
Кўнгил бўлсин саломат, бошласин Ҳақ йўлига,
Расулим умматига ЖУМА айём муборак !

✍ Дилобар Ўролова

@uralova_dilobar

#мулоҳаза☘☘☘
Шундай пайтлар бўладики... ҳақиқатни айта олмайсан. Айтсанг, бошқалар онгини бошқаришда, одамлар орасида норозилик уйғотишда айбланасан.

Шундай пайтлар бўладики.. ҳаққингни талаб қилсанг, бетгачопарликда, исён қилишга даъват этганликда айбланасан

Шундай пайтлар бўладики.. сен экранда кўрган актёрларингдан кўра, ҳаётдаги одамлар ҳақиқий актёр эканлигини англаб қоласан.

Шундай пайтлар бўладики.. сабринг тугайди. Ортиқ дош беролмайман деб ўйлайсан лекин сабр тугаган жойда бардош бошланади.

Шундай пайтлар бўладики.. Сенга маҳзунлик берган қийин дамларинг ўтиб кетади ва Яратган томонидан мукофотланасан. Ўшанда.... Ҳаётни қайтадан сева бошлайсан.

Ўткичи..ҳаммаси ўткинчи.Шодлик ҳам, дард ҳам, дунё ҳам..

Баски шундай экан қай ҳолатда бўлмайлик КЕЧАмиз учун мулохаза, БУГУНимиз учун шукрона, ЭРТАмиз учун умидимиз сўнмасин.

✍Дилобар Ўролова

@uralova_dilobar

❤️ Эй, дил
Ботир Қодиров

@uralova_dilobar

ОНАНГИЗНИ КЎРГАНИ БОРИНГ!

Нима кўрди дунёга келиб,
Айтингчи, бир дардингиз ёринг?
Ҳамма ишни бир четга суриб,
Онангизни кўргани боринг!

Эртага деб пайсалга солманг,
Ишим кўп деб чарчоқда толманг.
Э воҳ, бир кун аттангда қолманг.
Онангизни кўргани боринг!

Кечалари беуйқу, уйғоқ
Емирмасин вужудин фироқ.
Йўлингизга тургандир муштоқ?
Онангизни кўргани боринг!

Хира тортган кўзларин нури.
Лекин ёниқ қалбининг қўри.
Бордир балки бирор сўз, сири?
Онангизни кўргани боринг!

Сездингизми, анча қарибди?
Вужудидан кучи арибди.
Меҳрингизга илҳақ турибди.
Онангизни кўргани боринг!

Боринг, оппоқ сочларин силанг,
Шодлигига шодликлар уланг.
Худойимдан умрлар тиланг.
Онангизни кўргани боринг!

Ҳеч йўқ, буғдой сўзингиз билан.
Ёки ўғил-қизингиз билан.
Кўриб келинг кўзингиз билан.
Онангизни кўргани боринг!

Эркалатинг,чиройлигим деб,
Қуёшимсиз, гулойлигим деб
Тожу-тахтим,чин бойлигим деб
Онангизни кўргани боринг!

Кўрди қанча синов, машаққат
Дардин ёриб айтмади фақат.
Оёқларин остидир жаннат.
Онангизни кўргани боринг!

Махкам қучинг, сингиб бағрига.
Дармон бўлинг кўнгил дардига.
Зор бўламиз бир кун гардига.
Онангизни кўргани боринг!

Ҳар нарсага топилар имкон.
Ўртамасин кун келиб армон.
Она қайтиб келмас ҳеч қачон.
Онангизни кўргани боринг!

Нима қилдик, онамиз учун?
Синдиринг бас, соғинчлар кучин.
Илтимос, бугуноқ шу бугун.
Онангизни кўргани боринг!

✍ Дилобар Ўролова

@uralova_dilobar

• ҒАНИМАТ

• Рамазон кириши билан:
1. Беҳуда гаплар ўрнига зикрни кўпайтиринг!
2. Аллоҳ берган неъматларига шукрни кўпайтиринг!
3. Кўп еманг!
4. Кўп ухламанг!
5. Кўчага зарурат бўлмаса чиқманг!
6. Ҳаромдан сақланинг!
7. Ғийбат қилманг!
8. Тил ва қўл билан инсонларга озор бериб қўйманг!
9. Телефонингизга ажратган вақтингизни бу ойда Қуръонга ажратинг!
10. Намозларни вақтида адо қилинг!
11. Нафл ибодатларни кўпайтиринг!
12. Аллоҳга тавба қилинг!
13.  Қариндошларингизга силаи раҳм қилинг!
14. Ҳар куни иложи борича садақа қилинг!
15. Ота-онангиздан хабар олинг!
16. Ёлғон гапирманг!
17. Кунингизни интернетда, телевизор қаршисида бекорчи нарсалар билан ўтказманг!
18. Барча мусулмонларни, яқинларингизни дуода эслашни унутманг!
19. Яхшилик қилинг, ёмонликдан узоқлашинг!
20. Аллоҳ таолонинг яратган нарсалари борасида тафаккур қилинг!
21. Намозларингизни жамоат билан ўқинг!
22. Азон ва иқомат орасида дуони кўпайтиринг!
23. Ҳар кун Қуръон ўқинг! Қуръон ўқишни билмасангиз тингланг ва ўрганинг!
24. Таровеҳ ва таҳажжуд намозини қолдирманг!
25. Доим таҳоратли бўлинг!
26. Ейиш-ичиш ва таом пиширишда исроф қилманг!
27. Сабрли бўлинг!
28. Умид қилинг!
29. Ниятингиз холис Аллоҳ учун бўлсин!
30. Ҳар куни битта янги ҳадис ўрганинг!

• Рамазон барчамизга хайрли, барокатли, файзли бўлсин!
• Аллоҳим рамазонда куч-қувват ва офият бер!
• Рамазондан руҳан ва жисмонан покланиб чиқишимизни насиб эт!

@uralova_dilobar