طلعت المــــشايه
رايه تسبگ الرايه
_____
بسم الله والهادي وعلي رايتنه رفت
من البيشه شدينه العزم والدنيا طلعت
صوت الضماير للنحر يحسين هتفت
شيعة علي من البحر لحسين گصدت
نگصد ابكل همه
دمنه فدوه لدمه
__
هذا العهد من الصغر نبقى اعله دربه
اهلا يزاير يا هلـــه منــــــه نحسبه
بس هل درب يسوه التعب يا محله تعبه
معشوگنه حسين ونضل والله نحبه
عاشگين الغالي
اول وللتـــــالي
__
من كل بلد تگصد اله شدو حزمهم
حي الله مشاية علي رفرف علمهم
ثورة مشي ما تنتهي ويا محله اسمهم
من حيدر وام الحسن ورثو عزمهم
ثوره من يمحيها
كل سنه نأديها
____
مشايه والمهدي يجي ويانه يگصد
ثورتنه تمدد بعــــــــــد بيها انتخلد
تتعب يحاقد والزمن عن دربه يشهد
ثورة المشايه نصــــــر بيها انتوحد
خل نسمع العالم
ثوره بيها القائم
_____
خادم الحسين ع ناجي ابو كيان الصالحي

نوح اتخلص يا ليلك
رايح بالطف كل حيلك
يابو الباقــــــر نبجيلك
يا مولاي. يا مولاي
____
حزن. باقي الحزن
الم يحجي المحن
وطن. مالك وطـن
ها يبو الباقر مصيبتكم مصيبه
ليلك اتخلصه دعه ودمعه سجيبه
شفت ابوك اعله الثره شيبه خضيبه
وشفت عمتك بالدرب زينب غريبه
دمعك يجري يا حسره
كل ليله اتعيش الــعبره
دربك ما بيه اسم الله
يا مولاي. يا مولاي
_
گلب نوح الگلب
صعب موقف صعب
سبي. شام وغرب
ما تكفي ادموعنه مهما بچينه
اشلون نوفي سيدي لذيج الضعينه
عايش ايامك الم تبجي الحزينه
بكلبك ايعيش الجرح زايد ونينه
عايش حزنك ويانه
عينك تبجي وسهرانه
عمتك بالطف حيرانه
يا مولاي. يا مولاي
_
صبح يبجي الصبح
عشت لوعـــه وجرح
نزف جرحك مـــــلح
يالشفت عمتك سبيه بين اجانب
عايش أحزانك سبي يبن الاطايب
يا عليل حسين بألالامك تراقب
شفت عماتك سبايه ويا نوايب
شفت اخيمكم محتركه
وتعذب آه الفــــرگه
ضلت بنفاسك شهكه
يا مولاي. يا مولاي
__
دوه ماصح دوه
ضوه تنزف ضوه
نحــــر بالدم روه
يا عــذاب الشام يا ليـل الخرابه
ضــل ابوك إبلا جفن سلبو ثيابه
عالتــــراب اتنام تتوسد ترابه
اه يحسين وغربتك يا مصابه
حزنك جازي ومتعدي
حاير بيمن من ابدي
حزنك باقي للمهدي
يا مولاي. يا مولاي
____
الم عـــايش ألم
سهم جرحك سهم
ضعن تبچيله دم
يا جروحك سيدي وضيم الليالي
شنهو حالك من عفت كل الغوالي
يبقى صوت الرافضه مولاي عالي
احنا نخدم بالنفس ونضـل نوالي
عهد ابدمنه اموقعينه
حبــكم بالدم شارينه
اي وجروح البسكينه
يا مولاي. يا مولاي

الخادم ناجي ابو كيان الصالحي

#قصائد_مسلم_والسيده_حميده_عليهما_السلام
**

اشلـــونه اليــــفارگله ابو گلولي اشلــــونه
بعيونه ينشاف الفگــــــد اي والله بعــيونه
بعيونه تلگــــــون" كل عمـره مدفون"
بعيونه ينشــــــاف الفگد اي والله بعيــونه
_______
حميده مسلــــم تانتنه ابدمعة حزنهه
حميده عاشــــت غـربتـه وازداد ونهه
حميده مكــسورة جنـح بغـــيـابه چنهه
عاشت حميــــده تنتظر بلــــكت اله رجـعه
منيتها يوصلها خبر عن مســــــلم اتسـمعه
سلوتها بغيابه البجي والحــــسره والدمـعه
حسبالها باقــي عــــــــدل واتريد اله فزعه
تنتظره ماكـــف الدمع واتراقــب الغـالي
وتگله بويه امروتــك بس عاين لحــالي
ذبلانه العيــــون " كل عــمره مدفون"
بعيونه ينشاف الفگد اي والله بعـيــونه
_______
تنــــادي هم ترجــــع الي يابويه وافرح
تنّــــادي تذبح فرگـــــتك يالغالي تـذبح
تنــــادي يا حاله الك يا مـــــسلم اشـرح
سابيني يا بويه الدمـع واعـــــيوني ذبلانه
ششرح شـسولف يالابو يالغالــي حـيـــرانه
ترجعــــــلي لو بــويه بعد ميــفيد الامـتانه
مفتوح گلبي بـــس ترد ومشــــــرعه بيبانه
ما عودتني اعله الجفه ياسلـوة اعـــيوني
يابو حميده ابنيــــــتك ترضه يـطـــگوني
توجعني الامــــتون" كل عمره مدفون"
بعيونه ينشاف الفگد اي والله بـــــــعيونه
_______
غريبـــــه بالطـــف ضـلت ومـيت حلمهه
غريبـــــه تنـــحب باليسر يكـــــتل المهه
غريبـــــه نفس ام الخـدر اصــبح اسمهه
مسبيه وي ام الخـــــدر يا شــام الـمـصايب
ليل الخرابه اشگد صعب بس ضلت اتراقب
ذايب گلبها مـــن الهجر فوگ العطـش ذايب
يجري دمعها اعله الابو ما يـسكت وساچـب
مشتاگه لحــضان الولي يا حـيرة الــحيره
عن مســــلم ادور خبـــــر من ديره الديره
هل يا ترى يكـون؟" كل عمــره مدفون"
بــــــعيونه ينشاف الفگد اي والله بــــعيونه

__________
وطنـــهه مسـلم چان ابوها ورحل عنهه
وطنـــهه سابيها الدمـــــــــع والاه فـنـهه
وطنـــهه طفـــو شمــــعته وادمه جفنهه
تبچيله بحزان ودمع وتگــــــــــله هم ترجع؟
حشمتــك وبلكــــًــت الي يابويه لو تـســمع
اتلاشه ليل ابغــــــــيبتك واحشــاي تتگـطع
يا ليلي مايخلـص بچي ما يســـكت الـمدمع
محتاره بويه عمتَــــي يا عمــــــتي زينـب
حارس علينه للصبـــح شفت المـتن حـدب
حًــارس للضعون " كل عمره مدفون"
بعيونه ينشــاف الفگد اي والله بـــــعيونه
_________*

حـــزنهه ما يــــخـلـص ابد تشبه رقيـه
حـــزنهه لن اثنـــينهن فــــــگدن سـويه
حـــزنهه سابيها سبــــــي وهيـــه سبيه
اثنيناتهن فگـــــدن ابو واتخــــــــيل الحاله
ليلتهن اتخلـــــص نعي والحســـره چــــتاله
مسلم اويلي امن الســــطح مذبـوحه آمـاله
وحسين ميت بالسحگ ومگـــــطعه اوصاله
وياهن الزهره احضـرت تنعى مصـيبتهن
ساعه تنوح وتنتــــحب ساعه تســـكتهن
والفاگد اشـــلون؟ " كل عمره مدفون"
بعيونه ينشاف الفـگد اي والله بعــــيونه
________**

تمت بحمدالله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي

#قصائد_فاطمه_العليله_ع

بس انه البقـــيت وما گـــلت گومي
عود امحضره بويه اوياكم اهدومي
_________**

مو علــه ابدليلي العــــله فرگتكم
راح اتموت روحــي اباب عتبتكم
لتحسبوني عادي مو شرط بـتكم
لو رحتو تجيكـــم مــيته اعلومي
_________**

لا تقنعـَـني بويـــه ابغيـبتك شلي
گومــــي اويانه بويه للـسفر گلي
شنهي العيشه بعدك يا بـــعد كلي
يمي انته واحس ابعيد عن يومي
_________**

من دون الخــوات انته تعرف بيه
فـــوگ ايدك انــام واغــفه ليلــيه
لتگلــي اروح وعــــود الــك جـيه
لتخليني انام وترحـــــل بــنومي
_________**

مال انــــه اقتــنع تـمشي وتخليني
لا والله ابد هــــــيهات يحـــسيني
تدري بالفــــــراگ اشلــون ياذيني
بعدك ما رحت هاك انضر ارسومي
________**

بويه اوداعتك ماعيش انه ابدونك
شنهي اعيوني اذا ما تنظر اعيونك
خدامــه اريــد وامــشي بضــعونك
بس راويني جفك بويه خــل يومي
________**

ما بــيه مـــرض وافراگــم مــوتي
لو رحتــــو بعد ما ينــسمع صوتي
لتگلولي هيــنه وحــــضرو تابوتي
يالتسمعنــي دوم وتســمع اهمومي

_________**

تمت بحمد الله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي

خير ما شفت مثلك يبو الــخير
شايل يا محــــنه افياي للـــطير

ما شايف بشر يبجي عله اعداه
انته اجبير وألطف سيدي زغير

سفينه للنـــجاة ومأوه للغــرگان
الما يخدم يضيع ويــــوكع ابير

ل ناجي ابو كيان الصالحي

وأنه من هذا العزه ماريـد شـــــي
بس نضرتك سيدي واعليه فـــــي
جا وحقك لولا هل خدمه اضيـــع
متت وبدربك صرت يحسين حي

ل ناجي ابو كيان الصالحي

حسين ارزقني البچي وانطيني اديك
ابتعد عنــــــــك واجــــــي نادم عليك
الادب يبن الزهـــره اريدن والخشوع
ازلف وعاشور يــــــــــــلزمني واجيك
ياخي مثلك ما شفت هـــــجي حنين
تبجي حتى اعله الاخـذ مـــــنك رداك
شنوفي وانته انطــيت كلشي حسـين
كلشي مغشوش ويضل طــــاهر هواك

ل ناجي ابو كيان الصالحي

ما اريدن شي فقـط دليني بيك
ورايد اتأدب واصيُــــــرن خادم
تزعل الناس المهم عندي رضاك
مو مهم عـــــندي رضاها الوادم

ل ناجي ابو كيان الصالحي