#شجرة_الهيل

**هله بآخر غصن من شجــرة الهيل
هله بعطرك الخــــــــلّه الريّه ورده

شمس تتبع شمس أولاد الحسين
ما تكفي العوالم شمس وحــــده

مثل ما شمس الله إمخلّي للناس
شمــــــــس لازم للگلوب التعبده

واَشْرق نور شمس المهدي بإحساس
تتِّـمَّتْ ذوي القربى والـــــــــــــمودّه

نزل نزلت مطر ومفطّره الگاع
إستلذّت بي وشمّت عطر جدّه

سواد الكحل يفضح نيّة العين
اذا مو بيضه هم تُعْتَبَرْ رمــده

لنوايا العين أقرب سچّه الجفون
وهنيــــــاله التصير السچّه خدّه

شما گلبك وعينك تجتهد حــيل
عنِ المهدي تصير إبقُرب سجده

حلات الليل للعنده مــناجاة
وگلبه وي خليله عنده گعده

وإلــوجه التحِبَّه إحچيها الأسرار
ولا تــحچيهن لـ وجه المـــــخدّه

وإفرح غير هو المهدي مولود
بــــــس دمعك إعذره لو تبدّه

حلات الحب اذا يتوچّه بدموع
وعكّازاته الآهـــــــــات التسنده

وأرد لمغازلك وأغرگ بالأوصاف
وأحير وبالقوافي تصيــــر شِدّه

وأشوفن خدّك أحلى من الضوه هواي
يالــــــــحاجبك سيـــــــف وبيه حِدّه

وبـــــــثغرك يصير العسل ويذوب
ويا شهد اللي يوصل عذب شهده

وعله عينيك عِيْشَتْ ناس مولاي
لا تغمض وجــفنك لا تــــــــسدّه

وإحرگني الجمر بي كشخت دلال
خـــــــــــلِّي الگلب حار ولا تبرده

گالوا مولده وگلت آنه مـــشتاگ
رغـم ما گلبي أحسَّن صار مهده

المفروض اليحب إيكتله الفراگ
وحبيب الروح ما يحْتِمِـل بُعده

وآنه اللي أحب من أقترب ليك
وحته من أجافي .. حُبّي بعده

گلبي إلك .. يمك ..ومن أجافيك
بهيچ إقـبله گلـــــــبي ولا تصدّه

رغم كلشي إلك هالگلب وَجْدَه
إلــــزم گلــبي حيــــل ولا تهدّه**

#الميرزا_علي_حسن_المنصوري

يـ أمنية عمري الأنتظـــــــر تتحققْ
وبگلبي مو بالكعبة إلك صار الشقْ

أيتامك وإنته الأبو وإنته الشوگ
عالينتظر شوفك إبنظره إتصدّقْ

يا گمر سهرتنه بنصف من شعبان
يانور تخجل كل شمس لو أشرقْ

يا آخر العنگود من أهل البيــت
الحُسن منك ماخذ أجمل رونقْ

الموت حق وأسباب للموت هـــواي
بس من نظرتك حيل يحلالي الحقْ

اعله محبّتك وصّيت گلبي المهجور
بغير أبو صالح گتـــــــــــله لا تتعلّقْ

رغم آنه مو مثل اليحبك بإخلاص
مو مثل واحد عمر لأجلك أنفـــقْ

آنه اعله گد حالي أحبك مولاي
وبگلبي حبك (أحْرَقَ مَا أحْرَقْ)

اللي يحبك فايز بدنيه ودين
وبكل حياته برحمتك يتوفّقْ

& الميرزا علي حسن المنصوري &

أريد أتغزلك يا أغلى محبــــوب
وعله گلبي أرسمك بأجمل ألوان
وآنه بجمالك تاهت عيــــــــون
ويمن صوتك جميل وأعذب ألحان
صح إنسان يگدر يوصف إنسان
بس أتحده انته يوصفك انسان
يا سيد الدنيا بكل معانــــــــيك
أمير الكون انته وكل الاكــــوان
شگد يفرح المصحف وإنته تقراه
ياقرآن يرتل بوجه قــــــــــــرآن
مو بس الإحسان تقابله إحسان
چنت هم بالإساءة تقابل إحسان
يا سالوفة أمي بهدوة الليــــــــل
من چانت تگلي كان ما كــــــــان

ــــــــــــــــــــــــــــــــــــــــــــــــــــــــــــــــــــــــــــــــــــــــــ

الميرزا علي حسن المنصوري

لحن قصيدة #قاضية_الحاجات

شور .. جديد

#قاضية_الحاجات

يا أم البنين .. يا أم البنين
……… ..
يا قاضية الحاجات .. إقضي حاجة غرامي
رايد گلبي يذوب .. مثلچ بحسين إمامي
إسمي (عبدچ) يصير .. ماريدنها الأسامي

عـــلّميني عِيشْــــة الغـــربة للغريب
علّمي عيني تسهـــــر لأجل النحيب
كون بس حسين بگلبي يظل حبيب

عـــــــــلّمي گلـــبي الحنيّه
كون أبچي من اشرب أُميّه
كون مثــــلچ ينكسر ظهري
من اسمــــع بزينب مسبيه
………………… ..

يا سيّدة الأحزان .. عــــگب حسينچ غريبه
المثلچ عاشگ مذبوح .. كون تكتله المصيبه
درب دموعه يوديه .. ودرب الحسره يجيبه

انتي باب الله وعندچ يم الله جاه
خـــلي بس حسين بگلبي لا سواه
كـــــــــل زفير اليطلع من الريّه آه

يالـــــــحنينه حالچ شلونه
من رجعلچ ضعنه من دونه
حسيــن ظل بكربله وگلبچ
بالـــمدينه ومنخطف لونه
………………

فارگـــــــتي نور العين .. روحچ خضّر حزنها
يا عيشة بدون حسين .. حته الموت اشوه منها
يا ناس الـــروح تضيع .. من تفارگ وطنها

احنه مـا شفنا وحبينا عالــــكلام
يعينچ الله الفرگه چن نار الخيام
لعشگچ وحبچ من گلوبنه السلام

يــــــعينچ الله الراح شيردّه
ياغصن فارگ أعـــــــز ورده
يالنسيتي جــــــروح أولادچ
بس جرح الحسين شيشـدّه
……………..

يالعلّمتي العباس .. شـــــلون الطاعه لإمامه
يحني راسه المملوك .. يــــم مولاه وغرامه
سيّدي چان يسمّيه .. ماكو (خويه) بكلامه

هيچي عــلّمتي أولادچ ينحنون
سيّدي تگلّوله مــــــــن تتكلمون
هوّه أمّه الزهره وآنه مَنْ أكون

چلمة الـ (خويه) شمحلاها
اْلگمر بس من طاح گالاها
يالعظيمة شــعظم تربيتچ
تربيـه الــــــــعباس وفّاها
……………

گلبچ يبني بدموع .. خمس گبور لعذابه
تبچين أكثر لحسين .. وتنوحين لمصابه
واللي يعاتبله گبور .. لا مـــا ينفع عتابه

عالـــگبر تبچين ويبتل الـــــــتراب
ويـلي عالمذبوح وماضاگ الشراب
يبني اشتاگيت ولأجلك گلبي ذاب

الحسرته تصــــب دمع هنياله
الحسره وسط الگـــلب چتّاله
الحاله يبچي شما يمر حسين
يشكر الـــــــزهره على حاله
…………………
#الميرزا_علي_حسن_المنصوري

#من_زمان ( أم البنين ع)

من زمان وإنته كالوا مــــا ترد
من زمان ويجرح بروحي البُعد
أنته من يوم الرحت
وآنه أحس روحي متت
ــــــــــــــــــــــــــــــــــــــ
من رجع ظعنك بدونك
وآنه أحس خلصت حياتي
ومن سمعت الناعي ينعى
أستقبلت ساعه مماتي
بس مشيئة الله رادت
هسه ما تحصل وفاتي
يعني أبقى عليك أنوحن
وأبقى أبجي بنايباتي
والحياة بلا وجودك بس حزن
والحياة روحي بيها بلا وطن
عايشه بس ما عشت
وآنه أحس روحي متت
ـــــــــــــــــــــــــــــــــــــــــــــ

العاشك اليفكد حبيبه
دمعته تعاشر جفنها
وذكرياته كلها تلجم
وينلجم من تحجي عنها
فاكدة وليدي وحبيبي
آيروحي ويا حزنها
روحي تبچي چي تحبك
وتبجي چي أم لأبنها
والدموع تأذي لو سكته تصب
والدموع تجوي جم خد وكلب
من عفتني تعذبت
وآنه أحس روحي متت
ـــــــــــــــــــــــــــــــــــــــ

من جنت تلفظ (ييمه)
وجنت أشبكنّك بديـــــه
آنه أخجل چي كلتلي
چلمة جانت للزجيـــــــه
وبس لأنكم ما شبعتوا
إمن امكم الراحت ضحيه
بدمعتي جنت آنه أقبل
چلمة ال(يمه) عليـــــــه
والامان جان من عينك يشع
والامان هسه بس نوح ودمع
يلّي بعيونك همت
وآنه أحس روحي متت ــــــــــــــــــــــــــــــــــــــــ

شلون أنامنها الليالي
وما يفارك بالي رسمك
جنك إنته كبالي واكف
وآنه بدموعي أكلمك
وچي بعيده الغاضريه
شلون أجيك وأبجي يمك
كومة تراب إجمعتها
جن كبر سميته بإسمك
والينوح ليله يخلص بالألم
والينوح يذكر أطفال وخيم
وكلشي عكبك ضيّعت
وآنه أحس روحي متت ــــــــــــــــــــــــــــــــــــــــ

يمه لو مرّت حوافر
بيه ترسم غاضريـــــــه
كالوا ضلوعك حوافر
عليها داست روحه جيه
بعدك تمنيت أموتن
آنه وي بنتك رقيــــــه
وراح أموتن هسه يبني
توّه حضرتني المنيـــه
خل أموت وخلها تخلص هالسنين
خل أموت شتسوه عيشه بلا حسين
وبالفراق تــــــلوّعت
وآنه أحس روحي متت

..................................
#الميرزا_علي_حسن_المنصوري

#يخدام **شما لحسين انطيتوا… يخدام
كفيتوا ووفيتوا .. يخدام
…………………
ياهلا بخدام الحسين الغياره
التجاره وي الحسين اربح تجاره
يالي للزوار كلمن فتح داره
بالنيابة عنكم انئدي الزياره

لحسينكم ضحيتوا .. يخدام
كفيتوا ووفيتوا .. يخدام
…………………
كل شخص للزاير امحزم حزامه
احلى من الزاد نتذوق كلامه
انتو تدعون النه نوصل بالسلامه
واحنه ندعي الكم اتدوم الخدامه

هنيالكم شفديتوا .. يخدام
كفيتوا ووفيتوا .. يخدام
…………………
اليخدم حسين ابد مو ذلة قياسه
تشوفه ما بين الخلگ مرفوع راسه
اليخدم ابن الزهره عالي ابين ناسه
والخدمها يشرف العالم مداسه

بالزهراء اعليتوا .. يخدام
كفيتوا ووفيتوا .. يخدام
…………………
الـ ياهلا منكم ترد الروح النه
الزاير يشوف المعزب بيته جنه
يعطف علينه المعزب چنه امنه
ندعي الزهراء كون تعلي شأنه

خدامها تسميتوا .. يخدام
كفيتوا و وفيتوا .. يخدام
…………………
لإن ما بي راية رد ضعن السبايه
ترفرف بطول الدرب مدري چم رايه
هاي زينب عوّدت لحسين هايه
چنه قران الضعن بس نقص آيه

لرقيه من بچيتوا .. يخدام
كفيتوا و وفيتوا .. يخدام
………………………… .
[ الميرزا علي حسن المنصوري]**

#إجينه **اجينه اويه ضعنك مشايه ..
ترفرف بالجروح الراية
گصدتك أنصارك .. زار الله الزارك
يا ابا عبدالله
………………………… ..
اتحزمت چن كل سنة مشايتك
وترس عين الشمس رفّت رايتك
تبيع حته ارواحها شرايتك

انته اغلى من الروح
ياحسين المذبوح
الحب الاوحد انته
وانته جرح الجروح

يهنيال اليهيم بعيونك
اكتمل عقله الصار مجنونك
انوار الله انوارك .. زار الله الزارك
يا ابا عبدالله
…………………………..
حسين ومعازيبك إيخجلونه
گبل لا نطلب طلب ينطونه
الينحسب خادم صدگ خيعونه

الك كل الخدام
شدوا الخدمة احزام
كون كل الزوار
تنام يله اهيه تنام

يسهرون يتعبون خدامك
يتانوها كل عام أيامك
دارهم چن دارك .. زار الله الزارك
يا ابا عبدالله
………………………… ..
شما يطول الدرب وياك احله
كون اليحب كل جرح يندله
لدربك شگد حيره من نكتبله

الشعر والاشعار
گبالك إشگد زغار
انته حُب اللاهوت
انته سر الاسرار

يقرآن والجروح آياته
وعله النوگ اجتله ابنياته
عله النوگ اسرارك .. زار الله الزارك
يا ابا عبدالله
…………………………..
مايك وزادك شفه يالغالي
واليحبك بأي مرض ميبالي
كلها تنصه وانته ذاك العالي

شما تمر الازمان
تبقى اجمل انسان
وسفرتك خير الخير
ما يظل اي جوعان

يماي وروه الكون بعيونه
يمالك گلب اليحبونه
وبالعشگ نتشارك .. زار الله الزارك
يا ابا عبدالله
…………………………
كون كل خطوه بجرح نحسبها
ويمك اشتكتبها انته اكتبها
الخطوه باچر تشفع لصاحبها

واليحب المذبوح
كون كل عمره ينوح
كون كل الخطوات
الك يهديها جروح

اليعيش بجراحات الخيمه
يشوف الدرب نار وهيمه
تشب بينه نارك .. زار الله الزارك
يا ابا عبدالله
…………………………
[ الميرزا علي حسن المنصوري]**

#كعبة_العشق **كربله كعبة عشگ .. نعتنيها .. ونمشي ليها ..ونوصل لأجمل گلب
هذا من عدنه عهد .. كل سنه احنه .. انواسي ضعنه .. ونمشي وياه الدرب
واللي يوصل كربله…الگمر يستقبله
°°°°°°°°°°°°°°°°°°°°°°°°°°°°°°°°°°°
ياعشگنه انته حبنه وماكو شي بالحب صعب
إعلمودك يابو الأكبر ينعشگ تعب الدرب
بين اهلنه نمشي احنه وما مشينالك غصب
وانته اختك عذبوها وگوّه مشوها الغرب

واللي يشعر بالتعب .. خل يباوع ..للمواجع .. والضعن والعايله
ماكو سوط اليضربه .. ولا هضيمه .. ولا شتيمه .. يلگه بس الـ ياهله
الكل تگله ياهله…الگمر يستقبله
°°°°°°°°°°°°°°°°°°°°°°°°°°°°°°°°°°°
انطينه دمع بهالمسيرة يواسي دمع ام الخدر
خطوه خطوه ودمعه دمعه خله يخلص هالعمر
حبك الويانه يمشي ويمشي وي ضعنك شمر
دمعة المهضومة تچوي وتنزل عله الخد جمر

يمشي بجروح الضعن .. واختك انته تبچي سكته .. عالهزل خفيه تون
الينسمع من عدها حس .. يضربوها .. يعذبوها .. وازرگ يظل المتن
بيا وضع ضعن العُله…الگمر يستقبله
°°°°°°°°°°°°°°°°°°°°°°°°°°°°°°°°°°°
هذا دربك كلها تعجز من تريد توصفه
انته نور الله اللي دومه ضاوي ظل وماطفه
مو ثواب آنه أدور لا كرامات وشفه
قربه يحسيني لِوجهك خطوتي يابو الوفه

أمشي وعيوني إلك .. وآنه أدعي .. ارزقني دمعي .. وخلني أبچيلك بعد
خلي گلبي يحترگ .. من أذكرك .. وعله صدرك .. مدري چم حافر صعد
وچم سهم من حرمله…الگمر يستقبله
°°°°°°°°°°°°°°°°°°°°°°°°°°°°°°°°°°°
نوصلك وي الفواطم بس فرق بين الثنين
من بعيد احنه المناره نصدها ويزيد الونين
وزينب بيا حاله تنظر بس گبر ظل الحسين
وكل سنه تتعذب اختك آه ييوم الاربعين

كل سنه يرد الضعن .. إبعذابه .. وبمصابه .. ويمك يزيد الألم
إبضعن إختك اجت .. چم غريبه .. وچم سليبه .. ويهضم مچان الخيم
والعتب للعايله…الگمر يستقبله
°°°°°°°°°°°°°°°°°°°°°°°°°°°°°°°°°°°
زينب المشتاگه يمك من خجلها شگد بچت
إتگلّك اعذرني يخويه چي رقية ما اجت
الحراير واليتامه بهالطريق تعذبت
واحنه نمشي وعدنه غايه انواسي اختك النسبت

المواكب والخدم .. كلها تبذل .. محد يمل .. نعمة خدمة زايرك
ياعزيز ام الحسن .. ياهو مثلك .. كلها لأجلك ..بالخدامه تناصرك
الخادم اعله منزله…الگمر يستقبله
°°°°°°°°°°°°°°°°°°°°°°°°°°°°°°°°°°°
# الميرزا_علي_حسن_المنصوري#**

#سوگ_الكوفة السيدة رقية ع (من الخيال)

آه .. ياسوگ الكوفه
دخلتك مچتوفه
**بنيه زغيــرونه
وبگلبي خوفه

آنه رقيه والدمع بعيوني مخنوگ
وسفه سبيه أجهبك مچتوفه عالنوگ
ضعن الهواشم ياوسف ظل فرجه للناس
گلهم يغضون النظر عن عمتي ياسوگ
……………………
آه .. السوگ ومصابه
نمشي بعذابه
شوفي يا سكنه
چن محبس بابه

محبس أبونه الـ سلبوه جابوا يبيعوه
چا شنهي ذنبه والدي وصبعه يگطعوه
لو طالبينه من أبونه والله ينطيه
چا هسه خنصر والدي بيا گاع ذبّوه
……………………
آه .. ناسك أذونــــــه
يسوگ وشتمونه
والسلبوا منه
بيك يبيعونه

چنهــــن تراچيي هذن يردون يبيــــــعون
عله چم فلس دم أذني ظل يخر عالمتون
من عندي جروهن غصب وتألمت حيل
طفله آنه وبأذني الوجع يتوصف شلون
……………………
آه .. ياسوگ وهالناس
ماعدهم إحساس
يشمرونه بحجار
ما يقبل عباس

يشمروني وآنه مچتفه أشگف بيا إيد
عدنه مصيبه ونايبه وعند الخلگ عيد
من الزغر صح شيبت من ضيم الطفوف
بس الـ عله وجهي ضرب ماهو تجاعيد
…………………
آه .. حبال بچفيني
وحيل إتذيني
كاروك الغالي
چن شافت عيني
كاروك عبدالله وسف ياسوگ ينباع
شالوه كاروكه وبقه عبدالله عالگاع
خلهم يضمونه الرباب ابشوفته تموت
ياسوگ كلشي إعزيز إلي إتطشر وضاع
…………………………
[ الميرزاعلي حسن المنصوري ]**