حكمة اليوم تقول :
قبل ماتبداء تذاكر غطّي نفسك جيداً؛ عشان ماتبرد وانت راقد

أتصفح النت بامان الله ...
ضهر لي اعلان صابونة تصفية تمليع حق الذحل..
المهم جاني فضول دخلت اشوف التعاليق
الا والجنس اللطيف وحتى شباب طلبيااات عليها وهذك يسأل اذا موجود خارج صنعاء كذا..
بعدا رجعت اشوف السعر 9000 ريال.. انصدمت ..

والله لو هي تطهر من الذنوب مش الا الجراثيم والذحل .. ?

ورجع راجعت نفسي وقررت اني ادلع روحي اشتري لي واحدة ديتول ب 300 ريال تعبت ع النسيم العادي

ي سقا الله ايام زمان ايام تلفونات النوكيا والماجد ١٠ والقوة الضاربة
كان الواحد يقلب التلفون عشان يتصور سلفي ويرجع يدخل في الاعدادات حق الصوره ويعمل اعادة تسمية ويوثق اسمه الرباعي تقول احد بينكره..ويعملها باقتين من الورد ويندعها خلفيه للشاشه ويرسل به يشحن بيت عمه ?

لو العلاقات الزوجية مثل علاقتنا بالجامعة لاتنقرض الطلاقات والمشاكل الزوجية

علاقتنا بالجامعه
الجامعة تبهذلك تهينك وتسبب لك مشاكل نفسية وبعدين ترجع لها كل صباح عادي بدون كرامة وتحمد ربك عليها كمان .

الجامع المجاور لسكننا كل يومين صندل يسرقوني حتى لو افرقهن كل فرده في باب مادري كيف ?.
المهم
اليوم سرت الجامع حافي القدمين
قلت ما عيجلسوش كل يوم يسرقوني صندل..

شبحوني في الباب وقالوا:
ما دام بتجي حافي إذن أنت الذي بتشل الصنادل

مابش حظ هكه او هكه انا المظلوم?

اروح من الجامعة بعد 3 محاضرات والضمير الدراسي شغاال نقره ضغوطات اختبارات اشتي اوصل اذاكر.

اوصل ارتاح والقصد قيلوله للعصر؛ راحت عليا غفلووله ليين مغرب?‍♂?

وبعدا نوم العصر احلامه غريبة احيان تحلم انك فار تشل خزان ماء وشوية وقدك دكتور تبيع ديزل واصحى واتذكر اني طالب جامعي مزنوق ارجع اواصل احسن لي

نصيحة انا متاكد انكم ماتحتاجوها بس شاقولها لانهم يقولو من علّم شيء أتقنه

النصيحة :
لاتمزح مع احد لاتعرفه مهما كان الأمر
طبعاً المعرفة ليست معرفة اسم فقط إنما معرفة نفسية هذا الشخص أهم.

قولو انا رجمت بكلمة لواحد اعرفه شكلاً فقط وهذك الكلمة لو قيلت لي عااادي طبيعي وبعدين هو اتحسس منها قوي وخلاني شعرت بالندم كأني قتلته.

للناس ضروف لهم مزاجات مختلفه لهم منظور قاصر فلا تقس على منظورك تتصرف حسب مزاجك تحكم علي احد ضاهرياً
ودمتم بوِد.

يا اخي والله ان احنا شعب حبوب ومليء بالأجواء الباريسية في داخله

يعني الدنيا مطر هذه الأيام وسبحان الله مطر غزير وسيول ...!
تدخل الواتس تشوف الحالات وكلهم فلاسفة مالك عليا الطلاق انهم يطحسوا افلاطون ??

الذي يكتب "ربااااه ما بال السحاب"...!
والذي يكتب "إن الجرح في السحابة قوي"..!
والذي يكتب "ابكي ايته السماء على حالنا"...!
والذي يكتب "لا بأس يا سحابتي فكلنا مثقلين بالدموع"...!

ههههههههههههه
ذليتوا افكارنا عند الله وخلقه

يا اخي تحس ان هذا الشعب داخله مخرج هندي عسر ????
كمية الدراما الذي في الحالات اكثر من ال MBC دراما نفسها ...!

والذي يصور نفسه وهو في البدروم ولا في المطبخ وينشرها ويقول امطار خير وبركة، تمام مله ع الاقل خرج راسك من الطاقه.. ?

باقي يومين لو يستمروا هكذا عيخسف بنا الباري ويسلط علينا الجراد والقمل والضفادع ونعيش في جفاف لمدة ٧ سنين هههههه

اي واحد يشوف حالة من حق هولا الناس ينصحه لوجه الله ؛ اليوم دنيا وغدوة آخرة
ما عيبقى لك إلا العمل الصالح

ثاني أوكسيد الكربون بريء من الذي بيحصل لطبقة الاوزون لأنو محد بيفطرها ويوجع قلبها إلا هولا الناس ???

#مسروقات