#قصيدة#عقائدية **صلح الامام  الحسن ..
من وزن المجرشه
.

صلح الحسن ..
اول درس نفهم معانيه
صلح الحسن ..
منهج بنى الثوره الحُسينيه
من مايه يروينه.. بانت مضامينه.
بالغاضريه
ـــــــــــــــ ❁ ❁ ❁ ـــــــــــــــــ

خيمة حرب بيها الحسن
                 وبگلبه شبت ناره
كل جيشه صار اويه العدو
                  وتبعثرت انصاره
والد يزيد الطاغيه 
             بث بالحرب اخباره
يمنح جواري وي ذهب
                  للي غمد بتاره
.
اتخاذلوا ..
جيش الحسن رادوا يأسرونه
اتخاذلوا ..
وبلا حرب  للباغي ينطونه
داسو على عتابه .. وجنوده سلابه
وي آل اميه .. بالغاضريه

ــــــــــــــــ ❁ ❁ ❁ ـــــــــــــــ

دين الله يتنفس هظم
                 محد يريد ايعزه
چان الزمن اغبر زمن
                  بيه الزلم مهتزه
بي تفتخر صارت هند
             من مثلت بالحمزه
بس الحسن بيهم تقي
                والطاغيه يبتزه
.
دنية غدر..
عاش السبط والنايبه بداره
دنية غدر ..
لازم يجنب  منها انصاره
  يسعف جراحاته .. يدري بمعاناته
رب البريه .. بالغاضريه

.ـــــــــــــــــــ ❁ ❁ ❁ ـــــــــــــــــ

ريحانة الهادي صبر
         وبصبره محفوظ الدين
وتصالح ويه اهل الكفر
           كله لجل يوم حسين
لازم يغـربل أمـته
             منها يطلع الزينين
عشرين عام التربيه
            وللنصره طلعوا 70
.
المجتمع
راضي ويريد الباغي يحتله
المجتمع
كاشخ يشوفه بملبس الذله
من جوهر اسراره.. ايربي ثواره
لجل الرزيه .. بالغاضريه

ــــــــــــــ ❁ ❁ ❁ ـــــــــــــــــ

يفهمها شبل المصطفى
               كل الخطط مكشوفه
يدري الجنود ابحضرته
                     المنحره ملهوفه
ظلت قليله شيعته 
                  ولابد يعد لطفوفه
جان الصلح مهلة وكت
                  بيها يحد اسيوفه
.
لجل المحن
رايد رجال اتضمد آلآمه
لجل المحن
يكبر علي الاكبر وجسامه
عنده القتل عاده .. ويضحي بولاده
يوم المنيه.. بالغاضريه

ــــــــــــــــــ ❁ ❁ ❁ ـــــــــــــــــ

من هالصلح راد الحسن
                يحفظ  دماء الثُله
يدري الحسين ابثورته
                درب النصر يندله
تهتف دمائه ابكربله
                هيهات منه الذله
وتكمل اخته منهجه
          لو صعدت اعله التله
.
خل يتضح
هذا الامر والناطق ايذيعه
خل يتضح
هذا الصلح بي نصره للشيعه
بانت علاماته .. بالطف كراماته
نصر الابيه .. بالغاضريه

ـــــــــــــــــ ❁ ❁ ❁ ـــــــــــــــــ

المجتبى عاش بألم 
            بنفاسه ظلت شمه
عن حاله وصلو بالغدر
            جعده بديها اتسمه
يم جده رفضت يندفن
              ام الجمل وتذمه
تابوته صابوه بسهم 
           فاض الكريم ابدمه
.
ابو الفضل . 
سل سيفه راد ابضربه يمحيهم
ابو الفضل .
بالطـف حسـين ايگله نفـنيهم
ظل حابس آلآمه .. الطاعة ايّمامه
عنده قضيه ..  بالغاضريه

ــــــــــــــ ❁ ❁ ❁ ـــــــــــــــــ

حظر يزيد النينوى 
         سبعين الف أذنابه
وحسين بس 70 اله
          هذا عدد اصحابه
كل فارس نعد  بألف
           برزو ليوث الغابه
جيش آل اميه بكربله
         سحگو على انيابه
.
صلح الحسن
انشوفه بالنظره الولائيه
صلح  الحسن
من كل زمن خرج  فدائيه
هاي اول ابعاده .. صوت النصر ناده
ثار الزچيه .. بالغاضريه

ــــــــــــــــ ❁ ❁ ❁ ـــــــــــــــــ

حسن الموالي الفاطمي

٢٠١٩**

**.
الزهراء ..ومجالس العزاء.....تجليبه....

أنشــــد وادور كــل ارض
عــن دمــعة العـين
وين الگه مجلس بالحزن
يندب على حسين
.
مـا أبطـــل عـبــرتــي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
آنـه أم الغــريب الـمـحد أينـصــره
آنـه أم الشــــهيد  الهـشمو  صدره
آنـه أم التـــريب الـمـنــذبح نـحره
ظـامي ولاتروه مـن العـذب قطره
.
أنشـد على دمـوع الحزن
صــبـح ومســيه
وين الگه مهــظـــوم ويون
للـــغـاضــريــه
.
آنــه بلسم  علـــتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
تون أجــروحــي لـو راد العــزه يلتـم
أدخــل واجلـس آنــه بــآخـر الـمـأتـم
أون لحسيني واذرف  دمعتي من دم
والطــم عالــضـــلع  ياريـته يتهــشـم
.
ابني أنذبح فوگ التـرب
ظل صدره مخسوف
الف وســـبع مـية جرح
صلـن  بـالطــفــوف
.
من يطـــفي جمرتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
وي همس الدموع يظل خـيالي أيطوف
انـظــر چـــن خيــام وقــافله وطفوف
واشوفن چـن نحـور مـوذره وچـفوف
يويلي وچــن علـيـلي بالحبل مچتوف
.
انظر يتــامه بكـــل كتر
تتـلــفــت ادور
مرعـوبه موتــها الهظم
تعثـــر بالنحور
.
جرحي يـدوي بحسرتي
لبــني اذرف دمـعتي
...... آنه الزچـــيه .....
.
ـــــــــــــــــ ❁ ❁ ❁ ـــــــــــــــــ
.
صــوت النـاعي يتــرك بيه چم لـوعه
من يوصـف رقــيه ويـنـزف ادمــوعه
ابـــوها يـالحـزينه هشـــمو أضْــلوعه
مثلچ الها سطــره بخـــدها مطبـوعه
.
أربــع أصــابـع من زجر
شوفي اعله خدها
يالـزهره طاحت عالوجه
لـمــن جلـــــدهـــا
.
وي رقــيه غــربــتي   
لبــني اذرف دمـعتي
...... آنه الزچـــيه .....
.
.ـــــــــــــــــ ❁ ❁ ❁ ـــــــــــــــــ
.
أموت من البچي لو بالقصــــيده أسمع
شــمر ثنى اعله صدر اوليـدي يتــــربع
يويلي بســيفه بوداج الـوصي يگــطــع
أهيس روحي وي روح ابـني هم تطلع
.
للنـاعي اصـــيح آنه أعد
وأنـتــم تعيـــدون
لو عيني ذرفـت بالدمـع
لدموعي تبچــون
.
للأبــد يــاشيــعــتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
أطيح من البــواچي وأگطع الأنفاس
لو نـادى الـمنادي ذبحــــو العبــاس
اتـخيل مصابه وأخـــته بــين الناس
غريبه وتحدي بيــها زمرة الانجاس
.
عباس اظمه بدمـــعتي
وأنــدب يشيعه
ياريته نحري الـي انذبح
يم الشـــــريعه
.
للقـــيـامه ونـتـي
لبــني اذرف دمـعتي
...... آنه الزچـــيه .....
.
.
............

حسن الموالي الفاطمي**

#جديد  محرم ١٤٤٠
مجلس أم البنين ..
قصيدة متعددة الأوزان
آخر الهجري + ٤/٣الشيعتي +بحر طويل
..........         ...........        ............

أتأخرت  جيت  اعتذر 
يا فاطمه
گبرچ اعرفه الدمعتي
شابع ضمى
ودعت الحسين . لارض المنيه
هل دمعة  العين ..مابين أديه
يا فاطمه..
.
_
.
آنه ينبوع الدمع 
منحني مني الضلع
گلبي يا ويلي انشلع من ودعتهم
.
مشى حسين الكربله
بالحرم والعايله
كلفت بالقافله ولدي اربعتهم
.
ودعته واخذ  گلبي
جرت دمعاتي ملهوفه
حبيبچ راح يالزهره
بعد بعيوني ماشوفه
.
شفت الطفوف ابدمعته
وحافر فرس
وبريته وي كل نفس
رمح انغرس
بعيونه عبره..... يسمعني انعه
ظمني اعله صدره..چواني دمعه
يا فاطمه  
.
_
.
شفت گبرچ منفطر 
يعني گلبچ منقهر
جبت وي ماي الورد يالزهره دمعات
.
للعليله الفاگده
بالهظم متواعده
شبگت احسين وتون ونّ الحمامات
.
تقبله وتشهگ  ابصدره 
تستنشق عطر نحره
يتبسم  غده الها   
والذباح  ينتظره
.
وياك أخذني اتگله
يالوجهك دوه
بويه ابوداعك  آنه والميته  سوه
من الضعن سار   .  مدمعها لهاب
تتنطر اخبار  ...  وي الهوه الهاب
يا فاطمه    
.
_
.
بالفخر متگبعه 
عندي أولاد اربعه
قدمتهم آنه قربان الأمامه
.
يالزچيه ابكربله
يفتدون  العايله
ابو فاضل گلي أرسلچ علامه
.
  من أخواني يوم الطف 
بس الموت يرضيني
   علامة دمي يا يُمّه
سهم ماطلعه من عيني
.
لسه انتظر يافاطمه
وجرحي نعى
بهذا العمر سهم الهجر
اتجرعه
اعيوني متنام  ... بيهن تشب نار
من رشگ السهام. شنهي الجره وصار
يا فاطمه   
.

.
أنتي ياروح السمه 
جرحچ ايشوف الدمه
عينچ بلمح البصر توصل للطفوف
.
تأخروا  يالطاهره
شنهي بحسين  الجره
اعرف ابعين الولايه عينچ اتشوف
.
اذا گبرچ  نفضلي  اتراب 
و يعني خلصن أيامه
واذا  چواني ريح الهاب
  يعني النار بخيامه
.
گبرچ طفح بالمگبره
ينبع دمه
يعني ابو اليمه ضلوعه
امهدمه
ونّ الحزينات .... شمر اليسمعه
بخد اليتيمات ... طبعة إصبعه
يا فاطمه      
.

.
مرن أكثر من شهر 
اليوم اجه هذا الخبر
جيت اخبرچ عن حبيبچ يالوفيه

بي ابن حذلم  نعى 
والمدينه تسمعه
طاح ابو اليمه على الغبره رميه
.
اريد اندب على ايتامه
ادري الموت محتاطه
عبد الله  انذبح نحره 
اندفن  ياويلي بگماطه
.
نوح اليتامه ابكربله
دمعه وألم 
يالزهره عبد الله غفى
بنحره  السهم
بچفوف الحسين  . دم منحره ايسيل
وبجمرة  البين  .... ظل ينعى جبريل
       يا فاطمه        
.
__
.
آني جيتچ اعتذر 
ادري سرچ مستتر
العقيله انطتني عنچ كل الاسرار
.
بس تسمعين الدمع 
ينفتح جرح الضلع
يالحزينه  دمعتچ عالوجنه مدرار
.
راح انصب  مجالسکم
وريدن نضرة اعيونچ
شعر تکتبلچ ادموعي
وولادي  يخدمونچ
.
آنه احْمِد الباري انقبله
مني النذر
هاليله وي رمله ورباب
آنه افتخر
اولادي الابرار ... وفو  دموعي
بخيام الاحرار  طاحن ضلوعي
يا فاطمه         
.

.
حسن الموالي الفاطمي
٢٠١٨/٨/١١
.

ميمر تراثي..
.
هل بالسمه .. هلال الدمه
جايب احزان الفاطمه
لجل الهظم يفتح باب .. نقره الذبح بحروفه
.ـــــــــــــــــ ❁ ❁ ❁ ـــــــــــــــــ
هاللـيله يهلال الدمع  لاهـليت
ابشوفتك يكبر جرح اهل البيت
من السمه لاهل الطفوف اتعنيت
جايب خبر .. عن ياشهر
عن الظمى وگطع النحر
يجمعنه دمع السچاب .. اول ليله بضيوفه
.ـــــــــــــــــ ❁ ❁ ❁ ـــــــــــــــــ
وبثاني ليله تجـتمع دمعـتنه
لون السواد ايرفرف ابرايتنه
لجل الخـدامه فـاطمه ربتنه
من ينعلن .. شهر الحزن
هذا النعـى وذاك اليـون
يخنگنه كل ريح الهاب .. لمن نعيش اضروفه
.ـــــــــــــــــ ❁ ❁ ❁ ـــــــــــــــــ
ثـالث ليـله وي العليــله العبـره
ظلت وحيده ودرب ابوها اتنظره
ياشيعتي كسـر الگلب شيجبره
راحوا هلي .. وماظل الي
بس النـــوايح تعـتلي
تندب يادرب الاحباب.. لهلك آنه ملهوفه
.ـــــــــــــــــ ❁ ❁ ❁ ـــــــــــــــــ
رابـع ليـله لام البنـين النـبراس
ابكربله ضحت ابخمست حراس
اربع ولد ومحمد  ابن العباس
بالموزمه..لارض الدمه
أمه لُبابه اتقدمه
بالغيره جمره لهاب .. تشبه ابوه اطيوفه
.ـــــــــــــــــ ❁ ❁ ❁ ـــــــــــــــــ
خامس ليالي كربله محـــتاره
مسلم وحيد اتخاذلت انصاره
من انأسر ويلي انذبح بتــاره
وبغربته .. وبلوعته
طوعه الوحيده النصرته
موقفها ينطينه اجواب.. مخلص احوال الكوفه
.ـــــــــــــــــ ❁ ❁ ❁ ـــــــــــــــــ
سادس ليالي المـوزمه بيـها اخـبار
عن عابس وعن شوذب وعالانصار
كل نشمي بيهم لو برز چنه اعصار
شالو لوا .. ايشع ضوه
بي تتشح كل نينوى
كل خطوه الهم محراب.. بالتضحيه موصوفه
.ـــــــــــــــــ ❁ ❁ ❁ ـــــــــــــــــ
اسمك ياسـابع كـربله للـوفـاي
عباس ابو الغيره الكفيل الرواي
طر الزلم للمشرعه وجاب الماي
من حيدره .. هالمقدره
منه الجيوش امبعثره
ماتحصي كل الكتّاب .. مجمل ضحايه اسيوفه
.ـــــــــــــــــ ❁ ❁ ❁ ـــــــــــــــــ
وبثامن اجروح الشهر دم مسفوح
وبهلتـه گلـب الـزچـيه مـجـروح
بي تنعى جسام الشهيد المذبوح
ابمحنته .. اتعنته
الزهره بالدم حنته
بمصابه تنعى الغياب .. ام الحزن معروفه
.ـــــــــــــــــ ❁ ❁ ❁ ـــــــــــــــــ
ياتاسـع ايام الشـهر لا تــظهــر
بيك انهشم هاليله صدر الاكبر
بين العدى ياويلي جسمه اتوذر
جسمه بكتر .. دمه يدر
للعتره طاح اول بدر
متخضب ابدمه اخضاب. . ليلى وابنها اتشوفه
.ـــــــــــــــــ ❁ ❁ ❁ ـــــــــــــــــ
بالعاشـر اتخلص ليالي العـشره
وبطرته محـبوبي گطـعو نحره
دم الحسين اعله الترب يالزهره
وبكربله .. شبله انوله
اتذبحه نبلت حرمله
يالبضعه ويشم عطاب..حرگ الخيم بطفوفه
.
تمت ولله الحمد
لاتنسوني ووالدي من فضل دعائكم المبارك
#ذكرت بعض الروايات والسير.  ان للعباس ولد يسمى محمد استشهد في كربلاء .

حسن الموالي الفاطمي

من قصائد
2014
.

#تم تبديل #المستهل وتنقيح بعض المفردات

**...مجلس القاسم
الوزن..مجرشه...
.
.
هاك أخذ هذا العلگ شده بجبينك
هاك أخذ هذا الحرز خله ابيمينك
اسحگ ضلع للظلام
باچر حرب يجسام
.
.
طرالفجر عين الشمس
وكحه وييُمه اتخزرك
من كل كتر برض الحرب
گامت ييمه اتنظرك
گمت اسمع ۳۰ ألف
يتشاورون ابذكرك
طب ذو الفقار المرتضى
ياربي منه سترك
.
يا بطل جيش العده طشره اعله كيفك
يا بطل روس الزلم مشتهيه سيفك
انت النفل ماتنظام
باچر حرب يجسام
.
....................................................

ها يالولد من المهد
يوم المنايه انّطره
ما أرتوي بماي النهر
تعرفني بيمن اروه
ماي العذب عندي يظل
يايُمه ثار الزهره
اول طلب منك ردت
ثار الضلع والعصره
.
فاطمه الزهره الطهر يبني ولوهه
فاطمه برفس الظهر يُمه سبوهه
لا تنسى طبرة الهام
باچر حرب يجسام
.
.....................................................

گبر الزچيه المختفي
أحنه ييُمه انزوره
چنه نروح اويه الحسن
نشتم عطر بخوره
يقره ابوك المستهل
يا فاطمه المقهوره
ثارچ يظل للمنتظر
يمه ابوكت ظهوره
.
لازم ومطلب إلي ثار الزچيه
لازم ابسيفك تطب للغاضريه
تزرع برضها الاسهام
باچر حرب يجسام
.
...................................................

وسط الحرز قطرة دمه
تشرح الم ضلعهه
والشيله صارتلك علگ
يحچي بهظم دمعهه
أبن الصهاكه فاطمه
على الوجه صفعهه
رفس وعصر يوليدي
وبسن الرمح دفعهه
.
ذوله يُمه الهدّموا خدر الشريفه
ذوله يُمه همه أصحاب السقيفه
سمعني كسر العظام
باچر حرب يجسام
.
.....................................................

من المهد شابع حزن
شابع جرح بحساسك
متعلم انته عالحرب
يبني وسرت بنفاسك
ابمولدك أبو الفضل
يُمه ابجبينك باسك
شمرت ابوك المجتبى
لا ما تدنگ راسك
.
لو ألف فارس برز تكسر ظهرهم
حتى لو ٧٠ ألف بصبع تفرهم
داويلي جرح الأيام
باچر حرب يجسام
.
.....................................................
.
هذا اولاً ثار الطهر من
طلعتك اريده
او ثانياً ثار الاخوك
الاكبر اوريده
اوثالثاً رف رايتك
يا وارث الصميده
اورابعاً دگ ثايتك
مهيوبه بالعقيدة
.
خامساً لاهل الكساء اوركز ابهاي
خامساً لازم ترد وبجربتك ماي
تروي الحرم والايتام
باچر حرب يجسام
.
.....................................................
.

.
حسن الموالي الفاطمي
.

٢٠١٨/٧/٢١**

#نزله سريعه ليلة هلال محرم 1441
.
وجه السمه انراقب .
. بالمبصر الثاقب
شهر النوايب ينولد لو هل الهلال
.
ـــــــــــــــــ ❁ ❁ ❁ ـــــــــــــــــ
.
ياشهر حـزن الـولايه
والنوايح والبلاء
ننتظر مولد جروحك
بالهلال ابهالمساء
تشتعل بينه البطوله
ننتظر يوم العزاء
يهتف النبض ابدمانه
كربلاءٌ كربلاء
.
انرفرف الرايه ..
ونرتل الايه
ونواسي غربة فاطمه لو هل الهلال
.
ـــــــــــــــــ ❁ ❁ ❁ ـــــــــــــــــ
.
احنه شبان المجالس
عدنه ثار ومايضيع
يال ثارات الحسين
بعاشر الطف الفضيع
ياذنب انظر امامي
بحدوة الحافر صريع
تنسبي اخته وبناته
وينذبح طفله الرضيع
.
انطالب ابثاره ..
لابد نشن غاره
وي الامام المنتظر لو هل الهلال
.
ـــــــــــــــــ ❁ ❁ ❁ ـــــــــــــــــ
.
ثابتين اعله العقيده
والزمان شما يدور
ماتخوفنه المذابح
لا ولا سحگ الصدور
كل طفل من عدنه يولد
يگطع گماطه ويثور
بالمهد ويناغي امه
يال ثارات النحور
.
جمرة جرح بينه ..
يا هو اليلاوينه
ونسل سيوف الباشطه ..لو هل الهلال
.
ـــــــــــــــــ ❁ ❁ ❁ ـــــــــــــــــ
.
قاسميون ونضحي
ونقتحم ارض الحتوف
جاسم وبالحومه عرسه
وحنته گطع الچفوف
تزدهر وردة شبابه
من يشم عطر الطفوف
شفنه كل گطره بدمائه
ذبحت نحور السيوف
.
القاسم ويانه ..
ايرفرف الوانه
لدرس البطوله نستعد لو هل الهلال
.
ـــــــــــــــــ ❁ ❁ ❁ ـــــــــــــــــ
.
من علي الاكبر اخذنه
معنى بر الوالدين
ظل يرتل بالمنايه
لاحياة ابلا حسين
من رجع صوب المخيم
وجر بگلبه الحنين
رد يشم عطر الابوه
وقبل امه بالجبين
.
سل باشط الثوره ..
جيش العدو طره
نذكر مواقف صولته لو هل الهلال
.
ـــــــــــــــــ ❁ ❁ ❁ ـــــــــــــــــ
.
مو شهر ننطر وجوده
احنه بل عام الحياة
نشهگ انفاس البطوله
من مواقف خالدات
موقف البدر العشيره
من يذل نهر الفرات
لم يذق من مايه قطره
ورتوه بماي الوفاة
.
شهر النبي وآله ..
انراقب اهلاله
عام الشعائر ينوجد .. لو هل الهلال

.

حسن الموالي الفاطمي

2019

ريت . لا هليت. يهلال. السمه
من اشوفك انظر انحور ودمه
بالهظم گلبي انفطر
وانکسر مني الظهر
ريت لاهليت يهلال السمه
.--------------------------.
يلي تدري بگلبي دامي
وبهمومي امعفره
اشتظن لمن اشوفك
گلي شنهي اتذکره
آنه زينب الغريبه
واخوتي فوگ الثره
هذا ظامي ذاكه دامي
هذا ذبحو منحره
.
ماسلم منهم ولا واحد الي
والي ماتو کل اهلها تنولي
تمشي بدروب السبي
حتی لو جدها النبي
حتى لو امها الزچيه فاطمه
.
.
.
بس جمر ينزف وريدي
بعيني دمعه من دمه
من الزغر انظرلك آنه
ويّه أمي فاطمه
من يحل اول محرم
من تشوفك بالسمه
تگلي ياعظم المصيبه
من تظلي ابلا حمه
.
يهل ويشوفچ سبيه بالطفوف
ويلي وخيول العده بخدرچ تطوف
بلا حمايه ولا کفيل
بالهظم ليلچ طويل
عالحزن والهم ييمه معلمه
.
.
.
شفتك وشفت المواجع
دمعي يندب لا هله
بالحرب چن سيف اشوفك
بيك اخوتي امچتله
شفتك بيوم المصيبه
صرت قوس الحرمله
مصوب بنبله دليلي
وروحي لسه امعلعله
.
نبله منها طاح ابو الاکبر صريع
...نبله بيها منذبح نحر الرضيع
نبله. يم. المشرعه
بعين اخوي امگطعه
ظلت الاطفال کاتلها الظمی
.
.
.
وجهك المظوي تكدر
بالسمه اعيونك تنام
جمره من نار المخيم
حولت نورك ظلام
بالطفوف أنّظر گمرنه
ما أفل عن الامام
توضت ابنوره المنيه
قبلت نحره السهام
.
تغيب تظهر مايهم بيك الخليل
..الك ماينظر بعد شاف الكفيل
اگصد الجرف النهر
اشرب ايثار وسهر
درس غيره من ابو الغيره اتعلمه
.
.
.
بالعشر تيام عمرك
صار وجهك چن بدر
نورك الساطع جمعنه
للمشي بدرب اليسر
عالرمح عبدالله راسه
وانظر الجرف النهر
ماشفت منك بطوله
وينه مدك والجزر
.
السمه . زعلت لابن. حامي الحمه
دموع لجل اححسين تمطر من دمه
غيب . يهلال. الدمع
عدنه ما ظل كل ضلع
کلها طاحت عالتراب امهشمه.
.
.
لاتنسوني ووالدي من فضل دعائكم المبارك
.
.
حسن الموالي الفاطمي

#هلاليه جديدة محرم
قصيدة أستقبال ليالي محرم
........آخر الهجري + ربع الشيعتي....
.
..................المستهل ...... .
.
هل محرم بالدمه .
. ذابح اعيون السمه
شفنه دمعة فاطمه .. دمها مدرار
.
__ ١
.
أول أيامه دمع ..
لجله نلطم عالضلع
بالمواكب نجتمع .. عدنه تذكار
.
ثاني ليله القافله ..
وصلت الطف كربله
زينب اويه العايله .. تبدي تحتار
.
_ ٢
.
ثالث ايام الرِده ..
للعليله الفاگده
بالهظم متواعده .. وحشه بالدار
.
عالوجن دمها يهل ..
بالمواجع تبتهل
نجي ياربي الأهل.. من الأخطار
.
_ ٣ __
.
رابع أيامه نعى ..
البنين الاربعه
للعظيمه الخاشعه .. ام الاسرار
.
أعتلت عرش المجد ..
قدمت أربع ولد
أشهد الباري شهد .. عدها إيثار
.
__ ٤ _
.
خامس أيامه جرح ..
بي هظم ماينشرح
مسلم ابگلبه رمح .. من الاشرار
.
تسري بالخد دمعته ...
تخاذلوا عن بيعته
طوعه بس النصرته . والزمن جار
.
__ ٥ _
.
سادس أيامه اكتفه ..
ابذكر اهل الوفه
الولايه اتوصفه .. يوم الانصار
.
عابس وجون وحبيب ..
نافع وسيف وشبيب
وهب و الحُر النجيب . طلبوا الثار
.
_ ٦ _
.
سابع أيامه اكتمل ...
نزل عباس البطل
عالعده لمن حمل . كل فكر حار
.
طر ال ٣٠ ألف ..
سيف ابو فاضل خَسف
ذوالفقاره يختلف .. ضربته إعصار
.
_ ٧ __
.
جاسم الطف جنته .
. يوم ثامن حنته
أمه رادت زفته.. وي الاحرار
.
تاسع ايام الطفوف ..
بي علي الاكبر نشوف
سيفه حز نحر السيوف .. نجل الأطهار
.
٨
.
عدنه بالعاشر نحر ..
١٢ طبره انطبر
من السمه ينزل مطر .. دم الابرار
.
عضمه بالگاع انغرس ..
صدره ابو اليمه انرفس
نبل ورماح انترس.. تشوفه الزغار
.
__ ٩
.
الشمر حز منحره ..
اوسنان الطبره
بَجّدل الگص خنصره ... وذره اوذار
.
شطوله عمرك ياشهر ..
لا هله بذاك الخبر
بليلة الحادي عشر ... الضعن سار
.

حسن الموالي الفاطمي

يبن الزچيه الطاهره المعصـومه
.طفك ينادي اليوم جاسم يـومه
عمي يامـغــوار
خل اطلب الثار

.
وصاني ابوي المــجــــتبى بهذا اليوم
عمك يبويه حسـين لوظـــــل مهموم
يبني اهتف بيــوم الحرب بيــن الگوم
القاسم آنه ابــــن الـــزچي المعصوم

ثارات اطلب بويه للمهـظـومه
طفك ينادي اليوم جاسم يـومه
ما ظلو انصار
خـل اطلب الثار

.
اسنين اتاني ويــومي هــــــذا اتنــطر
ياعمي حــزني بگلــــبي دم تفــجــر
خــــل ابـــرز الطــــفك بعد مــا أگــدر
منــــك طلـــبت الرخــــصه لاتتــعــذر

ثارالحسن والچبــــدته وسمومه
طفك ينادي اليوم جاسم يـومه
علي غـده وذار .......خــــل اطلب الثار

.
جاوبني يبني مـــن اشمـــن عطــرك
چن الحسـن لوســال دم من حــــرك
جاوبته ياعـــم عمري فـدوه العـــمرك
وخلافي ادري الخيل تهشم صـــدرك
بشفافـك دموع الحزن
.طفك ينادي اليوم جاسم يـومه
بيمينــي بتار ........خــــل اطلب الثار

.
جاوبني رد يابو الشهامه وشـيــمــه
لاحگ على غـــدر الزمــــان وظيــمه
جاوبــــته زادو عمـــي بالـشــتــيمه
والسب وصل عماتي وسط الخـيــمه

شبلك نزف وضلوعه ها لمهشومه
.طفك ينادي اليوم جاسم يـومه
من هاي الاشرار .
خــــل اطلب الثار

.
جــاوبــني عـگبك امـــــك الحــزنـــانه
وانته الهه يبــني الچــبده والريحـــانه
گتله امي گــــالت يمـه عَـلـّيْ الـوانه
ارد اعلم جــيـوش العـــده منـــهو آنه

سالم ارد أمــي تظل منــدومه
طفك ينادي اليوم جاسم يـومه
خل دمــي تــذكار.
خــــل اطلب الثار

.

تمت بفضل الله ورحمته في يوم الخميس ٢٠/ شهر رمضان/١٤٣٣
٩/٨/٢٠١٢

حسن الموالي الفاطمي

#عندما وصل الامام زين العابدين عليه السلام بركب السبايا الى مشارف المدينة أرسل
#بشر #أبن #حذلم للمدينه وطلب منه أن ينعى الامام الحسين.
.
.

أبن حذلم
ينشد ابيات الشعر لاهل المدينه
أبن حذلم
حسين گلهم بالطفوف مگطعينه
.
عالرمح يندار .. راس ابو الاحرار
والعقيله تنادي ياجد انسبينه
ـــــــــــــــــ ❁ ❁ ❁ ـــــــــــــــــ

بالمدينه .. وبونينه
ابن حذلم بالشعر شد المشاعر
.
ايها الناس.. لطمو عالراس
بالنوايب سحگت حسين الحوافر
.
العقيله.. وي عليله
رجعوا ونزف الدمه أعمى النواظر
.
الارامل.. عالمحامل
معذبات وعالعبي تراب المقابر
.
هالنواعي
أمر من زين العباد استعجلتها
هالنواعي
قطره من فايض دموعه وصلتها
.
دمه ظل مدرار .. راس ابو الاحرار
والعقيله تنادي ياجد انسبينه
.
ـــــــــــــــــ ❁ ❁ ❁ ـــــــــــــــــ
.
بفيض الدموع.. ولطم الضلوع
نشدته الوادم على اخبار اليتامه
.
بذبح الحسين .. گلهم البين
طشراهم بالفلا بحرگت خيامه
.
واحد يصيح... وآخر يطيح
وآخر بسوط الشمر مصيوبه هامه
.
لمسلم اثنين .. اليتيمين
للركب مارجعوا أنه بالسلامه.
.
ياحميده..
من تسمعين الخبر أتمني موتچ
ياحميده..
للمدينه وسفه ما وصلوا اخوتچ
.
يطلب الهم ثار.. راس ابو الاحرار
والعقيله تنادي ياجد انسبينه
.
ـــــــــــــــــ ❁ ❁ ❁ ـــــــــــــــــ
.
دار الانظار.. لبيت الابرار
لمح عالباب العليله الفارگوها
.
روح الحسين.. ياضوه العين
شرد اخبرچ عن رقيه العذبوها
.
بهجمة الخيل.. وبيدت الحيل
ضبو بچفها الحبل من چتفوها
.
طفله متنام.. بخربة الشام
الطشت من جابو الها أشووفوها
.
خدها مصفوع
والمدامع تختصر قصة سبيها
خدها مصفوع
والورم من المتن واصل لديها
.
يدري بيها شصار ... راس ابو الاحرار
والعقيله تنادي ياجد انسبينه
.
ـــــــــــــــــ ❁ ❁ ❁ ـــــــــــــــــ

بحبس الانفاس.. التمت الناس
منه كلش قربت حره حزينه
.
شگد تقيه.. او نقيه
تگله يايُمه أرد انشدك أبني وينه
.
عن الحسين.. تنشد العين
يبن حذلم انگطع گلبي بونينه
.
عدد الها .. عن ولدها
گلها بالدم وفوا العترة نبينه
.
للميادين..
نعم ما ربيتي يالحره التقيه
للميادين..
ارتجاز اولادج بثار الزچيه
.
وبركبهم سار .. راس ابو الاحرار
والعقيله تنادي ياجد انسبينه
ـــــــــــــــــ ❁ ❁ ❁ ـــــــــــــــــ

ردت ردود. بجمر الخدود
ظلت تنشده الوفيه عن الحسين
.
گلها عباس.. عالزلم داس
وعينه صوبها النبل يم الميامين.
.
تگله وحسين.. بيا كتر وين
گلها عباس العمد طر رأسه نصين
.
گامت تنوح .. أم الجروح
گلها عباسج يحره بلايه چفين
.
وين الحسين
گلها طايح عالثره وگطعوا وريده
وين الحسين
گلها ضلعه ما سلم لاخنصر ايده
.
يجاوب الاسرار.. راس ابو الاحرار
والعقيله تنادي ياجد انسبينه
.
ـــــــــــــــــ ❁ ❁ ❁ ـــــــــــــــــ

يالتسألون .. اشتفهمون
ليش ابن حذلم نقل صوت الامامه
.
زين العباد.. هالامر راد
بالشعر راد اختصار الكل كلامه
.
المجالس.. تظل مدارس
باقيه وي كربله ليوم القيامة
.
ولي مجروح .. وياهم يروح
مايتركونه ويوفوله التزامه
.

عنده بيتين
من شعر بيهن نعى بذيج المسيه
عنده بيتين
بشر ابن حذلم غدى ناعي الزچيه
.
تسمى من انصار ... راس ابو الاحرار
والعقيله تنادي ياجد انسبينه
.
ـــــــــــــــــ ❁ ❁ ❁ ـــــــــــــــــ

تمت بجوار الجوادين عليها السلام
مستشفى الكاظمية

أسألكم الدعاء

حسن الموالي الفاطمي