ንገሯት
ሞቶልሻል በሏት በጥበቃ
ሳይተኛ እንደነቃ
ከበሩ ደጃፍ ትክል ብሎ
የስንቱን ግልምጫ ሁሉን ችሎ
አርፎልሻል በሏት ዛሬስ ሁሉን ጥሎ
አደራ ንገሯት
ግራ ብትጋባ ስሜ ቢጠፋትም
ማን ነበር ብትልም
ያስታወሰች እንደሆን.....
ሃበሻ ነችና ለቀብሬስ አትቀርም።

መጠኑ

እንደው ለመሆኑ
ውበትሽ ስንት ነው የአልኮል መጠኑ
ተንገዳገድኩልሽ!!
እንደው ለመሆኑ
ልኬቱ ስንት ነው የውበትሽ ስበት
ስንት ዜሮ አለበት?
ስንት ኒውተን?
ብቻ እሱን ትተን....
እንደው ለመሆኑ
ምን ብሎ ፈጠረሽ 
ሊያሳይብሽ ይሆን የጥበቡን ስፋት
ወይስ ለኔ ጥፋት
ሳይሽ ለምውለው
ባንቺ ለምምለው
ወይስ አፈሩን ለማንሳት ወርቅ እንቁ አነሳ
ወይስ ሰው መሆንሽን ሲፈጥርሽ ረሳ
እንደው ለመሆኑ
ስንት ነው መጠኑ

*ትዝብት

ትዝብት ነው ብቻ!!
ፎሎወር ስናሳድድ፣
ያንዱን ስራ ሌላው ሲንድ፣
ሚበላው ጠፍቶ ደሃ እያጣ፣
ዱቄት ተለቃልቀን ስንነጣ፣
ትዝብት ነው ብቻ!!
............
ሆድ ለባሰው ማጭድ አዋሽ፣
የወሬ ወንዝ የወሬ አዋሽ፣
ሰው ሰውነቱን ረሳነው፣
ስንከፍል ስንሸነሽን፣
በምላስ ጦር ስንረሽን፣
በዘር ወንፊት ስንጣለል፣
ስንወርድ ስንቃለል፣
ያልሞተውን ስንገለው፣
ሃቀኛውን ስናገለው።
ትዝብት ነው ብቻ!!
.......
ባህል ረስተን ያገር ወጉን፣
ስንረክስ ጥግ ጥጉን፣
ነገር ሴራ ስንጎነጉን፣
ስንጥስ ቃሉን ህጉን፣
ስንሳለቅ በደሃ እንባ፣
ሰው አንሶብን ከዘንባባ፣
እስኪ እግዜር ሆይ ጣልቃ ግባ።

ከደጅህ ርቀን ውሎዋችን እዛው ነው*😁

" መድህኔ"

ግቢ ከገባሁኝ
የቀረብኳት በጣም
ሁሌ ማገኛት
ስገባም ስወጣም
ሳላያት የማልውል
ስሟን ሳላነሳው
ጠረኗን ሳላሸት
ጣዕሟን ሳልቀምሰው
እጅግ ተናፋቂ
የአንጀቴ ማራሻ
እሷን ያጣሁኝ ቀን
አጣለሁ መድረሻ
ፈጥኖ ደራሽ ሁሌ
ሊገለኝ ሲቃጣ ጠኔ በኔ ብሶ
የረሃብ መድህኔ ሁሌም ለኔ በሶ።?

እስኪ የበሶ ወዳጆች?‍♂️?‍♂️

"ግርሻ"

ያኔ ተለያይተን
አይንህ ላፈር ብለሽ
አይንሽ ላፈር ብዬ
ኮብለሽ ኮብልዬ
ስንለያይ በጥል
ጉዞአችን ለየቅል
ከልቤ የፃፍኩት ፍቅርሽ ሲደበዝዝ
የአንቺ የሆነውን ስሰርዝ ስደልዝ
ታዲያ...
በአመታት እድሜ
ቢያገናኘን ግዜ ያለያየን መንገድ
በፅኑ መሰረት የተከልኩት ልቤ
ይል ጀመር ገድ ገድ
ከልቤ ያኖርሽው ጠባሳዬ ሽሮ
ዛሬም ተመኘሁሽ አንቺን እንደድሮ
ይኸው የፈራሁት በኔ ላይ ደረሰ
ከጅምሩ ይልቅ ግርሻው በኔ ባሰ።

"አለም ዘጠኝ"

አንዱ አለም ዘጠኝ ሌላው አለም አስር
ልክ አይደሉም ብዬ ጣቴንም አልቀስር
እኔ ግን ብናገር እድሉ ቢሰጠኝ
አልል አለም አስር አልል አለም ዘጠኝ
በእውነቱ....
እየኖርን ሳለን በራሳችን አለም
ከሁሉ ሚለየን ሰጥቶን ልዩ ቀለም
አልገባም ቆጠራ
ጣቴንም ድርደራ።
ይልቁንስ ስሙኝ....
አይደል አለም ዘጠኝ
አይደል አለም አስር
አለም በሰው ስፍር።

ውስጥ ውስጤን በልቶ
ቢያደርሰኝ ከሞት ጫፍ
ታሪክም ባልሰራ ታሪክ ሆኜ ልፃፍ
ሲቀረኝ አንድ ሐሙስ የቀናቶች እድሜ
ዛሬም አልተቋጨ የካች አምናው ህልሜ
ስንት ለሊት ያለምኩት
ሆዴ ልለምንሽ ሳሚኝና ልሙት።

ሰማሁ!
አንቺማ ሰምሮልሽ
በአነባሁት እንባ መስኖ ጀምረሻል
እኔ ዳስ የለኝም ጎጆ ቀልሰሻል
ይባሱንም ብሎ ሁለት አድርሰሻል
ይመስገነው ላንቺ
ይመስገነው ለኔም
ባጣሽ ከህይወቴ
አንብቼ አንብቼ
ቆረጠልኝና ሆኖልኝ ምኞቴ
ማሰብ ጀምሬያለሁ
እውላለሁ ሰላም
ይከፋሻል ብዬ እንደ ድሮ አልሰጋም
አንቺን ለማስደሰት ሌት ተቀን አልተጋም
የት ገባች የት ወጣች ትቻለሁኝ ከቶ
ፍቅርሽም ኮብልሏል ቤቴን እኔን ትቶ
ታዲያ ምን ይሳነው!
አምላክ ይመስገና
አንቺም ባለሽበት 
እኔም ባለሁበት እንኑር  በደህና።

እኔን ብሎ ገጣሚ!!
ይኸው ትላንትና
ባነሳው ብእሬን
ላነሳት እምዬን
ላወሳት ሃገሬን
ከቃል ባህር ውዬ
ስንኞች ልጨልፍ
ቀኑን ሳሰፈስፍ
ሀ አልኩኝ
ኢትዮጵያዬ አልኩኝ
ሞነጨርኩ ጀመርኩት
ታዲያ ምን ያረጋል
በሃገር ጀምሬ በስምሽ ጨረስኩት።